lunes, 27 de mayo de 2013

Floretas

Este cabo de semana soi estato castigato en la capital, asinas que no he puesto salir. Miraré de resarcir-me este. Manimenos tiro d'archivo pa amostrar-tos dos floretas blancas.
La flor d'el martuel (Fragaria vesca) , no tardaremos a minchar-ne:
E esta ye, dica que se pase per aquí JMN e nos despase las dubdas, desconoixita. E como ya s'ha pasato, ya la tenemos identificata, una Dryas octopetala, una reliquia de la era glaciar. Per cierto, que leigo que creix entre es 1700 m. e es 3000m., pero yo la he vista a 1200 se arriba e a piet d'auto:
A veyer se me cunde el proximo cabo de semana.
P.S. Pa veyer millor las fotos he visto en el blog de José Fernández un metodo: i punchatz dencima e pretatz F11.

domingo, 19 de mayo de 2013

Primavera, encara que no'n pareixca, II (u ixo espero)

Ahier marché enta Ordesa. Hue -que no ha feto mal día de tot, pos dica la tarde no s'ha meso a plever- no podebe (navatas e comida familiar) asinas que el viernes dicié que encara que plevés a tot meter saldrí. Amés esperabe poder pillar bell fabolar con boira de l'augua de la nuet anterior. Pero no pillé boira, e sí nieu como se no hes nevato en tot l'hibierno. La verdat ye que el contraste tonal entre el verde electrico de las fuellas d'es faus con el blanco de la nieu yera bien pincho. Ixo sí, pa fer fotos un día malismo, pos prencipió plevendo, dimpués me cayó una miqueta de matacrabitos e dimpués se metio a nevar como se fues febrer. Se mulla el filtro, emporqueas el polarizador, se banya la camara... bai, que cal tener paciencia.
Este ye d'el principio, quan quasi no pleveba e i heba boiras que rondaban a'l Tozal d'el Mallo e a'l Gallinero (estoi que se dicen asinas):
Paré cuenta en las venas d'este fau, e dimpués el contraste entre el verde e el blanco, aquí ceyaba una miqueta de matacrapitos:
 Prencipia a nevar, no guaire pero pa que veigatz l'ambient:
 Una miqueta més zarrata con el 100 macro:
 El famoso churro, ambientazo hibernal, a veyer se sabetz trobar una gota :-(:
 Quan sales d'el fabolar (pa la mía desgracia no i heba boira entre es faus), un B&N quasi natural. Aquí ya nevaba con alma:
 E aquí ya cayeba la mundial, no arribé ta la "Cola de Caballo" perque no'n valeba la pena e querebe tornar ta casa a la hora de comer:
 Unaltra envista:
Ya baixando, como siempre, me trobé la romería d'Ordesa: montanyers, turistas, turistas con zapatos, con zapatillas... Mismo en veyé dos que me recordoren es míos tiempos mozos quan no sabenos de la existencia d'el gore-tex e correnos per la montanya con chirucas malas: iban con deportivas e con bolsas de basura en es pietz :-)
En fin, que dimpués pasa accidents u cal ninviar l'helicoptero a replegar chent...
Salut.

miércoles, 15 de mayo de 2013

Primavera, encara que no'n pareixca.

Esto maitín, un ratet antes d'ir ta un entierro, pareixeba que s'ubriba un clar en el ciel griso que tenenos de buen maitín. Asinas que he asomato una miqueta el morro per el Plan, a veyer se i heba suerte e podebe pillar bell refleixo se s'heba feto basetas. I hai augua a manta, pero pareix que no prou pa que se faya la basa gran que se fa en bell medio d'el Plan.
Tampoco no i heba garra primer plan que das profundidat a la toma, asinas que encara que aora pareix obligatorio de ficar-ne un encara que sía con calzador, no he puesto, perque es patos no s'estaban quietos :-)
Bueno, pro de retolica. la envista dende el Plan enta Pineta:


 E las primeras orquidias que veigo en la valle Bielsa estianyo, quan baixabe a'l canto de la Fuent de la Pera, una Dactyloriza elata ye, como bien m'ha correchito JMN (mersi):

Dan un orache malismo pa'l cabo de semana, d'augua e baixa la cota de nieu. No sé se podré salir ta la montanya ni ir a veyer "as navatas". Ixo sí, me pienso que estianyo baixarán en l'aire.

lunes, 13 de mayo de 2013

Anyisclo primaveral

Soi estato ya quantas vegatas en este puesto, pero siempre mirando l'agüerro. Pero l'altro día veyé una foto d'este lugar dende Sestrals e m'animó a ir-ie. La verdat ye que d'agüerro ye impresionant, pa que se te desencaixe la bariella d'admirar-lo, pero de primavera tampoco no ye brenca mal, con ixe verde electrico que tienen las fuellas d'es faus quan salen.E amés se nota este hibierno que hemos tenito con tanta nieu e augua, en sale per tot. En resumidas cuentas, que ye tot precioso, prencipia a salir flors per totz es puestos (e encara faltan las millors :-D) e tos consello a's que podiatz que no tos perdiatz la primavera en es Pirineus, que presientan aora tota la gama de verdes.
Un fau a'l que le tenebe mutas ganas (sobre tot per las venas) pero nunca no el hebe puesto pillar bien de luces:
 En el Puent natural de roca, mirando de fer bel·la abstracción (no sé se el he conseguito):
 No m'atrevié a pillar un punto de vista més baixo, las leneras esbarizaban cosa mala e i heba muta corrient (se me i caigo me'n voi de capeza ta'l Puent)
 Aquí el río baixa una miqueta més tranquilo:
 Un barranco lateral:
 Unaltro puesto que en vale la pena de visitar:
 E el barranco d'A Pardina, an que cayé de grapas fa uns meses :-):
 E ya, baixando, m'entretenié con la flora.
Aquí la Pinguicula grandiflora a punto d'ubrir-se:
 D'esta, la Scilla lilio-hyacinthus (u Ixacinto, como la casa d'Estaroniello) en hebe visto en la zona d'el Puent pero yeran sin ubrir. Quan baixabe en trobé una pila ya en flor, e la verdat ye que son preciosos, e més perque encara no es hebe vistos montesins. Yeran a'l canto d'el Cardamine heptaphylla, asinas que deben precisar las mismas condicions ambientals:
E ya quan tornabe enta casa, dende el mirador que i hai antes de Vio, una imachen clasica:
  
P.S. E bueno, pareix estar que aora este blog ye escrito en LAPAPYP, pero me niego a comentar esta lei que me pareix subrealista, asinas que yo continaré charrando d'aragonés e catalán.

miércoles, 1 de mayo de 2013

A Fraga

Hue, día festivo pa's que troballan, que per cada día son menos, he marchato ta la montanya perque no podré ni sabado ni domingo.
Daban boiras de maitins, e como tiengo tant mala suerte quan salgo a fer primeras luces que siempre pillo el ciel sin una boira, me dicié que hue sería el mío día pa pillar un ciel con unas luces espectaculars. Con ixa idea en la capeza, me metié el despertador a las quatre d'el maitín. Pero han salito dos cosas mal. La primera que me durmié a las dos pasatas de la nuet e quan ha sonato el he matato e m'he dato media vuelta. Segunda, que quan he unierto un uello a las 5 e media churando en arameu per la mía poca formalidat, yera plevendo. Bien se vale que no m'he despierto a la hora prevista perque el habrí feto per demés.
Asinas que he feto una miqueta de tiempo antes de marchar t'A Fraga, en el río Yaga, debaixo de Revilla.
Ye un toponimo curioso, pues cuento que viene d'el latín FABRICA e nos indica que m'es d'antes debió d'haber-ie bel·la industria que dependeba de la fuerza d'el augua. Encara i quedan es restos d'una caseta que serviva a's de Revilla e Estaroniello pa fer-se luz. En Bielsa, an que més d'antes i habió una important industria minera, tenemos la carrera Lafarga, que tiene el mismo orichen que el castellano fragua, l'apellito catalán Fàbregas, etc.
A'l que ibe, que ye una curseta bien curta e sencilla, pero el lugar ye espectacular, una pena que las fotos no permitan dimensionar bien el puesto. Ixo sí, baixaba muta augua e ixo se nota a la hora de fer largas exposicions por la hora tant tempranera e perque yera nuble e plevendo...
El barranco Consusa, quan yere choven, menos fiero e no tenebe fillos el baixé bel·la vegata. Siempre m'acuerdo d'este rapel volato de 30 metros (e de las marmitas trampa que i hai antes):

Dos tomas d'el Yaga, el churro d'el fundo debe de medir uns 15 metros:


Orella d'onso ya en flor (yo cuento que nunca no la hebe vista floreixita tant luego...):

E un caragol, ya que llevabe el macro e no he trobato garra orquidia, que yera una de las ideas que llevabe, m'he entretenito un ratet: