domingo, 30 de agosto de 2015

Per la Val de Tena (e II)

Pos ixo, que contino con las fotos de la escapata enta la Val de Tena. La idea yera fer las zagueras luces (vid. la entrata anterior), bel·launa nocturna e las primeras luces sobre es Infiernos (pa ixo m'hebe llevato el tripode). E aquí tenetz l'hotel de las mil estrelas (encara que ixa nuet n'i heba pocas perque la luna yera gran):
 E las fotos de l'amaneixer:


 Dimpués ya a replegar el campamento e ir enta'l Collato de l'Ibón de Tebarrai pa puyar ta's Infiernos. Amagué el saco, la tienda e el tripode e entalto, a pasar per la marmolera.
Envista enta es Ibons Azuls e Vachimanya:
 En la tuca de l'Infierno central (3083 m.):
 La famosa cresta (no ye pa tanto, ye muit ampla e se i pasa bien se no tiens vertigo e las condicions son buenas:)
 E ya cara abaixo, pasando a'l canto de l'Ibón de Tebarrai enta la Collata de Piedrafita:
 Baixando ya enta Sallent, con l'Ibón de Campo Plano e abaixo Respomuso baixo la mole de Pico Moros (bell día caldrá ir-ie):
 Ibón de Campo Plano:
 E l'ibón de las Ranas (creigo):
Un hordio en Respomuso (a tres eurazos...) e a las quatre suelas enta Sallent.
El track:



viernes, 28 de agosto de 2015

Per la Val de Tena (I)

Per cada anyo, se puedo foi una escapateta d'un par de días a dormir ta la montanya. Goso aprofitar, no pas siempre, pa ir ta bell puesto t'an que no i soi estato u fa anyos que no i voi. Estianyo trigué la Val de Tena (puede estar que fes 18 anyos que no peteniabe per astí), en concreto es Ibons Azuls, pa poder fer fotos e, de paso, puyar ta bell 3000 inedito pa yo (es Infiernos, més concretament). Qué goyo me fa ixa zona. Yo cuento que ye perque ye muit diferent de la mía, tot de granito sin quasi caliza (e ixo que en la Valle Bielsa tenemos parte de la montanya de Parzán que ye granitica, pero no n'i hai guaire).
Pos ixo, que prencipié a caminar dende O Balneario de Panticosa a las dos de la tarde (yo siempre con ixes horarios tant rars) e, pensando-me que se me faría tarde, en dos horetas e media yere en l'Ibón Azul d'alto.
Las fotos d'ixe día.
L'arribata, con un solazo d'el copón, pero con uans boiras que prometeban:
 Enredando con las uellas (estoi que astí les dirán ovellas) de churra tensina, que no se gosan veyer per Sobrarbe:
 E un mardán que i heba per astí de no sé aón:
 Zagueras luces sobre Comachibosa/Vignemale, con el 100 macro (án yeran las boiras que i heba de tardes?):
 E con l'angular, pa poder veyer l'Ibón:
 E las zagueras-zagueras luces:
Estas son las d'el primer día, ya vendrán las d'el miércols.

sábado, 22 de agosto de 2015

Una nuet en la Estiva

S'heba promeso a's críos e caleba cumplir-lo. Amés de que nos lo pasemos de bitibomba, aprofité pa fer quantas fotos nocturnas. No han salito guaire bien, con mutos pixels calients que espero que se deban a que la temperatura no yera mica fría e el sensor de la camara se calentaba en exceso. Este hibierno caldrá tornar a fer largas exposicions quan sía chelando a veyer se no'n sale tantos, de píxels calients.
Asinas se despediba el sol d'una boira sobre Treserols:
 Las nocturnas.
Una de la Vía Lactia sobre las Zucas:
Una circumpolar:
Una larga exposición enta'l sur (mientres dormibe), se veyen cómo chiran las estrelas en diferents sentitos (Sur e Norte). De izquierda enta la dreta: Zuca punchuda, Pico Anyisclo, las Solas, Soum de Ramond, Perdio, Cilindro, Garién, Felqueral e parte de La Capilla:
E l'amaneixer, sin grans luces (unaltro madrugón per demés, e en va n+1):
E ixo ye tot per aora.




