viernes, 27 de febrero de 2009

Hue Felqueral fa un anyet

Quí me'l iba a decir fa un anyo cuan prencipié a fer el blog (sin pensar-me-lo guaire, como foi mutas altras cosas en la vida, tot cal decir-lo) que aguantarí (e que m'aguantaritz, tot cal decir-lo una altra vez) tot un anyet metendo cosetas, fotos e fateras en el blog. El més important de tot ye que m'ha permitito conoixer buena cosa de chent, encara que sía virtualment, e creigo que l'ha feto una miqueta d'honra a'l aragonés belsetán, que ye d'el que se trata, ya que pachinas de fotos n'i hai una pila, pero poder arribar a la chent d'una traza tan dreta ye diferent, encara que arribe de forma virtual (una altra vez). Pos per tot ixo e més, estoi que cal celebrar-lo, u a'l menos nombrar-lo.
I ha habito intes de baixón, que no m'apeteceba fer res; altros que yere una miqueta més hiperactivo e ibe pinchando cosetas a menuto, e cuento que el tiempo que contine el blog enta debant, perque no pienso fer-lo per secula seculorum, continaré con la misma marcheta.
Es temas tocatos no son estatos guaires, sobre tot fotografías d'el mío "medio ambient", pero siempre i hai tiempo pa entrar a tocar el tema de las luengas, e mismo bel·la vez cualque custión personal. Estes días m'habría feto goyo d'ir amostrando-tos cualques fotos d'el carnaval de Bielsa, pero con muta dolor de corazón no me ye estato posible de quedar-me-ie esti anyo; p'altro anyo será.
Pa rematar ya, perque voi improvisando sobre la marcha (nunca no soi estato de fer, desfer e refer es textos, per ixo ye pro espontanio: trigo las fotos e dimpués en foi bel comentario), agradeixer-tos a totz es que tos itz pasando per el blog de cuan en vez, e sobre tot a's que deixatz bel comentario. Per ixo, permititz-me una chicota mofla e que bufetz con yo la vela d'el cumpleanyos, una vela muit tipica per este país. Salut e no rebletz.


15 comentarios:

  1. ¿Deseguro quies que te la bufemos?
    Pues bienga apreparate... BUFFFFFFFFFFFFFFFFFFFFFFFFFFFFFFF

    ResponderEliminar
  2. Y que cumplas muchos más!

    ResponderEliminar
  3. Muitas felizidaz y enta deban. Prou que ha feito muita onra pa dar a conoxer o belsetán -y laragones en cheneral-.
    Yo m'estimo más no bufar... encara que si lo cambias por bella atra cosa.

    ResponderEliminar
  4. Muitos parabiens. No conoxeba o tuyo blog, pero me'n pienso que en tornaré...

    ResponderEliminar
  5. Per molts anys, toivotan paljon onnea!

    ResponderEliminar
  6. Muitismas Felididaz Felquera!!
    Per muitismas añadas, per muitismas mas fotos y per ixe poliu belsetan!!
    Salut y a plantar firme

    ResponderEliminar
  7. Mutas gracias a tots es que tos hetz pasato, e especialment a aquers que han perdito encara que sía un minutet pa deixar la felicitación. Salut, e que elcontinetz leyendo-me mientres teniatz ganas. Mersi.

    ResponderEliminar
  8. Pues muchas felicidades y que sean muchas mas, esperemos.

    ResponderEliminar
  9. Muitas felizidaz, nino. Contina amostrando-nos ixas fotos tan polidas y ixe aragonés tan perfecto... fa goyo de poder leyer-te y tener tan amán os mons y as parolas de bielsa.

    Y prou mersi a tú.

    ResponderEliminar
  10. No sabeba que o tuyo blog feba ya un añet! Aspero que en cumpla muitos más.

    ResponderEliminar
  11. Felizitazions dende o Sur. Perén m'ha cuacau pasar-me por o tuyo blog ta "remullar-me" en a frescor d'as bals pirinencas (dibina bal de Pineta...) Sobrebuenas as tuyas fotografías.

    Entabán con o tuyo gran treballo.

    Chuan Chusé Bielsa

    ResponderEliminar