Perseidas 2011

Estianyo m'he llevato a la filla mayor a veyer Las Perseidas ta La Estiva. Perseidas no'n veyemos garra, perque i heba luna plena e ademés yera prou nuble. De totas trazas estió bien. En prencipio inos a ir-ie es dos solos, pero s'apuntoren dos parellas més con es suyos fillos, e pasemos una buena nuet. Unaltro anyo será el veyer las fugaces, pero fer nocturnas en buena companyía, charrando e con uns vasetz de vin, no ye mica mal, e ademés con ixa anvista.
Antes de fer-se de nuet, quan ya lusquiaba, prometeba buenas luces perque yera nuble enta l'oeste, e no defraudó:
Dimpués, ya quan yera de nuet de tot, se fació el que se podió:

E el rebel sonó bien luego, pero unas boiras enta l'este nos privoren de que las puntas de las montanyas se metesen royas como en altras ocasions :-(
Au, salut
De totas trazas, ye un puesto bien pincho pa ir-ie a pasar una nuet, asinas que a veyer se a l'altro anyo acompanyan una miqueta més las condicions.

Luna plena

Dende que he tenito el segundo cadiello, no puedo escapar-me de días ta'l mont perque encara da muta fayena, e el que le queda de dar guerra. Asinas que se cosa quiero fer, no me queda unaltra que salir de nuet. Hue i hai luna plena, e en principio no ye guaire buena pa fer nocturnas. Manimenos, feba un anyo que tenebe en la capeza una imachen, e precisabe la luz de la luna plena pa que m'iluminás una ermiteta clavata en un puesto muto especial. Ye la ermita de Sant Chuan-i-Pablo, en Tella, de la que se tiene constancia de la suya consagración en el sieglo XI, concretament en l'anyata 1018, asinas que en 7 anyetz fará el suyo primer milenio (pero nunca no arribará a estar tant viella como el dolmen d'el mismo lugar).
Asinas que quan tenebe a's fillos ya dormindo, he pillato es trastes e t'allá que i soi ito (no sin veyer antes la gollata reprobatoria de la duenya, que debe de pensar que me falta un mallazo enn'a capeza). Quasi no m'ha feto falta ni el frontal, perque se i veyeba mui bien, menos quan pasas per un trocet de selva. Bueno, aquí va qualque foto:

Estrels no se'n vei guaires estas nuetz, pero siempre se puede fer altras cosetas. Salut.

Un ratet per Tella

El domingo de tardes marché enta Tella con la intención de veyer (e fotografiar se podebe) un fenometo astronomico que m'heba comentato l'amigo Frikosal.
No i habió suerte, l'horizont en es Pirineus no ye el més propicio, perque ye tot plen de montanyas e tozals (encara que ixo ya el sabebe yo antes d'ir-ie). Ademés a las horas que se suponeba que s'heba a dar, tenebe la luna chusto dencima (yera chicota, pero ya feba luz) e la contaminación luminica de L'Aínsa, Boltanya e mismo Uesca an que tenebe que enfilar la camara. Total, que i fue quasi per demés, pero ya que ibi yere fayé qualque foto. Dimpués salié a tota vitesa cara casa, pa arribar-ie a hora de chitar a's cadiellos.
Bueno, puyé ta'l tozal an que ye la Virchen de la Penya, la mía intención yera ir ta Sant Chuan i Pablo, pero dende aquí tenebe millor anvista enta abaixo. Ya lusquiaba quan i arribé, pero encara se podeba veyer una brinquerrina d'azul per an s'heba amagato el sol. A la dreta ye Castillo Mayor:
Mientres febe tiempo m'entretenié fendo altras fotos, como esta de la portalada de la ermita con la Onsa Mayor:
E ya quan marchabe, encara le fayé bel·la foto a'l dolmen, antes de salir a las quatre suelas:

