Puyata ta Suelza

Feba anyos que querebe puyar ta Suelza. Ye una montanya que tiengo aquí a'l canto casa pero que siempre la vas deixando. E per fin el sabado i puyé. Yere estato cerqueta, en es ibons de Barleto, pero quan i fue l'anyo pasato ya no tenebe fuerzas pa fer cima, perque yera la primer cursa que febe en la temporata veraniega e ya m'hebe clavato 1600 de puyata pa desayunar.
El sabado i fue con un amigo dende Ordiceto. Ye una cursa sencilla (una miqueta més de 600 metros de puyata) pa puyar ta un quasi-3000. Millor, perque fa una semana que tiengo una contractura en el huembro que me fa veyer las estrelas, asians que ya podetz contar cómo i puyé. Pos malament, como habretz pensato. Pero como no i hai guaire desnivel, marché chino-chano. Encara que se he de decir la verdat, me fayó més mal el huembro quan baixanos con es botes de la pista.
La luz no yera guaire buena (sobre tot perque no amaitinemos mica), pero ye una de las millors anvistas que i hai per aquí, perque a este pico le falta 30 metros pa's 3000 e amés no n'i hai dengún arredol que el tape, asinas que vistazo enta es quatre puntos cardinals.
Bueno, aquí tenetz qualques fotos. Las dos primeras son dende la Collata quan remata la lera:
Enta Pineta con el 100 macro:

 Aquí con l'angular, a's pietz l'Ibón d'el Cau:

 Enta la Vall de Chistau:

 Enta la France:

 Dicié que totz es picos que puyarí este verano el farí con esta camiseta. Este ye el primer, a veyer se agosto e septiembre (e octubre seguntes cómo vienga de nieu) cunden més que chulio:

 

 Una floreta per dencima d'es 2800 de la que no sé el nombre (el especialista, per favor, que la identifique :-D):

Esta sí que la tiengo identificata, la Papaver lapeyrousianum:

E aquí tenetz el track.

 Salut.

Qualques cosetas

Voi fendo qualque coseta encara que dimpués no trobo tiempo pa penchar-las en el blog. No ye que no me vague, pero entre unas cosas e altras (per exemplo, he recuperato la mía bicicleta de montanya, que tiene la pobra més de 20 anyadas e qualques dolencias tipicas de la edat, le pasa como a yo) no trobo l'inte d'editar las fotos.
Pero en esta semana he durmierto con la filla e uns amigos en la caseta de La Estiva e he feto una miqueta de flora. Maitín, se la contractura en la espalda me deixa, miraré de puyar ta Suelsa, pero per lo camín sencillet, per Urdiceto, poco més de 600 metros de desnivel pa quasi un 3000. ¿M'estaré fendo viello?
Aquí tenetz unas fotos de l'amaneixer en La Estiva. Me metié bien luego el rebel (6:15) e ixo que nos chitemos una miqueta tarde. Prencipió muit bien l'alpenglow (ixa color roya que se mete per las puntas quan sale el sol), pero dimpués una puta boira decidió que despertar-me tant luego no'n heba  valito la pena e decidió tapar el sol e malmeter las luces. Pero como ya yere despierto, decidié de mirar de fer una panoramica.

 
E ya pa rematar una siempreviva:

Au, salut.

Parnassius apollo

El sabado de buen maitín marché a buscar la Parnassius apollo. Se recordatz, ya la hebe vista l'altro día baixando de Tringonier, asinas que fue ta un puesto an que sé que i son abundants. Pero tiengo mala suerte, e el sabado bufaba un aire que no ye guaire convenient pa'l macro (u mica, u brenca), asinas que d'el que querrí haber feto, cosa. Tos meto las fotos que son acceptables, pero sin aire podrí haber feto altras cosas més interesants. Ya me sabretz disculpar.

Un cuco sobre una ustulata:

.

 Un par de flors de nieu:

 Un Aster alpinus

 E aquí las Parnassius apollo, esta primera sin aire habrí puesto sacar las dos a foco, pero con l'airaz ya yera prou difícil tener-ne una enfocata, no'n quedó altra soque tirar en rafaga e cruzar es dedos pa que bel·launa salís bien.

Portiello de Tella

El viernes de maitins puyé ta'l Portiello de Tella, an que i yere estato quantas vegatas replegando uellas e crapas d'ixe lugar, pero siempre per la man de Tella (acceso muit comodo en auto). Nunca no i hebe puyato per la man de Bielsa, e asinas que enbdrecé enta allá. No tenebe guaire tiempo a perder, perque salié quan deixé a's críos en el cole de verano (a las 10:15 d'el maitín prencipiabe a caminar, e no son horas, ya el sé) e hebe de tornar a replegar-los a las dos de la tarde.
En menos de dos horetas arribé ta'l Portiello, sin perder guaire tiempo. Ye un camín muit majo que conoixebe a trozos, pero fue per puestos nuevos. Cruzas pinars, selvas d'abetz, d'abellaneras, bixorderas... martuels e orquidias a punta pala e, sobre tot, quan arribas ta la tasca flor de nieu a embute, asinas como aster alpinus. No fayé garra foto dica que no arribé ta la parte alta, e amés que no tenebe guaire tiempo,  i correba bruixina, e ibe con la espalda chupita e sin més ropa d'abrigo. Asinas que quatre fotos mal fetas e t'abaixo.
Unas anvistas dende Portiello

 L'aster alpinus

 La caseta de Montinier, un buen locus amoenus pa ir-ie a dormir bel·la nuet :-). Aquí enta Fuesa e Suelsa:

 E aquí de cara ta'l Portiello:

D'agüerro, se me vaga, me faría goyo de fer la cursa Bielsa-Portiello-Tella-camín de la canal-Bielsa. Ya veremos se i hai tiempo e fuerzas.
E aquí el track, que antes se m'heba olvidato

Mosica de quan yere choven

E per cada día me fa més goyo
http://www.youtube.com/watch?v=OSYiIBCbB4M
E maitín se me vaga tos pincho qualque cosa d'el que he feto este cabo semana.

Lilium martagon

Esto maitín soi puyato ta Pineta a veyer el lirio martagón, no fues cosa que se m'is a pasar. E i soi puyato a una hora mala, perque soi salito de Bielsa a las 10:30 d'el maitín (hebe de deixar a's críos en el cole de verano e en la guarde), asinas que he pillato una luz muit dura. Bien se me'n ha valito que yera medio nuble e bell ratet no i heba una luz tant fuerte. Aquí tos deixo un par de fotos d'el martagón e unaltra d'el lino.

Unaltra puyata frustrata

Hue querebe, dimpués de compromisos socials, familiars, ludicos, laborals, etc.,prencipiar con la temporata de montanya. E pa ixo m'he despierto a las 5 d'el maitín, he pillato es bartulos e soi marchato enta el Pico de l'Ibonet, en la montanya de Tringonier. Pero esta vegata no m'ha feto desistir la nieu, seno la boira. Quan he pasato la Plana el Cabo e he prencipiato a puyar enta l'Ibón de Tringonier se m'ha meso la boira e a cascar-la el plan que llevabe, media vuelta enta abaixo. Mientres puyabe ya contabe que no podrí fer cima, perque yera prou nuble, pero la boira ya m'ha feto desistir de tot. Asinas que m'he entrenito fendo fotos, perque amés m'he trobato cin una de las palometas més bonicas que i hai per aquí, la Parnassius apolo.
Unaltro día será, l'important ye que pa estar la primera salita m'he visto fuerte e con buenas sensacions.