Per fin pareix que ye aquí

Con una semana de retraso sobre l'horario previsto pero pareix que per fin arriba l'agüerro. Dimpués de dos días de fiesta soi tornato ta Pineta e se vei més abantato l'agüerro. No se puet decir que sía la hostia, pero ya m'aconorto con el que sía.
En es churros de Lalarri ya i hai faus amarillencos, encara que en queda mutas verdes. El sabado baixé t'A Fraga, entre Rebilla e Escuaín, an que i hai unas gorgas e una gáriz bien pincha pensando-me que i trobarí las colors d'agüerro e no me fayó el morro cloc, yera como aquí, u sía, hauto. Pero per fin hue sí que he puesto fer las tipicas, pero no per ixo menos pinchas, fotos d'esta epoca. Tos ne deixo bel·launa, no n'he feto guaires perque he prencipiato a fer-las una miqueta tarde. A veyer qué tos pareixen. Salut.

As fuents de Fornos

Ayer, como feba tant buen día e tenebe fiesta, marchemos d'excursión ta las Fuents de Fornos, en el termino municipal d'A Espunya, ¿verdat Betato?. Yo ya i yere estato mutas veces (mismo i hai bel·la entrata en este blog sobre ixe puesto), pero no pas con la filla.
Como siempre que se va con críos, fas tarde, e per ixo no arribemos ta O Churro Fornos perque, ademés de que no i debe de baixar augua (ya fa días que no plebe como cal) decidiemos de comer en O Vado, en el forcallo an que s'achuntan es ríos Garona d'Os Molins e el río Irués.
La filla, valient como era sola se i fotió ta l'augua. Feba calor, sí, pero l'augua yera chelata, se nota que en ixo no ha salito a su pai; no se'l piensa mica a la hora de foter-se ta'l río u ta la mar, mientres que yo tatoneo buens ratos antes de meter-me-ie.
Tos amuestro bel·la foto pa que veigatz que encara que i hai sequera (el camín dende Badaín ta O Vado yera muto secativo e i heba volatas d'aire que cremaban), per ixes vivers encara sale buens mangazos.

Pareixco fato

u talment en sía.No tos pensetz que tiengo mica ganas de continar escribindo (bueno, escribir tampoco no ye que escriba guaire), pero voi fendo fotos e me fa goyo de dar-les salita e que las veiga la chent (tampoco no sé se i hai guaire chent que siga el mío pasatiempo). Pos ixo, qu evoi a fer caso a Lois Chabier, a'l menos per bel tiempo.
Las tipicas, e curtas, explicacions. Llevamos 15 días que totas las tardes plebe, muto u poco pero va pasando tronacils; e ixo, ademés d'el feto de no poder aprofitar totz es ratos pa ir fendo fotos, aporta una luz que a yo me fa muto goyo, asinas como ixas gotetas d'augua que aportan més, a'l menos pa'l mío gusto.
Un martagón, encara no son totz ubiertos, per ixo encara i habrá tiempo de conseguir bel·la foto decent:
Un cuco que ye la segunda vez que el veigo. se de flors en tiengo poca ideya, de cucos menos (menos ixe refrán que diz: Pa que se'l minchen es cucos que se'l minchen las cucas). Es dos días que es he vistos heba plevito he pareixeban como aletargatos.
Una malveta (malva malveta, cura-me la ixordiqueta, que diz la cultura popular. Talment sía un placebo, pero funciona).

En un lirio blanco (¿será albino?). No n'i hai guaires, pero este sale totz es anyos en el mismo puesto.

El mes de las flors

En este país el mes de las flors son tres en reyalidat: mayo, chunio e mismo chulio. Prencipeya ya en abril con es narcisos per es pratos, pero a finals de mayo ya ye la explosión. Aora mismo podemos veyer flors de lis, orellas d'onso, jaras, la flor de la carronera, viboreras (no conoixco el nombre en aragonés, como de mutas altras floretas que ni an sé se en tienen), gallos, alcozons, la flor de la farnacera, chonzanas.... e las cypris que ya son pasatas.
Encara faltan es lirios, es martagons, una altra florata d'el cypripedium en altura, las siemprevivas.
Hue tos ne meto buena cosa fotos perque ya feba días que no i pinchabe cosa.

Esta ye una aguilenya (qui conoixca bel nombre en aragonés s'agredixerá)
Esta ye la grasilla (idem sobre es nombres en aragonés), insectivora era. Gosa creixer en paretons per an que caye augua, pero tamién se'n vei a'l canto es reguers d'augua per tierra.
Una floreta chiquinina que da muto chuego a la hora de fer-le fotos (no pas las mías, pero en fotonatura se'n vei bien pinchas)
Una altra orquidia:
La chonzana (Gentiana alpina, creigo), esta ye merecinal e se'n cría per es puertos:
Dos de flors de lis, esta tarde miraré de tornar-ie a veyer se foi bel·la foto millor:

La orella d'onso, le fan goyo es pacos e las pen·nas:
Un tipo de campaneta, tamién he de tornar-ie con millor luz:

E una preba de composición, pro minimalista:

Crietas

Bel·la foto més, sin guaires comentarios.

Crapa con crapito I:


Crapa (una altra) con crapito II:
¿Tos acordatz d'el enganyapastors cobando? Pos aquí tenetz las crietas, mira que son fieras:

Ya sabetz que se i punchatz dencima se i veyen més grands.

Cualques fotos

Encara que estes días voi mui aqueferato -a partir d'el 20 espero tener una miqueta més de tiempo-, tampoco no ye custión de deixar el blog a l'abandón. Per ixo tos meto bel·la foto que he feto estes días en el troballo. No son gran cosa, pero a's que les faya goyo la montanya cuento que las agradeixerán. E se no... ¡qué les voi a fer yo!
Pos aquí las tenetz, un corzo que se fotió ta'l río
Un segallo de chizard en Montaspro:
El barranco Lalarri que baixa bien grand:

E una altra d'el Zueco de Venus, que en va salindo més poquet a poquet:

Zueco de Venus II

Fa uns meses tos charrabe d'esta polita orquídea. Pos bien, dimpués de cuantos vuiaches per veyer se ya heba salito, estianyo va con pro retraso, hue per fin he visto las primeras. No'n i heba so que dos, pero en uns días cuento que saldrán las de demés. Mientres alen e no aquí tenetz estas pa ir fendo boca.

Ya arriba la primavera

Pareix que aora sí, e que ye pa quedar-se-ie, encara que bufa un poquet de puerto que fa que no s'esté bien de tot.

Güe, día de Sant Chorche e festivo, no he puesto salir ta'l monte a fer garra foto. Pero ayer, antes de baixar-me-ne ta Zaragoza e puyar di nuet, sí que me fayé una escapata enta Pineta, per viyer se cayeba litz. No tenié suerte con las litz, pero sí con un ziel azul que feba goyo de viyer-lo. Cuento que güe que ha feto buen día se'n será ita muta nieu, pero ayer de maitins encara en quedaba buena cosa.

Sobre tot per alto, que a'l menos n'i hai dos metros (e igual me quedo curto), perque tota l'augua que ha caito aquí estes días (mismo bel ratet nevar) a partir d'es 1.300 yera nieu, que chunto a la que cayó la semana pasata, pos ya podetz contar. Ansinas per ixemplo ye el pantano de Mediano, que ha medrato buena cosa e encara espera es mayencos.
Mientres vas baixando enta la Villa, s'aprezeya més la primavera, es paixaricos encorrendo-se (qué querrán fer es marranos), las flors de las chicoinas en es pratos, es artos e zereseras en flor... menos muixardinas, que encara no'n ha salito garra.
El caso ye que como tos decibe de tardes me'n baixé ta Zaragoza perque hebe a fer cualques recaus e podié disfrutar d'el Somontano tan verde per el trigo e amarillo per las allagas. A una color le trobé falta: a color roya. ¿Ya s'ha pasato el tiempo d'es ababols u encara ye luego?, perque en viyé mui poquetz. Ya nos dirá l'amigo Onset cuánd ye el tiempo d'ixas flors que no abundan guaire per aquí (sí per A Fueba e la Tierra Buixo, que astí tienen almendreras, oliveras, trigo...). Con tot e con ixo, es Pirineus como telón de fondo bien cargatos de nieu, e mismo en i heba en Guara, feban que es güellos se'n isen de cabo ta cuand enta l'anvista.
Ya pa ir rematando este rollo, entrando ta Zaragoza me i trobé la famosa e dica alabez desconoixita pa yo entrascada de la rotonda de la MAZ. Entre que arribabe tarde e la calorota que i feba fayé mui mala folla, e més encara acordando-me que feba poquetas horas yere per Pineta més solo que la una. E pa rematar-la de joder, cuan tornabe enta casa un accident a l'altura de Zuera que obligó a esbarrar el trafico per la carretera viella e me fayó perder més tiempo encara.
En fin, d'ixes días que me fan estresar pero que miro d'olvidar mirando-me estas fotos como las que tos i meto.

El puerto la Lera

"Nabatiando" per pachinas web de fotografía -quiero aprender a trastiar bien con l'aparato "d'arretratar" nuebo e dimpués con el photoshop, que se puede fer cosas que son la ostia- yere fendo-le una gollata a'l archibo d'el ordenador de sobremesa, perque el portátil el tiengo out per el momento, e espero que tienga soluzión...

Bueno, pos a'l que ibe, que he bisto esta foto que no m'acordabe d'era e m'ha pareixito maja pa meter-la aquí (e no pas en garra blog d'íxes de fotografos, que he bisto fotos pa cagar-se). Ye feta dende el Puerto la Lera, un d'es piors camins que he feto en·n'a mía bida, e que se puede biyer fendo una diagonal a la izquierda e enta abaixo, per la lera, que per ixo se diz ansinas el puerto.

Ya sabrez que puyar per una lera ye ir un paso entadebán e dos entazaga, pues en este le'n puez meter un més entazaga.

Fa güega con Franzia, e enta part t'allá no i hai buena ambista, pero enta part d'aquí no me direz que no mereix la pena. El día que fayé la foto no me quedó altra que almorzar correndo e medio chitato dezaga un paretón perque bufaba un aire dende "la France" que chelaba, fer la foto e tornar-me-ne a baixar uns 1.200 m. (debe d'estar sobre es 2.500 m, e salié caminando dende es 1.300 se fa u no fa).

Pero bueno, mereixió la pena, e cuan sepa cómo atrapaziar millor la foto... pues més encara.

Que tos faya goyo

P. S.: en la foto d'abaixo se puede intuyir el Puerto la Lera a la dreta d'el pico Felqueral, u sía, el pico de la dreta.

Güe ba de fotos

Pos ixo... poca letra e cuantas fotos.

De tardes soi baixato ta L'Aínsa a fer cualque compra e, per fin, me he baixato la camara de fotos u "d'arretratar", que diría bel güelo.

Que tos fayan goyo.

P. S. Como soi un poquet zapo pa esto d'es ordenadors, només dezir que las fotos abrían d'ir en sentito imberso.