E aora dende Espierba

Hue tenebe previsto fer qualques fotos un rato dimpués de que se metés el sol, pero a la fin se m'han tuerto es plans e he habito de quedar-me a casa cudiando a'l borche. Como m'hebe quedato con las ganas de fer nocturnas, quan he puesto soi salito de casa un par de horetas ta Espierba, e soi tornato fa un ratet (encara soi descargando las fotos). Alto en Es Morés no i feba mica frío, 0ºC, pero en ixa puta ribera Espierba cómo se i nota la inversión termica: -5ºC. Bai, que ye la primer vegata que no paso fredor fendo fotos de nuet d'hibierno. Como i hai luna nueva se i veyeba un ciel espectacular, e ixo que yere bien cerqueta d'el lugar. Astí m'he pegato una hora e media u per astí; cal estar friki :-D
El Mallo Gran:
Una de larga exposición dende el Mallo Gran enta la Sierra de las Zucas:
Una forzando la sensibilidat de la camara, pa que tos fayatz una ideya d'el ciel que i heba:
Un árbol enta el norte, iluminato con el frontal:
El domingo, se puedo e me vaga, miraré d'ir a fotografiar una coseta que m'han contato, pero no sé se veyerá dende la montanya, perque es nuestros horizonts ni son plans ni son baixos. ya tos contaré. Salut.

Ahier de nuet en Pineta

Ahier, dimpués de chitar a's críos, decidié de puar ta Pineta a fer unas nocturnas aprofitando que no i heba luna e que se i veyerían més estrel·las. Ademés, dimpués d'el nevazo d'el viernes de nuet e d'el sabado de maitins estaría tot bien pincho. E asinas yeras, quan i arribé a las 23:15, i heba -5ºC, e como no tenebe guaire tiempo, perque querebe estar en casa quan le tocás el biberón a'l chicot, me metié a fer fotos con prisas. E encara que sé que las prisas no son buenas companyeras, no me'n quedaba altra, asinas que en las dos horas que i estié fayé el que podié, que no ye guaire. Ademés el frío fa que las pocas neuronas que tiengo no treballen como cal, e per ixo se me podeba haber aplicato el refrán ixe de "atina marido que la noche es corta". Total, que pasé buena cosa frío e no torné con las fotos que querebe. He de comprar-me unas botas con calefacción a veyer se en puesto d'estar pensando en es dedetz chelatos, puedo pensar en las fotos que quiero fer.
Ixo sí, mereixió la pena, perque i heba un ciel espectacular, e no se sentiba soque el río correndo a uns metros d'an que yo yere.
Esta ye la primera que querebe fer. Sabebe que la polar quedaba a la dreta de la Capilla (dende la mía anvista, prou que sí), asinas que miré un enquadre adecuato encara que no se i viyeba ni pa churar. En el que no cayé (las prisas e curto que ye un) ye en meter una apertura de diafragma ubierta perque no i heba luna, e zarré a 10 como se n'i habés, pero no'n i heba. A's vente minutos d'estar la camara en marcha paré cuenta d'ixe chicot pero important detalle, e como querebe fer altras cosas, veyé que no me vagaría de fer las altras fotos que tenebe pensatas, asinas que a aturar la exposición e a asperar que se fes la toma fosca (u dark frame). Me quedó muit escura, pero con es programas he mirato d'aclarir-la, encara que se veye muto ruido.
Dimpués querebe sacar el fundo d'el circo, e fayé una preba forzando la ISO pa veyer se yera bien el foco. Como tenebe la ISO més alta, se i veye muto ruido, pero quiero amostrar-tos el ciel que se viyeba. Una pena la contaminación luminica, cuento que será de Gavarnía. Con una camara que treballe millor l'alta sensibilidat (una 7D u una 5DII, per exemplo), podrí fer millor fotos como esta, pero cal aconortar-se con el que tiengo :-(, que tampoco no ye malo pero no ye buen pa fer nocturnas.
E ya la zaguerá que fayé, con el mismo enquadre que l'anterior pero con 15 menutos d'exposición, antes de salir hopando cara abaixo a dar el biberón:
Au, salut.

