Ibón de Plan

Dimpués d'haber estato el cabo de semana pasato carnavaliando fendo l'onso, el cuerpo ya me pediba paz e retiro espiritual. E la millor paz e retiro espiritual que le puedo dar ye ir-me-ne ta la montanya, a cremar las zagueras toxinas de carnaval (e prou que las he crematas).
Ahier no me'n fue perque daban malo, e se suponeba que hue milloraba, pero quan m'he despierto a las 4:30 yera nevando encara, a las 5:30 ya no podebe més e he brincato de casa enta Saravillo, pa puyar ta la Basa de la Mora, a la que le debebe una visita con nieu. La qüestión ye que la nieu m'ha acompanyato tota la puyata, nevaba quan i soi arribato e continaba nevando quan me'n soi ito con las mans encheberditas. A's 20 d'ir-me-ne, quan yere en Lavasar, s'ha quedato raso e ha prencipiato a bufar el puerto, levantando vulturneras con la nieu polvina.
Que a qué viene tot esto? Pos ye una captatio benevolentiar, perque no soi contento con las fotos que he feto, pero ya yere con la flor en el cul demasiato tiempo :-)

Cómo las preferitz es expertos, con el WB més fredo u més calido?

As Devotas

Feba més d'una semana que querebe fer-le bel·la foto; per fin el martes podié fer-lo.

Aora, Carnaval :-)

Ordesa (e III)

Con estas cheleras que ha pegato, es obchectivos a fotografiar podeban estar mutos (este mesmo), pero me podió la gola e torné ta Ordesa per tercer vegata en poco més d'un mes (sin mica nieu e chel e quasi chelata) per veyer se la Cola de Caballo yera chelata de tot. No i habió suerte, tot el chel de la parte central s'heba caito e baixaba augua per la paret. Pero totz es de demés yeran chelatos e bien chelatos. Nunca no es hebe vistos antes asinas, e llevo mutas visitas ta Ordesa, se bien ye cierto que con tanto frío estoi que no i soi estato nunca. I heba un paquetón de nieu que dificultaba la marcha, e las mías previsions horarias se'n fueren a cascar-la, pero la Naturaleza ofreixeba un espectaclo impresionant.

Las fotos de la chornata.
Circo de Suaso, con unas boiras preciosas:

Cola de Caballo:

  

Gradas de Soaso:

Cascada del Estrecho:

E tes imáchens de la Cascada de la Cueva (yo cuento que es fotografos farinos una replega de firmas per cortar ixe fau he he):

 

Una nuet per Tella

Tella ye un lugar especial. Deixando a un canto el carinyo personal que tiengo a ixe lugar, a mutos d'es suyos habitants e la suya variedat d'aragonés, ye un puesto plen de machia: un dolmen, tres ermitas, un mirador privilechiat sobre buena parte de Sobrarbe, etc. I voi, quan puedo, a fer fotografías nocturnas. Ahier yera un día que con una miqueta de suerte, yeran totz es ingredients en el suyo punto: plomazo de nieu que no se'n heba ito, luna plena e, de tardes, el ciel raso. Fa anyos que tiengo un enquadre pensato, mica orichinal pero estoi que no he visto garra foto nocturna dende astí. E una de las razons per la que me compré una camara de formato completo yera per fer nocturnas, e quasi no'n he feto garra dende que la compré.
Asinas que, con ixa foto en la capeza, salié de casa con totz es cataticos e ta Tella que me'n fue. Mala suerte, dimpués d'una puyata con una miqueta de nieu (en el pacín de Cortalavinya, en el esbarre de La Miana e tot Lo Bovaral dica Fandichuerre), me trobo con boiras en el ciel, pero gordas, no pas finas. Totas las mías ilusions fotograficas se desfayoren, pero ya que bi yere, no me'n ibe a tornar ta casa con las mans lasas. Asinas que, a -5'5ºC e forrato, acometié el camín de las ermitas. A'l menos tenié suerte e heban feto tranya.
Bai, que no foi soque estraliar e yo soi de pocas parolas, que tos deixo las fotos e caldrá esperar a que se tornen a dar las circumstancias apropiatas a veyer se consigo el que quiero.
No me negaretz quee l puesto ye chulo:

 Tornando enta l'auto:

 Dende lo garache Murillo:

 E ya, antes d'entrar en casa e en calor, una anvisteta de Bielsa la nuet (ai, no, que ixo se diz en francés: Bielsa la nuit). Siempre he quiesto fer esta foto con nieu, e como ahier no ibe a molestar a dengún deixando l'auto en bell medio de la carretera...

