Pa totz es Santos la nieu en es altos e pa Sant Andrés en es pietz.

Torno d'unas vacanzas plenas de nieu e un frío chelador e cuan arribo ta casa un capuccino... no, cuan arribo ta casa més nieu. Per el que se vei el sabado nevó con ganas, m'han dito que sobre uns 40 cm., encara que ya se sabe que con la cantidat de nieu siempre se corre una mica la romana. No sé se l'agüerro marcará cómo vendrá el hivierno, pero se ye ansinas ya nos podemos ligar las abarqueras e las molatieras, amanar la pala e temblar cuan vienga la fautura d'el gas. El títol de la entrata ye un refrán que estianyo se cumple a medias, perque pa totz es Santos ya tenenos la nieu a's pietz. Se contina ansinas, en vez de pa Santa Aguedeta dica la bragueta nos arribará ta la capeza.
Tos meto un par de fotos recient quitatas de la camara.
La primera ye de la carrera, encara se vei nieu en es pins, e i hai un altro refrán que diz: "La nieu d'el pin espera la de maitín", e m'he mirato la pachina web de l'Agencia Estatal de Meteorología e nos da una semana guapa de nieu e plevia.
La segunda ye de la terraza de casa mía, que yere per limpiar-la pero esperaré a que caigan las litz d'el tellau. Astí tiengo totas las macetas enronatas en nieu.
Ya torna blogger a fer el "cabrón" que no me deixa mover las fotos... Ya tos meteré bel·la foto de las vacanzas. Salut.