Una nuet en es Ibons d'Anayet

Habe mutos mutos anyos, estié en Canal Roya encara que no arribé ni an t'A Rinconada. Ixe lugar se me quedó en es pendients (n'i hai tantos en la mía vida que ixa caixa ye rebutient, sobreixen es deben). I soi tornato, m'han concedito el permiso -a veyer si n'i hai més- e i fue a pasar un par de días per astí per la montanya.
Esta vegata no le fayé guaire caso a la Canal Roya (finals d'agosto no ye la millor epoca pa viyer-ie flora) e me centré en la puyata enta's Ibons d'Anayet con un mochilón que pesaba més que una vaca en brazos. Arribé t'alto a l'hora de comer e me dediqué a mirar enquadres pa las nocturnas, preveyer luces, fer fotos, etc. Tenié suerte perque de tardes salió quantas boiras que millororen el ciel, que liso e laso no tiene guaire gracia. El puesto ye d'una belleza exultant, bien se vale que Aramon (Gobierno d'Aragón e Ibercaja) contribui a recordar-nos en qué mundo vivimos e se veyen en una collata es remontes d'Espelunciecha.
I fayé una pila de fotos dica que prencipió a fer-se de nuet. Es días anteriors ya hebe visto que la luna me faría una santchuanada: yera quasi plena. Pero saliba per lo sur, e esperabe que s'amagás dezaga de las montanyas e me permitís fer bel·la foto nocturna sin guaire luz. Como viyé que tardaría e yere cansato, me chité a dormir pensando que si me despertabe luego encara podrí fer qualque cosa. E estar medio insomne me venió bien. Ubrié un uello sobre las cinco, la luna ya no se veyeba e tenebe el carro chusto dencima d'el Midi d'Ossau, refleixando-se en l'ibón. Asinas que vencendo la mandria e desafiando el frío me metié a fer fotos dica que salió el sol.
Soi tornato muto contento d'es resultatos, e como siempre tos ne deixo bel·la muestra. Me queda un camatón de fotos en l'archivo, pero no quiero cansar-tos con guaires, asinas que aquí en va bel·launa.
Una anvista dende el camín que puya de Sallent:
Unaltra dende el mismo puesto pero con un enquadre diferent:
Dende la orilla de l'ibón:
Se fa de nuet, el viello volcán que estió el Midi pareix que torna ta la vida:
El que veyé quan me desperté, no ye mica mal ixa anvista:
La Vía Lactea u Carrera Sant Chaime sobre l'Anayet:
E mirando de fer una circumpolar, no podié estar guaire rato, dica que prencipió a veyer-se una miqueta de luz per l'este:
E ya, per fin, quan amaneixeba:

E prou :-)

Perseidas u Glarimas de Sant Lorient

Ayer yera la nuet con més probabilidatz de poder fotografiar las Perseidas u Glarimas de Sant Lorient. De mediodías pleveba e no tenebe guaires esperanzas de poder salir. Pero de tardes prencipió a bufar el puerto, que aquí significa dos cosas: que no pleve u nieva (d'hibierno) e que baixa la temperatura. Asinas que de nuet el ciel yera raso como el uello d'un paixarico. Pillé la mochila, el tripode, una silleta d'ixas plegable, el mp3 e ropa d'abrigo e ta'l campo que i fue.
En viyé una cinqüentena, pero fotografiar-ne que se veiga bien una. La ley de Murphy actúa tamién de nuet. Quan la camara yera fendo la dark-frame u toma escura saliban las estrel·las més majas, e quan yera pillando luz u no se'n veyeba garra u yeran chiquirrinas de tot. Talment 30" sía un tiempo excesivo perque ya prencipeyan a veyer-se las trazas de las estrel·las, pero como i heba luna nueva habié a tirar d'ISO pa poder captar-las e de tiempo d'exposición pa mirar de tener més probabilidatz.
En fin, que i estié dica las dos, el sensor de la camara se calentaría per las tres horas que estié "afotando", pero no pas las mías mans, perque quan puyé ta'l coche marcaba 10ºC, e ademés feba aire de puerto. Pero ixo sí, un ciel majismo, s'apreciaba la Carrera Sant Chaime (u Vía Lactea) de pistón. Una maravilla ixo d'estar de nuet enn'o monte mirando-te el ciel.
No ye que se veiga gran cosa en la foto, perque ademés tiré d'angular pa pillar més troz de ciel, perque si con un angular ye difícil de pillar-las, con un tele ya has de tener muta suerte u tener més conoiximientos d'astronomía que no yo, que no sabié reconoixer soque Casiopea, y no'n soi mica segur d'ixo.
Astí, abaixo a la izquierda, se i veye una chiqueta estela, ixo ye lo millor que sabié conseguir :-(

