martes, 29 de septiembre de 2015

Vachimala

Sí, con V se atendemos a'l quepareix el suyo etimo: VALLEM MALAM.
E no ye tant mala, perque me permitió pasar undía estupendo, con bell inte d'apuro, fendo la cresta més larga que he feto en la mía vida. Ixo sí, te permite encadenar ueito tresmils (asinas salen documentatos, encara que bel·laún no deixa d'estar una prominencia entre dos collatas) per una cresta que no ye apta pa chent sin experiencia per ixes terrenos, vertigo u el corazón delicato. I hai uns patios pa las dos mans que significarían el tuyo zaguer trepuzón, pero unas vistas que compensan qualsiquier inte de dubda quan te preguntas "qué conyo foi yo aquí?" he he.
Pos ixo, una puyata larga, difícil e espectacular feta en la buena companyía d'un zagal d'Abi con qui me fotié buens charrazos en aragonés, que siempre ye d'agradeixer. No tiene dificultatz tecnicas (mans, pietz e cul como muto) con buenas condicions, pero no ye apta pa totz, ixo tamién ye verdat.
Saliemos dende Taberners enta el Vado de Vachimala, an que nos esbarremos pa ir a buscar es Ibons de Vachimala dende accediemos a la cresta a 2900 pa ir encadenando, sucesivament, el Pico de la Pez (3.024), el Pico d'el Puerto de la Pez (3.018), Pic de l'Abeille (3.029), Pico Chabier Lozano (3.057; en es mapas sale como Marcos Feliu, pero yo no sé quí ye ixe sinyor e dubdo muto que sía el nombre tradicional, asinas que puestos a inventar nombre, me'l adedico), Vachimala chicot (3.061), Pico de l'Ibón (3.100), Punta Ledormeur (3.120) e Vachimala (3.177). Como se nos feba tarde e querenos tornar ta casa a una hora decent, no fuemos enta l'Ixabre, que nos quedaba cerca pero ya yenos fartos de tanto puya e baixa (e ixo que la cresta que es desepara ye la més sencilla, per lo que se veyeba dende la punta).
Asinas que con esto doi per rematata la temporata estival, con una consecución de tresmils (no sé per qué m'ha dato per astí este verano): Astazu chicot, Astazu Gran, Perdido, Robinyera, Lardana, Infiernos (tres), Culfredas (3), Vinyamala, Cerbillonar, Clot de la Hount e Central. E con estes 8 en foi 23, que no ye mica mal.
A partir d'aora, deixaré las latas cumbres pa centrar-me este proximo sabado en la feria de Bielsa (el domingo no cuento que faya patas pa salir) e es proximos es dedicaré a fotografiar l'agüerro se puedo.
Tos deixo con las fotos (mutas, pero garra en la cresta).
Primeras luces sobre Cotiella:
 El barranco d'es Ibons de Vachimala:
 Vista enta Culfreda, t'an que puyé la semana anterior.
 El primer 3000 d'el día:
 Enta Francia, ixa valle promete:
 En la punta Vachimala, en segundo plano se veye parte de la cresta:
 Enta Treserols:
 Lardana e Espadas, con Ixabre en primer plan:
 Enta l'Aneto:
 Enta Cotiella:
 Baixando enta la Senyal de Viadós, a'l fondo las montanyas de la Valle Bielsa:
 Una capanna, con Vachimala a'l fondo:
 E Viadós, per an que baixemos pa fer-la circular:
 Muit recomendable siempre que sepas que te fotes en terrenos per an que cal parar muta cuenta.
Aquí el track:




domingo, 27 de septiembre de 2015

Agüerro II. Barrosa.

Son es albars e las cereceras es primers árbols en marcar l'agüerro. Como que tiengo debilidat per es cursos d'augua (con es riesgos que conllevan, especialment pa's aparatos electronicos, hue per fin ha resucitato el móbil nuevo que cayó -como deciba Leonardo Escalona- de grapas en la Cinca) e cereceras no n'i hai, me'n soi ito a fotografiar es albars, d'es que tantos n'i hai per la ribera d'el río Barrosa.
Ya sé que encara le falta, pero ye que no me'n adubo e tiengo forniguetas en el cul pa marchar a veyer es colorins.


 Encara he de procesar las fotos d'ahier en Vachimala e las de hue mirando, unaltra vegata, l'agüerro.


jueves, 24 de septiembre de 2015

Agüerro

Ahier, per fin, prencipió la mía estación favorita de l'anyo (mesmo i habió qui me felicitó he he): l'agüerro. La mía e la de quasi totz es fotografos de paisache que conoixco. E encara que per cada anyo me fan més goyo las hotos hibernals (será perque no se'n veye tantas), no m'adubo a esperar que es fabolars se vistan con es suyos millors vestitos calidos. Per ixo, cuento que en dos semanas prencipairé el mío peregrinache per es fabolars de Sobrarbe a mirar de capturar las colors.
Pero ahier, pa celebrar-lo marché enta esta nuquera que totz es anyos pareix que tiene prisa per vestir-se d'amarillo, e estié chugando con era un ratet.






miércoles, 23 de septiembre de 2015

Culfredas (3031, 3027 y 3032).

Este cabo de semana he salito ta'l monte dos vegatas. La una, el sabado, fue de romería de cursa ta Ordesa, ta la Cola de Caballo. Se nunca m'olvido de per qué solo i voi d'hibierno u entre semana difuera de temporada, recordatz-me es las més de 200 dominguers personas que i heba (cans sueltos, chent enn'o río, chilos...).
Como en salié farto, de chent, el domingo querebe escapar ta bell puesto an que no'n veyés guaire, de chent (qué le imos a fer, asocial que ye un...). E decidié d'ir ta's Culfreda, que hebe visto dende Lardana e contabe que no i habría guaire chent. Asinas continabe con la colección d'estianyo de tresmils (no sé, nunca no m'heba dato per fer ixo) e me llevabe la camara nueva. Perque con parte d'el premio d'el centro Excursionista de Ribagorza (que, per cierto, encara no he cobrato ni he tornato a saber cosa més d'ers) m'he comprato una Canon G16, pa llevar-la ta la placha, reunions familiars e, sobre tot, quitar-me dos quilos e pico de la chepa de la 6D més obchectivos. E ye que llevabe tiempo parando cuenta de que quan me emtebe estes sobos de més de 1500 metros de puyata, arribabe tan remallato que febe las fotos como podebe fer-las con una compacta. E per ixo m'he pillato la compacta. Pa fer fotos la 6D e pa captar recuerdos la G16 :-)
E estas son las primeras que foi...
El sol toca las  puntas d'es Culfreda.
 Mientres puyas, dezaga de las montanyas francesas,apareixen Robinyera e L'Almunia e s'intui el pico Marmorés.
 Enta Suelsa e Fulsa:
 Treserols (en las caras norte i heba una miqueta de nieu, como podetz veyer):
 Neouvielle:
 Treserols, Astazu, Robinyera:
 Penya Montanyesa:
 El ganyán:
 E Lardana (mama mía, aora veigo per an que i puyé e ixo ye dreto como un campanal):
 E una capanna arribando ya ta Taberners:
E el track, prou que sí. En wikiloc no salen es metros reals, perque se limitan a restar l'altura minima a la maxima. Seguntes el mío GPS sale 1659 m. de puyata positiva.



martes, 15 de septiembre de 2015

Cutio cutio

Pos ixo, que setiembre, encara que ni an paro cuenta, va enta debant e l'agüerro ya prencipia a asomar la pateta per debaixo de la puerta. fa días qu eindo a troballar ya voi veyendo cómo es albars se van metendo amarillencos e la montanya va aprestando-se pa amostrar-nos la suya millor cara en un mes (u a'l menos ye la cara que més goyo me fa a yo). Hue, tot e que pleveba, no m'adubibe e soi ito ta la ribera d'el Barrosa a chugar con es albars. Ya sé que falta muto, pero ye que las ganas me pueden.




