Swertia perennis e Euplagia quadripunctata

Esto maitín he puesto escapar-me un ratet (el precisabe, e prou) e soi ito ta la Vall de Chistau con un amigo que ye per astí de vacaions. Entre mutas altras cosas, hemos puesto fotografiar esta palometa nocturna, la Euplagia quadripunctata (ixe nombre me'l ha dito el mío amigo malas que la ha vista, ye una enciclopedia con patas ixe hombre):
Dimpués somos marchatos a fer una gambateta per un pinar quasi virchen, que yera precioso. E ya antes de tornar ta casa, somos estatos una miqueta con la Swertia perennis, que la hebe vista l'anyo pasato en un fontanal en Canal Roya (Canfranc), e hue he puesto estar més tiempo con era. Creix en las pauls, e ye de la familia de las chonzanas, encara que no'n pareixca. Pero sobre tot, ye una flor bien pincha, con una color preciosa. Tiengo que mirar en bell puesto per aquí per Bielsa a veyer se en trobo (e ya en tiengo un par, de puestos, en·n'a capeza a ón ir):
Au, dica unaltra.
P.S. Quasi m'olvido, caminando per lo pinar m'he trobato una chicota familia de chabalins (la mai e dos crías). Soi estato un ratet fotografiando-la sin que era me guipás, pero quan m'ha visto m'ha fotito un bufito que ha espantato a las crías e han salito a las quatre suelas.
La pena ye que me pensabe que llevabe l'obchectivo con la maxima focal, e el llevabe con la minima, asinas que se m'han quedato pro leixo (e ademés a contraluz e con ISO -no pas ixo- bien alta). Pareix que el mío amigo atraye a esta chabalina con las suyas feromonas, perque ye el segundo día que le sale per la misma zona. Pero rai, tos ne deixo una foto, chusto quan m'ha visto (no sé se per lo ruido de l'obturador, l'ablor que febe u a qué):

Parnassius apollo e Epipactis palustris

Pos ixo, que hue de maitins he puesto escapar-me un ratet con un amigo a dar una vuelteta per la montanya. Caminar no hemos caminato guaire perque hue l'obchectivo yera la Parnassius apollo, una palometa bien pincha d'estas -e altras- montanyas. Asinas que somos itos ta un puesto de la valle an que sabenos que n'i heba, e ya hemos aprofitato pa puyar una miqueta. Como que ye una especie considerata vulnerable, me permitiretz que no dé la suya localización, encara que tampoco no ye garra secreto e yo la he vista a menuto e per mutos puestos.
L'anvista, tot e que no me sosprende perque ixas montanyas las tiengo muit vistas, yera bien maja.
Dimpués d'estar veyendo qualques marmotas e collalbas, somos itos a veyer el nuestro obchectivo principal de hue, esta belleza:

E ya pa rematar el maitín somos baixatos a veyer la Epipactis palustris, una de las zagueras orquidias que podremos veyer per este anyo. No fue mica fácil: l'aire, es repetens, es tabans e una colla de més de 50 críos dando guerra per lo río no nos facilitoren la fayena.
E per aora ye prou, no sé quán podré tornar a salir :-(

Martagón e Rosalia alpina

Esto maitín soi ito con un amigo fotografo (ixe que m'ampra el 100-400 quan imos a fotografiar paixariquetz) a fer fotos a'l lirio martagón. Quan ya n'henos feto pro e nos n'inos enta una altra mata de martagón, de pura suerte nos hemos trobato con un eixmplar de Rosalia alpina, que ye una mena d'esgarabacho que ye catalogato como en periglo d'extinción. He feto las primers prebas (no he puesto fer-le-ne so que quatre), l'he deixato a er que le'n fes, e quan me tornaba a tocar a yo la camara se m'ha bloqueyato e ya no he puesto fer-ne més, de fotos. He churato una miqueta e quan soi tornato enta casa ya heba resucitato, pero m'ha privato de pasar un buen rato. Bien se vale que a'l menos l'amigo ha puesto aprofitar (que me se yo la cantidat de gigas que i habrá gastato). Yo a'l menos ya sé án ye, e podré tornar-ie quan quiera.
E qualques fotos d'el martagón, que yera l'obchectivo de la cursa peroq ue de camin ha pasato a un segundo plan:
Esta ye feta con fondo artificial:
En fin, una pena que no l'haya puesto fer més fotos a la Rosalía, pero estoi que no ye la zaguer vegata que la veigo (u a'l menos ixo espero). Salut.

