lunes, 31 de marzo de 2008

Tornamos... ¿quí sabe per cuánto tiempo?

El mío cado, con el carnuz abaixo a la dreta
Pos ixo, que güe a'l enchegar el ordenador pa meter-me a troballar ba el fillo de **** e me diz que se coneuta a Internet. Dimpués de tres días trencando-me la capeza de qué coño le pasaba a'l traste este, dimpués de foter-me el sabado de maitins charrando con un siñor de telefonica pa mirar d'apañar-lo e deduzir que el problema el tenebe yo meso en l'ordenador (la tarcheta de no se qué ostias), dimpués de cagar-me en toz es santos que almuerzan e en es que no son santos se no superiors... Güe marcha.

Ya beremos cuánto aguanta, pero mientres aguante, caldrá aprofitar-lo, e se no cremaré la torre.

Tan e mientres el mío portátil contina el suyo periplo per Uesca, a beyer se a'l menos puedo salbar el disco dur, que ademés de tot el troballo que i tiengo meso (aora ya iré fendo copias de seguridat, cuan m'he bisto la crapa roya), el que més me pena son totas las fotas de la mía filleta que ibi'eran. Cruzemos es dedos pa que el disco dur tienga soluzión.

miércoles, 26 de marzo de 2008

La Grota


Ayer me'n puyé ta Pineta per se cayeba liz, e como no'n biyé garra, m'azerqué ta la Grota, que ye el zaguer churro que fa el barranco Lalarri antes de chuntar-se con el Zinca, que per zierto, encara baixa ixuto.

Ye un puesto majismo, con una gorga bien pincha, pero que no se puede aprofitar pa'l baño perque ya ye parque, conque no queda so que mirar-se-lo. Cuan baixe el mayenco será més espectacular encara.

No tardará guaire a prenzipiar a cayer liz, pero mientres tanto caldrá aguardar una miqueta, e ixo que ayer la nieu se desfeba de camín. Encara que pa güe tornan a dar nieu, pareix que ba a benir la calor e alabez tornaré a ir-ie pa fer fotos.

martes, 25 de marzo de 2008

El puerto la Lera


"Nabatiando" per pachinas web de fotografía -quiero aprender a trastiar bien con l'aparato "d'arretratar" nuebo e dimpués con el photoshop, que se puede fer cosas que son la ostia- yere fendo-le una gollata a'l archibo d'el ordenador de sobremesa, perque el portátil el tiengo out per el momento, e espero que tienga soluzión...

Bueno, pos a'l que ibe, que he bisto esta foto que no m'acordabe d'era e m'ha pareixito maja pa meter-la aquí (e no pas en garra blog d'íxes de fotografos, que he bisto fotos pa cagar-se). Ye feta dende el Puerto la Lera, un d'es piors camins que he feto en·n'a mía bida, e que se puede biyer fendo una diagonal a la izquierda e enta abaixo, per la lera, que per ixo se diz ansinas el puerto.
Ya sabrez que puyar per una lera ye ir un paso entadebán e dos entazaga, pues en este le'n puez meter un més entazaga.
Fa güega con Franzia, e enta part t'allá no i hai buena ambista, pero enta part d'aquí no me direz que no mereix la pena. El día que fayé la foto no me quedó altra que almorzar correndo e medio chitato dezaga un paretón perque bufaba un aire dende "la France" que chelaba, fer la foto e tornar-me-ne a baixar uns 1.200 m. (debe d'estar sobre es 2.500 m, e salié caminando dende es 1.300 se fa u no fa).
Pero bueno, mereixió la pena, e cuan sepa cómo atrapaziar millor la foto... pues més encara.
Que tos faya goyo
P. S.: en la foto d'abaixo se puede intuyir el Puerto la Lera a la dreta d'el pico Felqueral, u sía, el pico de la dreta.

lunes, 24 de marzo de 2008

Efeuto Foehn


El efeuto Foehn (u Föhn) ye una cosa que yo m'acuerdo de biyer-la en el Instituto cuan yere pro chobeñón. Ye una d'ixas cosas que, sin saber per qué, se te quedan grabatas en la memoria e t'en acuerdas ya pa tota la bida u dica que l'alemán íxe (¿cómo se deziba? a, sí, Alzheimer) te la faya olbidar.

Bueno, pos como mutos de busaltros sabrez, ixe efeuto atmosferico consiste en que las boiras, e per tanto las prezipitazions, se quedan agarrapinchatas en la besán norte -en este caso d'es Pirineus- mientres que ta la cara sur només pasa un aire ixuto que d'ibierno chela. E ixas boiras que pareixen arrozegar-se per las montañas enta abaixo e que aquí se denominan "la gabacha".

Bien, pos ixo que yo biyé en Zienzias naturals en BUP e que es güelos d'aquí saben per propia experienzia, pareix que es metereologos no'l conoixen, e les ne quiero esplicar perque dimpués de tota la Semana Santa amenazando con nieu (ixas nebadas iban a prenzipiar el chuebes di nuet) e ye esta nuet ye cuan ha prenzipiato a nebar; qué casualidat, cuan s'ha aturato l'aire de puerto...

Ye clar que en Nabarra, el País basco u en zonas ubiertas ta'l norte como la Valh d'Arán, las boiras no se troben el impedimento de las montañas altas que i hai en el Pirineu zentral, pero a'l menos en Sobrarbe e Ribagorza (no sé qué fará en es Pirineus catalans, pero la Tramontana ye el mismo que el nuestro puerto), cuan i hai aire d'el norte no caye una lerma de nieu, pero ni un sacre, se acaso bel·la bolisma que l'aire traye de Franzia.

Siñors metereologos, cuan bienga bel·la borrasca de norte, tiengan en cuenta este fenomeno -per altra parte repetito per tot arreu- perque se yo fues osteler e m'anulasen abitazions per culpa suya, les denunziarí.

jueves, 20 de marzo de 2008

Güe ba de fotos





























Pos ixo... poca letra e cuantas fotos.
De tardes soi baixato ta L'Aínsa a fer cualque compra e, per fin, me he baixato la camara de fotos u "d'arretratar", que diría bel güelo.
Que tos fayan goyo.
P. S. Como soi un poquet zapo pa esto d'es ordenadors, només dezir que las fotos abrían d'ir en sentito imberso.

















miércoles, 19 de marzo de 2008

Flor de nieu


Como la parola d'un ye el que bale, aquí ba la foto de la flor de nieu que le prometié a Onset. Ye per fer cualque cosa, perque güe no tiengo mica gana d'escribir. Pa estar el día d'el pai la filla m'ha feto un regalo pistonuto, calentura e dar guerra tota la tarde, ya beremos cómo ba la nuet.
Ayer, que sí que tenebe ganas d'escribir, me fayé una coseta bien maja sobre toponimia chesa, pero no me deixó puyar-lo sin minchar-se-ne la mitá. Como yera con etimolochías e tot el copón no tiengo branca ganas de repetir-lo, cualsequier altro día el tornaré a fer. Ayere tamién, talmén estió problema d'el serbidor u baya-se-ne busté a saber, querié fer un comentario en·n'o blog d'Onset, pero (cosas d'el mundo birtual) dimpués no i amaneixeba.
Ale, que pasez buenas bacanzas e que nos / tos caiga la nieu chusta per toz es nuestros Perineus.

lunes, 17 de marzo de 2008

Liz


Encara que den mal orache pa estes días que bienen, la calor que ha feto estes días ta zaga fa que las liz baixen per las canals, como se bei en esta foto (que no ye d'estiaño).

Lit -en plural liz, encara que bel·la bez se forma un doble plural "lizes"- ye una parola bien maja e sonora, que sirbe tanto pa la nieu que caye de la montaña como pa la que caye d'es tellaus dimpués de nebar. Me miro el Diccionari etimològic d'el mayestro Corominas e leigo que el suyo orichen pareix estar en un tipoiberico u iberoide *LUTE / LITE / LITU, e que el nuestro lit ye chirmán d'el gascón lit o lits, d'el castellano alud (ixo ya el sabebe), d'el basco roncalés lito, d'el basco suletino lütho, d'el dolomitico alpino luda. En catalán ye replegata la forma llido e el més rezién ido. Ya nos dirá bel amigo de Blocaires cómo se diz en el catalán pirinenco.
Cuántas bezes no nos sentiremos: "para cuenta que te cairá la lit", e qué marcha lleban cuantos pobroz coches cuan imprudenmén el deixas aparcato debaixo es tellaus. Tamién tienen mala folla ixes dos tellaus que enfilan enta la misma carrera, que has a ir preto ta la paret u mirando entalto pa mirar que no te fotan bel paquetazo nieu en la capeza, e el que ye pior, que se te meta nieu per el cuello enta abaixo. Ya iremos mirando estes días l'orache pa parar cuenta con las liz d'es tellaus. E cuan faya buen caldrá puyar ta Pineta u ta Barrosa (en la Fratata) pa biyer cayer la nieu per las canals.