lunes, 14 de septiembre de 2015

Rechirando l'archivo

Quan abanza setiembre unas forniguetas prencipian a mover-se per es budiellos de totz es fotografos de naturaleza que s'adedican a'l paisache. E a yo, tot e que soi un simple aficionato, tamién me pasa. Ya prencipio a planificar l'agüerro e, encara que no me bocho guaire (Pineta, Anyisclo, Escuaín, Buixaruelo...), voi pensando en cómo irá l'agüerro. E claro, pensando-ie, hue que tiengo fiesta m'he meso a mirar l'archivo e voi repasando fotos d'agüerros anteriors. El millor de tot ye que nunca no trobas las mesmas condicions, e ixo ye un alicient pa tornar totz es anyos tas mesmos puestos. Tos deixo con unas fotos ya viellas, pero que m'ha aganato de revelar unaltra vegata.






sábado, 12 de septiembre de 2015

Vinyamala u Comachibosa (3299 msnm)

El sabado pasato puyé ta'l Vinyamala u Comachibosa (més conoixito como Vignemale) per la man de Buixaruelo. Ya llevanos tiempo charrando con uns companyers de troballo de fer bell pico e decidiemos este, que yera inedito pa totz. A la fin i habió bel·la baixa més imprevista e i fuemos tres. Ye una puyata larga, dura, en mutos trozos sin camín, pasando per una lera que a yo se me fayó larga, con risque de caita de pietras, a paso més lento d'el que goso llevar. Pero tot se pasa quan, dimpués de pasar per la chaminera d'el Corredor de la Moscova (qué nombre, per cierto) e crestiar una miqueta, veyes la envista d'el glaciar rodiato de picos, veyendo dende Treserols, La Valle tena, el Midi d'Ossau, el de Bigorre, Neouvielle, etc. E ye que, per dur que sía el camín, el que ye pennacer, ye pennacer e se le olvidan tot el que ha penato puyando quan llega en la cima. E ya que ibi'ere, no se podeba deixar la oportunidat de puyar ta'l Clot de la Hount (3285), Cerbillonar (3247) e el Pico Central (3235).
Las fotos... Ah,per cierto, ya tiengo la G16 que m'acompanyará ta este sobos, la 6D la deixaré pa fer fotos de verdat, me sacaré dos kilos d'el macuto que agradeixeré e no me costará tanto sacar la camara pa fer fotos puyando e baixando.
La foto mía (gracias, Marta) en la punta d'el Vinyamala:
 E la envista d'el glaciar. I hai chent, per se tos queretz entretener trobando-los.
Con estes quatre picos ya he feto 12 tresmils dende que torné de la placha a finals de chulio. A vyer se deixa la nieu e en caye bel·laún més antes de prencipiar a fer fotos de l'agüerro.
Este cabo de semana, per diferents qüestions, toca de no ir ta la montanya, snif.

martes, 8 de septiembre de 2015

Pineta

Feba días que le tenebe ganas a esta foto de Pineta. El chueves pasato i heba boiras de tronata e fue a veyer se conseguibe buenas luces. No tenié suerte, pero per un menuto una luceta calida iluminó las boiras. Con tot e con ixo, esta envista de Pineta no tiene precio.
Con ixa miqueta de luz e el 100 mm:
 Una miqueta més tarde, lusquiando:
Pero dica hue no he puesto descargar las fotos...

miércoles, 2 de septiembre de 2015

Per la Cruz de Guardia

Ahier, encara que no yera día de tronatas, i heba uns cumuloninmbus bien mahos. Mesmo fotió bell chaparrazo. Asinas que i heba probabilidatz de buenas luces d'atardeixer. Siempre he quiesto pillar, con las colors royencas dimpués de las tronatas, rayos de sol filtrando-se entre las boiras. Pero como ixo ye pro difícil, me conformo con fer el que se pueda.
E per ixo marché enta la Cruz de Guardia, immillorable mirador sobre buena parte de la Val de Chistau:

E tamién sobre Pineta. Yera nuble e el sol se filtraba, pero no yera el que yo querebe:

 Per ixo, veyendo que hebe a mirar unaltra alternativa, pensé en Cotiella, an que i heba boiras e le entraba luz lateral:

E con esto prencipia la replega de setiembre. E estas fotos van in memoriam.