Un día per la estepa

Un, que ye feto a la exuberant naturaleza pirenaica, se piensa que per ixas estepas de la valle media de l'Ebro no i debe d'haber guaire vida: espartals, plantas punchutas, tierras de chesos e lagunas salatas, paramos crematos per lo cierzo, per lo frío e per la calor... Manimenos, quan un tiene un guía que conoix como pocos la redolada arredol de Zaragoza (e ademés un gran fotografo) e unaltro acompanyant que te deixa parte d'el suyo equipo fotografico perque a tú no t'arriba con es milimetros ;-), fa goyo de tener amigos como ixes.
El sabado pasato estié en el bel medio d'ixas estepas e pedregals disfrutando como un enano (encara que chelato de frío, sobre tot a primer hora) disfrutando de la vida que rebosa per ixe país (e n'i hai més de la que pareix a simple vista). Tota una revelación de que, encara que sía un comentario pro habitual, la naturaleza arriba ta's rincons més estrimers. Tampoco no ye que fenos guaires fotos, pero aprendié muto, e bel·launa en podiemos fer.
Como siempre tos ne deixo qualque muestra.
Esta ye una alondra de Dupont (Chersofulis duponti), un ave estaparia en periglo d'extinción e que no més vive en las zonas esteparias de la Peninsula Iberica e d'el norte de Marruecos. Corre como un diaple, e quan creyes que la tiens enfocata ya ha desapareixito. Con tot e con ixo, bel·la foto se le podió fer, encara que més leixos d'el que m'habría feto goyo. Manimenos, ixa leixanía sirve pa veyer el suyo habitat.
Dimpués de foter-nos un almuerzo como cal, marchemos a vesitar diferents zonas d'observación d'aves, e a'l canto d'una basa podiemos veyer este chorlitejo (fa un anyo en veyé un chunto a la presa de Pineta, pero no podié afotar-lo con un obchectivo de calidat como el que m'heban deixato):
E ya pa rematar (es primillas no se deixoren afotar) un alicastro, no sé exactament quál ye. No se i vei guaire bien, e ye evident que no ye la millor foto, pero se vei el suyo metodo de caza, sobrevolando es marguinazos e espuenas en busca d'el suyo alimento:
En fin, que las mías baixatas ta Zaragoza tienen aora un alicient, que antes no teneban, e que con ixas amistatz fa goyo d'ir-ie (manimenos, les debo per lo mío país el tordo d'augua, el pintaparetz e mutas altras especies).

¿Trencahuesos, trencauesos u trencagüesos?

La verdat ye que no tiengo mica clar cómo escribir-lo, pero ixo ahora arrai. Hue me'l he pasato como un nin·no afotando ixes animals, que cuasi s'ha convertito en un tótem. S'ha encertato que he puesto acudir ta unbuen puesto pa veyer-los e que un buen amigo m'ha deixato un trabuco en condicions pa no tener que ir-ie con el mío talabarte. Mersi mesache, tamién dende aquí. Yeran més leixos que no pensabe, e i heba "interferencias"entre es animals e el obchetivo, pero con tot e con ixo m'he feto contento de poder-los veyer e afotar, encara que mutas fotos no valen pa cosa. Aquí tenetz bel·launa de las que més goyo m'han feto. Salut.
Estes primers son chóbens, se nota en que son més foscos (e més confiatos, i son entratos es primers a pesar de las chodigatas que les fan cuantos espabilatos d'es que no diré nombres):


N'i heba un que yera pro guito, e que acometeba a totz es de demés:
Estes son adultos, como se vei per la color narancha, son entratos més tarde e la luz ya yera masiato dura:
E aquí un choven e un adulto tricolotiando-se, chugando u que me sé yo qué feban:
En fin, un espectaclo pa's uellos (a'l menos pa's mío), e que con camara en man ye encara millor; cuan no me i cabeban en el encuadre -ixo sí, poquetas veces- pensabe en el privilechio que he tenito. A veyer se nunca puedo repetir-lo. salut.

