Mal orache

Este cabo de semana, como ya sabretz, ha feto un orache malismo. E ixo que es dos días, tanto sabado como domingo, daban posibilidatz de buen orache de maitins. E infeliz que ye un e se'l creyeba, encara que daban frío querebe tornar ta Comodoto. tanto sabado como domingo me desperté a las quatre d'el maitín, pero en mirar-me per la finestra de la cocina sabebe que esplans se'n iban a cascar-la... Pero mientres que qualsequier persona normal habría aprofitato pa tornar a dormir, yo no. Soi medio insomne e quan me despierto me cuesta horros tornar a dormir, e ixo se el consigo. Asinas que es dos días fendo tiempo pa marchar.
El sabado decidié d'ir enta abaixo a veyer se no pleveba, pero quanto més baixabe més plebeba. A la fin, farto, torné ta Morillo a visitar las orquidias que hebe traobato l'altro día e mismo n'i heba bel·launa nueva. Qué incomodo ye fer fotos plevendo a tot plever:

Como torné luego e per fin s'ubrió el ciel, me llevé a's fillos ta Espierba pa que chugasen con la nieu, perque cuento que esta será la zaguera que caiga dica l'agüerro que viene. I heba unas vistas sobrebuenas, pero no me convencen guaire las fotos perque tenebe un uello mirando per lo visor e l'altro cosirando a'l chicot, que te la fote en la uembra d'un uego:

E el domimgo marché ta Barrosa, a veyer se tenebe suerte e s'ubriban las boiras, pero no'n tenié, de suerte, e no fayó soque nevusquiar:

E baixando chugué un ratet con el macro e el chel:

Cruz de Guardia

Como el sabado me quedé con ganas de fer una miqueta de montanya (tos recuerdo que querebe puyar ta l'Ibón de Plan pero m'habié a dar vuelta quan cruzas per primer vegata el barranco), el domingo decidié de puyar ta la Cruz de Guardia a fer las primeras luces sobre Treserols (bai, el de siempre). Es que siatz encara seguidors d'esta pachina, talment recordetz que fa uns meses miré de fer-lo pero no podié puyar t'alto de tot perque no llevabe molatieras ni raquetas. Ahier llevabe de tot encara que no queda guaire nieu (las molatieras no las emplegué soque pa baixar la zaguera pendient, que teneba la nieu chelata) pero me falló la hora. M'hebe meso el rebel a las quatre, pero como m'hebe chitato tarde a la fin ubrié es uellos a las quatre e media. E ixa media hora ye la que me faltó pa poder arribar t'alto con las primeras luces. Asinas que m'habié de conformar con fer las primeras luces an me pilló e dimpués puyar ta la collata a almorzar.
Primeras luces sobre Treserols, chugando con l'angular, el 50 mm e el 100 mm:

 Aquí ya dende la Cruz de Guardia, enta Cotiella e enta Pineta:

 E una sospreseta quan ya yere quasi abaixo, un Narcisus assoanus. El hebe visto, e a muntons, per L'Aínsa u per A Guarguera, pero no pas en Bielsa dica ahier:

 E esto ye tot per aora :-)
P. S. Ai, no, como siempre se m'olvida el track, encara que no i hai perdida se i puyas de días (no pas como yo he he)

Primeras orquidias

Esta ye la historia de como un buen día te despiertas con la sana intención de puyar ta l'Ibón de Plan e rematas fotografiando orquidias en Morillo de Tou. ¿Que cómo se fa ixo? Muit fácil, no podendo cruzar un barranco per lo mangazo d'augua que baixaba...
M'he despierto a las quatre e media pa poder estar en l'ibón con las primeras luces. Ya me pensabe que podeba baixar prou augua, pero como ahier fayó frío (mismo cayó bel floco de nieu en Bielsa) contabe que per alto la nieu s'habría chelato e que no i habría tanta augua. E tamién m'he temito el que me podeba pasar quan he cruzato el barranco per la pista, perque eh visto que baixaba muta augua. Pero hombre de fe que ye un, ha pillato el camín entalto con la esperanza de poder cruzar-lo per es bolos. E quan i soi arribato, a mama mía, amés d'el mangazo d'augua es bolos yeran chelatos. Asinas que como yeran las seis d'el maitín, feba un frío que esconsellaba escalzar-se e clavar-se en bell medio d'el tamborinazo e se mirabe de brincar ibe a cayer de grapas en el barrango, he visto que la millor opción yera dar-se media vuelta. Asinas que a las 7 e poco yere en l'auto, e como no yeran horas d'ir ta garra cabo ni tampoco de tornar ta casa, he decidito de baixar a veyer se ya heban salito las primeras orquidias per la tierra plana.
Suerte he tenito que en he trobato bel·launa e, encara que feba aire, he puesto tornar ta casa con bel·la coseta en la tarcheta (e ueito km. en las patas).
Aquí tos presento a la Ophrys insectifera:

E aquí a Ophrys sphegodes:

Espero no haber-me trafucato con la identificación. No son las orquidias més fotochenicas que he visto, pero como totas las criaturas d'el Sinyor :-), se mereixen bel·la foto.