P. S. Ya sabebe yo que no el hebe soniato e que bel·launa més hebe pillato. Debe d'estar que encara soi durmierto, perque no hebe caito en que las dos primeras las pillé antes de las 12 de la nuet e a'l descargar-las a l'ordenador me las guarda en carpetas diferents. Asinas que aquí las meto tamién, n'i hai una que se i vei escasament perque yera mui chiquirrina...

A veyer se la sabetz trobar :-)

Quan es nuestros antepasatos trigoren este lugar pa fer-ie un dolmen megalitico, quan es las albors d'el primer milenio i fayoren una preciosa ermita romanica e dimpués, per si nunca i heba poca intervención divina, en fayoren altras dos ermitetas més la ilesia d'el lugar, quan i hai tantisma tradición sobre bruixas e bruixons... en un lugar machico como ye Tella, no les faltaba mica razón.
E de nuet, como diz la canta de la Ronda de Boltanya, "debajo del Dolmen de Tella, se siente girar y girar el planeta".
Espero que esta imachen tos faya sentir una miqueta ixa sensación de que chira el planeta. Un quartet d'hora d'exposición, pro como pa veyer cómo chira este planeta. Salut.

Sant Chuan-i-Pablo

Ayer dimpués de cenar m'asomé ta la finestra e viyé que yera despasato. Encara que i heba luna plena ya habe meses que tenebe pensato ir ta la ermita de Sant Chuan-i-Pablo a fer unas fotos nocturnas, perque la verdat ye que el puesto tiene mutas posibilidatz, tanto de día como di nuet. En la media hora que cuesta d'ir dende Bielsa dica Tella se metió nuble, pero ya que ibi yere no me'n ibe a tornar sin, a'l menos, mirar de fer bel·la foto. Estié mirando qualques enquadres pa tornar bel día que sía despasato e sin guaire luna, e la verdat ye que el puesto da pa ir-ie més d'una vegata.

El puesto se conoix como Sant Chuan-i-Pablo per la ermita que i hai, encara que popularment (e talment pa atrayer turistas) se le denomine Puntón de las Bruixas. La ermiteta estió consagrata en l'anyo 1019 (quasi 1000 anyos enta zaga), e forma parte de la ruta de las ermitas, camín circular que tos recomiendo, perque l'anvista ye soberbia. Se pasa per la ermita de Faixanillas e la de la Virchen de la Penya. Ademés, Tella ye un lugar majismo, con una cantidat de cursas a fer que enorme per un medio natural inmenso.

