jueves, 30 de julio de 2015

Robinyera

Yo no voi ta la montanya quan quiero, seno quan puedo. E ixo ye el que me pasó el martes, que podebe escapar-me e no e dubdé mica. A las cinco e poco ya yere en la Borda Brunet pa puyar ta Robinyera, un d'es 3000 més accesibles de la valle Bielsa. Pero que sía accesible no significa que no hayas de puyar 1300 metros. Sabebe que irí chusto de tiempo e que se me faría de neut, pero con luna quasi plena, frontal e GPS no i habría problema (bueno, sí, que se m'acotoloren las pilas d'el GPS... pero rai, se me fayó de nuet en buen terreno).
Sobre las 8 llegué en la punta, quatre fotos rapidas e cara abaixo, que querebe pasar la lera con una miqueta de luz. I puyé el tripode, pero per demés, totas las fotos fetas a pulso e tirando d'ISO, asinas que calidat, mica.
L'autorretrato, que ya no falta :-)
 Treserols, Astazus, La Capilla, Vignemale... e tot el solazo de frent:
 L'Almunia, el pico que més goyo m'ha feto de totz es que he puyato:
Enta la Collata d'Anyisclo:
 Es Gorgos de Lalarri:
 Zagueras luces sobre Cotiella:
 E la hora azul con la luna sobre Comodoto:
E prou.

martes, 28 de julio de 2015

Suelsa

Per se el sabato no hebe tenito pro con el sobo d'es Astazus, el domingo nos ne puyemos totz ta Suelsa, un quasi 3000 (2972 msnm, pa estar exactos). Zilieta se portó como una  campeona, mesmo quan perdié el camín e habiemos de puyar un troz de lera como es chizarces, e Guillén, como el llevabe en dinya a las costiellas (en mochila), no caminó mica, pero puyó ta una buena altura. Como que no me fa goyo de puyar fotos d'es críos ta internet, deixo solo las fotos de paisache, las altras son pa consumo propio.
Ibón d'Ordiceto, con muit poqueta augua:
 E el Cau e la valle Verde, dende la Collata:
Esta tarde a veyer se me vaga de puyar ta Robinyera...

lunes, 27 de julio de 2015

Astazus

Feba días que no salibe a caminar como cal. La zaguer vegata que el fayé, e no fue guaire, fue pa fer la Feixa Tormosa. U sía, que ya heba plevito (que ye el que se gosa decir, perque i hai una sequera gorda). Este cabo de semana querebe puyar ta Marmorés, t'an que feba anyos que no ibe. Deixé dito en casa (siempre que m'acuerdo deixo dito ta ón voi, no sía cosa que calga cobrar el seguro) que se me trobabe con fuerzas, mirarí de puyar ta's Astazus, pero contabe con que podrí per la falta de forma.
Asinas que con ixe obchectivo salié de casa a las 4:30 de la nuet (cosas d'el poco dormir) e acometié cara Marmorés. I puyé muto millor que no esperabe, asinas que endrecé enta la Collata que da vista (quan quiere) enta Gavarnía pa puyar ta's dos Astazus: el chicot primer e el gran dimpués.
Como la salida prometeba estar fura (a la fin quasi 1900 m. de desnibel), no me llevé ni an el tripode, asinas que las fotos son testimonials, fetas totas a pulso, como recuerdo d'una chornata montanyera que ya precisabe.
 Primeras luces sobre las Zucas, espectaculars. La primera con el 100 macro (tirando d'ISO) e la segunda con l'angular:


Debaixo d'ixa boira ye Gavarnía. Se veye la mía uembra, amés d'el Tallón, el Casco e Pico Marmorés:



Dende  l'Astazu gran enta la Plana Marmorés e Pineta, una envista espectacular con l'Ibón de Marmorés, Cilindro e la Tuca Treserols:

Enta l'Ibón e el Pico Felqueral, recortata en formato quadrato perque la parte d'abaixo no deciba cosa:
La diferiencia d'orache entre la cara norte e la sur:

E tot baixando, e aprofitando que el sol yera alto (las 11 a.m.) e que no feba uembras en la valle Verde, una foto dende el Volant de marmorés enta Pineta e las suyas montanyas:
E ahier puyemos totz enta Suelsa (Guillén en dinya a las mías costiellas), pero ixo ye unaltra historia.
Tos deixo el track per se nunca queretz fer-lo:



jueves, 23 de julio de 2015

De tornata

Dimpués d'estar una semana per tierras cantabras, ya soi tornato enta la montanya. En estas vacacions quasi no he feto fotos (he de fer-me con una compacta decent pa las fotos familiars) e ya tenebe mono de poder fer-ne como cal e, per qué no decir-lo, en la montanya (en Cantabria estiemos un día en Picos, pero no me fa goyo ixa masificación ni la forma que tienen de sobreexplotación turistica d'el Parque Nacional).
Asinas que quedé con un amigo e, dimpués de mutos anyos sin haber-ie estato, puyemos ta Viadós (Val de Chistau) a veyer se tenenos suerte con las zagueras luces, perque es días de tronata puetz tener suerte. E sí que en teniemos, de suerte e de zagueras luces, perque contemos con l'ayuda de l'aire de puerto que fayó que se medio despasás el ciel. Aquí es resultatos.
Mirando las primeras compos, con el ciel quasi nuble encara:
 Prencipia a salir el sol, con pocos segundos de diferiencia s'iban iluminando diferents partes:

 El sol chugando con es estratos:

 E ya el zaguer inte de luz sobre Lardana e es Infiernos. Viadós espectacular, como el recordabe:
Unaltro día a veyer se m'atrivo a editar las marinas que m'he traito.

lunes, 6 de julio de 2015

Per Tormosa

Fa días que no camino en serio, per ixo he perdito una miqueta la forma. Aora que la flora ye en ebullición cuesta de puyar ta ixas montanyas, pero cal cremar las toxinas de tanto hordio que cal prener pa combatir la calor. Asinas que i heba que fer una miqueta d'esfuerzo e, coincidindo que feba días que querebe ir ta Tormosa, el sabado aprofité. Me costó de puyar (sudabe como un caballo), pero mereixió la pena: ye a rebutir de flors. Gatarrabiosas, flors de nieu, orquídias per tot, bel·la farnacera, lirios... Flors per tot arreu e las envistas fan que mereixca la pena de fer-se una curseta per astí. No fayé guaires fotos, pero disfruté de la montanya.
La unica foto que he feto estianyo d'el Martagón:
 Envista enta'l Pico la Capilla, asignatura pendient que faré quan tienga una miqueta més de forma, perque la puyata ta'l Puerto la Lera la recuerdo como una de las piors que he feto:
 Gatarrabiosa, chugando con es desenfoques:
 E la envista dende Tormosa enta es picos de Pineta, Felqueral, la Capilla, Blancas de Lalarri e L'Almunia:
E ixo ye tot per aora.