miércoles, 31 de diciembre de 2014

Buen 2015

Que el 2015 nos sía propicio, e a's fotografos: buenas luces


martes, 30 de diciembre de 2014

Per la tierra baixa

El día 24 pasé per la zona de Sobrarbe (el Sobrarbe real, perque ya sabretz mutos que esta zona, antes de que fesen la comarcalización, yera conoixita como Sobrarbe y las Valles) e yera tot bien maho: boira preta e tot chelato. M'habría feto goyo de parar e fer quantas fotos, pero no me vagaba perque hebe a fer quantas cosas en Uesca. E el sabado pasato, sabendo que se'n iba per un curto espacio de tiempo l'anticiclón, baixé a veyer se tenebe suerte e pillabe boira e chel. Una miqueta de boira sí que pillé, pero las temperaturas no yeran tant baixas como l'altro día. En primeras marché enta A Fueva e no i heba boira, asinas que endrecé enta Mediano, an que la hebe vista en pasar per L'Aínsa. Estié chugando una miqueta con la clau alta pensando en pasar-las a blanco e negro.



 Tornando ya enta casa, decidié d'esbarrar-me un ratet enta A Capana, un puesto que siempre he visto dende la carretera e m'heban dito que yera una casa muit pincha. E asinas yera, no me defraudó. Una casa que sería, ta part d'alavez, bien rica, con buens campos, buena anvista e una casa enorme, con ilesieta e bordas bien grans, pero an que tot amenaza con espaldar-se. E ye una pena, perque ye bien comunicata e estoi que en el suyo tiempo no habría costato guaire de mantener-la.



Maitín miraré de salir a fer bel·la foto més, pero pa per si no me vaga de fer cosa més este 2014 en el blog, tos deseyo, e me i incluigo, un buen anyo 2015. Este 2014 ha tenito las suyas cosas buenas, pero tamién malas e mesmo muit malas. Que el 2015 vienga millor pa totz.

martes, 23 de diciembre de 2014

El Due

Ya sé que esta ye una de las mías fotos cansinas clasicas, pero ye que encara no soi contento con las que tiengo perque no he trobato las condicions ideals. Asinas que continaré puyando-ie dica que consiga una imachen que me deixe satisfeito. Amés, qué conyo, ye una forma que tiengo d'entreter-me em ixas nuetz d'hibierno. Como se veye que no soi estato pro buen estianyo e Papa Noel ni es Reis me van a trayer es tres obchectivos que quiero pa completar l'equipo, me conformo con uns grampons pa poder puyar ta Comodoto, perque no i hai guaire nieu, pero la poca que n'i hai ye chelata e dura como un tempán.
Aquí tos ne deixo unas quantas.
Antes d'amaneixar, la conoixita como "hora azul":
 Las puntas prencipian a recibir es primers rayos de sol:

 E aquí ya fendo el capullo con el sol de frent e totz ixes flarazos...


lunes, 15 de diciembre de 2014

Río Cinca chelato

Estas fotos no son d'este cabo de semana pasato, son de l'anterior (d'el Puent de la Constitución), pero como este zaguer soi estato en la "city", no he puesto salir ta la montanya :-(
No son cosa de l'altro mundo, pero encara que somos tenendo un hibierno calient (cosas d'el cambio climatico, e ya sé que oficialment somos d'agüerro encara, pero aquí ya fa días que habría a estar hibierno), el río Cinca s'ha chelato.
A veyer se la proxima semana puedo fer qualquecosa.
Una anvista global:
 Un detalle con el 100 mm.:
 E aquí el churro de Marmorés, yo soi a la izquierda mirando de dimensionar, pero como voi de negro cucaracho no se me i veye guaire bien. Pa estes menesters de dimensionar habré a llevar-me el gore-tex narancha. De totas formas, no s'aprecia guaire bien la diemnsión d'el Churro, que ye més gran que no pareix:


lunes, 8 de diciembre de 2014

Telera

Este Puent he aprofitato dos días pa salir, encara que l'orache no acompanyaba guaire. Imos con el primer día, que fue el pior per lo que respecta a l'orache pero el millor en lo fotografico, a'l menos pa yo.
El viernes recibo uns whatsaps de Javier Camacho (no tos perdiatz las suyas fotos) a quí conoixié pa'l Puent de Totz es Santos en es que me deciba que yera per la zona e se querebe fer qualquecosa. Prou que sí. Dimpués de proponer quantas opcions, a la fin nos ne fuemos enta la Val de Tena, a fer las primeras luces sobre Penya Telera. Yo i yere estato de zagalón per astí (13 anyos, me pareix que tenebe) e ya no m'acordabe guaire. Prou que fue una gran opción, perque el puesto ye muit guapo. Astí estiemos pasando frío e fendo fotos. Tos ne deixo bel·launa con diferents enquadres:



 E dimpués de prener un café, ensenyar-le un puesto que no conoixeba e deixar-lo an que yera aloxato, como yera luego me fue a dar una vuelteta per Buixaruelo. Esperabe trobar chel, pero la verdat ye que lo unico que i veyé fue turistas. Ah, e este barranquet.
Unaltro día las de hue domingo.

sábado, 29 de noviembre de 2014

Fornos, unaltra vegata

Dimpués de dos cabos de semana sin poder salir a fer una miqueta de mont, hue de maitins m'ha importato igual que plevés, perque ya no podebe més. Como lleva dos u tres días plevendo sin parar, hebe pensato que es ríos e barrancos normals irían plens d'augua, e que talment fues una buena idea ir ta Fornos a veyer quánta augua baixaba per lo frato e se podebe cruzar el río (feba días que pensabe en ir ta A Fraga, en Revilla, aprofitando que es caixicos son bien chulos con la color amarilla, pero el desestimé perque baixaría muta augua per lo río Yaga). E amés, plevendo como pleveba,el de Fornos ye un camín que puetz fer con lo batiauguas, e he penasto que d'ixa forma no me banyarí guaire. Asinas que enta astí soi ito, e miratz-os que i soi estato buena cosa veces, pero nunca no hebe visto baixar tal cantidat d'augua. Yera espectacular, pero las condicions no yeran las millors, perque no feba soque plever e i heba muta humedat en l'ambient e en el filtro...
Con tot e con ixo, s'ha feto el que s'ha puesto (en esta primera i hai dos gotetas, pero yera quasi imposible evitar que l'augua en polvo que saliba d'O Chorro manchás el polarizador):




viernes, 21 de noviembre de 2014

Las buenas luces

A ón serán? Perque yo nunca no las veigo quan voi ta la montanyan; me fuyen como se putís :-D
Anteahier unas luces estupendas, marabillosas, con boiras espectaculars. Ahier, que podebe escapar-me un ratet, ciel raso como el uello d'un paixarico. Pero el que la sigue la consigue, e bell día las trobaré.
Torné enta l'Ibón de Plan, la semana pasata nuble preto e esta demasiato raso...

 Estes enquadres son muit pareixitos. No sé quál funciona millor, se queretz deixar la vuestra opinión será bienvenita:





viernes, 14 de noviembre de 2014

Hibierno

Una vegata que se pasa la deleria de l'agüerro, como debo d'estar una miqueta masoquista, tiengo ganas de pasar frío e prencipiar a fer fotos con nieu.
Ahier de maitins i habió un amaneixer d'ixes espectaculars con boiras de colorins; bai, d'ixes que siempre me pillan en casa mirando-me per la ventana e maldecindo e preguntando-me per qué conyo no es veigo es días que salgo a fer primeras luces. Como la previsión yera la que yera (pocas boiras), pensé que talment de tardes se repetisen ixas luces. Asinas que salié de treballar, me cambié, comié en l'auto e me planté en Saravillo a puyar ta l'Ibón de Plan per lo GR (qué le imos a fer, es pobres no tenemos pa 4x4). Mientres puyabe ya veyebe que no ibe a tener luces: mutas boiras per l'oeste e s'iban zarrando las boiras en el circo. Pero rai, ya que ib'yere...
L'Ibón, per més visto que el tienga e per més fotos que se'n veiga per Internet, m'encanta. Esta vegata decidié que deixaría es trallos en paz (son d'es árbols més fotografiatos d'el mundo, me pienso) e chugarí con las formal d'el chel. El que no sé ye se el he conseguito.





lunes, 10 de noviembre de 2014

Puent d'as Crabas e Escartín

Feba mutos anyos, talment 9, que no pasiabe per Sobrepuerto, e ixo que ye una zona que m'encanta dende que la descubrié de la man de José María Satué e es suyos libros que miran que no caiga en l'olvido (a lo que ayudó tamién Julio Llamazares con la suya famosisma La lluvia amarilla).
Nunca trobabe el día de tornar-ie dica el sabado pasato,quan un cambio de plans a zaguera hora truncó la ideya inicial e fayó que me decantás per ir ta O Puent d'as Crabas, un puesto que quan me preguntan quáls son es míos lugars favoritos d'el Pirineu, siempre digo entre es primers.
Aquí en tenetz quantas fotos:




 Aquí m'entretenié con estas fuellas de fau:
 E ya que ib'yere, no podebe tornar ta casa sin puyar encara que fues un ratet ta Escartín. Siempre que voi per ixe camín pienso en es pobres zagals quan les decisen "Baixa t'o huerto e puya-te bella col". Pero en arribar ta Escartín se m'imple l'espritu de tristeza. No quiero estar melancolico con es lugars abandonatos, pero me fan muta pena, qué le imos a fer. Pensar en la chent qu ei vivió, que fochó de firme pa fer ixas bordas, ixes paretons, ixas feixas... E que aora sía tot espaldato u quasi. En fin... I fayé mutas fotos, pero con prisas perque no querebe tornar guaire tarde enta casa. Per lo camín fue pillando lans (se n'i hai estianyo, mama mía) pa plantar-los. Un caixico provenient de Sobrepuerto servirá de recordatorio de mi pai.

 Una de l'interior de la ilesia aprofitando que con la camara nueva puedo tirar d'ISO (10000 e sin flash). No cuento que dure guaire, perque i hai una crepa pro gran en la paret dezaga de l'altar.



miércoles, 5 de noviembre de 2014

E pa rematar

Pos ixo, pa rematar este largo puent tant intenso en lo fotografico (gracias, familia) el lunes, per fin con un día d'agüerro (heba plevito la nuet anterior, yera nuble e la temperatura no puyó d'es 12ºC), marché per la carretera d'Anyisclo enta Fanlo e d'astí baixar enta Sarvisé. La carretera d'Anyisclo goso fer-la de nuet quan voi a fer montanya, e l'altro día la disfruté bien, perque yera muit bonita e quasi no pasaba autos (e es que veyé yeran d'el país). M'entretenié més que no pensabe e dimpués per la selva entre Fanlo e Sarvisé (que yera preciosa) no podié fer la idea que llevabe. M'encanta ixa selva, pero siempre me'n torno con la sensación de que no le sé quitar el suco, talment perque sin un tele me pierdo mutas fotos buenas.
Pro de retolica, aquí van las fotos:
Dinamica de fluitos:
 Aora con elementos arquitectonicos:


 Ya per o Chate:
 Per cada vegata més miro de fixar-me en es chicotz detalles:
 Fuellas varatas:
 Refleixos:
Per fin ha arribato la nieu, no cuento que quede cosa de l'agüerropa'l cabo de semana que viene.