jueves, 13 de marzo de 2008

Zueco de Benus



A esta polida orquidea le queda tres meses, se fa u no fa, pa tornar a deleitar-nos con la suya florazión, a'l menos a las que son abaixo, que las que creixen per la montaña les cuesta més de salir. Estiaño encara tiengo més ganas de biyer-la, pa fer-le fotos con la camara nueba, ya que ésta la fayé con la compacta e quiero fer-le-ne con la réflex.
En Pineta en sale en tres puestos, que yo conoixca e que no boi a zitar, e en pocos lugars més d'el Pirineu aragonés, a la Bal de Tena, diz que per la montaña de Tella (yo no la he bista per astí) e no sé se en garra puesto més. No conoixco el nombre en belsetán, e ademés no cuento que en tienga perque ya sabrez que las flors que no tienen garra utilidat no gosan tener-ne, de nombre. El nombre zientifico me pareix que ye Cipripedium calceolus, e ixe de Zueco de Benus el biyé en un cartel de flors que fayoren en el Biello Aragón; en castellano se diz Zapatito de Dama, que tampoco no pareix una denominazión guaire popular, pero bes-te-ne a saber. Ya nos dirán es amigos de blocairesdel pirineu.com que parlan catalán cómo se diz en ixa luenga chirmana.
Ye una planta, a'l menos a la Peninsula Iberica, en periglo d'extinzión e la "rezeta" se te pillan con cualsequier troz de la planta ye de 3.000 eurazos. Pero, ¿quí sería el matután que en rancás? No pas yo -ni tampoco las bacas, que paixentan a'l canto e ni an se las miran-, perque m'estimo més de fer-le fotos

miércoles, 12 de marzo de 2008

El pico Felqueral


Talmén bel·laún de busaltros ya el conoixca, pero el de la dreta ye el pico que da nombre a este blog, el Felqueral. Como ya podrez contar, astí no i creix garra felquera, se no que el nombre le biene d'una zona més t'abaixo an que se'n cría a embute. El que i hai a man izquierda ye el Garrién u Garién, que con es mapas se ban cambeando es nombres a las cuatre suelas, e a la toponimia la tratan a baqueta. Per no charrar d'el tan emplegato "El Humo de Muro" en puesto d'el autoctono O Lumo (LUMBU) Muro.
E ixo que nusaltros no somos a'l canto Nabarra como es pobres chesos e ansotanos, que se no berinos escrito Txisagüés. Ya tenemos pro con sentir per cada berano a milars de turistas catalans dezindo que aón ye La Pineta u La Pineda, u sentir a chen charrando per el móbil en·n'o parquin de Pineta dezindo que son a'l Perdido (la tuca de las Treserols u Tres Erodes), sin parar cuenta que encara les queda 2.000 m. t'alto, e i hai buen puyatón, que ixo puya a cuchillo.

lunes, 10 de marzo de 2008

Luengas pirenaicas (chicota reflexión)


Como cuento que ya debez d'estar fartos de sentir charrar d'eleczions e d'el Chikilicuatre, me'n foto en fer garra comentario sobre estes temas, que ya i hai cuantos foros e pachinas web an que poder parlar-ne se se quiere dica la saziedat, perque güe soi baixato ta Uesca e en totas las emisoras que ibe sintonizando u charraban de la una u de l'altra.
Ye bien pincho el Semontano aora, el trigo prenzipiando a medrar e dando una coloreta berde que pocas bezes se i bei, almendreras en flor, plebia, l'ambista de la Sierra Guara... Ixo m'ha feto pensar en que en no guaire tiempo per astí abaixo ya prenzipiará a floreixer l'allaga, e ya se sabe: "Cuan l'allaga floreix, la fambre creix, e cuan bachoca pa toz en toca". Comparaz este refrán con este altro gascón que replegó Coromines (DECat, I, p. 559): "qoan era escóba florís, er'hame pet país,/ qoan bajòque / alavets hi toque, / qoan hè'ra trictric, / tant n'ha't praube com et ric".
Ye curioso cómo se pareixen las luengas pirenaicas, e no només en l'aspeuto u en la sintaxis de la luenga, se no en la perzepzión d'el medio e en es refrans tan pareixitos que tienen, soi segur que en catalán en debe d'aber bel·laún pareixito.

E encara que no tienga cosa a beyer, tos deixo esta foto d'altro azirón.

jueves, 6 de marzo de 2008

Mui mala notizia

Iñaki ye el de la izquierda, con forro azul
M'han gritato aora mismo pa dezir-me que güe han trobato el cuerpo d'el montañer basco afincato en Sarabillo Iñaki Cabo. Faltaba dende feba uns días e l'altro día un amigo suyo denunzió la suya desapareixión. Teneba la furgoneta zerca d'el Ibón de Plan u Basa la Mora e estoi que dende ayer eban prenzipiato la busca, ya podez contar con qué conzions.

Iñaki llebaba cuantos años bibindo en Sobrarbe, esperto escalador de chel e guía de montaña, publicó abe uns años la Guía de Escalada en Hielo de la balle Bielsa, que la presentó chunto a yo cuan fayemos con Barré el libro d'el belsetán.

In memoriam, Iñaki.
http://www.diariodelaltoaragon.es/noticias/detalle.php?id=271360

miércoles, 5 de marzo de 2008

Blocaires del Pirineu


Grazias a un enlaze d'el blog d'Onset he trobato Blocaires del Pirineu, e, ¡qué querez que tos diga!, no he dudato mica en apuntar-me-ie. Me pareix una iniziatiba intresán, chen que bibimos a's Perineus e que femos blocs. La mayoría son en catalán (jo no tinc cap problema, potser que en tinguin ells per a entendre el meu catalá si mai parlem, perquè fa molt de temps que no ho parlo i se m'ha oblidat molt) perque la mayoría de la chen son de Catalunya, pero ya i somos dos es que escribimos en aragonés, Onset e un serbidor. Ya sabez, se bel·laún d'es que bibiz per estas montañas tenez un blog e querez partizipar-ie, besitaz el enlaz que i hai en esta misma pachina. T'alto el Perineu / Visca el Pirineu

Espierba


Güe contina nebando, ¡pa una bez que enziertan es d'el INM cal dezir-lo! Ye nebando contino dende ayer, encara que de nuet cayeba més bien matacrapitos, ya sabez, ixa nieu chelata en boletas chiquilinas. En es puestos an que no pega l'aire debe d'aber uns 15 zm., pero i hai uns bolturnos que chelan e fan bolar la nieu. Cuento que, como aquí bufa el puerto, de par ta Franzia debe d'estar cayendo un buen paquetazo. Se maitín sale millor e no ye mal la carretera igual me'n puyo ta Pineta a biyer cuánta n'ha caito.
Como güe no ye día pa ir a fer fotos ta garra cabo, e pa fer-las dende la bentana casa no mereix la pena, tos meto una foto de la ilesia d'Espierba dimpués que nebás a metá d'abiento. ¿Que no pareix d'es Alpes?

martes, 4 de marzo de 2008

Nieu


Només como curiosidá, ye nebando. Pareixeba, dimpués d'este fin de semana primaberal, que no tornaría el ibierno, pero aquí el tiengo trucando en la puerta casa. La foto ye una puta mierda, pero he trigato ixa chaminera que beigo dende la bentana la cozina pa que i es buen contraste, que se no no se biyeba la nieu. A ratos nieba més e altros poqueta cosa, pero ye prenzipiando a plegar e ya beremos se se queda en una zinarrata u nos fote un paquetón (que no cuento perque bufa un poquet de puerto). La putada ye que de tardes abrí a baixar ta Uesca, e se i hai nieu per la carretera no podré ir-ie. ¡Qué le imos a fer!

