Buen 2013

Tiengo bel·las fotos esperando el procesato, pero no me vaga. Asinas que, mientres el foi e no, tos deixo esta foto d'ahier d'el Forau d'Aiguallut (Vall de Benás) pa deseyar-tos a totz es que pasatz per aquí un buen 2013, encara que la cosa no pinte guaire bien :-(

Pos ixo, buen 2013 e salut e treballo que no'n falte.

¿Hibierno?

Siempre yere estato en este puesto d'agüerro, menos una vegata que pasé caminando, de verano, dende Pineta ta Sant Úrbez (e no i paré guaire, perque pensabe visitar-lo d'agüerro). Tenebe ganas de veyer-lo con nieu e chel, e pensabe que n'i habría a tamas de las temperaturas tant altismas que tenemos pa estar en esta epoca de l'anyo. En Bielsa n'i hai una miqueta a partir d'es 1400 metros, e ixa zona ye a la misma altitut. Pero me trafucabe, en quedaba muit poca a partir de Selva Plana, igual como en A Ripareta. A partir d'el Barranco d'a Pardina ya n'i heba més, pero un eslisón en ixe barranco me fayó cayer ta l'augua, asinas que no me'n quedó altra més que emprender enta abaixo. E bien se vale que no feba frío e el forro que llevabe ye impermeable e es pantalons de montanya s'ixecan a escape. Per suerte, la camara no se banyó e el trompazo no fue guaire fuerte :-)

E aquí ye an cayé de grapas. Una vez que comprebé que l'equipo no s'heba mullato, encara fayé qualque foto.

En esfensa de la Educación Publica

Ya perdonaretz que me'n salga una miqueta d'el tema fotografico-natural, pero esto ye important.
Ni tos cuento cómo afecta a la escuela de Bielsa, ni a la Escuela Infantil de Bielsa, cuento que i hai prous exemplos per tot.
Aquí podetz firmar pa que no i haiga més recortes en es presupuestos d'Educación.
A veyer se, como minimo, luitamos pa que esta chent no esbrozole es servicios publicos basicos.

El puent

Dimpués de la nevata d'el miércols (no ye que cayés gran cosa, pero quasi tanto como tot l'hibierno pasato en chunto) querebe haber aprofitato este puent pa fer qualquecosa, e més aprofitando que veniba un amigo fotografo que siempre que tiene més de dos días se'n viene enta aquí u enta la vall de Chistau. Pero fotograficament no s'ha puesto aprofitar guaire, qué le imos a fer. L'hibierno tiene estas cosas, te chelas, se no trobas buenas luces poqueta cosa se puede fer, ye tot plen de nieu e chel e no puetz arribar ta seguntes qué puestos, etc.

Pero rai, ya i habrá altras oportunidatz. Amés soi prebando un nuevo programa d'edición de fotos, asinas que se a la mala suerte a la hora de fer fotos, le chuntamos que somos de prebatinas, a veyer qué sale.
P.S. Veigo que se veyen poco nitidas en la miniatura, se i punchatz dencima se veyen millor.

De buen maitín

U millor dito, bien de nuet. Fa días que tiengo esta foto en la capeza. Bueno, la foto e la puyata, perque siempre que soi estato per ixe cabo soi puyato en auto. E perque me i han llevato, que yo no tiengo 4x4. Asinas que dende fa días pienso que quan sía tot bien plen de nieu (que puet estar que sía esta semana), i puyaré a fer esta foto. Pero como sabebe per aón caleba ir pero no hebe feto nunca ixe camín, marché con el GPS pa tener la ruta presta pa quan i vaya con nieu.
La verdat ye que debe d'haber-ie una anvista buenisma perque vas per la divisoria entre Pineta e Ruego, pero como yera escur como una lupatera, no se i veyeba ni pa churar. Salié d'Espierba a las 6:10 e arribé ta la Plana Fonda a ixo de las 8 d'el maitín, chusto antes que el macizo de Treserols se metés royo como pocas vegatas el hebe visto. Una vez fetas las fotos, e chelato de frío (nota mental: no cacegar unaltra vegata el tricot mientres puyo e llevar-me més ropa quan i haiga més nieu, sobre tot es guants recios), enfilé enta Lalarri, perque ya feba días que no hebe baixato de la Estiva enta allá. Chusto antes d'arribar ta Lalarri veyé el camín que marcha enta el Refugio de Pineta, e como nunca no el hebe caminato m'endrecé enta astí. Pero quan arribé ta la Lera Sacos no i heba ni rastro d'el camín (cuento que la lera se movería con tot el que plevió d'octubre) asinas que enfilé dreto enta abaixo per la lera dica la Ermita de Pineta.
Un consello, se nunca queretz seguir el track que he marcato, no tos metiatz per ixe camín que tos decibe, itz ta Lalarri e astí ya decidiretz se baixatz per el GR-11, per lo camín d'es Churros de Lalarri (que pa yo ye la millor opción) u per la pista. Ah, e preveyetz un auto en Pineta.
Aquí va qualque foto pa que veigatz cómo cambia en pocos minutos, tos recomiendo punchar dencima, sobre tot en la zaguera.

E aquí el track.