martes, 18 de agosto de 2015

Lardana/Llardana (Posets) 3369 msnm

Como totz es meses d'agosto... Asians cantaban Ixo Rai fa anyos. Pero yo, totz es meses d'agosto e septiembre, m'estimo més de fer montanya que salir de fiesta. Asinas que el domingo, pasando de salir en las fiestas de Bielsa (m'estimo més Carnaval), me'n puyé ta Lardana (toponimo chistabín) u LLardana (toponimo benasqués) u Posets (toponimo d'es mapas e d'es montanyers) dende Viadós.
Me pensabe quem'hebe recuperato ya de la puyata 6 días antes ta'l Perdito, pero es quadríceps no opinaban el mesmo e estioren ronyando tota la puyata.
El millor? Las envistas.
El pior? La chent que puyaba a cuerda per la man benasquesa e es zaguers 500 metros de puyatas, que son una lera infernal dreta como un campanal.
Per an puyé yo no veyé soque chizarces, marmotas e un pintaparetz (Trichodroma muraria, en el Perdito tamién en veyé un), i hai unas envistas enta la Val de Chistau e las montanyas de Bielsa impresionants, la cheolochía de Lardana ye impresionant... Mutas cosas buenas que compensan es 1740 metros de puyata que te clavas pa almorzar.
Pero bueno, cada un que puye per an quiera e totz tenemos dreto a ir ta la montanya, encara que agosto ye agosto.
Las fotos... Una pila, pero esto ye una cronica montanyera e no ye de fotografía.
Primeras luces, me recordaba a Islandia:
 El manguant que m'encorre siempre per ixas montanyas:
 Envista en l'Aneto:
Enta Turbón:
 Enta la Val de Chistau:
 La cresta Pavots-Espadas-Lardana que querrí haber feto pero que indo solo va a estar que no... A'l fondo Cotiella e Penya Montanyesa:
 Las formas de la roca, con la Lit de Lardana (el poco que en queda):


 Viadós tot baixando:
 E las montanyas més sinyaleras de la valle Bielsa: Suelsa, Fuesa, Treserols, Astazus, Robinyera e L'Almunia:

E aquí el track:


viernes, 14 de agosto de 2015

Luces de tardes

Ahier de tardes podié fer una escapateta e, como me deixaban un 4x4, decidié d'ir ta la Cruz de Guardia, t'an que feba anyos que no i hebe puyato (en coche, a pata l'anyo pasato). Como i heba habito tronatas e en daban més, i puyé per veyer se tenebe suerte con las luces royas que se meten en Pineta quan truena. Pero no las trobé, perque ya no tornó a tronar e salió el puerto. Asinas que aprofitando que llevabe tele fayé esta foto sobre quantas montanyas de la Valle Bielsa: Cuezo, Comodoto, Punta la Estiveta, Garién, Felqueral, Astazus e el Puerto la Lera:

E dimpués fue a veyer se i heba buen atardeixer sobre Lardana, pero las boiras no me'l querioren ensenyar. Con tot e con ixo, sobre el macizo de Cotiella sí que i habió unas lucetas decents, encara que tampoco no yeran pa tirar codetes:

Que pasetz buenas fiestas de Bielsa.

jueves, 13 de agosto de 2015

Glarimas de Sant Lorient

Como totz es anyos, miro de salir a veyer las Glarimas de Sant Lorient u Perseidas. Estianyo decidié que irí a veyer-las ta Vallivió, un puesto més que conoixito pero que tiene posibilidatz. Mientres me mirabe enta el cielpa veyer las estrelas e pensabe (no i hai cosa millor que estar solo, en bell medio d'el mont e en silencio pa ixo), deixé la camara fendo una circumpolar (no pas completa, tenebe suenyo).

 E aquí una de 25 segundos con la Carrera Sant Chaime:
Ahier torné con companyía infantil, pero yera nuble e no se'n veyeba garra.

miércoles, 12 de agosto de 2015

El Perdido (Treserols)

Per fin, el lunes, dispongo d'un día pa poder ir ta la montanya sin prisa, sin mirar d'estar en casa a la hora de comer.
Como el sabebe dende bell día antes, me meto a pensar t'án puedo pegar, e como feba días que querebe repetir el Perdido, pos t'allá que voi. L'altra vegata hebe puyato per la Collata Anyisclo e la Punta las Solas, esta vegata querebe cambiar una miqueta e decidié (perque ibe yo solo, no trobé acompanyants) de puyar per la Feixa Tormosa, pasando per la Terraza Bellavista (qué nombres les meten, mama mía) e la collata que i hai entre el Soum de Ramond e el Perdido. Ye un camín largo, dur, an que cal trepar en bell tramo, encara queda nieu en la zaguera rampa, no i hai camín a ratos, cal saber orientar-se bien,puyas més de 2400 metros positivos, etc. Bai, que ye muto més fácil de puyar per Góriz, pero manimenos per allá no cuento que tiengas ixa sensación de puyar per puestos salvaches, sin veyer quasi a dengún, con unas envistas enta Pineta impresionants.
Pero bueno, la cima la puerta d'el Corte Inglés, e la baixata per la Escupidera una romería. Per ixo m'estimo més d'ir ta altras montanyas an que no i hai tanta chent, encara que estas emblematicas calga visitar-las de cabo ta quan.
Como ibe a fer montanya, las fotos son de recuerdo, no esperetz veyer calidat, yo no sé se yera la falta d'oxicheno u la cansera, pero no yere pa componer :-)
Las fotos d'el día.
Vista enta Marmorés tot puyando:
 Enta Pineta dende la cima:
 Enta l'Ibón de Marmorés antes de la Escupidera:
Un manguant que yera per astí_
 Enta Lalarri, Robinyera, L'Almunia, La Estiva, etc.:
 El glaciar:
 L'augua baixaba a chorro, se desfá e la chent charrando de la Pantoja u de Paquirri:
 Un ibonet verde antes d'el Balcón, chugando con el reflexo d'el glaciar:

E la vista enta Pineta dende el balcón, sin uembras perque el sol alto:

Dende el Balcón ya baixé a tota vitesa.
E el track:
 




domingo, 9 de agosto de 2015

La fe

En qüestions relichiosas soi ateu, pero per lo que fa a temas fotograficos, quan vas mirando las primeras u las zagueras luces, mutas vegatas se tracta de tener fe. Sales de casa con grans expectativas e tornas sin cosa (como m'ha pasato esto maitín), u sales a veyer qué te trobas, sin guaires esperanzas, e a la fin tiens recompensa.
Se fa u no fa ye el que nos pasé ahier. Llevanos uns días charrando de quedar el sabado de tardes pa ir a fer fotos (no soi yo l'unico barrenato que va per ixas montanyas con camara e tripode a horas intempestivas), mirando previsions e a la fin decidiemos deixar-lo estar perque la previsión yera que plevería tamién tota la tarde e tota la nuet d'el sabado a'l domingo, asinas que las nuestra esperanzas d'un atardeixer buen se desfeban.
Pero a la fin. el sabado a las 5 de la tarde, es telefonos prencipian a sacar fumo de gritatas e whatsapps: qué femos?, miramos de salir?, t'án imos? A la fin i fuemos 3/4 d'es previstos (la un que faltaba heba a venir de leixos) e teniemos una miqueta de suerte. Pero ixo sí, nos costó lo nuestro: boiras que iban e veniban sin deixar-nos veyer cosa, plevia, piedra e, quasi a la fin, bel·la rayateta de sol que iluminó las boiras.
Pos ixo, qüestión de fe, cal ir-ie e, bel·la vegata, la fe fa que no se muevan las montanyas, pero sí las boiras (u talment fues l'aire de puerto).
Asinas nos recibió:

 De cabo quan le daba per mallar de firme:
 Pero a la fin la espera tenió la suya recompensa:
 Las boiras iban e veniban, ofreixendo diferents luces:
E esto meitín soi puyato ta Pineta a veyer se i heba suerte con las priemras luces, pero no pas siempre se'n tiene, de suerte (se no esto sería muit fácil e perdería la emoción).