Chizart e pintaparetz

L'altro día, puyando per la montanya, podié alufrar estes dos animals. El chizard el tiengo més visto que el tebeo, pero la curiosidat ye que le fayé la foto con un gran angular (18-55 mm), con que ya podetz contar que el tenebe bien cerqueta, casi a tocar. El pintaparetz (Trichodroma muraria) ye una especie de paixarico que no ye de buen veyer. Fa tres u cuatre anyos el podié veyer esvolastriando-me per dencima en un barranco un buen rato, pero no llevabe la camara con yo. Ante ayer, cuan el guipé amané el 70-33, la pena ye que no ye estabilizato, el enfoque ye lentismo e ye un f/4'5, per el que a 300 mm. ye més escur que una lupatera. Per ixo se i vei ruido e no ye el enfoque bueno, perque ye feta a pulso e l'obchetivo no ye mica buen, pero ixo a yo ahora trampis, he tenito la oportunidat de fotografiar-lo, e espero que en uns anyos (e millor equipo) tienga una altra vez la posibilidat de fer-le fotos.


P. S. Encara tiengo a l'archivo una pila fotos, como las de la puyata de l'altro día ta Punta de las Solas (3022 m.), pero contino tenedo pro galvana con el blog.

Dende l'atalaya

Ya feba días que no actualizabe el blog, ya perdonaretz. Tamién ye que en estes zaguers días no he feto garra foto que en valga la pena, perque ya soi esperando l'agüerro en plenitut, e ixo que encara le falta cuasi un mes. Como ha feto muto frío (aire de puerto con las primeras nieus per es altos, no guaire, una zinarrata, pero pro como pa que te cheles) tampoco no he puesto caminar guaire.
Esta foto ya debe de tener cerca d'un mes, pero me pareix maja. Salié dende La Estiva cara Feixa Castiecho per Prebón-rodiando Lalarri per alto- e cuan ya yere a punto de prencipiar a baixar me paré a fer-me un fumarret e viyé a este chizard (como podretz apreciar ye un masto, e con buens cuernos) que atalayaba Lalarri dende una pen·na pero no me viyeba a yo. Lastima de no tener un millor obchectivo, ya en voi mirando per internet e le tiengo ganas a un, pero con la economía como va no soi segur de fer ixe gasto. Mientres nos habremos a aconformar con el que tiengo. Salut.

Lirón II

¿Tos acordatz d'ixe lironet que viviba en una caseta de paixariquetz? Pos l'altro día i tornó con parella, ya son fendo-se el niedo pa pasar el hibierno. Cuan salioren de la caixa puyoren ta un árbol, e yo tamién, dezaga, pinchato d'un camal con una man e en l'altra la camara foto... comedias pa poder meter-zos aquí esta foto.

Dimpués de mutos días sin escribir cosa ni meter garra foto -yere inmerso en un proceso selectivo que per fin ye rematato, ya veremos en qué remata l'asunto- hue m'animo a meter-ie bel·la foto perque ya soi tornato enta la rutina. Las d'aora ven de paixaricos, alicas e alicastros, maitín se fa buen orache cuento con puyar ta Marmorés, an que el ibón debe d'estar encara chelato. Se i puyo ya tos ne meteré cualque foto.

Un trencahuesos, demasiato movito pero ye que yera muto leixos:Un par de paixariquetz:

Una gralla piquigualda:
Una alica, no sé se ye la cullebrera u la real, i heba mui mala luz e no le viyebe bien las colors per debaixo:
Pos ixo, espero no tener el blog tant a l'abandón como estes zaguers días.

Marmotas

Totz es días en el troballo i veigo mutos animals, ayer mismo chizarz, una rabosa, una boleta, una alica cullebrera... e marmotas, mutas marmotas.
En la Estiva i hai una pila marmotas, e podié quitar estas fotos a unas crías que son més confiatas que las mais. Yere chitato a'l canto d'el cado e me i fue acercando poquet a poquet dica que s'atrevioren a salir. De cuatre crías en i heba una que se fiaba més que las altras, e a era le fayé que me sé yo la de fotos. Tos ne meto estas dos: