sábado, 31 de agosto de 2013

Esparveras, pasavelas, paixarelas, palometas...

Mutos son es nombres que reciben estes animals en aragonés.
Voi a estar dos semans sin poder salir ta la montanya. Mientres ploro de pena, tiro d'archivo d'el zaguer día que fue a visitar las Parnassius apollo.
Las principals protagonistas:



Una Papilio machaon dencima d'una Epipactis rubra. Encara que son més comuns, son preciosas e nunca no hebe puesto fer-les una foto  en condicions :

E una Melitea ssp. (u sía ni puta ideya u n.p.i) :



lunes, 26 de agosto de 2013

Las Pardas

Feba días, anyos, que querebe fer el camín de las Pardas, pero siempre el ibe deixando dica trobar un acompanyant, perque diz que ye un camín muit perigloso. E la verdat ye que en ye, pero el sabado pasato el tenebe como segunda alternativa se no podebe fer la primera e, como ya habretz intutito per lo nombre de la entrata, a la fin no me'n quedo altra soque fer el camín de las Pardas. E ye que tenebe ganas de meter-me un buen sobo e probar-me el chenullo izquierdo, que el tiengo tocato d'un chaquetazo que me fotié fa dos semanas, quan fue a fer las fotos de Lardana/Posets. E pa ixo, una buena opción yera fer un 3000, con un buen desnivel e veyer se me respondeba bien. La ideya inicial yera puyar dende Barrosa ta Liena, pasar ta Sobresplucas, rodiar per dezaga e puyar ta Robinyera, sobre tot per fer-lo per un camín inedito pa yo. Pa ixo m'informé bien en Parzán, e con las indicacions que me dioren me decidié a fer-lo. Pero no hebe previsto la boira que m'iba a tapar el puesto per an que hebe de puyar, e pa no ficar-me en un chardín, e ya que ib'yere, marché a fer el camín de las Pardas, estando conscient de que talment m'hes de dar media vuelta.
Ye un camín con fama de perigloso, e la verdat ye que en ye se tiens vertigo u no yes feto a caminar per mals terrenos. No ye tant aerio como la Feixa de las Flors, per meter un exemplo, pero un trepuzón trayería nefastas conseqüencias. La verdat ye que disfruté como un chabalín en un basetón de bardo, e ixo que no podié disfrutar guaire bien de las vistas per la boira que las tapaba a vegatas.
Hue, encara menos que altras vegatas, no importa la calidat fotografica perque no gosan tener-ne; encara que disfruté d'un amaneixer bien pincho, a la parte final no yere cansato, el siguient: remallato, e no yere pa pensar en parametros. Sobre tot tos voi a mostrar fotos de per án pasa el camín per se queretz ir-ie. Ixo sí, se tenetz vertigo no i vayatz e se i hai chel u nieu ni se tospase per la capeza ir-ie.
Diferents momentos de l'amaneixer:


Una envista enta l'oeste. Aquí ya veye que probablement ya tendrí que desistir de Robinyera, que ye el que  ye a la dreta tapato per las boiras:

 E las fotos "documentals" de bells trozos d'el camín.
Este ye el principio d'el camín, quasi fa miedo d'entrar-ie:
 E aquí diferents muestras d'el trazato:



 Esta ye baixando ya de Barroseta:

E aquí tenetz el track con el recorrito. I hai bell troz en el camín de las Pardas an que el GPS perdeba recepción pero no i hai problema perque no i hai guaires puestos per an ir:



martes, 20 de agosto de 2013

Tringonier e Pico L'Ibonet

Aora que ya no i hai tanta flora (ye un decir, perque el sabado veyé una zona plena d'orquidias recient salitas, e encara queda muta més flora que altros anyos pa estas fechas), arriba la hora de fer montanya de verdat. Ye a finals d'agosto e en septiembre quan me meto en forma, perque dende finals de mayo dica primers d'agosto voi seguindo el calendario de la naturaleza (sobre tot flors) e no camino guaire, u a'l menos tanto como me faría goyo, perque sé aón sale cada especie e per un regular no cal caminar guaire.
Pos ixo, que el sabado decidié de fer una miqueta de montanya. El primer plan yera puyar ta un 3000, pero como el que iba a estar el mío acompanyant a la fin no podió venir, me'n fue ta un puesto a'l que le tenebe ganas dende feba tiempo (perque en el 3000 d'es plans inicials ya i yere estato quantas vegatas): el Pico Negro (en mutos mapas sale como el Pico l'Ibonet, pero pa ixo me fío més d'el de PRAMES dica que pregunte a bel·laún de Parzán que me diga el nombre d'el país: CONFIRMATO, SE DIZ L'IBONET), dencima de l'Ibón de Tringonier.
Ye una puyata dura pero que mereix la pena, perque dende ixe pico -que fa 2869 metros- i hai una envista impresionant: Treserols, Astazus, Robinyera, L'Almunia, Neouvielle, Midi de Bigorre, una pila de montanyas en Francia, Batoba, Culfreda, Aneto, Vachimala, Lardana, Espadas, Suelza, Fulsa, Cotiella, Penya Montanyesa, tota la man pacina de Pineta...
La baixata la fayé per lo Marcatiecho ta tornar a salir ta la Plana el Cabo.
Ye una cursa dura, perque dende l'Ibón dica la punta no i hai camín. Ixo sí, disfrutaretz ixa puyata se sotz masocas e/u cheologos.
Tos deixo qualque foto que fayé, encara que quan arribé ta l'Ibón la luz ya prencipiaba a estar dura, e a la baixata yere cansato e no me trenqué guaire la capeza.
El Marcatiecho, antes de la Plana el Cabo, quasi de nuet encara:
 Primeras luces sobre Robinyera:
 Treserols refleixatas en l'Ibón:
 L'Ibón dende el Pico, con parte de la envista:
 Una capan·neta espaldata en la Plana el Marcatiecho, qué belsetán que no se i charraría...

E tamién tos deixo el recorrito/track:

lunes, 12 de agosto de 2013

Zagueras luces sobre Lardana

El viernes de tardes, dimpués de dar-me un sobo de maitins, marché a fer las zagueras luces con buena companyía. la verdat ye que ya yere cansato per es 1000 metros de desnivel que m'hebe clavato pa desayunar, e marchar con el mochilón gran (equipo, saco, tienda. comida e ropa) no m'ayudó a descansar-me. E menos encara un chaquetazo que me fotié de la forma més fata, perque se me chiró una piedra; e encara menos el frío que pasé antes de montar la tienda, perque pa estar en agosto nos habiemos a meter ropa como se fues finals d'octubre. Total, que llevabe un mal cuerpo d'el copón que encara me dura, con dolors musculars en la espalda e malestar cheneral. E ye que un ya no tiene 20 anyos e no puede ir fendo seguntes qué cosas.
Pero bueno, la sesión, a pesar d'el mal temple que llevabe, no estió mal; la envista mereixeba la pena e el ciel estrelato sin luna yera majismo.
Saliba la gabacha per lo puerto:
 E quasi tapaba el pico de las Tres Güegas:

 Zagueras luces sobre Lardana:
 Contina baixando la gabacha e bufando el puerto, feba muto frío:
 Alpenglow sobre Lardana (me fa goyo de veyer-la con la canción Champagne supernova d'Oasis):

 E una preba d'una circumpolar. Aquí ya no febe patas e no me trenqué guaire la capeza. Con tot e con ixo no ha salito mal  de tot:



viernes, 9 de agosto de 2013

Una vuelteta

Como contino con insomino (e sin fillos), esto maitín he marchato a dar una vuelta. No me vaga d'escribir cosa.









jueves, 8 de agosto de 2013

Barrosa

Feba tiempo que no ibe per Barrosa. La zaguer vegata que i fue yera nevando, pero ixo no quiere decir cosa perque estianyo l'orache ye como ye, que nos va a tornar barrenatos a plantas, animals e animals de dos patas. Pa estar a l'altura de l'anyo que somos, he visto martagons en flor, martagons ya pasatos, bell lirio recient salito, martuels a punta pala (mmmm, qué buens), dactylorhizas, etc. Mismo tres robellons!!! Yo n'he visto, e plegato, a finals d'agosto, pero no pas a estas alturas.
Pero imos per partes, como deciba Jack el Estripador. Llevo un mes despertando-me sobre las 5 d'el maitín, el que ye una putada perque no me puedo tornar a dormir, per més que leiga, que me meta a veyer dovinaires en la tele, collas de "flamenquito", noticias, teletiendas... en fin, ixas cosas con las que implen la programación a ixas horas en que només es vichilants nocturnos e es que no podemos dormir somos veyendo la tele.
Pero hue, a diferiencia d'altros día que m'hebe de joder e quedar-me en casa, he puesto escapar-me e a una hora prudent, quan ya se i veye, soi ito -como he dito antes- ta Barrosa, a veyer se con una miqueta de suerte me i trobabe qualque cosa. No ye estata la millor sesión de fotos que he feto en lqa mía vida (encara ye per conseguir), pero siempre te baixas bel·la foto en la tarcheta.
Primeras luces sobre Robinyera, encara que yera nuble en ixe pico e per l'Este, e no s'ha meso guaire royo:

Ya cerca d'el cul de Barrosa, m'he trobato con un martagón encara con flors, e la foto me sirve pa fer la transición de paisache ta flora :-)

Aquí l'amigo Epibolium angustifolium (e se soi trafucato en la identificación ya sé quí me sacará de la error) :

E una Meconopsis cambrica una miqueta pocha dimpués d'el tronacil d'ahier. Imposible de mirar un millor enquadre perque yera entre bolos de granito, e yo ya tiengo una edat que no me permite de fer contorsionismo:

E aquí un escarabaixo que m'ha entretenito un ratet, con este sí que no m'atrivo a dar-le nombre (u sía, que ye un Escarabaixo spp. u npi):


miércoles, 7 de agosto de 2013

Parnassius apollo, e prou

Churo que ya no puyaré miraré de no puyar més fotos de la apollo, pero la verdat ye que se me fa difícil, bien difícil.
 Ahier de maitins e hue , aprofitando que tenebe qui s'estás con es fillos, marché a pillar-las dormindo. Ahier fayé poquetas fotos pero torné contento. Hue m'ha pasato el cuento de la letera: a las 5 e picode la maitinata ha caito un buen batilazo d'augua e yo, que ya yere despierto, me las imachinabe con las gotetas d'augua posando pa yo e ya tenebe el fotón en la capeza. Pero quan i soi ito no las trobabe, he caminato muto més d'el que goso caminar e no'n veyebe ni una. Total, que ya me dabe la vuelta quan en un puesto an que ahier en veyé quantas, m'he mirato més despaciet e per fin n'he visto dos. Yeran mullatas pero ixas gotetas que hebe visto en la mía ment no ibi'eran, mecagüen...
Las d'ahier, encara no'n hebe puyato garra con las alas ubiertas, e la segunda ye la que més goyo me fa de totas las que he feto estianyo:


Las de hue. Obviament, la segunda no ye una Parnassius:

lunes, 5 de agosto de 2013

La Estiva


Tiengo un amigo  (punchatz en l'enlaz e disfrutaretz de fotos muit buenas) que siempre que viene t'aquí quiere puyar a fer las primeras luces sobre Treserols. Yo, encara que me pienso que es dos en chunto somos gafes e quasi nunca pillamos unas luces espectaculars, el i acompanyo bien a gusto, perque per més vegatas que i puye no me canso de veyer esta envista (el sabado recordabe la rimer vegata que i puyé, quasi se me cayen las retinas de contemplar tanta belleza). Pos ixo, que en l'inte preciso se clavó una boira tapando el sol; pero, ya que i yenos, no yera qüestión de tornar cara abaixo con las abrellas cachas e caleba fer bel·la foto perque las luces, sin estar la hostia, no yeran mal:

Dimpués m'entretenié una miqueta con la flora, en especial con la siempreviva (m'encanta esta floreta):
E con l'Aster alpinus:
E marchemos en busca d'altros obchectivos fotograficos (no pas lents, no sé se m'entendetz) e nos trobemos con esto, que mide uns 15 metros d'altura en un lugar muit poco transitato. La gracia d'esta foto, amés de la belleza d'el puesto, ye que estiemos fendo largas exposicions entre las 12 e la 1 d'el mediodía con un ND de 10 pasos:

viernes, 2 de agosto de 2013

Parnassius apollo II

Esto maitín no m'he puesto resistir, a las 6 en piet pa pillar-las durmiertas e quietas pa poder fer-les fotos. Una pena l'aire que feba, perque ha tocato tirar de sensibilidat e la mía camara a 400 ya fa prou ruido. Se, como dicen en bell puesto, esta tarde pleve, maitín intentaré millorar las fotos con las gotetas d'augua.
Detalle d'un ala:
 E aquí diferents preciosidatz: