lunes, 31 de agosto de 2009

Puyata ta Treserols

Ayer puyé con dos colegas ta la punta Treserols , més conoixita per lo suyo nombre en castellano como Monte Perdido (que a la suya vez viene dende el francés Mont Perdu). Ya feba anyos que charranos de puyar-ie, e per fin estianyo el fayemos. Fayemos la ruta més larga de las que conoixco: puyar dende el refugio de Pineta (1240 m.) ta la Collata Anyisclo (2440 m.), dende astí ta las Punta de las Solas (3002 m.), pasar per debaixo d'el Pico Anisclo (u Soum de Ramond) dica la collata d'este con el Perdido e ya ta'l pico (3355 m). Dende astí baixemos ta'l Ibón chelato (que no'n yera), ta la Collata d'el Cilindro e baixar per lo glaciar ta Marmorés e dende astí ta Pineta. Mama mía qué sobo. I fayemos el camín china chana sin correr mica, pero el cansancio se va metendo en la piernas. A yo me feba més miedo la baixata, pero baixé millor que no me pensabe. Fayé un borguil de fotos, e tos ne deixo bel·la una. Ye una corsa que tos recomiendo se tenetz una miqueta de forma fisica, perque las anvistas sonbuenismas (Pirineu aragonés dica Penya Uruel, Pirineu francés, Moncayo...).
Collata Anyisclo e Valle de Pineta dende la puyata ta las Solas:
Dende el mismo puesto enta L'Almunia, Rubinyera e La Estiva:
Castillo Mayor e Penya Montanyesa puyando enta Las Solas:
El canyón d'Anyisclo dende Las Solas:
Pico Anyisclo (Soum de Ramond) dende Las Solas, dezaga amagato nos espera el Perdido:
Punta Treserols dende la Collata d'el Pico Anyisclo:
El "trío guaire" en la tuca més altera, como dició el de la izquierda "es hombres puyan dende Pineta, es gabachos dende Góriz":
El Cilindro e el ibón (es)chelato dende la punta:
La famosa escupidera, qué puyatón que i hai, m'estimo més de fer el camín que fayemos nusaltros (1000 metros més de puyata que dende Góriz) que íxe:
El ibón de Marmorés dende la collata d'el Cilindro:
E el glaciar de Marmorés, poco en queda, e con estas calors se desfá encara més rapido:
D'aquí t'abaixo, como ya el tiengo pro visto no ficié fotos. Me'n tienen que pasar bel·launa més que se fayó con altra camara, a veyer se m'acuerdo de pinchar-las. Salut.

lunes, 24 de agosto de 2009

Una nuet en La Basa la Mora

Ayer i fue con dos fotgrafos de verdat (la un ye frikosal, tenetz el enlaz a'l suyo blog astí a la dreta, tos lo recomiendo), no pas como yo, con qui pasé uns ratos buenismos (no i estiemos tota la nuet, a las 2 e cuarto ya yere en casa) fendo-nos unas risas, charrando de fotografía, d'el santo prepucio e de cuantas cosas més. La un, el que gastaba canon, me deixó un obchetivo de 50 mm. con una apertura de diafragma de 1'8 (ixo ye la hostia de luminoso), e estié probando exposicions curtas (30 segundos) con ISO 800 e el diafragma ubierto de tot. No fayé fotos de més tiempo perque con 50 mm no se pilla guaire anvista, asinas que me centré en mirar de conseguir bel·la foto anque fues remotament similar a las que fa, e nos deleita con eras, frikosal. Ya me diretz qué tos pareixen. A yo me fa més goyo la primera.
Salut.

jueves, 20 de agosto de 2009

Chizart e pintaparetz

L'altro día, puyando per la montanya, podié alufrar estes dos animals. El chizard el tiengo més visto que el tebeo, pero la curiosidat ye que le fayé la foto con un gran angular (18-55 mm), con que ya podetz contar que el tenebe bien cerqueta, casi a tocar. El pintaparetz (Trichodroma muraria) ye una especie de paixarico que no ye de buen veyer. Fa tres u cuatre anyos el podié veyer esvolastriando-me per dencima en un barranco un buen rato, pero no llevabe la camara con yo. Ante ayer, cuan el guipé amané el 70-33, la pena ye que no ye estabilizato, el enfoque ye lentismo e ye un f/4'5, per el que a 300 mm. ye més escur que una lupatera. Per ixo se i vei ruido e no ye el enfoque bueno, perque ye feta a pulso e l'obchetivo no ye mica buen, pero ixo a yo ahora trampis, he tenito la oportunidat de fotografiar-lo, e espero que en uns anyos (e millor equipo) tienga una altra vez la posibilidat de fer-le fotos.


P. S. Encara tiengo a l'archivo una pila fotos, como las de la puyata de l'altro día ta Punta de las Solas (3022 m.), pero contino tenedo pro galvana con el blog.

lunes, 17 de agosto de 2009

Flors de nieu (leontopodium alpinum), in memoriam



Una flor de la montanya pa un montanyer. Sirvan estas dos fotos como chicot homenache a Óscar Pérez, la suya familia e amigos, la chent de Peña Guara e sobre tot a's que han preso la difícil decisión de deixar la operación de rescate. Un abrazo a totz ers.

lunes, 10 de agosto de 2009

Panoramica dende Rubinyera

L'altro día puyé ta Rubinyera con totz es talabartes (sobre tot el tripode, que pesa més que la puta que el cagó cuan puyas ta un pico). Ye un tres mil d'es més chicotz, seguntes uns mapas mide 3.005 m. e seguntes altro 3.003 m. Total, que fas rodar una tusco de la punta cara abaixo e ya no arriba ta's 3.000. El caso ye que encara que no sía d'es tresmils més celebres, tiene una anvista buenisma enta Barrosa, Treserols, Marmorés, Ruego, L'Almunia, Mondoto... La pena ye que l'altro día s'amanaba la tronata que cayó di nuet e i heba muit mala luz. Con tot e con ixo, ya que i hebe puyato el tripode me decidié a fer-ie cualques fotos pa fusionar-las como panoramica, e aquí tos deixo el resultato.

Boiras

Hue hebe de puyar ta Marmorés, e tenebe la intención, ya que i puyabe, d'ir ta l'Astazu grand. Cuan soi salito de Bielsa i heba muta boira per tota la Valle Pineta per la humedat d'estes zaguers días de pleber. Mientres ibe puyando salibe de la boira que deixabe enta abaixo, pero malas que soi arribato ta'l Embudo s'ha meso la boira preta alto en Marmorés e no he puesto fer so que almorzar alto con el forro preto e marchar cara abaixo. Ya se viyeba que ixas boira preta se'n iría, pero la cuestión yera cuán, per el que he pillato el camín e cara abaixo una altra vez. La primer foto ye de la boira en·n'a Valle, e la segunda de cuan marchabe ya cara abaixo.
Pa'l unico que ha sirvierto ye pa eliminar las toxinas de la ronda d'ayer de la fiesta Parzán.


A veyer qué día pincho fotos de la puyata ta Rubinyera, el problema ye que i heba muit mala luz.

martes, 4 de agosto de 2009

Macro

Encara que llevo uns días que soi tornando a fer buena pacha con la fotografía d'anvistas, que las tenebe un poquet abandonatas, no m'olvido mica d'el macro e de las flors, cuquetz e cuquetas. Aprofitando que he deixato el tabaco habré a cabidar pa comprar-me un obchetivo especifico pa ixes menesters (pero en preciso -u tiengo el concieto- de cuantos: un grand angular pa anvistas e nocturnas, el 70-200 f/2'8 IS, el 100-400 f/4 IS, el...). Ya se verá, per aora tos deixo con unas fotos d'esta misma tarde.
La primer foto ye d'una zygaena (¿s'escribe asinas?), aprofitando que yera tarde (sobre las 20:15) pa que no se movés el bicho e que no feba guaire aire m'ha salito a foco, perque llevabe uns días que les ne febe de días e no i heba Dios qui las podés fer bien e que s'estasen quietas. L'altro día me deciban que es altros bichos no se las minchaban perque teneban no sé qué vereno, pero una vez viyé como una aranya se'n minchaba una. El problema d'esta foto, e de cuasi totas d'esta tarde, ye que per una error (¿despiste?) ye feta con ISO 500, pero con tot e con ixo no se i vei guaire ruido.
Esta ye d'un altro cuco, bel·la mena de cucaracho antenuto:
Paso aora ta las flors. La primera una flor de nieu, esta sí que la he vista bien alta, cerqueta d'es 2000 metros se no més:
Esta ye una altra siempreviva como la d'el altro día, me fa muto goyo esta floreta, que ademés gosa estar muto sufridera per l'ambient an que creix:
E ya pa rematar una escabiosa:
Au, un altro día més.

Panoramica

Esta ye la primer panoramica que foi fusionando cinco fotos fetas dende La Estiva (qué ganas tiengo de fer-ie una nocturna). Pa estar la primera me pienso que no ye mal. La primer conclusión que quito ye que talment sin el polarizador gane. No sé, ayer cuan se me'n venió ta la capeza no i pensé guaire, no més en pillar es puntos comuns. Caldrá ixulufrar més sobre estas cosas. la segunda cosa que he aprendito ye que fer-las con Photoshop ye sencillismo. Va dende Comodoto per la izquierda de la imachen dica El Sobrestivo per la dreta, viyendo-se la Plana Fonda, Treserols, Astazus, Garién, Pineta e La Capilla.
Pro a fés que hetz a clicar dencima de la foto pa veyer-la grand.