martes, 20 de agosto de 2013

Tringonier e Pico L'Ibonet

Aora que ya no i hai tanta flora (ye un decir, perque el sabado veyé una zona plena d'orquidias recient salitas, e encara queda muta més flora que altros anyos pa estas fechas), arriba la hora de fer montanya de verdat. Ye a finals d'agosto e en septiembre quan me meto en forma, perque dende finals de mayo dica primers d'agosto voi seguindo el calendario de la naturaleza (sobre tot flors) e no camino guaire, u a'l menos tanto como me faría goyo, perque sé aón sale cada especie e per un regular no cal caminar guaire.
Pos ixo, que el sabado decidié de fer una miqueta de montanya. El primer plan yera puyar ta un 3000, pero como el que iba a estar el mío acompanyant a la fin no podió venir, me'n fue ta un puesto a'l que le tenebe ganas dende feba tiempo (perque en el 3000 d'es plans inicials ya i yere estato quantas vegatas): el Pico Negro (en mutos mapas sale como el Pico l'Ibonet, pero pa ixo me fío més d'el de PRAMES dica que pregunte a bel·laún de Parzán que me diga el nombre d'el país: CONFIRMATO, SE DIZ L'IBONET), dencima de l'Ibón de Tringonier.
Ye una puyata dura pero que mereix la pena, perque dende ixe pico -que fa 2869 metros- i hai una envista impresionant: Treserols, Astazus, Robinyera, L'Almunia, Neouvielle, Midi de Bigorre, una pila de montanyas en Francia, Batoba, Culfreda, Aneto, Vachimala, Lardana, Espadas, Suelza, Fulsa, Cotiella, Penya Montanyesa, tota la man pacina de Pineta...
La baixata la fayé per lo Marcatiecho ta tornar a salir ta la Plana el Cabo.
Ye una cursa dura, perque dende l'Ibón dica la punta no i hai camín. Ixo sí, disfrutaretz ixa puyata se sotz masocas e/u cheologos.
Tos deixo qualque foto que fayé, encara que quan arribé ta l'Ibón la luz ya prencipiaba a estar dura, e a la baixata yere cansato e no me trenqué guaire la capeza.
El Marcatiecho, antes de la Plana el Cabo, quasi de nuet encara:
 Primeras luces sobre Robinyera:
 Treserols refleixatas en l'Ibón:
 L'Ibón dende el Pico, con parte de la envista:
 Una capan·neta espaldata en la Plana el Marcatiecho, qué belsetán que no se i charraría...

E tamién tos deixo el recorrito/track:

4 comentarios:

  1. Chenial! Pero o vinclo d'o track tamién ye espaldato, como a capan·na...

    ResponderEliminar
  2. Gracias per avisar Chesús, pero estoi que ye problema de blogger, per més que miro d'actualizar l'enlaz, siempre sale error. Como feba tanto tiempo que no puyabe garra cursa, no m'acordabe cómo hebe de fer-lo. Fato que ye un con las nuevas tecnolochías :-)

    ResponderEliminar
  3. El reflex em sembla collonut i amb unes grans possibilitats a altres hores ;-)
    Salut!!

    ResponderEliminar
  4. Sí Pere, jo vaig pensar el mateix, però els 1000 metres de pujada que hi ha, més una aproximació de 7 km. amb tot el pes de l'equip, tenda, sac i comida fa que m'ho pensi (perque pujar-hi de nit és molt complicat).
    Si puc juntar les ganes amb el "pase pernocta" m'ho podria plantejar...
    Gràcies i salut

    ResponderEliminar