O Puen d'as Crabas


Este idilico cado ye entre Escartín e Basarán, en o Barranco d'A Glera. Cuenta José María Satué (en es libros ¿Qué feban dinantes en un lugar d'o cobalto d'Aragón? e Alredor d'a chaminera) que astí i eba un losizo que permitiba cruzar el barranco, pero que se'l llebó un tamborinazo d'augua (no me'l quiero ni imaginar cómo debeba de baixar). I hai cuantas formas d'arribar-ie, pero yo tos boi a dezir las dos que he feto yo. Las dos son salindo dende Bergua (t'an que se i arriba per una pista que sale de Fiscal e que ye bien pa toz es coches, ixo sí ye mui pazina e cal parar cuenta d'ibierno). Dende este lugar sale un camín que ba enta Forcos (que ye el mismo barranco d'el Puen d'as Crabas, ya sabrez que per aquí cada troz de barranco tiene un nombre) e que cruzaremos per unas palangas de fierro. Dimpués iremos remontando el río dica que i hai un esbarre, el de la dreta lleba enta Escartín en puyata pasando per un caixicar mui majo, e el de la izquierda sigue se fa u no fa paralelo a'l río un buen rato dica que arribemos ta un poste de PR's que nos endrezará a la izquierda enta Basarán. Seguiremos esta camín pero cal parar cuenta perque sale un caminet que lleba enta uns gortez (pro que abandonatos) e per astí cal mirar el millor puesto pa admirar el Puen d'as Crabas. Se emos dezidito de puyar ta Escartín (un lugar que debió d'estar mui majo, pero que ye esboldrengado-se como cuasi toz es de Sobrepuerto), abremos a ir enta las bordas -u buerdas que se deziba en Sobrepuerto- de la parte baixa d'el lugar pa pillar el camín enta Basarán en un fuerte baixatón. En ixe camín podremos biyer un biello molín con una muela en·n'a paret que yo no sé cómo farían pa puyar-la. Baixín-baixán arribaremos ta ixe cartel d'antes e caldrá mirar ixe caminet que tos dezibe.

Se tenez oportunidá no deixez d'ir-ie, que mereix la pena. E se baixaz dende Escartín pensaz en que teneban que baixar ta ixes güertos a pillar bel·la col u ensalada e el que camín de tornata que les esperaba.

lunes, 3 de marzo de 2008

Treserols


Ayer que feba un día buenismo -güe pareix, ixo dizen, que torna el frío- aprofitemos pa fer una cursa per el Cornato con la nin·na pa que le das l'aire. Buena temperatura, gota d'aire e un ziel azul que feba goyo de biyer-lo. A'l canto la presa fayé esta foto de Treserols u Tres Erodes que dizen en Espierba. Se m'ha cremato una miqueta la nieu, pero ye que fer fotos con la nin·na pinchata de la espalda en·n'a mochila ye pa no perder guaire tiempo medindo luzes. Ademés ye la foto an que més quieta yera l'augua e millor se refleixan las montañas.

Astí la tenez

domingo, 2 de marzo de 2008

Flor de Lis en el Felqueral


Ademés de berdá, que esta foto ye feta en el Felqueral(que tamién se siente bel·la bez como Felcaral, ya biyez qué cosas tienen las bocales atonas), como bien inican las felqueras que i hai dezaga. Ye una flor majisma que ademés fa una oloreta mui buena, encara que una micarona dulze. En esta balle i hai tres tipos d'esta familia, a'l menos que yo conoixca, que esto de las flors tamién ye mui complicato: la flor de lis, el lirio martagón e el lirio azul, a'l que bel·laún diz allaza, nombre con el que tamién se siente a'l abozo u alcozón (en castellano asfódelo, me pienso), perque la chen no se mete d'acuerdo. El que sepa de flors que el diga.

De totas trazas el lirio azul -que tamién n'i hai bel·laún blanco, bel día i meteré una foto- no debe d'estar guaire buen, perque las bacas nian el tocan, como a'l gamón (que sí se'l comeban es latons).

Bien se les ne bale a las bacas de la pila turistas que se's lleban de recuerdo e antes d'arribar ta'l auto han de tirar-lo perque ya no balen pa cosa, que se no no podrían minchar yerba de tantismos que n'i hai.

Total, que la foto ye de la flor de lis e soi charrando de l'altro.