viernes, 16 de mayo de 2008

No se'n deixa de plever


Llevamos ya que me sé yo la de días sin veyer el sol. Ayer estió tot el día nuble encara que apenas plevió. Pero el de güe ya pareix un diluvio. Soi salito de casa a las seis d'el maitín cara ta Uesca a fer-me el reconoiximiento medico pa enganchar en poquetz días en el Parque (se se pensaban que m'ibe a estar dos horas de viache sin pixar per ers iban buens), e a'l talle prencipiaba a plever. Tot el camín de baixata viyendo cayer l'augua con ganas, la hora que somos estatos en Uesca diluviando, la tornata enta casa més encara. Baixaban es barrancos plens, perque la tierra ya ye farta d'augua, e se la pisas vomieca. El tunel de las Devotas altra vez con el churro per dencima (vid. es posts anteriors) e el río Cinca medrato.
Espero que per la zona que abasteix d'augua a Barcelona pleva tanto como per aquí pa que no tiengan problemas d'abasteiximiento e no tiengan que foter-le-ne a dengún. Aora blinca el Gubierno d'aragón que recurrirá se no se paraliza el prochecto perque ya s'ha superato la fase d'emerchencia (¿pero no deciban antes que no yera un trasvase? ¿de qué coda van a recurrir aora?).
Només espero que maitín l'orache nos dé una tregüeta pa poder baixar a viyer las navatas, que me faría goyo de llevar-ie a Zilieta, encara que cal decir que a era igual se le'n da que baixe navatas, portavions u petrolers, mientres tienga pedretas de la glera pa arrullar-las ta'l río.
He leito en el Diario d'el Alto Aragón que i hai siete u ocho (güeito) navatas prestas pa totas las delegacions (d'Alemania, Republica Checa, Finlandia...) e que talment es "raiers de la Pobla de Segur" en trayerán una altra en cambión. Pareix que la cosa promete, per ixo espero que faya un buen orache, a'l menos unas horetas. Ademés en L'Aínsa i autúa de tardes la colla Val d'Echo, an que tiengo un par d'amigos, e querrí ir a veyer-los perque nunca no es he vistos tocando en "direuto".
Pos ixo, superatos es problemas de la sequera, que nos faya un poquet de sol, que queremos plegar muixardinas e muixardons.

3 comentarios:

  1. A yo m'encantan os días de plebida y m'estimo más ixos días que plebe de contino y a ulor a umedá que os d'ixa calorina que t'afogas. 'Para gustos los colores'. Antiparte caleba que plebese firme ya.

    ResponderEliminar
  2. Jo ja tinc ganes de que surti el Sol. El Pirineu està preciós, quins colors estan quedant! Amb el teu bloc estic descobrint una llengua que, em sap greu dir-ho, desconeixia. No la perdeu!

    ResponderEliminar
  3. ONSET: a yo tamién me fa goyo que pleva, pero dimpués d'un mes que pleve día par d'atro... pos ya cansa. Que se reparta un poquet més l'augua a'l largo d'es meses.
    NÚRIA: la verdat ye que sí que ye majismo, es pratos bien verdes, la tierra farta d'augua, es caixicos con la fuella nueva, es barrancos plens... La primavera ye una preciosidat. No m'estranya que no conoixeses l'aragonés, mismo i hai mutos aragoneses que no'n saben mica sobre era. Gracias per el tuyo comentario / Gràcies per el teu comentari.

    ResponderEliminar