Ixo ye tot, aora a esperar la ola de frío polar.

Plomazo

Las previsions, per fin, s'han cumplito. I hai plomazo de nieu. No pas en Bielsa, an que lleva nevando més de 24 horas e no cuento que arribemos a's 10 cm. de nieu, pero sí en Pineta, an que en ha caito més de medio metro de nieu. Sí, un paquete. Asinas que quan m'he despierto, a las 6 e pico d'el maitín, m'he asomato a la finestra e he visto estrelas. He pillato totz es trastes e me'n soi ito ta Pineta. Pero en la vuelta d'Ixabierre m'he meso a fer comedia con l'auto, perque no quereba puyar nian con las ruedas de nieu. Bien se vale que el tracto de l'Ayuntamiento pasaba en ixe inte enta Ixabierre e he puesto puyar. Perque ha durato poco rato e no me podebe mover guaire bien, pero i ha habito 10 minutos que s'ha ubierto el ciel per l'este e he puesto disfrutar d'unas luces estupendas. No he puesto refleixar la belleza d'ixe inte, pero se tos puedo dar una miqueta d'ixe rato, me foi contento.

Per Ordesa II

L'altro día no querebe saturar con tanta foto, asinas que decidié de trestallar la entrata en dos. En esta tos muestro es churrros de la parte baixa d'Ordesa, per totz conoixitos, asinas que no descubriré America ni cosa pareixita. Pero estes días soi estato mirando fots d'Ordesa hibernals e la verdat ye que se'n veye bien pocas. Pero, con e con ixo, tiengo un problema. No sé se ye per la emoción d'el día u qué, pero me fan goyo las fotos que foi quan son recients, con el paso d'es días ya no me'n fan tanto. Ye normal? Solo me pasa a yo?
En fin,q ue aquí las tenetz. No podié dedicar-les guaire rato perque quan fue conscient de la hora que yera me die prisa per arribar ta l'auto, e ye que m'estimo més d'arribar ta casa a la hora de comer, e a las tres e media ya yere en Bielsa (contatz que i hai hora e media de viache entre Ordesa e Bielsa).
Las Gradas:

 Estoi que esta no ye guaire conoixita:

 La d'el "Estrecho" dende alto. No m'atrivié a salir de la baranna per lo chel, no yera pa fer bromas e yo tiengo dos fillos...

 Dende abaixo, tampoco no podebe acercar-me-ie més per no llevar grampons:

E esto ye prou. Pa este cabo de semana dan muta nieu, a veyer se puedo salir a fer una curseta, pero caldrá parar cuenta con las litz.

Per Ordesa I

Dimpués d'el chasco que me llevé el martes quan, en bell medio d'el camín de Suaso paré cuenta de que hebe cacegato la rotula d'el tripode, el sabado torné ta Ordesa con el viello, pesado pero fiable manfrotto a fer las fotos que habrí quiesto fer el sabado.
Endrecé el camín de nuet, con la idea de puyar primer ta la "Cola de Caballo" e dimpués baixar fendo fotos tranquilament. Per ixo trestallo esta entrata en dos: en las fotos que fayé tranquilament (la de hue) e las fotos que fayé con prisa e rodiato de chent. Como no tiengo criterio, tiengo una pila de fotos, pero miraré de no fer-me guaire cansino.
Prou que son puestos muit conoixito e fotos muit vistass, pero estoi que d'hibierno tienen una machia especial, per la nieu e el chel. Pos ixo, hue las fotos son de la parte d'alta de la cursa, quan quasi se me lleva l'aire (e ixo que soi cerca d'es 80 kg. e con tot l'equipo a la chepa debo estar entre 85 e 90).
Circo de Suaso, el puerto fa revolbins de nieu en la Punta Treserols e poca nieu queda en tierra, perque se la llevata l'aire. ixo sí, i hai unas cheleras d'el copón. L'aire quereba foter-me en l'augua e veyé salir volando una molatiera, bien se vale que s'aturó cerqueta:

Cola de Caballo, qué diferiencia con fa dos semanas, quan no i heba mica chel:

 Con una temperatura de color més fría:

 Dimensionando:

 E ya de baixata, el primer churro que i hai baixando enta las Gradas. Aquí ya m'hebe trobato las dos priemras personas que puyaban: