Torna el burro ta Ordesa II

Bien se vale que no puyé totas las fotos d'Ordesa de vez, perque esta semana -sí, la de nieu per tot arreu. m'he quedato en el dique seco. Qué le imos a fer, i hai obligacions que son per dencima de las devocions.
Asinas que tos deixo con las fotos  de la baixata dende Soaso enta abaixo. Que yera bonito, sí, pero no especial, per ixo estas fotos son més conoixitas que Belén Esteban.

Vuelta la burra ta las cols. Digoooo... vuelta el burro ta Ordesa

He de decir que Ordesa m'encanta.
No ye mica rar se tenemos en cuenta que ye un puesto que fa goyo a muta chent. Pero yo, que soi una miqueta solitario, miro de no ir-ie quan i hai muta chent. El verano pasato i fue e quan veyé la canidat de chent que i heba en la Cola de Caballo e totz es que nos trobemos per lo camín, a l'altro día decidié de puyar ta's Culfredas, uns 3000 muit apartatos d'el mundanal ruido.
Ixo de verano u de primavera, perque se i vas d'agüerro ye tot plen de fotografos con tripodes. Que el puesto ye impresionant d'agüerro, con es fabolars vestitos de royo e amarillo? Sí, e tos recomiendo que i vayatz, més que més se i podetz ir entre semana. Qué queretz sacar las fotos que fa tot quisqui? No i hai puesto millor en Aragón :-)
Per tot ixo, a yo quan de verdat me fa goyo d'ir ta Ordesa ye d'hibierno, quan no i hai guaire chent e el paisache cambea de tal traza que no ye guaire visto. Estianyo i soi ito ya quantas vegatas. Per cada vegata que anuncian frío, i voi con la esperanza (perdemés este hibierno) de trobar-me la Cola de Caballo chelata de tot. Con tot e con ixo, siempre i hai chent (la de dominguers que me trobo per la parte baixa quan torno enta l'auto) e per ixo, se quiero fer fotos tranquilo, me toca d'estar-ie, como muit tarde, a las 7.
Este cabo de semana querebe fer las primeras luces sobre la punta Treserols, perque d'hibierno entran una miqueta laterals e iluminan ixa punta, e qué millor que fer-lo dende el Circo de Soaso, mirando de trobar un buen primer plan pa tirar con l'angular. No se veyen guaire bien ixas luces, pero, amés de la belleza d'el puesto, me faría goyo de que tos metiatz per un inte en la foto, "disfrutando" d'el frío, de la soledat e d'el privilechio d'estar astí, tú solo, veyendo cómo la punta Treserols se va metendo roya e sabendo que yes la unica persona que ye contemplando ixo.
En fin, qué rollo macabeu tos he suelto. Ya me callo e tos deixo con las fotos d'el Circo e de la Cola de Caballo.

Las de la baixata pa unaltro día :-)

Ordesa

Estes que dan l'orache per la televisión son uns alarmistas. A metat de la semana pasata pareixeba que iba a rribar la fin d'el mundo e a la fin cosa. Frío, pero no pas tanto.
Mirando a veyer se s'heba cumplito la previsión, el domingo marché enta Ordesa. Quasi no i heba nieu dica el fabolar, pero a partir d'astí cal decir que yera espectacular, perque encara permaneixeba la nieu caita el día anterior (no guaire, uns 4 cm.) e no i heba ni dios per astí.
No arribé dica Cola de Caballo, talment i torne este cabo de semana, perque sí que dan temperaturas baixas a veyer se trobo chel, perque per lo río baixaba augua a boticiecas.
Tos deixo con bel·la foto.
Las Gradas:

Circo de Soaso:

 Cascada de la Cueva. Ya veyetz que no i hai mica chel e sí muta augua:

 E un detalle, como la foto d'el Félix de Azara pero con H2O en estato liquido e no pas solido:

Boiras

En la entrata anterior charrabe de que me'n yere ito enta Plana Canal perque pareixeba que despasaba e i fue a veyer se tenebe suerte con las luces. Mientres esperabe a las zagueras luces l'aire en altura, u bell altro fenomeno atmosferico, fayó que se formás una boira pro especial que fue vista e captata per muta chent de Sobrarbe.
Aquí deixo las mías aportacions con las diferents coloracions seguntes abanzaba la tarde:

Pareix que este cabo de semana per fin viene l'hibierno, ya yera hora. Caldrá mirar d'aprofitar-lo.

Plana Canal

El domingo amaneixió nuble preto, pero de tardes pareixeba que despasaba, asinas que pensé que talment trobás buenas luces d'atardeixer. Feba días que tenebe ganas d'ir ta Plana Canal e t'allí que marché.
Luces, el que se diz luces buenas, no'n veyié, pero bell rato se colaban entre es fratos d'una espectacular boira (se mereix una entrata propia, muta chent la veyió e muta chent la fotografió) dando-me oportunidat de chugar con la camara.
Aquí tenetz bel·la foto d'ixes ratetz en que las luces iban e veniban.
Sobre Castillo Mayor, a'l fundo Cotiella e en bell medio Lierga:

 Sestrals e Guara a'l fundo:

 Sol en Penya Solano e Penya Montanyesa:

 Una miqueta de sol en Lierga e Cotiella:

Como siempre, millor punchatz dencima de la fotos pa veyer-las millor.

La Estiva, de nuevo

Sabado, 4:15 a.m. Ubro un uello, ubro es dos, sé que no me tornaré a dormir. T'án pego? Pos ta Comodoto, a veyer l'amaneixer. Como feba días que no nevaba e heba feto calor, contabe con que podrí puyar ta La Estiva en auto e dende astí ya ta Comodoto.
Prencipio a puyar e primer problema: un bolo en bell medio de la pista. Per suerte, debo d'estar més fuerte que no me pienso perque consigo mover-lo e deixar-lo a un canto de la pista.
Segundo problema: prencipia a pareixer nieu més abaixo d'el que esperabe.
Tercer e zaguer problema: antes d'arribar ta'l vación la nieu ya prencipia a cubicar. he de deixar l'auto e tirar de calcetín, e encara me queda dos kilometros largos foniando.
Bueno, rai, soi venito a caminar, no? Me calzo las botas e arreo pista-pista dica que arribo a'l paso Fornos a las 6:30. Como no me va a vagar de puyar ta Comodoto, decido quedar-me per astí a veyer se i hai suerte con las luces.
E l'amaneixer no fue el que esperabe. Suerte que a'l fondo de la valle i heba boira e qualquecosa podié fer :-)
Fendo tiempo a que amaneixés:

 Ya clarea enta l'este:

 Prencipian a iluminar-se las paretz de Pineta:

 Sale el sol:

 Las boiran pillan ixa tonalidat calida d'es primers rayos:

 E 5 fotos que fayé pensando en componer una panoramica e que me ha chuntato el mío amigo Javier Vecino (gracias mil), perque el mío PSno me deixa chuntar fotos, a saber per qué:

Punchatz dencima de las fotos pa veyer-las millor, especialment en la zaguera pa veyer-la tota.

De nuet

Dende fa anyos me fa muto goyo la fotografía nocturna. Unaltra cosa ye que la practique tot el que querrí. Amés, tanto la camara como l'angular que tiengo son buenas ferramientas pa ixes menesters.
Este cabo de semana, con visita a la ciudat entre medio, he feto un poder vencendo a la mandria e soi salito ta la montanya a aprofitar la luna plena e la (poca) nieu que i hai.
El viernes marché ta la Sierra Espierba e ahier ta Barrosa, pa no tardar guaire a tornar ta casa perque hue hebe de troballar. Pa la de febrer, que cuento que ya m'habré recuperato d'es excesos de carnestutas, me faría goyo de puyar a fer nocturnas ta bell pico. Quí se i apunta?
Dende la Sierra d'Espierba:

E en Barrosa.
Pareixco un hombre-lupo, no me falta soque otular a la luna:

Enta Robinyera (3003 metros) e L'Almunia (3132); es dos puyatos, a veyer quan torno ta L'Almunia, que me fayó muto goyo:

 Punta Robinyera e una constelación que veyé en la foto anterior, a simple vista no se veyeba tant bien: