sábado, 28 de marzo de 2009

Tierra bucho

Esto maitín que me'n ibe de viache, per primer vez en muto tiempo sin guaire prisa, he decidito de baixar per Guaso, Arcusa e Olsón pa salir a'l canto d'el Mesón de Ligüerre ta la cheneral. No me'n soi baixato per Colungo e Alquezra perque tampoco no me vagaba pa tanto, pero no pas per falta de ganas. He tenito que salir una miqueta tarde, e la luz no yera la millor, ademés i heba un gallín que no deixaba el ciel tant azul como estes días ta zaga (e calor, se maitín ha a nevar ya puede cambiar la cosa). Con tot e con ixo s'ha feto el que s'ha puesto. Las almendreras ya han perdito buena cosa de las flors e ya follan (1); las allagas prencipeyan a floreixer (cuan l'allaga floreix la fambre creix, e cuan bachoca pa totz en toca), pero n'he visto pocas en plenitut e no he aturato l'auto. Es trigals ya verdeyan e son pro majos. Tamién he feto cualque foto per el Somontano, an que es trigos tamién son bien verdes, pero yera de mediodías e i heba una luz muit fuerte, per el que no me convencen. He trobato a faltar es ababols, ya no debe faltar guaire pa que salgan (encara que en Zaragoza ya n'he visto bel·launa), conque a veyer se nunca torno a baixar sin prisa cuan n'i haya, d'ababols, e puedo fer bel·la foto més maja que no las de hue.
Flor ¿d'almendrera? (creigo que este árbol no yera una almendrera, he feto la foto en un mirador debaixo Mipanas)

Pirineus dende cerca d'Olsón

Treserols dende Arcusa (buenoooo, un poquet antes)
(1) Follar < latín FOLIARE, `fer fuella´. Esta nota ye pa's que no conixen l'aragonés, que la primavera la sangre altera, pero no pas tanto como pa fer que es árbols buquixcan.

5 comentarios:

  1. Tampoco no en se muito d´arbols, pero almendrera no puestar. As flors de l´almendrera naxen direutamen d´a rama e istas escuelgan una miajica.
    [Os chapos son los que en saben prou: http://unajaponesaenjapon.com/?p=367 ]

    (Per aqui tampoco no fa fredor...)

    ResponderEliminar
  2. Magnificas as fotos. Qué buena pinta nos fa ya o país!

    ResponderEliminar
  3. A planta pareix un Prunus cerasifera pisardii.

    ResponderEliminar
  4. Ya me pareixeba a yo que no yera una almendrera, Alberto, m'has deixato chelato, ni an sé de qué árbol me charras (sé que a Prunus i son l'almendrera, es artos prinyoners, etc.), bien se me vale que Sant Google me'l dirá.
    Diapllin, veigo que d'árbols frutals en sabes més que no yo.
    Onset, como siempre, gracias

    ResponderEliminar
  5. O prunus cerasifera ye o guindo, y a subespezie pisardii ye a zerisera chaponesa. Ye iste arbol ornamental de fuellas granates. Fa una semana alto u baxo han rematau de chitar as flors.
    Me fa asabelo goyo iste arbol, amás por as suyas flores, todas rosicas, por as fuellas granates, que pareix que sigas beyendo l'arbol en negativo.

    ResponderEliminar