viernes, 27 de febrero de 2009

Hue Felqueral fa un anyet

Quí me'l iba a decir fa un anyo cuan prencipié a fer el blog (sin pensar-me-lo guaire, como foi mutas altras cosas en la vida, tot cal decir-lo) que aguantarí (e que m'aguantaritz, tot cal decir-lo una altra vez) tot un anyet metendo cosetas, fotos e fateras en el blog. El més important de tot ye que m'ha permitito conoixer buena cosa de chent, encara que sía virtualment, e creigo que l'ha feto una miqueta d'honra a'l aragonés belsetán, que ye d'el que se trata, ya que pachinas de fotos n'i hai una pila, pero poder arribar a la chent d'una traza tan dreta ye diferent, encara que arribe de forma virtual (una altra vez). Pos per tot ixo e més, estoi que cal celebrar-lo, u a'l menos nombrar-lo.
I ha habito intes de baixón, que no m'apeteceba fer res; altros que yere una miqueta més hiperactivo e ibe pinchando cosetas a menuto, e cuento que el tiempo que contine el blog enta debant, perque no pienso fer-lo per secula seculorum, continaré con la misma marcheta.
Es temas tocatos no son estatos guaires, sobre tot fotografías d'el mío "medio ambient", pero siempre i hai tiempo pa entrar a tocar el tema de las luengas, e mismo bel·la vez cualque custión personal. Estes días m'habría feto goyo d'ir amostrando-tos cualques fotos d'el carnaval de Bielsa, pero con muta dolor de corazón no me ye estato posible de quedar-me-ie esti anyo; p'altro anyo será.
Pa rematar ya, perque voi improvisando sobre la marcha (nunca no soi estato de fer, desfer e refer es textos, per ixo ye pro espontanio: trigo las fotos e dimpués en foi bel comentario), agradeixer-tos a totz es que tos itz pasando per el blog de cuan en vez, e sobre tot a's que deixatz bel comentario. Per ixo, permititz-me una chicota mofla e que bufetz con yo la vela d'el cumpleanyos, una vela muit tipica per este país. Salut e no rebletz.


jueves, 26 de febrero de 2009

Tos recomiendo una visita

Dimpués d'una semana pa olvidar (con decir que m'he perdito es carnavals ya ye tot dito) e que un par de personas s'hayan preocupato per es míos huesos perque no me deixabe notar per aquí: YA SOI EN CASA (per fin dimpués d'una semana en Zaragoza).
No voi a meter cosa més que un enlaz ta'l blog d'una persona que sí que entiende de fotografía. La entrata que tos enlazo a yo me fayó estar-me con la boca ubierta un buen rato, ixo sí que ye arte, bien se vale que m'ha inspirato (per no decir que le copiaré la ideya) pa mirar de fer cualque cosa pareixita, e se ye posible quedaremos bel día pa ir como craberetz de nuet per las montanyas e que m'ensenye cualque cosa. A yo me pareix la hostia ixa foto, e espero que a vusatros como minimo tos faya muto goyo. Salut.
Grand foto de nuet
P. S. En uns días este blog fará un anyet (¿quí me'l iba a decir?). Se no se me pasa ixe día espero tornar a fer una entrata nueva e mía.

miércoles, 11 de febrero de 2009

Hostia, qué marcha llevamos







Qué hivierno, pobretz, que me sé yo la de días que ha nevato. De cayer paquete no guaires veces, pero de días que ha nevato, nevusquiato, que ha caito bel·la cinarrateta, esterrenyato, torna a tapar la nieu es pratos... Es ganaders deben d'estar fartos , e es que no'n somos pues tamién. Ya avisoren que i heba alerta amarilla per acumulación de 20 cm. de nieu, pero en es Pirineus occidentals, pues aquí ya llevamos una miqueta més de 20 cm. (19 cm. a las 10 e media, e no se'n ha deixato dende alavez), conque en Panticosa e ixes lugars altos d'el Viello Aragón e d'el Alto Galligo ya i serán enronatos. Pa muestra bel·la foto feta dende la finestra de la cocina e dende el mío estudio enta la terraza de casa. Ya arribará chunio.
Actualización: a estas horas (14:40) contina nevando a tot meter e ya pasamos es 30 cm. Pro a fes que ya no tenemos tele, pero per aora internet aguanta.