jueves, 29 de octubre de 2009

Anyisclo II

L'altra vegata que i fue t'Anyisclo yera luego perque l'agüerro encara no i yera arribato e yera tot muto verde, e hue i soi tornato a mirar l'agüerro con dos colegas fotografos, pero talment ya yera una miqueta pasato, con tot e con ixo m'ha feto muto goyo de tornar-ie. Hemos prencipiato a caminar tarde e somos tornatos ta'l coche ya de nuet zarrata, yera escur como una lupatera. Pero bueno, somos puyatos t'A Ripareta que yera el nuestro obchectivo e ya baixando no hemos puesto fer garra foto. A veyer qué tos pareixen las fotos de hue.
Este debe d'estar el fau més fotografiato d'Anyisclo, en meto tres encuadres diferents:
Esta ye una anvista d'el camín, que yera majismo de tot:

Uns potrecons que i heba dencima d'un trallo de fau:Un puent de roca antes d'arribar t'A Ripareta:
Cuantas imáchens de las gorgas e gáritz que fa el río antes d'A Ripareta:



E ixo ye tot, que no ye poco, per hue. Salut.

martes, 27 de octubre de 2009

Les llums de la nit / Las luces de la nuet



es que viviatz en Barcelona, u cerca, u podiatz asistir, no tos podetz perder la exposición e conferencia d'el cartel d'alto.
Yo no podré ir-ie, e ya me jode -cagondiós mira que m'escapo, ¿eh?-, pero es que podiatz asistir a ixa prochección e conferencia d'un grandismo fotografo de naturaleza e millor persona (tenié la suerte de conoixer-lo este verano e fer fotos con er e con altro amigo e fotografo en la Basa la Mora) no tos podetz permitir el luxo de perder-tos-la.
Un zaguer consello, pasatz-os per lo suyo blog pa veyer una grand foto nocturna . Ye la hostia.

lunes, 26 de octubre de 2009

Més fotos d'agüerro

Como ya he tornato el 100-400 que m'heban amprato e no'n vale la pena que mire de fer paixaricos con el mío 70-300 que ye muto mal, me toca de fer fotos a l'agüerro de Pineta, que esti anyo ye tardán, pero majismo. Es fabolars royos, la nieu e el ciel azul fan una combinación buenisma. La verdat ye que fa una calor que no ye normal, e asinas se'n va de rapida la nieu de l'altro día. Hue soi puyato ta's 1800 u més e de manga curta, encara me tornaré a meter moreno. Per cada día que pasa me queda menos días pa plegar, una pena.
Hue he feto el camín de Montaspro (el nombre el tiene mui bien meso), e tos las meto per orden:

Dende Lalarri, encara no i arriba el sol, pero m'ha feto goyo el refleixo d'el Cilindro en la baseta:

Dende el mismo puesto, pero enta el Perdido, Pico Anyisclo e Punta las Solas:
La Capilla e el Mallo Royo:

Dende la labacera d'el camín de Montaspro enta abaixo:
La selva la Bispeta, un fabolar con unas colors royas majismas:
Una altra de la Bispeta:
Arribando una altra vez ta Lalarri, es Esparrets, Cilindro, un poco del Perdido, es churros de Marmorés...:
E una anvista d'el cul de Pineta, fa una mica d'efecto barrilete el obchetivo, pero tos podetz fer una idea:
Au, ya n'i hai cuantas. Salut.

domingo, 25 de octubre de 2009

La tipica foto feta dende Espierba

pero esta la he feta yo. Dimpués n'he feto altras con filtros de densidat neutra u de degradatos neutros, ahora no me'n acuerdo, que m'ha deixato un amigo. Esta ye feta con el obchetivo d'el kit (que no ye mica buen) e con el mío polarizador, dimpués ya m'han deixato el 100-400 (con el que fayé las fotos del trencauesos, pa días el torno a tener) e hemos prencipiato a fer lo fato con es paixariquetz. A partir de hue se torno a fer paixaricos habrá a estar con el mío malismo sigma 70-300, que ye lentismo e muto fosco, se fará el que se pueda dica que pueda cabidar pa fer-me con el 100-400 u el 400 fixo, que pa días i hai caldo.

miércoles, 21 de octubre de 2009

Una tregüeta entre la plebita e la nieu

Esta tarde m'han dito en el Refugio de Pineta que heban medito 230 l/m2 e que no sabeban cuánto heba sobreixito, perque en·n'o traste que i tienen pa medir-la no i cabeba més. E bien se les n'ha valito que alto, sobre es 1800-1900 metros yera nieu, que se no igual se les lleva el río. Ye curioso, totz es barrangos de la man pacina baixaban fartos d'augua que no'n podeban més, el barrango de La Estiva tamién ha movito bien, el de Lalarri e el de Montaspro tamién, menos el Cinca cuan baixa de Marmorés, cómo se nota que ha nevato, se no baixaría un río enorme.
Pos como diz el titulo, hue hemos tenito una tregüeta, perque cuasi no ha plevito dende esto maitín, pero aora en cai a cabazos una altra vegata, a veyer qué fa maitín. E como l'orache nos ha deixato mismo veyer una brinquerrina el sol, he aprofitato pa fer bel·la foto.
Esta ye feta a zaguera hora, cuan ya lusquiaba, pero me fa muto goyo ixa luz entre es faus:
Una altra d'el tunel, e cuento que no serála zaguera, encara falta una miqueta de color e que las fuellas tapen la pista:
Este ye el barrango de La Cueva (como podretz veyer ye un nombre modern), que no baixa so que de mayenco e cuan i hai temporal u tronata grand:
El río Lalarri, que ha medrato buena cosa (podetz veyer en una entrata anterior cómo baixaba fa tres días):
Es picos con nieu, Treserols no s'ha arribato a despasar de tot, no més s'han visto el Garién, el Pineta e La Capilla, como podetz veyer, la nieu ye pro baixa:
Un pinchán en un liroler, no tot ha a estar anvistas e churros. Pa días torno a fer fotos de paixaricos, ya me toca de tornar el teleobchetivo a l'amigo que me'l deixó:
E esta zaguera -encara que ye la primera que he feto hue- ye de cuan le daba el sol a'l embalse e se refleixaban es árbols caducifolios:
Au, per hue ya ye pro. Salut.

lunes, 19 de octubre de 2009

Per fin pareix que ye aquí

Con una semana de retraso sobre l'horario previsto pero pareix que per fin arriba l'agüerro. Dimpués de dos días de fiesta soi tornato ta Pineta e se vei més abantato l'agüerro. No se puet decir que sía la hostia, pero ya m'aconorto con el que sía.
En es churros de Lalarri ya i hai faus amarillencos, encara que en queda mutas verdes. El sabado baixé t'A Fraga, entre Rebilla e Escuaín, an que i hai unas gorgas e una gáriz bien pincha pensando-me que i trobarí las colors d'agüerro e no me fayó el morro cloc, yera como aquí, u sía, hauto. Pero per fin hue sí que he puesto fer las tipicas, pero no per ixo menos pinchas, fotos d'esta epoca. Tos ne deixo bel·launa, no n'he feto guaires perque he prencipiato a fer-las una miqueta tarde. A veyer qué tos pareixen. Salut.

martes, 13 de octubre de 2009

¿Trencahuesos, trencauesos u trencagüesos?

La verdat ye que no tiengo mica clar cómo escribir-lo, pero ixo ahora arrai. Hue me'l he pasato como un nin·no afotando ixes animals, que cuasi s'ha convertito en un tótem. S'ha encertato que he puesto acudir ta unbuen puesto pa veyer-los e que un buen amigo m'ha deixato un trabuco en condicions pa no tener que ir-ie con el mío talabarte. Mersi mesache, tamién dende aquí. Yeran més leixos que no pensabe, e i heba "interferencias"entre es animals e el obchetivo, pero con tot e con ixo m'he feto contento de poder-los veyer e afotar, encara que mutas fotos no valen pa cosa. Aquí tenetz bel·launa de las que més goyo m'han feto. Salut.
Estes primers son chóbens, se nota en que son més foscos (e més confiatos, i son entratos es primers a pesar de las chodigatas que les fan cuantos espabilatos d'es que no diré nombres):


N'i heba un que yera pro guito, e que acometeba a totz es de demés:
Estes son adultos, como se vei per la color narancha, son entratos més tarde e la luz ya yera masiato dura:
E aquí un choven e un adulto tricolotiando-se, chugando u que me sé yo qué feban:
En fin, un espectaclo pa's uellos (a'l menos pa's mío), e que con camara en man ye encara millor; cuan no me i cabeban en el encuadre -ixo sí, poquetas veces- pensabe en el privilechio que he tenito. A veyer se nunca puedo repetir-lo. salut.

viernes, 9 de octubre de 2009

El tunel

L'altro día me declaroren en fotonatura esta foto como OT (difuera de tematica). Ni el comparto ni el entiendo, pero como me fa goyo e aquí soi quí decide qué e cómo se publica, pos aquí la foto. Tornaré a fer-la cuan l'agüerro sía més abanzato e es faus més amarillencos, pero per ahora habretz a conformar-tos con ésta. Salut.

jueves, 8 de octubre de 2009

L'agüerro amuestra la pateta

Se fa de rogar, pero poquet a poquet va arribando el muit chodigo. E més encara hue que ha plevito pro, prencipió ayer di nuet e ha ito plevendo tot el día dica que es barrancos e es ríos han medrato, que buena falta les feba. Con tot e con ixo estianyo l'agüerro viene més tardán, i hai roldes de faus verdes de tot chunto a altros que ya son como heban a estar pa estes días. Bueno, a yo trampis, que el veigo totz es días; pero pa la chent que pensaba aprofitar este Puent d'el Pilar pa fer fotos de l'agüerro (i heba cuantos amigos fotografos que m'heban dito que quereban venirt'aquí) pos va a estar una grand putata. En fin, asinas tendrán desincusa pa tornar-ie una altra vegata. No he puesto fer guaires fotos perque como tos decibe no feba soque plever, pero con tot e con ixo m'he escapato un ratet. Tos ne deixo, como siempre, bel·la muestra.

La primera ye feta dende el embalse, aprofitando que i daba bel·la rayateta sol (t'alto yera nuble preto como bien he puesto comprebar dimpués):

Este ye feta dende un poquet antes d'el Refugio de la Ronatiza, encara no pleveba pero no tardariba guaire a prencipiar:
Es barrangos de la Man Pacina, ya feba días que no se viyeban tant plens. Es faus d'el primer termino son d'Esquinarasnos, íxes van un poquet més abanzatos:
El churro d'el río Lalarri dende un poquet antes d'el puent que el cruza, aquí s'en heba deixato una miqueta de plever, no tardaría guaire a tornar l'augua.
E ya cuan baixabe, el Cinca, dende el puent de la pista. Ayer cuasi no baixaba augua per es Churros de Marmorés, e hue iban bien medratos.