Per fin la nieu tant anunciata.

Dende ayer, que tenebe fiesta, estió alternando la nieu con l'augua tot el día a Bielsa. Esto maitín, cuan soi salito a las 6 d'el maitín cara Pineta per zaguer día de la campanaya, plebeba en Bielsa, pero a partir d'Ixabierre nevaba e ya i heba plagato, e dende el esbarre cara Espierba la carretera yera blanca. Hebe a ir esquivando es árbols que s'embanaba per el peso de la nieu, perque como estianyo la nieu ye arribata tant luego encara i hai mutas fuellas en es árbols e ixo, encara que pareixca una fateza, fa que hayan a aguantar muto més peso. A Pineta nevaba a tot meter, dica que se'n ha deixato a ixo de las 11 d'el maitín, pero ya heba meso una capa de nieu d'uns 20 u 25 cm.
Pro que he aprofitato a fer fotos, pero ye un incordio fer-ne nevando, con el batiauguas, el tripode e la nieu cuasi dica la rodeta (a tot esto yo sin molatieras e es balons chupitos); a'l que cal sumar que no tenebe guaire batería. Pero bueno, tos meto bel·la muestra pa que, como yo, tos despidiatz de Pineta per una temporata, perque encara que i vaya puyando, ya no'l faré tant a menuto como dica hue. Voi a fer una preba en meter-las en blanco e negro, ya me diretz qué tos pareix e se ixo ya las meteré en color. Per cierto, en la primera m'ha caito una bolisma de nieu en el polarizador, per ixo i hai un troz borroso

¿Nieu? No pas aquí

Como gosa pasar totz es anyos cuan arriba el hivierno, cuan veyes l'orache en la televisión e anuncian el caos per la nieu, aquí no pasa cosa. Hue, en el telediario de Tele 5, han dito que la metat de la provincia de Huesca yera cubierta de nieu, e ye mentira. Anterdayer plebió -yera de nieu sobre es 2.000 m.- e borrasquió una minqueta (bel día caldrá parlar sobre es diferents nombres que reciben per este país las distintas clases de nieu). Mientres que hue ye estato nuble dica la tarde pero no ha caito ni una bolisma. Como ye de dar, bufaba el puerto, e como gosa pasar, cuan bufa el puerto u no nieva u el fa d'una forma ridicula. Se yo tenés un negocio d'hostelería m'acordarí d'es que fan l'orache per espantar a la chent d'ixas trazas.
ya contarán es altros companyers blocaires pirinencos se ha nevato per las suyas tierras.
Ya veremos qué pasa con el frent que anuncian a partir de maitín de tardes, tos ne mantendré informatos.
Salut
Una foto pa ir despedindo l'agüerro, que con estes fríos e aires ya habrán caito caso totas las fuellas. Ye pro tocata -per ir fendo prebas més que altra cosa- e pareix un cuadro (bel·laún me dirá, e con razón, que es experimentos se fan con gaseosa).

¿Se nos ne va l'agüerro?

Ixo pareix se continará fendo el mismo orache que ha feto hue: nieu a 1.800 (de maitins, de tardes estoi que habrá baixato), aire de puerto e frío. Las fuellas ya van cayendo formando l'alfombra ocre que podetz viyer-ie en estas dos fotografías:
Ya me queda poco pa plegar, a cabo de mes, e ye hora d'ir despedindo-me de Pineta que ya me falta poquetz días. D'hivierno i puyo bel·la vez, pero no ye el mismo. Qué pena me fa.
En fin, pa que veigatz la nieu que ha caito (el ciel ye cremato, pero medir luces con este día e con tanta gama de colors, a'l menos a yo, me resulta muit difícil):
E un codirroyo (creigo) que se m'ha meso "a tiro" mientres esperabe a las rebestas:

Anyisclo e Pineta

Ilesia de Vio con Sestrals a'l fundo:
Churros d'el Molín d'Aso:

Puent de San Úrbez, t'abaixo i hai una caita que no la querrí pa's míos huesos:

Churro de Lalarri, en la pista d'el mismo nombre:
Bombolón plen de polen e enganyapastors (o espantaturistas o escusabrendas):

Lugar de Vio:

Ayer de maitins fayé una escapateta enta Anyisclo, ixa grand maravilla natural, no guaire tiempo perque entre que deixabe a la nin·na en·n'a guardería e salibe e no de casa pos se me ficioren las mil. Ixo d'Anyisclo ye pa ir-ie con més tiempo, ya que a las dos enganchabe e no i podié estar guaire. Con tot e con ixo me vagó de fer la "ruta d'el Molín d'Aso" -a las cuatre suelas, ixo sí- e fer bel·la foto. La luz no yera guaire buena perque ya yeran casi las doce d'el maitín, pero qué le imos a fer... Vusaltros chuzgaretz.