Las fotos no valen gran cosa, ya digo que tiengo que tornar-ie en millors circunstancias, pero ya que i fue, a'l menos querié aprofitar el rato que i estié. Quan arribé ta'l coche (i hai 20 minutos) prencipiaba a nevusquiar... y trobé el briquet que me pensabe que hebe tresbatito (el tabaco me fa companyía mientres foi fotografía nocturna, tamién ye opcional llevar-se un arradiet, pero tampoco no ye mal sentir la vida nocturna).
La primera ye forzando el ISO pa mirar el enfoque, tiene un rudio que tira enta zaga, pero a este tamaño no se nota guaire (ISO 3200, f/2'8, 30"), e churo que yera de nuet:
Esta ya ye feta a ISO 100, f/2'8 e 138" d'exposición, i hai diferiencia, ¿verdat?:
Pues con un aduyant amagato entre es buixo e iluminando la ermiteta, estoi que se puede conseguir grans fotos en este puesto.
Mientres ibi yere, pensabe en tota la tradición que i hai en Tella sobre las bruixas que feban las suyas trobatas per estas ermitetas, estoi que una persona miedosa u supersticiosa no podría dedicar-se a este tipo de fotografía, perque la cantidat de cosas que se sienten de nuet en medio d'el mont ye increíble (el craberet, bel chabalín, l'aire que fa mover es camals... bai, que te puetz cagar de miedo como deixes volar la imachinación). I tornaré, pero con briquet.

Una nuet en Guaso

En verdat no ye estata una nuet, estoi que i soi estato menos d'una horeta. Somos baixatos a cenar ta casa d'es cunyatos e m'he escapato con el mío cunyato antes de cenar. Ya feba días que tenebe la ideya de fer una foto nocturna con un exconchurader (¿verdat Frikosal?), la pena ye que este de Guaso ye chusto en bel medio de las dos poblacions més grans (ergo con més contaminación luminica) de tot Sobrarbe: L'Aínsa e Boltanya. Asinas que i heba luces per tot, una pena no tener un edifico d'estes per la valle Bielsa, pero con tot e con ixo no me'n ibe sin las mías fotos. Ya diretz se tos fan goyo. Salut.
Ya sabretz que es exconchuraders son ixas construccions tradicionals que serviban pa que es mosens d'es lugars ninviasen las tronatas enta's lugars de la redolada e que no apedregás en el suyo lugar. En Sobrarbe n'i hai bel·laún, yo conoixco que el de Guaso e el de A Torrocilla, pero regular que n'i habrá més, a veyer se trobo documentación e en trobo qualcún que no sía rodiato de contaminación luminica.
L'exconchurader con la torre de la ilesia dezaga:

No més la ilesia, que per era misma ya mereix una visiteta, se vei dende mutos lugars d'el país perque ye en la punta d'un tozal:E aquí una anvista d'es dos edificios, que bel·laún que sepa treballar con photoshop me diga cómo correchir la perspectiva...

Torno a fer fotos

Per fin, dimpués d'un mes y medio con la camara arreplegando polvo, ayer de nuet salié a fer fotos una altra vegata. Como ya somos en luna nueva i heba un ciel que feba goyo de veyer-lo, con la Carrera Sant Chaime preciosa. Encara que i hai poqueta chent per estas montanyas, i hai contaminación luminica, pero mica comparable a la que n'i hai en las ciudatz.
La mía intención yera mirar de fer una foto circumpolar arredol de la estrel·la polar, pero el mío temporizador chinorri no se lleva guaire bien con la mía camara, ademés que no debié de programar-lo bien. Asinas que desisitié e pillé el 50mm f/1'8 per la suya luminosidat, pa sacar buena cosa d'estrelas. Viyendo las fotos a traviés de la pantalleta de la camara pareixeban bien, pero hue en casa no m'han feto guaire goyo, i hai muto ruido e el foco no ye guaire bien. De totas trazas, reducindo-las no se veyen tant mal, per ixo m'animo a puyar-las. A veyer cuán aprendo a fer fotos nocturnas como cal
Bueno, per mirar de conseguir-las que no quede. A'l menos se i vei fauna, perque tornando enta casa viyé un corzo, dos liepres, un teixón e ya a 100 metros de casa un ciervo que cuasi me'l meto en drento el coche.

Esta ye feta dende el mirador enta Anisclo que i hai pasato Buerba, se i vei La Punta las Solas con nieu:
Esta ye feta dende el mismo puesto enta la Penya Montanyesa, se i apreceya pro bien la contaminación luminica de A Espunya e es suyos adosatos:
La Carrera Sant Chaime:
Esta la fayé baixando per lo desfiladero de As Cambras (u Anyisclo baixo), iluminé una miqueta l'árbol con el frontal:
E esta ye feta pensando en una canción de la Ronda de Boltanya que diz, charrando d'es lugars de Sobrarbe, "luciérnaga entre montañas / no te dejes apagar / si los hombres permanecen / los dioses ya volverán":
P. S. Pareix que en poquetz días tendremos, 30 anyadas tarde, una lei de luengas d'Aragón. M'he abstenito d'escribir sobre el tema viyendo la cantidat de rebuznos que se sueltan en foros como el d'el Periodico de Aragón, que ye el que goso leyer per internet. A veyer en qué para tot.

Una nuet en La Basa la Mora

Ayer i fue con dos fotgrafos de verdat (la un ye frikosal, tenetz el enlaz a'l suyo blog astí a la dreta, tos lo recomiendo), no pas como yo, con qui pasé uns ratos buenismos (no i estiemos tota la nuet, a las 2 e cuarto ya yere en casa) fendo-nos unas risas, charrando de fotografía, d'el santo prepucio e de cuantas cosas més. La un, el que gastaba canon, me deixó un obchetivo de 50 mm. con una apertura de diafragma de 1'8 (ixo ye la hostia de luminoso), e estié probando exposicions curtas (30 segundos) con ISO 800 e el diafragma ubierto de tot. No fayé fotos de més tiempo perque con 50 mm no se pilla guaire anvista, asinas que me centré en mirar de conseguir bel·la foto anque fues remotament similar a las que fa, e nos deleita con eras, frikosal. Ya me diretz qué tos pareixen. A yo me fa més goyo la primera.
Salut.

Més nocturnas

Ayer marché, una altra vez, a fer fotos nocturnas perque me pensabe que con la nieu que heba caito estaría tot mui majo, e en yera. La pena ye que i heba desmasiata luna e con es 8 minutos d'exposición no saliban guaire bien. Como no feba orache pa estar fendo prebas de diafragmas e tiempos, en ficié unas poquetas e me'n torné enta casa. Es resultatos no rematan de convencer-me guaire (per no decir mica), pero ya que i fue pos en meto bel·la una. Torné a marchar cara Tella, e bien se me'n valió que dica el Dolmen -u Losa la Campa- encara no yera mal la carretera, ya no puyé per Lo Pinar perque astí i habría més nieu e chel enn'a carretera. Pa ir ta'l Dolmen per el camín i heba en bel cacho an que m'arribaba la nieu dica es collons (literal), e un aire que no me tiró la camara con el tripode perque el metié baixo pa que fes menos resistencia. El resultato estió este:
Ya baixando, dencima de Cortalavinya, e podendo-me estar en drento el coche, torné a fer-le una foto a Penya Montanyesa e Penya Solano, e le la quiero dedicar a O Zagal, va pa tú, per el contacto con el país.

Dende Espierba (Es Morés)

E vuelta la burra ta las cols, ayer con tot el frío que feba (dica -8ºC) torné a salir con la camara. Salié de casa a las 23:15 de la nuet e i torné a las 2:45. Ayer estié calculando el tiempo que costaba de fer cada foto, e son 8 minutos con la camara en marcha e altros tantos mientres procesa la imachen; en total més d'un cuarto d'hora. Pro que cambea dependendo de las circunstancias, ayer i heba mingua, per ixo le podebe meter tot el tiempo que permite la camara en Bulb, e le ubrié més el diafragma (f/3'5), ya que la luna no yera tant fuerte como l'altro día, que yera plena, ademés bel ratet la tapaban unas boiretas. Las primers fotos que fayé dende la presa de Pineta no valen pa cosa perque la luna no heba salito encara per Suelza. Dimpués me'n fue cara Espierba e ya podié aprofitar més la luz de luna. E éstes son es resultatos. Apa, salut.