martes, 30 de septiembre de 2008

A per es camparols

Tos meto el programa d'unas chornatas micolochicas que ha organizato l'Ayuntamiento pa's que tos fayan goyo es camparols pa esta fin de semana que vien. Esperemos que dica que prencipien pleba e mereixca la pena d'ir a plegar-ne. Yo maitín iré a plegar bel robellón e me pareix que ya no'n mincharé més, que ya n'he minchato un par de veces este agüerro (tant ixuto).


Cagondiós, el copio e pego pero no quiere salir, tos deixo el enlaz:
www.bielsa.com/


miércoles, 24 de septiembre de 2008

Es churros de Lalarri

Como ya tos die un anticipo d'es Churros de Lalarri, hue tos ne meto bel·la foto més, que ayer me'n baixé per el camín d'es Churros. Encara faltará la parte d'alto, dende el puent de la pista dica es plans de Lalarri, que el deixo p'altro día. No baixa guaire augua -somos de sequera, a veyer cuan quiere plever- e cuan es faus pillen la color de l'agüerro de tot i tornaré, pero me pienso que son majetas (e ixo que yera nuble e escur como una lupatera) e las comparto con vusaltros, queritos lectors.


lunes, 22 de septiembre de 2008

Un diya productivo

Hue, encara que la luz no yera mica buena, he puesto fer cuantas fotos que me pareixen pinchas, ya diretz vusaltros.
E ixo que yenos en alerta narancha per precipitacions, pero no ha caito ni un sacre d'augua. Ixo sí, yera ixa luz blanca que crema es uellos (no sé se conoixeretz el refrán "sol blanco augua en el campo") e per ixo m'he mirato que no salís el ciel en garra foto.
Ya viyetz que encara que no teniamos las colors plenas de l'agüerro, encara se puede ir fendo cosetas.
Salut.

Una floreta muit pareixita a'l enganyapastors, pero con tallo, se conoixetz el suyo nombre ya me'l diretz.


Un d'es Churros d'el barranco Lalarri dende la pista:
El mismo barranco pero endrezando-se enta'l siguient churro (u sallent, que queda en toponimia):
E una teraraina que m'he trobato cuan arribaba el sol per Pineta (las 9 e pico, que dica alavez te i chelas), e m'ha feto goyo la composición:
Ya veyetz que no son chamineras, pero me pienso que no desmereixen.

jueves, 18 de septiembre de 2008

Dende l'atalaya

Ya feba días que no actualizabe el blog, ya perdonaretz. Tamién ye que en estes zaguers días no he feto garra foto que en valga la pena, perque ya soi esperando l'agüerro en plenitut, e ixo que encara le falta cuasi un mes. Como ha feto muto frío (aire de puerto con las primeras nieus per es altos, no guaire, una zinarrata, pero pro como pa que te cheles) tampoco no he puesto caminar guaire.
Esta foto ya debe de tener cerca d'un mes, pero me pareix maja. Salié dende La Estiva cara Feixa Castiecho per Prebón-rodiando Lalarri per alto- e cuan ya yere a punto de prencipiar a baixar me paré a fer-me un fumarret e viyé a este chizard (como podretz apreciar ye un masto, e con buens cuernos) que atalayaba Lalarri dende una pen·na pero no me viyeba a yo. Lastima de no tener un millor obchectivo, ya en voi mirando per internet e le tiengo ganas a un, pero con la economía como va no soi segur de fer ixe gasto. Mientres nos habremos a aconformar con el que tiengo. Salut.

martes, 9 de septiembre de 2008

Lirón II

¿Tos acordatz d'ixe lironet que viviba en una caseta de paixariquetz? Pos l'altro día i tornó con parella, ya son fendo-se el niedo pa pasar el hibierno. Cuan salioren de la caixa puyoren ta un árbol, e yo tamién, dezaga, pinchato d'un camal con una man e en l'altra la camara foto... comedias pa poder meter-zos aquí esta foto.

lunes, 8 de septiembre de 2008

Tuera e bomolón II

Un par de fotos més d'este estilo, que m'ha feto goyo la tecnica. Pa variar una miqueta en meto una de tuera amarilla. Ya se van desfendo las flors e formando un capullet. Esto ya marca agüerro (frío, augua) e setas. E la calefacción de casa que ya prencipeya a meter-se en marcha... la ruina.

martes, 2 de septiembre de 2008

¿Ya ye aquí l'agüerro?

Per un regular, en Pineta l'agüerro ye en el suyo esplendor t'allá ta'l Pilar. Debe d'estar la sequera u que me se yó, pero i hai camals que ya amuestran las colors tipicas de l'agüero como es urmos, azirons, bixorteras, avellaneras... u este fau, con un camal ya amarillo entre güembra e sol.
Habremos a asperar més pa tener agüerro agüerro, pero como anticipo no ye mal.