El efeuto Foehn (u Föhn) ye una cosa que yo m'acuerdo de biyer-la en el Instituto cuan yere pro chobeñón. Ye una d'ixas cosas que, sin saber per qué, se te quedan grabatas en la memoria e t'en acuerdas ya pa tota la bida u dica que l'alemán íxe (¿cómo se deziba? a, sí, Alzheimer) te la faya olbidar.
Bueno, pos como mutos de busaltros sabrez, ixe efeuto atmosferico consiste en que las boiras, e per tanto las prezipitazions, se quedan agarrapinchatas en la besán norte -en este caso d'es Pirineus- mientres que ta la cara sur només pasa un aire ixuto que d'ibierno chela. E ixas boiras que pareixen arrozegar-se per las montañas enta abaixo e que aquí se denominan "la gabacha".
Bien, pos ixo que yo biyé en Zienzias naturals en BUP e que es güelos d'aquí saben per propia experienzia, pareix que es metereologos no'l conoixen, e les ne quiero esplicar perque dimpués de tota la Semana Santa amenazando con nieu (ixas nebadas iban a prenzipiar el chuebes di nuet) e ye esta nuet ye cuan ha prenzipiato a nebar; qué casualidat, cuan s'ha aturato l'aire de puerto...
Ye clar que en Nabarra, el País basco u en zonas ubiertas ta'l norte como la Valh d'Arán, las boiras no se troben el impedimento de las montañas altas que i hai en el Pirineu zentral, pero a'l menos en Sobrarbe e Ribagorza (no sé qué fará en es Pirineus catalans, pero la Tramontana ye el mismo que el nuestro puerto), cuan i hai aire d'el norte no caye una lerma de nieu, pero ni un sacre, se acaso bel·la bolisma que l'aire traye de Franzia.
Siñors metereologos, cuan bienga bel·la borrasca de norte, tiengan en cuenta este fenomeno -per altra parte repetito per tot arreu- perque se yo fues osteler e m'anulasen abitazions per culpa suya, les denunziarí.
Entradas
Tens tota la raó. Aquí a Andorra passa igual, tota la setmana anunciant neu i no ha nevat fins la nit passada. Li haurem de donar la culpa al fogony.
ResponderEliminarI hai un nombre en aragonés de la zona oczidental que a'l buestro fogony le diz fagüeño (d'el latín FAVONIU). Pero ye que toz es ibiernos pasa el mismo, no fan so que meter la estrel·la de la nieu e dimpués res, ni plebe ni nieba, a bufar el puerto. Me pienso que abrían a parar més cuenta, perque ixo d'el que charro no pasa sólo a Sobrarbe (que sería un microclima), se no que pasa en tot el Pirineu zentral e oriental.
ResponderEliminarYo tamién estudié ixo y cal dezir que s'entiende millor con a foto que has meso que no con o texto y as definizions que meteban en os libros.
ResponderEliminar