De tornata, encara ye la carretera d'el Canyón d'Anyisclo d'unico sentito, m'esbarré enta el lugaret de Vio, hebe pasato cerqueta mutas veces pero no i hebe entrato, e la verdat ye que mui majo. De tardes a troballar, e dimpués d'estar garimboliando me'n puyé per el camín d'es Churros de Lalarri, que aora da més chuego con es faus tant amarillos. Apa, que vaya bien.
Hue blogger ye traveser e no me diexa ordenar las fotos, me cago en la mai que el va parir.
La primer foto (que no me deixa escribir una línia per dencima, ye un d'es churros de Lalarri). No cal que tos recuerde que se punchatz dencima de las fotos se fan més grands e se i veyen millor.
Salut.

Sobre la Lei de Luengas d'Aragón

Esto maitín, a Aragón Televisión, l'han feto una entrevista a Manuel castán, President de l'Academia de l'Aragonés. Aquí la tenetz.
http://es.youtube.com/watch?v=x6VkR-h8ZG4

Continamos...

No cal guaire texto, pa yo sobran las parolas este agüerro en es Pirineus, e ixo que no soi salito de Pineta més que pa ir ta La Comuna. Las fotos son d'ayer, hue n'he feto poquetas perque la luz no acompanyaba mica.

Agüerro, agüerro

Me faré cansino, pero ye que ye un goyo pa's güellos veyer tot esto.
Prencipeyo con unas d'esta tarde en el barranco Lalarri (cómo se nota que ayer plebió), per un tramo an que no i pasa turistas, sobre tot perque no i hai camín e cal puyar como es chizardz.


E aora unas poquetas de las mutas que he feto esto maitín a La Comuna. Pa's que no sabiatz aón ye, se trata de tres lugars de la Val de Chistau -Sin, Senyes e Serveto- an que el paisache humanizato d'agüerro ye pa cagar-se, a'l menos pa'l mío gusto, no sé qué opinaretz vusaltros.
Este lugar ye Sin.

Aquí amaneix en primer plan Serveto, e Sin ye a'l fundo a la dreta.

E esto ya son campos que he afotato dende el camín ta Feneplán.
E maitín me faría goyo d'ir enta Anyisclo de maitins, a veyer cómo va l'agüerro per astí.

Cómo ha cambiato

En tres días que no i soi estato, Pineta ha cambiato una barbaridat. Encara le falta un poquet pa estar en el suyo maximo esplendor, pero no le falta guaire (el digo per se bel·laún s'anima a venir-ie). Per el de demés, tot igual, pero ya falta menos para plegar, una pena que no sepan apanyar este tema e se malfurreyen tantismos diners en fateras.
Un par d'enganyapastors o "espantaturistas":
Per fin ha plevito e las paretz de Pineta tornan a pareixer el que yeran de primavera:
E aora pa que vayatz viyendo las colors e tos animatz a puyar t'aquí, pa'l cabo semana que vien yo cuento que encara será més majo:

¿Tos lo criyetz? No pas yo

Esto apareix en las edicions dichitals d'El Periódico de Aragón e d'el Heraldo de Aragón
No tos perdiatz es comentarios, cuántos catedraticos de filolochía romanica i hai per el mundo.
Iglesias, me faría goyo de creyer-te, pero cuento que conoixerás el contet d'el pastor e es lupos.

Post Scriptum: dica dentro d'uns días que jopo.

Fuellas ixutas

Entrata nº 100

No ye que lleve la cuenta, ni muto menos, que pa ixo soi de letras; pero a'l acceder pa fer la entrata he visto que ya en llevabe 99, e se las cuentas no me fallan ésta fa la 100. Pensabe titular-la Acirons e agüerro, pero...
Pos sí la foto ye d'ixa tematica, de l'agüerro e d'es acirons que m'encantan (como ya dicié en una de las primeras entratas que fayé t'allá ta'l mes de febrer). Maitín voi de maitins e a viyer se aconsigo un ciel azul d'es buens, perque esta foto ye feta d'el sabado de tardes cuan ya se'n iba el sol (e soplaba un puerto que chelaba, e borrasquiaba). Con tot e con ixo me fa goyo el contraluz.
Pos ixo, que encara que teniamos sequera, l'agüerro no falta a la suya cita.