viernes, 13 de agosto de 2010

Perseidas u Glarimas de Sant Lorient

Ayer yera la nuet con més probabilidatz de poder fotografiar las Perseidas u Glarimas de Sant Lorient. De mediodías pleveba e no tenebe guaires esperanzas de poder salir. Pero de tardes prencipió a bufar el puerto, que aquí significa dos cosas: que no pleve u nieva (d'hibierno) e que baixa la temperatura. Asinas que de nuet el ciel yera raso como el uello d'un paixarico. Pillé la mochila, el tripode, una silleta d'ixas plegable, el mp3 e ropa d'abrigo e ta'l campo que i fue.
En viyé una cinqüentena, pero fotografiar-ne que se veiga bien una. La ley de Murphy actúa tamién de nuet. Quan la camara yera fendo la dark-frame u toma escura saliban las estrel·las més majas, e quan yera pillando luz u no se'n veyeba garra u yeran chiquirrinas de tot. Talment 30" sía un tiempo excesivo perque ya prencipeyan a veyer-se las trazas de las estrel·las, pero como i heba luna nueva habié a tirar d'ISO pa poder captar-las e de tiempo d'exposición pa mirar de tener més probabilidatz.
En fin, que i estié dica las dos, el sensor de la camara se calentaría per las tres horas que estié "afotando", pero no pas las mías mans, perque quan puyé ta'l coche marcaba 10ºC, e ademés feba aire de puerto. Pero ixo sí, un ciel majismo, s'apreciaba la Carrera Sant Chaime (u Vía Lactea) de pistón. Una maravilla ixo d'estar de nuet enn'o monte mirando-te el ciel.
No ye que se veiga gran cosa en la foto, perque ademés tiré d'angular pa pillar més troz de ciel, perque si con un angular ye difícil de pillar-las, con un tele ya has de tener muta suerte u tener més conoiximientos d'astronomía que no yo, que no sabié reconoixer soque Casiopea, y no'n soi mica segur d'ixo.
Astí, abaixo a la izquierda, se i veye una chiqueta estela, ixo ye lo millor que sabié conseguir :-(

P. S. Ya sabebe yo que no el hebe soniato e que bel·launa més hebe pillato. Debe d'estar que encara soi durmierto, perque no hebe caito en que las dos primeras las pillé antes de las 12 de la nuet e a'l descargar-las a l'ordenador me las guarda en carpetas diferents. Asinas que aquí las meto tamién, n'i hai una que se i vei escasament perque yera mui chiquirrina...

A veyer se la sabetz trobar :-)

4 comentarios:

  1. El método de tirar granos de arroz iluminando con el frontal da mejores resultados. Yo también probé, pero me salió más arroz que estrellas.
    Buen intento, al menos no se aprecia mucho ruido, y el encuadre está muy bien.

    ResponderEliminar
  2. ¡A la fin saliés! A o menos viyés estrelas que aquí yera pleno de boiras, en bel momento s'ubrió bel claro y viyé bella estrelica, manimenos no viyé garra perseida.
    Por cierto, ixa constelación sí que ye Casiopea, ye una tipica W que ye en a fin d'o Camino de Santiago (San Chaime) ent'o Norte.

    ResponderEliminar
  3. Great stuff here, definitely going to check it out later :)

    ResponderEliminar
  4. Este comentario ha sido eliminado por un administrador del blog.

    ResponderEliminar