miércoles, 28 de mayo de 2008

No sólo de flors vive l'hombre

Perque el monte, en conchunto, ye majismo, el verde d'es faus, augua per tot.... Copón, que ganas tiengo que salga un día buen, pero d'es buens, pa salir a esbravar-me, ya ye pro d'estar zarrato en casa. Pero seguntes el INM (u como conyo se diga aora) dica'l martes de la semana que vien dan augua, pero como el día un engancho en·n'o parque...
Esta dos son de hue:
Trallo d'albar

Boira

E esta son de la semana pasata, un día que salió el sol:
Dende La Inclusa, en el prato Jilo

Dende la presa con el 14-40

Chicoina, u flor de bufar pa Zilieta

Paixaricos e flors

Capullet d'el Cypripedium calceolus

Orella d'onso

Enganyapastors cobando

Golondrineta

Hue, que pareixeba que amaneixeba despasato, soi puyato a veyer cómo iban las orquídeas e... encara les falta un par de días pa que prencipeyen a salir las primeras, n'i hai bel·launa que va més abanzata e ya quita el capullet como podetz apreciar en la foto. No me quedará altra que tornar-ie luego. Estianyo pareix que van un poquet més retrasatas que el pasato, no sé se perque ha plevito muto (la tierra ye farta d'augua que bomieca cuan la pisas) u perque no ha feto mica sol.
E como no he puesto fer fotos a ixa flor, pos n'he feto a la Ramonda myconi, més conoixita como "orella d'onso". Como que ixas flors son a'l canto d'un niedo d'enganyapastors amarillo que tiengo controlato, he aprofitato pa fer-le bel·la foto que tamién tos i meto. E como la cosa tamién va de paixariquetz, pos he aprofitato pa retallar bel·la foto de las que tiengo de la golondrina.

domingo, 25 de mayo de 2008

¡Qué caloreta tant buena!



Como decibe antes, de tardes cayó un buen chaparrazo d'augua con truens e tot el copón que nos fayó meter-nos es porches de la Casa la Villa a fer pleta. Astí yenos estroliquiando cuan me dio per mirar-me entalto e astí i viyé dos golondrinas aprofitando la caloreta d'es focos pa ixecar-se e, cuento, entrar un poquet en calor perque feba fresquet. Pos ixo, que me pareixó pro curiosa la imachen e les fayé cualques fotos e meto las que se veyen un poquet bien, perque i heba mui poqueta luz e no llevabe tripode. Habrí puesto millorar-las recortando-las una miqueta con photoshop, pero encara no'l tiengo instalato en el portátil e no tiengo ganas d'enchegar l'altro ordenador. Se nunca el foi igual las meto altra vez.

Río Bravo

El Cinca en el forcallo con el Barrosa, dende el camín de Picargüela


El Barrosa, grand pero més clar que el Cinca, dende el puent de Sorripas


Es dos ríos ya chuntos, debaixo d'el puent de la carretera


No, no ye que vaya a charrar sobre ixe clasico d'el "western", ye como baixan es ríos per aquí (e per allá. només cal viyer bel blog d'es blogaires pirenencos) de tanto plever. El viernes cayó en Pineta cerca de 100 l/m2; ayer sobre 20 l/m2 e güe lleva tot el día plevendo sin despasar ni un inte. Estas fotos son d'ayer de tardes, antes que se metés a tronar una altra vez, dimpués de més de 12 horas sin cayer gota, perque de maitins baixaban més grands. Hue deciba el periodico que dende el viernes dica el sabado el pantano de Mediano heba puyato un 6% de nivel, e ixo en Mediano ye muta augua. Uns amigos que puyoren ayer de L'Aínsa dicioren que el Irués baixaba tamién fuerte, e bel·la foto que saliba en la prensa mostraba el Cinca en L'Aínsa enorme, de punta a punta d'el puent.

miércoles, 21 de mayo de 2008

Trangas

Güe soi ito a veyer se ya heba salito el zueco de venus per meter-tos-ne bel·la foto, pero no i ha habito suerte e encara tardará, como poco, una semaneta més (pero no tos ne fayatz que ya i seré a l'aguait).
No pensabe fer garra entrata, pero esta foto me la he trobata mirando en google el carnabal de Bielsa. Yo soi el de la izquierda, e a ixa pobra mesacha le fayemos dar més vueltas que a una bailarota, perque se l'enreligó el tapabocas en las mías talacas e chiro t'aquí, chiro t'allá. Yo que me'n querebe ir a acometer t'altro puesto e cuanto més mirabe de jopar més embordiecho fenos. La pobra remató implorando que la deixanos estar, ya la viyetz con la cara enfullinata, pero yo ye que no me podebe soltar d'ixe tapabocas, e l'altra tranga firme botiar arredol d'era e yo arrozegando-la.
Pos no més ixo, una curiosidat. L'autor de la foto espero que no quiera "royalties" u, como caldría decir, dretos d'autor.

lunes, 19 de mayo de 2008

As navatas

Dende o lugar d'a Espuña...

dica a Villa de L'Ainsa...

baixón as navatas.
Lurte, colla de mosicos almogávars

Pos sí que en i heba de chent en el puent

Encara que o Zagal de Molinero l'Arco nos fa e fará més reportaches sobre ixe gran día que estió el sabado en la Trobada Internacional de Navaters, no m'estoi de fer-ne yo tamién una entrata . E la custión ye que navatas, el que se diz navatas, yo no'n viyé so que una cuan m'heba pillato el atasco a l'altura de la planta d'Horpisa, debaixo d'A Buerda.
Es que teniaz críos chicotz ya sabretz que entre que es mueves, desayunan, es vistes e t'apanyas tú pasa un buen rato. Pos ixo ye el que nos pasó a nusaltros, que saliemos a las 11 d'el maitín de casa e cuan podiemos arribar ta L'Aínsa ya i heban baixato casi totas las navatas menos una que s'esbrusó per el camín. Per el que cuentan estió una baixata rapida (cosa normal, perque per el río baixaba un buen tamborinazo, entre el mayenco e el que heba plevito es días anteriors) e una miqueta accidentato: remos perditos, bel·la capuzata, un clavillar trencato, etc.
En L'Aínsa, an que disfrutemos d'un buen día menos a las 2 que cayó un batilazo, en el puent d'el Cinca i heba muta chent, pero me podié trobar con O Zagal e presentar-me, ya que no nos conoixenos en persona. Es de Lurte fendo animación mosical e espantando a la filla con la farcha d'Almogávars que llevan. Dimpués de vermut con l'amigo Pepe Lera que veniba con la colla de la Val d'Echo pa animar la tarde chunto con es de Viello Sobrarbe, e una comida an que i heba arredol de 500 personas (es foranos qué me se yo la de fotos que fayoren a la paella) fizió que fues un día pistonuto. Més encara tenendo en cuenta que Pepe les dedicó la famosa canción "S'ha feito de nuey" a la filla e a la mai que la parió (gracias Pepe).
Ixo sí, cuan tornemos enta Bielsa tornó a plever de firme, qué diferiencia que i hai en tan solo 35 quilometros (e 400 e pico m. de desnivel).

viernes, 16 de mayo de 2008

No se'n deixa de plever


Llevamos ya que me sé yo la de días sin veyer el sol. Ayer estió tot el día nuble encara que apenas plevió. Pero el de güe ya pareix un diluvio. Soi salito de casa a las seis d'el maitín cara ta Uesca a fer-me el reconoiximiento medico pa enganchar en poquetz días en el Parque (se se pensaban que m'ibe a estar dos horas de viache sin pixar per ers iban buens), e a'l talle prencipiaba a plever. Tot el camín de baixata viyendo cayer l'augua con ganas, la hora que somos estatos en Uesca diluviando, la tornata enta casa més encara. Baixaban es barrancos plens, perque la tierra ya ye farta d'augua, e se la pisas vomieca. El tunel de las Devotas altra vez con el churro per dencima (vid. es posts anteriors) e el río Cinca medrato.
Espero que per la zona que abasteix d'augua a Barcelona pleva tanto como per aquí pa que no tiengan problemas d'abasteiximiento e no tiengan que foter-le-ne a dengún. Aora blinca el Gubierno d'aragón que recurrirá se no se paraliza el prochecto perque ya s'ha superato la fase d'emerchencia (¿pero no deciban antes que no yera un trasvase? ¿de qué coda van a recurrir aora?).
Només espero que maitín l'orache nos dé una tregüeta pa poder baixar a viyer las navatas, que me faría goyo de llevar-ie a Zilieta, encara que cal decir que a era igual se le'n da que baixe navatas, portavions u petrolers, mientres tienga pedretas de la glera pa arrullar-las ta'l río.
He leito en el Diario d'el Alto Aragón que i hai siete u ocho (güeito) navatas prestas pa totas las delegacions (d'Alemania, Republica Checa, Finlandia...) e que talment es "raiers de la Pobla de Segur" en trayerán una altra en cambión. Pareix que la cosa promete, per ixo espero que faya un buen orache, a'l menos unas horetas. Ademés en L'Aínsa i autúa de tardes la colla Val d'Echo, an que tiengo un par d'amigos, e querrí ir a veyer-los perque nunca no es he vistos tocando en "direuto".
Pos ixo, superatos es problemas de la sequera, que nos faya un poquet de sol, que queremos plegar muixardinas e muixardons.

jueves, 15 de mayo de 2008

miércoles, 14 de mayo de 2008

Día griso




Güe, como no fa so que pleber, no se puede salir ta garra puesto, asinas que tos deixo cualques fotos de flors (de la terraza de casa mía ).

lunes, 12 de mayo de 2008

Entalto Oregón

http://es.youtube.com/watch?v=YuY7WLoUTpc
Bien se nos ne vale que encara i hai chent que se'n fa per l'oregonés. Yo ye que con estes mesaches m'esmelico

viernes, 9 de mayo de 2008

Geoparque de Sobrarbe


Gracias a la pachina web www.sobrarbenses.com he trobato este reportache que fayoren en el programa de TVE "La aventura del saber". Tos recomiendo que tos lo mirez, perque sale imáchens bien pinchas. He pegato el enlaz pero no sale bien, conque se querez viyer-lo marchaz ta www.sobrarbenses.com e miraz-lo dende astí.
P. S. Puta manía tienen de decir-le a Pineta "La Pineta", me tienen dica las pelotas con ixo.

jueves, 8 de mayo de 2008

Bel·la foto més

Flor d'el pan de cullebra (u pixacans u ixarruego en altras zonas de Sobrarbe)


Flor de la cerecera


Unas poquetas de las que cayerán esta nuet


La Villa, con Ixabierre dencima, dende el camín


Barranco de La Planyera


Bueno, como no tiengo guaires cosas a contar, tos deixo bel·la foto que he feto esto maitín, que me'n soi puyato un ratet per el camín d'el ibón d'el Cau. Només he feto una horeta de puyata perque dimpués hebe a ir a replegar a Zilieta ta la guardería.
El millor de tot ye que m'he trobato con un rolde de muixardinas, las primeras que veigo esta primavera, que pro a fes que cayerán esta nuet en revuelto.

lunes, 5 de mayo de 2008

¿Aragón ye / ès trilingüe?


Pa yo la respuesta ye clara: PROU QUE SÍ. Pero i hai chent que pareix que encara no'l tien mica clar.
Tos cuento, güe la muller se'n ye baixata ta Monzón dimpués de troballar a fer la compra d'el mes (perque ya sabretz es que vivitz en zonas turisticas que en el lugar mercar el de cada día u el que te fa més falta, se no te sale el doble de car) e ye estata testigo d'una situación que, per desgracia, ye pro común entre mutos aragoneses. I heba dos reponederas troballando e una l'ha dito una frase en catalán a l'altra, ésta s'ha chirato como una fuina e reconstruigo el dialogo per el que m'ha contato la muller:
-A mí no me hables así, vete a tu país a hablar así.
-Yo hablo como se habla en mi pueblo, que además está en Aragón.
-Pues entonces eres una paleta, habla así en tu pueblo, pero aquí no hables así.
-Pues mira, aquí lo hablo con mi marido y con mis hijos.
-¿A ti te parecería bien que viniese un moro (cuento que aquí habrá pensato un moro de mierda) y te hablase en su idioma?
Bien se le'n ha valito a la inculta íxa que yo no ibi'ere, perque en ixes casos "entro al trapo" sin pensar-me-lo mica. Ademés en Monzón, con la cantidat de chent de la montanya que i vive, personas que tienen como luenga materna l'aragonés u el catalán, u que tienen Fonz (aragonés) u Santistebe (catalán) a'l canto.
Tot esto, per desgracia, ye pro común, sobre tot en el caso d'es aragoneses que tienen como luenga materna el catalán, e chent como es de la FACAO, con argumentos acientificos de tot, troban un buen caldo de cultivo en ixe enfrentamiento. Mutas veces m'he tenito que sentir cosas como: "si hablan catalán es que son catalanes". Contino, yo, a'l estilo gallego, les contestabe: ¿e tú d'aón yes, de Castilla la Mancha u de Castilla-León?. A partir d'ixa frase explicar-les que no i hai un solo país europeu an que no se i charre més d'una luenga. Soi farto de tener que explicar que las luengas no entienden de güegas, que éstas son en la capeza de la chent [cuan yo le dicié a la mía profesora de catalán en la Universidat que querebe aprender catalán perque yera la luenga d'Aragón que me faltaba per charrar se me miró una mica estranyata (ixo sí, no dezises un dialectalismo a clase perque se te miraba con uns güellos que feba miedo, ya podetz contar es míos companyers de clase de la Francha, no feban so que soltar-ne)].
No sé se nunca i habrá en Aragón una Lei de Luengas que funcione sin que se faya una campanya previa de sensibilización enta'l respeto pa las dos luengas minoritarias, e en especial pa'l catalán. Senyors de la DGA, en especial el President d'Aragón, de territorio catalanoparlant, prengan nota.

jueves, 1 de mayo de 2008

Fornos (con o permiso d'o Zagal de Molinero l'Arco)

Un poquet més abaixo d'el Chorro


Detalle de l'anterior


La que viene dende el Chorro



Una anvista més grand



Las Fuents de Fornos



El companyer d'A Espuña m'ha feto tener envidietas con ixas fotos e videu d'el Chorro e las Fuens de Fornos, per ixo güe m'he levantato bien luego, he pillato la camara fotos e t'allí que i soi ito. Feba a'l menos tres u cuatre anyos que no iy'ibe, pero dende Badaín no tiene perdida e en poco més d'una hora ibi'es. La verdat ye que no las tenebe totas con yo, perque como ya fa días que no pleve, me pensabe que no baixaría guaire augua.
Jolio, se en baixaba. En primeras arribas ta las Fuens de Fornos, an que manaba buena cosa d'augua, pero como per astí siempre en baixa, m'he dito: igual en el Churro Fornos no'n cai gota. Animal se en cayeba, como que no he puesto cruzar-lo pa viyer el Churro e m'he tenito que aconfortar con mirar-me-lo de bislai. Ixo sí, he feto fotos como un poseso, e tos ne deixo bel·launa. Ya perdonarez, pero las he fetas a pulso e per ixo no m'han salito bien de tot (ademés de l'augua cremata, pero se le quiers meter un poquet de tiempo d'exposición ya sabes el que pasa).