E prou

Prou d'agüerro, perque este cabo de semana no podré salir, asinas que tos deixo con las que, estoi que, son las zagueras fotos d'este. Pineta ya ye pasato encara que quede fuellas en es camals, aora caldrá esperar la nieu, pero con estas temperaturas, qué me sé yo quán arribará, perque mismo fa calor.
Se no fues tant zapo con Photoshop habría puesto fusionar quantas fotos con diferents medicions de luz, pero ixo pa yo ye un embordiecho, asinas que la que més se salva per la gran diferiencia de luces que i heba:

 Una clasica mientres puyabe:

 Un carrón, e el fundo ye un albar:

 E un detalle d'una fuella d'acirón, no tot va a estar anvistas:

Fin de l'agüerro

Pos ixo, que se m'ha rematato ya l'agüerro. Cal esperar una miqueta menos d'un anyo (que se me va a fer muit largo) pa poder rabentar las ninnetas d'es uellos con las colors d'esta epoca. E no ye perque no en quede (ahier, plevendo, la carretera entre Bielsa e La Enfortunada yera espectacular), como tos mostraré contino, seno perque el cabo semana que viene no podré salir, e pa l'altro ya no'n quedará gota, ni una fuella. Snif.
Pero bueno, encara que l'anyo pasato me quedé més contento que no este con las fotos conseguitas, l'agüerro de 2012 tampoco no ye estato brenca mal. He puesto ir ta qualques puestos (Buixaruelo, Ordesa, prou que Pineta) e he feto fotos que, sin estar pa tirar codetes, son potables. Ahier, como despedita de l'agüerro, marché sin un destín fixo pero sí que sabebe la primer parte de la ruta: la carretera entre Fanlo e Sarvisé. Espectacular, l'agüerro en el suyo clímax, impresionant, pa que se te cayés la baba e tot el que se tos ocurra. Pleveba, i heba boiras, las colors hipersaturatas... la pena ye que no le sabié quitar tot el que m'ufriba.

 D'astí marché enta Buixaruelo, ta un puesto que fotografié l'anyo pasato. Como ye més alto e més frío, ya quedaba pocas fuellas en es árbols, yeran quasi totas per tierra e per lo río. Pero nunca no defrauda, e bel·la imachen me llevé enta casa.

 

Pineta III. Hibierno-Agüerro

Como ya tos amenacé, foi la tercer dentrata de Pineta d'el viernes d'el pasato Puent de Totz es Santos. Invierto l'orden de l'anterior (Pineta II. Agüerro-Hibierno), perque en primeras teniemos frío d'hibierno, mismo nos nevusquió una miqueta, e dimpués, ya abaixo, trobemos l'agüerro, la Diosa Fortuna, con las suyas millors galas.

Aquí, mirando d'incluyir la luna. Una pena que la mía camara no tienga guaire rango dinamico, pero ye que ya ye vielleta la pobra:

 Cremando el ciel pa que e podés veyer cómo yera el Cul de Pineta:

 Per fin veyemos las primeras luces metendo las puntas royas, pero nos duró poco:

 Las boiras que nos taparían el sol, farían nevusquiar e, una vegata abaixo, plever:

 Agüerro con toque hibernal, u de revés, ixo rai:

 Estas dos son d'abaixo. Un d'es que m'acompanyaba quereba conoixer este puesto, que s'ha feto conoixito con es nombres de Menhir u Monolito.
Mirando d'ordenar el caos:

 E enmarcato per la vechetación:

Mientres i yenos, una colla de matutans se metioren a blincar per ixas rocas mullatas que eslisaban como el chel, e nos fastidoren la sesión. Ganas de matar-se que teneban, perque iban con zapatillas deportivas, d'ixas que no agarran brenca.
El sabado, se no pleve guaire, marcharé a mirar de fer las zagueras fotos de l'agüerro, se cosa en queda.

Irati

No, que no ye Irati, que ye una chicota broma con es dos fotografos que m'acompanyoren t'astí (aquí e aquí podetz veyer fotos suyas e deleitar-tos la vista). Sé que les fayó muto goyo el puesto e que le sabrán quitar més suco que yo, humilde aficionatet. Son fotos d'el chueves (el viernes tornemos a salir chuntos, pero ixo será pa unaltro día). A l'agüerro ya le queda poquetz días. El sabado que viene, se encara en queda brenca e l'orache me deixa, miraré de salir a despedir-me d'er dica l'anyo que viene. Qué poco dura el buen, pero talment per ixo el aprecie més.

Pineta II. Agüerro-Hibierno

El promeso ye deuda, e aquí van las fotos d'el domingo de tardes. A veyer se puedo fer qualque cosa este puent.
Querebe fer es churros de Lalarri,  pero como ya contabe e m'heban dito dos fotografos (Jep Flaqué e Esteve Garriga) con es que me prenié bell hordio el viernes de tardes, i baixaba demasiata augua. Con tot e con ixo, sabendo el frío que heba feto e que ya heban pasato dos días dende que heba plevito, m'i amané. Per demés, no puyo soque esta pa que tos fayatz una ideya. No ye que no se podés peinar l'augua, ye que se la exposición yera larga, saliba un bloque blanco.

 Como no se podeba fer cosa y no'n saldrí, mientres baixabe me trobé con dos potrecons (Amanita muscaria, per estar més preciso) que fueren es que me dioren la ideya de la mezcla d'agüerro e d'hibierno per la capucheta de nieu que teneban en la punta.

 Sabebe que no podebe cruzar el río perque ha tornato a fer de las suyas e no yere dispuesto a escalzar-me (calient que baixaba l'augua e una temperatura ideyal pa ficar-ie es pietz, como podretz contar), me'n puyé unaltra vegata ta la pista per lo camín viello. Astí m'asomé a veyer el río e no que yera medio chelato...

 E ya, per fin, quan baixabe ta casa ya lusquiando, la luna e la zaguer luz d'el día plena iluminaba Suelza e Fuesa, e no m'aducié d'aturar en la presa pa fer esta foto.

E en puyo tantas perque no sé fer tría, es fotografos buens en trigan una e las altras se las quedan :-)
A yo personalment m'encantan la cinquena e la zaguera, no sé qué en pensaretz vusaltros.