jueves, 31 de marzo de 2016

Mondoto

Encara que se pareixca a l'anterior (de feto, etimolochicament comparten un formant oto < ALTU), ye un tozal de 1957 que queda dencima d'el Canyón d'Anyisclo e que tiene buenas vistas enta Sestrals, Tres Marías e Treserols.
El domingo de tardes feba buena pinta: boiras e despasato enta l'oeste, con una miqueta de viento e boiras agarratas. Asinas que a prebar suerte, que la suerte sonríe a qui la mira. Marcha enta Nerín e puya ta Mondoto. A's 1700 nieu farta d'augua, e yo sin raquetas, cagüen. Bien se vale que i heba tranya, perque ye una montanyeta con 600 metros de desnibel (pa yo tozal, pero bueno, con una envista estupenda) muit adsequible e i puya muta chent.
Total que i arribo e bien se vale que siempre llevo ropa de sobras, perque i feba frío e a esperar a veyer se i heba luces. No fue el que esperabe, pero bueno, millor ixo que estar veyendo el fútbol.
Las fotos:
 I heba ratos que quasi no se veyeban las puntas per las boiras:
 Las Tres Marías u Zucas e O Zucón:
 Sestrals:
 Enta l'oeste. No sé qué pico ye ixe punchuto, se bel·laún me0l puede decir... agradeixito:
 E la foto que querebe, pero con millors luces (tot e que no me'n queixo, que podría haber estato pior). Abaixo a la dreta se i veye la Fuent Blanca d'Anyisclo.



lunes, 28 de marzo de 2016

Comodoto

Prencipié las vacacions de Semana Santa con muta rasmia e fendo un d'es míos "clasicos" u, como piensan es de demés: t'án conyo vas a ixas horas?. Que no ye altro que puyar ta Comodoto a veyer l'amaneixer sobre Treserols. La verdat ye que con luna plena  se i va muit bie, pero me falloren las previsions horarias (normal, en vispras de cambiar la hora) e quasi no i arribo. Habié de parar uns metros antes, en la cresteta cimera, perque ya se meteban las luces.
Total, que perdemés, perque fue un amaneixer d'ixes hautos, quasi sin una boira en el ciel. Pero ya que ib'yere...
Cresteta de Comodoto:
 Sale el sol:
 Fulsa, Suelsa e, creigo, Lardana:
 Un manguant que yera per astí:
Per cierto, que feba tanto aire que se me'n fue un guant volando. Se nunca en trobatz un negro North Face en un radio d'uns 50 km., que sepiatz que ye mío :-).

martes, 22 de marzo de 2016

Primavera

U ixo dicen. El sabado tocó sobo per la montanya e el domingo yera el día d'ir con es cadiellos a fer una cursa con raquetas.
Pero como yo no soi de dormir guaire, quan me desperté a las 6 yera nevando con alma uns copizos como boinas. A'l rato se'n deixó e veyé que podeba haber posibilidatz de que s'ubrís un fratet per l'este e, talment, buenas luces. Asinas que como ya no me vagaba d'arribar ta guaires puestos per las horas, la opción yera Pineta. I puyé con la intención d'arribar dica el cul de Pineta e veyer qué posibilidatz tenebe. Pero ixe ye un puesto an que las boiras se i quedan e no ye fácil que marchen. Asinas que quan veyié que yera difícil que se veyesen es picos, decidié de tornar-me-ne enta la presa e esperar. A la fin no i habió luces, pero sí que i heba un ambientazo hibernal que no marcaba precisament primavera, encara que dimpués salió el sol e fayó buen día.
En fin, tos deixo con las fotos d'hibernalia.







lunes, 21 de marzo de 2016

Torno ta la montanya

Perque pa yo l'esquí alpino, encara que precise nieu, no ye un deporte de montanya, tanta chent, e ixo de puyar sentato... No ye pa yo. Encara que ya he de llevar-ie a's críos, aprofito e esquío. A veyer se depuro un amiqueta més la mía tecnica bizarra e miro de fer equí de travesía, que ixo cuento que irá més con yo.
Pero bueno, que me'n voi d'el tema. Per fin este cabo de semana hge puesto salir un ratet, sobre tot a recuperar sensacions perditas. El sabado me'n puyé ta l'Ibón de Plan per lo camín d'el barranco, e me fotié un buen sobo. Primero perque feba quasi un mes que no caminabe e la forma se va perdendo, e segundo perque habié de fer tranya dende e ixo cansa més encara.
Las conidicions no yeran las ideals pa la fotografía: nuble, nevando, aire... eme'n torné con las mans quasi vacías. pero rai, la cosa yera salir, las fotos ya llegarán (u, a'l menos, ixo espero). Bel·la preba documental:


 E un golagután que me sigue per totz es cabos con un gore-tex narancha :-O


martes, 15 de marzo de 2016

Demasiato tiempo

Llevo tanto tiempo sin salir, que pareixco un onso zarrato. A veyer se este cabo de semana e, més que més, Semana Santa, me puedo resarcir de tanto tiempo sin ir ta la montanya.
No m'he puesto escapar soque un tarde, e ixo son estatas estas semanas ta zaga quan habrí puesto fer fotos hibernals, de nieu e chel.Pero la vida ye como ye (life is hit and miss) e no he puesto fer altra cosa.
Fotos de l'atardeixer sobre el Macizo de Cotiella, las unicas fotos en quasi un mes :-(