Una miqueta de Pineta

Per fin esta semana ha feto l'orache propio de l'agüerro: plever, fresco e nieu per las puntas. Soi estato embolicato que no'n podebe més, pero el martes m'escapé un ratet ta Pineta, pero no m'ha vagato de meter-me con las fotos dica hue.
Pos ixo, que se fa una semana e uns días fue a fer una gollata ta Pineta con la filla a veyer cómo iba l'agüerro e se me cayó l'alma ta tierra, estes días ha millorato pro, e tos ne deixo bel·la muestra, como siempre.
Es churros de la man pacina mientre i puyabe:
El pico Felquera con nieu, a'l Garién el tapan las boiras:
Quantos churros d'el barranco Lalarri:
La Grota:
E ya en el fabolar tornando enta l'auto:
No podeba faltar el tunel:
E unas venas de fau pa rematar:

Maitín tiengo intención d'ir bien luego ta Buixaruelo, a veyer qué i trobo. Au, salut.

E aora dende Espierba

Hue tenebe previsto fer qualques fotos un rato dimpués de que se metés el sol, pero a la fin se m'han tuerto es plans e he habito de quedar-me a casa cudiando a'l borche. Como m'hebe quedato con las ganas de fer nocturnas, quan he puesto soi salito de casa un par de horetas ta Espierba, e soi tornato fa un ratet (encara soi descargando las fotos). Alto en Es Morés no i feba mica frío, 0ºC, pero en ixa puta ribera Espierba cómo se i nota la inversión termica: -5ºC. Bai, que ye la primer vegata que no paso fredor fendo fotos de nuet d'hibierno. Como i hai luna nueva se i veyeba un ciel espectacular, e ixo que yere bien cerqueta d'el lugar. Astí m'he pegato una hora e media u per astí; cal estar friki :-D
El Mallo Gran:
Una de larga exposición dende el Mallo Gran enta la Sierra de las Zucas:
Una forzando la sensibilidat de la camara, pa que tos fayatz una ideya d'el ciel que i heba:
Un árbol enta el norte, iluminato con el frontal:
El domingo, se puedo e me vaga, miraré d'ir a fotografiar una coseta que m'han contato, pero no sé se veyerá dende la montanya, perque es nuestros horizonts ni son plans ni son baixos. ya tos contaré. Salut.

Ahier de nuet en Pineta

Ahier, dimpués de chitar a's críos, decidié de puar ta Pineta a fer unas nocturnas aprofitando que no i heba luna e que se i veyerían més estrel·las. Ademés, dimpués d'el nevazo d'el viernes de nuet e d'el sabado de maitins estaría tot bien pincho. E asinas yeras, quan i arribé a las 23:15, i heba -5ºC, e como no tenebe guaire tiempo, perque querebe estar en casa quan le tocás el biberón a'l chicot, me metié a fer fotos con prisas. E encara que sé que las prisas no son buenas companyeras, no me'n quedaba altra, asinas que en las dos horas que i estié fayé el que podié, que no ye guaire. Ademés el frío fa que las pocas neuronas que tiengo no treballen como cal, e per ixo se me podeba haber aplicato el refrán ixe de "atina marido que la noche es corta". Total, que pasé buena cosa frío e no torné con las fotos que querebe. He de comprar-me unas botas con calefacción a veyer se en puesto d'estar pensando en es dedetz chelatos, puedo pensar en las fotos que quiero fer.
Ixo sí, mereixió la pena, perque i heba un ciel espectacular, e no se sentiba soque el río correndo a uns metros d'an que yo yere.
Esta ye la primera que querebe fer. Sabebe que la polar quedaba a la dreta de la Capilla (dende la mía anvista, prou que sí), asinas que miré un enquadre adecuato encara que no se i viyeba ni pa churar. En el que no cayé (las prisas e curto que ye un) ye en meter una apertura de diafragma ubierta perque no i heba luna, e zarré a 10 como se n'i habés, pero no'n i heba. A's vente minutos d'estar la camara en marcha paré cuenta d'ixe chicot pero important detalle, e como querebe fer altras cosas, veyé que no me vagaría de fer las altras fotos que tenebe pensatas, asinas que a aturar la exposición e a asperar que se fes la toma fosca (u dark frame). Me quedó muit escura, pero con es programas he mirato d'aclarir-la, encara que se veye muto ruido.
Dimpués querebe sacar el fundo d'el circo, e fayé una preba forzando la ISO pa veyer se yera bien el foco. Como tenebe la ISO més alta, se i veye muto ruido, pero quiero amostrar-tos el ciel que se viyeba. Una pena la contaminación luminica, cuento que será de Gavarnía. Con una camara que treballe millor l'alta sensibilidat (una 7D u una 5DII, per exemplo), podrí fer millor fotos como esta, pero cal aconortar-se con el que tiengo :-(, que tampoco no ye malo pero no ye buen pa fer nocturnas.
E ya la zaguerá que fayé, con el mismo enquadre que l'anterior pero con 15 menutos d'exposición, antes de salir hopando cara abaixo a dar el biberón:
Au, salut.