Fornos

Ahier tenebe un compromís e no podebe marchar guaire leixos pa estar luego en casa, asinas que tocaba una curteta e qué millor puesto que Fornos con tanta augua e nieu como estianyo. Se me feba rar ir sin ropa termica, molatieras e raquetas, pero ye que la primavera ya truca a la puerta.
No defraudó, e mismo trobé una envista nueva que no conoixebe:

 Aquí el famoso Chorro. Baixaba un mangazo d'augua d'es buens, e per fin podié cruzar el río pa veyer-lo con augua (encara que el risgue de foter-me un banyo yera astí e a la fin tot se saldó con un piet endrento el río, encara que pensé que podría haber estato pior):

 Aquí el río que caleba cruzar pa veyer O Chorro, que queda a man dreta:

Ecomo ya va arribando la primavera, me vagó de chugar con estas hepaticas:

 Esta planta la trobé a'l canto de la primer Fuent de Fornos, e como siempre no sé quál ye. Le fayé dos fotos, una d'ambient e unaltra con detalle en la flor, a veyer se bel·laún (JMN, sobre tot), me la identifica:

El Cuezo II

¿U será Qüezo? La verdat ye que como que desconoixco la etimolochía (i hai un Tozaler de Cueso en Erisué `caixón alargato´, d'orichen indoeuropeu, pero no sé se tienen relación per lo seseo e demés) no me meto a esbarafundiar sobre ixo.
Pos ixo, que l'altro día, veyendo el potencial que teneba este tozal per la envista a 360º que tiene, decidié que puyaría a fer las primeras luces, unaltra vegata (e qué cansino soi). E ye que las 12 d'el mediodía no son horas pa fer fotos, como me pasó la semana pasata.
A las 5 salibe d'Espierba e a las 7:10 ya yere en la punta a esperar a que se metesen las luces. N'ha valito la pena, encara que he trobato falta a bel·la boira que das una miqueta de atractivo a'l ciel (e ixo que las esperabe seguntes la previsión, pero no n'he visto garra). Pos ixo, que aquí tenetz la preba de que i soi estato.
Enta L'Almunia, Robinyera e la Mot, abaixo se veye casa Agustín de Chisagüés:

 Anvista enta Pineta e Robinyera:

Suelza, Fulsa e Cotiella:

 La misma pero quan saliba el sol:

 En esta se veye Diera e el fundo de la valle 800 metros més t'abaixo:

Con un tele me'l habría pasato millor, pero no'n tiengo :-(
E una panoramica. Con totas las fotos ye millor se i punchatz dencima, pero con las panoramicas ye quasi obligatoria. Tamién ye una pena no tener una rotula especial pa panoramicas pa poder fer-las millor:

P.S. El track, que ye diferent a l'altro perque baixé enta Diera per Orébel. Se nunca tos deciditz a seguir-lo, he de decir-tos que la baixata no va per camín dica abaixo, asinas que se no tenetz costumbre no tos la aconsello.

El Cuezo

Nunca no hebe puyato ta esta montanyeta (pasa per poco d'es 2000 metros) e la verdat ye que he descubierto (pa yo s'entiende, que ya lleva días descubierto) una atalaya muit buena pa tota la valle Bielsa. L'anvista enta es 360º ye buenisma perque no tiens altra montanya debant que te tape: L'Almunia, Robinyera, Chinipro, Astazus, Treserols, tota la Man Pacina, Cotiella, Maristás, Suelza, Fulsa... Un puesto pa repetir buscando millors luces (no ibe solo e i arribemos a las doce d'el mediodía con una luz malisma). A la espera de trobar ixas luces, tos deixo una chicota muestra como testimonio.
Enta Suelza e Fulsa:

 Enta Cotiella:

 Treserols, Astazus, Robinyera, L'Almunia, etc:

 Astí abaixo ye Chisagüés:

 Enta Pineta:

Aquí el track, no fayatz guaire caso a l'horario, se puede fer en menos tiempo.