Faixa de las Flors

Se el que le metió el nombre de las flors i hes ito a primers de septiembre, el suyo nombre sería Feixa d'es cardos, que suena muto menos lirico, pero yera la flor més abundant en el primer día de septiembre.
Pos ixo, que el sabado, de buen maitín, me'n fue ta Ordesa a fer la Feixa de las Flors (encara que el suyo nombre tradicional seguntes el mapa d'el Parque ye Faixeta de Coma Barrau, pero pocos el conoixen asinas). Feba tiempo que querebe fer-la, perque d'el sector Ordesa no hebe feto soque la tipica cursa per lo fondo de la valle dica la conoixita Coda de Caballo, e siempre con nieu.
 Me desperté a las quatre e media d'el maitín pa poder pillar el primer autobús que sale de Torla a las 6 e las 6:15 prencipiabe a caminar dende casa Oliván. Con la lampa frontal e la luna plena asomando entre es árbols, fue fendo la puyata veyendo el Mallo. Dimpués m'esbarré pa pasar per la Faixeta pa arribar ya ta'l planerón -reino d'el karst- que da acceso a la Faixa de las Flors, d'es Cardos u de Coma Barrau. Quan la veyes dende el principio te dices: "¿pero per esta faixanga se i puede pasar?, ¿m'enfaixonaré?". Se veye muit estreta, pero una vegata que i yes en dentro, no'n ye tanto e no se corre garra risque (ixo sí, un trepuzón enta difuera e te vaga de cagar-te en tot quantas vegatas dica que arribas t'abaixo). Malas que i entré me trobé con un precioso pintaparetz, pero como el maximo de mm. que tiengo ye un 100, se me quedó a tomar per..., pero me deleité un ratet la gollata mirando-me-lo cómo comeba per las crepas de las rocas (prou esbrozolatas, per cierto, que no febe soque mirar-me entalto pa que no me'n cayés garra). Tamién i heba prou flor de nieu ya una miqueta pasata, pero no les fayé garra foto perque ya yeran pasatas e, sobre tot, perque feba un aire furacanato que quasi me tira largo en salir d'un sarrato. N'i heba mutas, pero n'he visto tantas u més en altras zonas d'el Parque, asinas que no será pa tanto he he. Antes d'arribar-ie hebe visto una pila de chizartz, con crapitos de l'anyo, d'el que m'alegré prou.
Adinas que china-chana fue recorrendo la faixa e quan salié veyé una envista de Treserols e la Breca que no coinoixebe, lastima de l'aire e d'el frío que feba (mismo i heba chel en bel·la fontaneta) que no me deixó nian poder plantar el tripode (se quasi me vulca a yo, ya podetz contar ta ón m'habría ninviato la camara e el tripode). E per fin arribé ta las temitas Clavillas de Cotatuera. Qué collons teneba el ferrer de Torla, pa que dimpués charren d'el de Sant Felices. Yo llevabe l'arnés con un par de mosquetons pa asegurar-me en la sirga, e con tot e con ixo ibe espantato (se me quedaba encara garra dubda, ya no'm tiengo: la escalata no ye lo mío), como pa pasar sin asegurar-me, cuento que m'habrí dato la vuelta, perque a yo ixo d'estar sin posar es dos pietz en tierra firme no me va mica.
E ya cara abaixo tranquilament con la satisfacción d'haber puesto pasar-las (cuento que i tornaré, e tamién l'arnés :-D).
Pos ixo, una buena cursa se no tenetz miedo a las caitas verticals.
Luna plena (segunda d'el mes, e la silueta d'el Tozal d'el Mallo):

 Camín de la Faixa:

 Un testimonio d'el Pintapartez:

 Envista enta Buixaruelo:

 Ordesa:

 Enta Treserols:

La Breca:

P.S. Prou que llevabe la camiseta verde d'Educación, pero debaixo d'un polo e d'el forro :-)
E aquí el track:

Ibons d'Anayet

Como fa dos anyos, e con un pase pernocta, soi marchato a fer nuet ta's Ibons d'Anayet, en la valle Tena. Manimenos no teni´ñe la misma suerte con las luces de fa dos anyos, como me gosa pasar este verano, que nunca trobo buenas luces. I arribé tarde, con el tiempo chusto de montar la tienda de campanya antes que se fes de nuet de tot. Quan i arribé yera nuble (mismo cayó quatre gotiafinas),a ratos se veyeba un ciel estrelato que feba goyo de veyer-lo, pero altros ratos se meteba un gallín que feba que no se veyesen las estrelas como cal. Bai, que fotograficament no'n valió la pena, pero como ixo de las luces son cosas que no son en las mías mans de cosa sirve lamentar-se. Amés tota la nuet estió bufando l'aire, asinas que ni reflexos ni hosti... ni cosa
Con tot e con ixo fayé qualque foto, a'l menos pa demostrar que i estié :-)

Neouvielle

El sabado, chunto con dos cinqüentons (he he), me'n puyé ta'l Pico Neouvielle (nieu viella en gascón, mismo en la toponimia se nota el cambio climatico, perque nieu n'i heba bien poca), que tiene 3091 metros. Nunca no i yere estato en ixa zona d'el Neouvielle, plena d'ibons represatos, pero ye bien pincha pa pasar-ie un día en familia rodiando es ibons, ibonetz e selvas que i hai per astí. Ye prou humanizato, pero mereix la pena d'ir-ie.
La puyata ta'l pico nos costó un buen rato, sobre tot perque en primeras tenenos prous dubdas de quál yera el millor camín pa ir-ie, e ixo nos fayó perder muto tiempo. Amés, per an prencipiemos a puyar ye prou incomodo, perque i hai caos de bolos graniticos per tot, mismo a ratos caleba ir entadebant fotendo blincos per dencima d'es bolos. Dende es lagos no i hai guaire denivel (uns 800 metros), per lo que fa que sía un 3000 no guaire dur en ixe sentito, pero cal estar feto a mover-se per ixes ambients, perque i hai bell paso que se no i yes feto te puede dar un mal, sobre tot baixando.
Aquí me tenetz en la cima, escapezato :-)

 Amaneix quan prencipiamos a puyar:

 En la punta, con un mar de boiras enta el norte

 Enta el punto de partita:

 La misma anvista, pero ya baixando

Prou de retolica, aquí tos deixo el track.

Chugando con Photoshop

Pos ixo, que poquet a poquet voi descubrindo cosas que conoixebe pero que no sabebe fer. E aquí tenetz el mío primer HDR (High Dinamic Range u Alto Rango Dinamico). No me fa guaire goyo ixa tecnica, pero quan i hai tantismo contraste de luces, te permite fer qualque cosa. Se tenetz ganas ya me diretz qué tos pareix (artificial, natural, una mierda, fa goyo...).
En este caso ye l'atardeixer dende la Estiva, chuntando dos fotos, la una medindo en el ciel e l'altra en las rocas d'el primer plan. Mal día pa estar en Marmorés con la gabacha.

Puyata ta Suelza

Feba anyos que querebe puyar ta Suelza. Ye una montanya que tiengo aquí a'l canto casa pero que siempre la vas deixando. E per fin el sabado i puyé. Yere estato cerqueta, en es ibons de Barleto, pero quan i fue l'anyo pasato ya no tenebe fuerzas pa fer cima, perque yera la primer cursa que febe en la temporata veraniega e ya m'hebe clavato 1600 de puyata pa desayunar.
El sabado i fue con un amigo dende Ordiceto. Ye una cursa sencilla (una miqueta més de 600 metros de puyata) pa puyar ta un quasi-3000. Millor, perque fa una semana que tiengo una contractura en el huembro que me fa veyer las estrelas, asians que ya podetz contar cómo i puyé. Pos malament, como habretz pensato. Pero como no i hai guaire desnivel, marché chino-chano. Encara que se he de decir la verdat, me fayó més mal el huembro quan baixanos con es botes de la pista.
La luz no yera guaire buena (sobre tot perque no amaitinemos mica), pero ye una de las millors anvistas que i hai per aquí, perque a este pico le falta 30 metros pa's 3000 e amés no n'i hai dengún arredol que el tape, asinas que vistazo enta es quatre puntos cardinals.
Bueno, aquí tenetz qualques fotos. Las dos primeras son dende la Collata quan remata la lera:
Enta Pineta con el 100 macro:

 Aquí con l'angular, a's pietz l'Ibón d'el Cau:

 Enta la Vall de Chistau:

 Enta la France:

 Dicié que totz es picos que puyarí este verano el farí con esta camiseta. Este ye el primer, a veyer se agosto e septiembre (e octubre seguntes cómo vienga de nieu) cunden més que chulio:

 

 Una floreta per dencima d'es 2800 de la que no sé el nombre (el especialista, per favor, que la identifique :-D):

Esta sí que la tiengo identificata, la Papaver lapeyrousianum:

E aquí tenetz el track.

 Salut.

Qualques cosetas

Voi fendo qualque coseta encara que dimpués no trobo tiempo pa penchar-las en el blog. No ye que no me vague, pero entre unas cosas e altras (per exemplo, he recuperato la mía bicicleta de montanya, que tiene la pobra més de 20 anyadas e qualques dolencias tipicas de la edat, le pasa como a yo) no trobo l'inte d'editar las fotos.
Pero en esta semana he durmierto con la filla e uns amigos en la caseta de La Estiva e he feto una miqueta de flora. Maitín, se la contractura en la espalda me deixa, miraré de puyar ta Suelsa, pero per lo camín sencillet, per Urdiceto, poco més de 600 metros de desnivel pa quasi un 3000. ¿M'estaré fendo viello?
Aquí tenetz unas fotos de l'amaneixer en La Estiva. Me metié bien luego el rebel (6:15) e ixo que nos chitemos una miqueta tarde. Prencipió muit bien l'alpenglow (ixa color roya que se mete per las puntas quan sale el sol), pero dimpués una puta boira decidió que despertar-me tant luego no'n heba  valito la pena e decidió tapar el sol e malmeter las luces. Pero como ya yere despierto, decidié de mirar de fer una panoramica.

 
E ya pa rematar una siempreviva:

Au, salut.

Parnassius apollo

El sabado de buen maitín marché a buscar la Parnassius apollo. Se recordatz, ya la hebe vista l'altro día baixando de Tringonier, asinas que fue ta un puesto an que sé que i son abundants. Pero tiengo mala suerte, e el sabado bufaba un aire que no ye guaire convenient pa'l macro (u mica, u brenca), asinas que d'el que querrí haber feto, cosa. Tos meto las fotos que son acceptables, pero sin aire podrí haber feto altras cosas més interesants. Ya me sabretz disculpar.

Un cuco sobre una ustulata:

.

 Un par de flors de nieu:

 Un Aster alpinus

 E aquí las Parnassius apollo, esta primera sin aire habrí puesto sacar las dos a foco, pero con l'airaz ya yera prou difícil tener-ne una enfocata, no'n quedó altra soque tirar en rafaga e cruzar es dedos pa que bel·launa salís bien.