Dende Espierba

Ahier, que feba un día primaveral, me'n puyé un ratet ta Espierba. No guaire, perque i puyé tarde e tenebe que tornar luego. Ibe a buscar el contraste entre l'agüerro e l'hibierno, gracias a la nieu que heba caito este puent de totz es santos (Pa totz es santos la nieu en es altos, e pa Sant Andrés en es pietz) e tenié suerte perque encara i heba cereseras royas (e ixo que gosan estar es primers árbols que pierden la fuella). La lastima fue el ciel, que yera raso e només salió bel·la boira quan ya ibe a marchar. Como veretz me boché bien poco, pero no me vagaba de fer altra cosa:
Esta zaguera ye feta con el 100 macro, e las anteriors con l'angular:

Per fin l'agüerro

Esto maitín soi puyato ta Pineta, unaltra vegata. Pero per fin es faus de la Selva Pochas ya yeran con las colors de l'agüerro. Bien se vale que i soi ito, perque a partir de maitín dan uns volturnos d'aire que no deixarán ni una fuella. Pa'l martes dan aire a 84 km/h, asinas que a tomar per saco agüerro, aora que se meteba tot majismo :-(
Pero bueno, s'ha feto el que s'ha puesto, que estianyo no soi pa poder ir-me-ne guaire tiempo per la montanya. Ya arribará l'anyo 2011 a veyer se se puede fer més cosas.
A lo que ibe, que soi puyato per lo camín d'es Churros de Lalarri e me'n si baixato per la pista, aquí tos deixo bel·la foto de hue:

Estoi que ya no podré fer més fotos d'agüerro estianyo (se me quedan en es debes la Comuna, Ordesa, Buixaruelo, o Puent d'as Crabas e un largo etcetera). Sisquera m'equivoque.

Una tregüeta entre la plebita e la nieu

Esta tarde m'han dito en el Refugio de Pineta que heban medito 230 l/m2 e que no sabeban cuánto heba sobreixito, perque en·n'o traste que i tienen pa medir-la no i cabeba més. E bien se les n'ha valito que alto, sobre es 1800-1900 metros yera nieu, que se no igual se les lleva el río. Ye curioso, totz es barrangos de la man pacina baixaban fartos d'augua que no'n podeban més, el barrango de La Estiva tamién ha movito bien, el de Lalarri e el de Montaspro tamién, menos el Cinca cuan baixa de Marmorés, cómo se nota que ha nevato, se no baixaría un río enorme.
Pos como diz el titulo, hue hemos tenito una tregüeta, perque cuasi no ha plevito dende esto maitín, pero aora en cai a cabazos una altra vegata, a veyer qué fa maitín. E como l'orache nos ha deixato mismo veyer una brinquerrina el sol, he aprofitato pa fer bel·la foto.
Esta ye feta a zaguera hora, cuan ya lusquiaba, pero me fa muto goyo ixa luz entre es faus:
Una altra d'el tunel, e cuento que no serála zaguera, encara falta una miqueta de color e que las fuellas tapen la pista:
Este ye el barrango de La Cueva (como podretz veyer ye un nombre modern), que no baixa so que de mayenco e cuan i hai temporal u tronata grand:
El río Lalarri, que ha medrato buena cosa (podetz veyer en una entrata anterior cómo baixaba fa tres días):
Es picos con nieu, Treserols no s'ha arribato a despasar de tot, no més s'han visto el Garién, el Pineta e La Capilla, como podetz veyer, la nieu ye pro baixa:
Un pinchán en un liroler, no tot ha a estar anvistas e churros. Pa días torno a fer fotos de paixaricos, ya me toca de tornar el teleobchetivo a l'amigo que me'l deixó:
E esta zaguera -encara que ye la primera que he feto hue- ye de cuan le daba el sol a'l embalse e se refleixaban es árbols caducifolios:
Au, per hue ya ye pro. Salut.

Per fin la nieu tant anunciata.

Dende ayer, que tenebe fiesta, estió alternando la nieu con l'augua tot el día a Bielsa. Esto maitín, cuan soi salito a las 6 d'el maitín cara Pineta per zaguer día de la campanaya, plebeba en Bielsa, pero a partir d'Ixabierre nevaba e ya i heba plagato, e dende el esbarre cara Espierba la carretera yera blanca. Hebe a ir esquivando es árbols que s'embanaba per el peso de la nieu, perque como estianyo la nieu ye arribata tant luego encara i hai mutas fuellas en es árbols e ixo, encara que pareixca una fateza, fa que hayan a aguantar muto més peso. A Pineta nevaba a tot meter, dica que se'n ha deixato a ixo de las 11 d'el maitín, pero ya heba meso una capa de nieu d'uns 20 u 25 cm.
Pro que he aprofitato a fer fotos, pero ye un incordio fer-ne nevando, con el batiauguas, el tripode e la nieu cuasi dica la rodeta (a tot esto yo sin molatieras e es balons chupitos); a'l que cal sumar que no tenebe guaire batería. Pero bueno, tos meto bel·la muestra pa que, como yo, tos despidiatz de Pineta per una temporata, perque encara que i vaya puyando, ya no'l faré tant a menuto como dica hue. Voi a fer una preba en meter-las en blanco e negro, ya me diretz qué tos pareix e se ixo ya las meteré en color. Per cierto, en la primera m'ha caito una bolisma de nieu en el polarizador, per ixo i hai un troz borroso

Anyisclo e Pineta

Ilesia de Vio con Sestrals a'l fundo:
Churros d'el Molín d'Aso:

Puent de San Úrbez, t'abaixo i hai una caita que no la querrí pa's míos huesos:

Churro de Lalarri, en la pista d'el mismo nombre:
Bombolón plen de polen e enganyapastors (o espantaturistas o escusabrendas):

Lugar de Vio:

Ayer de maitins fayé una escapateta enta Anyisclo, ixa grand maravilla natural, no guaire tiempo perque entre que deixabe a la nin·na en·n'a guardería e salibe e no de casa pos se me ficioren las mil. Ixo d'Anyisclo ye pa ir-ie con més tiempo, ya que a las dos enganchabe e no i podié estar guaire. Con tot e con ixo me vagó de fer la "ruta d'el Molín d'Aso" -a las cuatre suelas, ixo sí- e fer bel·la foto. La luz no yera guaire buena perque ya yeran casi las doce d'el maitín, pero qué le imos a fer... Vusaltros chuzgaretz.

De tornata, encara ye la carretera d'el Canyón d'Anyisclo d'unico sentito, m'esbarré enta el lugaret de Vio, hebe pasato cerqueta mutas veces pero no i hebe entrato, e la verdat ye que mui majo. De tardes a troballar, e dimpués d'estar garimboliando me'n puyé per el camín d'es Churros de Lalarri, que aora da més chuego con es faus tant amarillos. Apa, que vaya bien.
Hue blogger ye traveser e no me diexa ordenar las fotos, me cago en la mai que el va parir.
La primer foto (que no me deixa escribir una línia per dencima, ye un d'es churros de Lalarri). No cal que tos recuerde que se punchatz dencima de las fotos se fan més grands e se i veyen millor.
Salut.

Liz II

Güe soi tornato a puyar ta Pineta. ¡Jolio, qué paquetazo nieu ha caito estes días! A biyer se el miércols, San Chorche, fa buen e podemos ir-ie con la familia. Bueno, pa ir fendo boca aquí tos deixo cualques fotos que he feto güe. Salut.
P. S. Esta nuet, se me vaga, en meteré més.