Swertia perennis e Euplagia quadripunctata

Esto maitín he puesto escapar-me un ratet (el precisabe, e prou) e soi ito ta la Vall de Chistau con un amigo que ye per astí de vacaions. Entre mutas altras cosas, hemos puesto fotografiar esta palometa nocturna, la Euplagia quadripunctata (ixe nombre me'l ha dito el mío amigo malas que la ha vista, ye una enciclopedia con patas ixe hombre):
Dimpués somos marchatos a fer una gambateta per un pinar quasi virchen, que yera precioso. E ya antes de tornar ta casa, somos estatos una miqueta con la Swertia perennis, que la hebe vista l'anyo pasato en un fontanal en Canal Roya (Canfranc), e hue he puesto estar més tiempo con era. Creix en las pauls, e ye de la familia de las chonzanas, encara que no'n pareixca. Pero sobre tot, ye una flor bien pincha, con una color preciosa. Tiengo que mirar en bell puesto per aquí per Bielsa a veyer se en trobo (e ya en tiengo un par, de puestos, en·n'a capeza a ón ir):
Au, dica unaltra.
P.S. Quasi m'olvido, caminando per lo pinar m'he trobato una chicota familia de chabalins (la mai e dos crías). Soi estato un ratet fotografiando-la sin que era me guipás, pero quan m'ha visto m'ha fotito un bufito que ha espantato a las crías e han salito a las quatre suelas.
La pena ye que me pensabe que llevabe l'obchectivo con la maxima focal, e el llevabe con la minima, asinas que se m'han quedato pro leixo (e ademés a contraluz e con ISO -no pas ixo- bien alta). Pareix que el mío amigo atraye a esta chabalina con las suyas feromonas, perque ye el segundo día que le sale per la misma zona. Pero rai, tos ne deixo una foto, chusto quan m'ha visto (no sé se per lo ruido de l'obturador, l'ablor que febe u a qué):

Parnassius apollo e Epipactis palustris

Pos ixo, que hue de maitins he puesto escapar-me un ratet con un amigo a dar una vuelteta per la montanya. Caminar no hemos caminato guaire perque hue l'obchectivo yera la Parnassius apollo, una palometa bien pincha d'estas -e altras- montanyas. Asinas que somos itos ta un puesto de la valle an que sabenos que n'i heba, e ya hemos aprofitato pa puyar una miqueta. Como que ye una especie considerata vulnerable, me permitiretz que no dé la suya localización, encara que tampoco no ye garra secreto e yo la he vista a menuto e per mutos puestos.
L'anvista, tot e que no me sosprende perque ixas montanyas las tiengo muit vistas, yera bien maja.
Dimpués d'estar veyendo qualques marmotas e collalbas, somos itos a veyer el nuestro obchectivo principal de hue, esta belleza:

E ya pa rematar el maitín somos baixatos a veyer la Epipactis palustris, una de las zagueras orquidias que podremos veyer per este anyo. No fue mica fácil: l'aire, es repetens, es tabans e una colla de més de 50 críos dando guerra per lo río no nos facilitoren la fayena.
E per aora ye prou, no sé quán podré tornar a salir :-(

Goodyera repens

Ahier de maitins fue con un amigo a mirar una orquidia con nombre de pneumatico: la Goodyera repens. Nos costó una miqueta de trobar-la, pero a la fin el consiguiemos. E nos costó no pas perque no n'i hes, se no perque son chiquirrinas que no'n pueden més. Ya conoixco un puesto an que ir-ie ta l'anyo que vien, perque ademés que ye cerqueta de casa (encara que nunca no ib'yere estato), ye bien majo ixe lugar. Tos traduzco la información que da Wikipedia d'ixa flor (ya disculparetz perque el mío dominio d'el lexico vechetal ye infame):
Goodyera repens ye una especie d'orquidia d'el chenero Goodyera. Goodyera repens se troba en puestos isolatos en selvas e pauls d'Europa. Ye una planta rara, pero ye la orquidia més común en Escandinavia. Tamién se troba en Canadá e el norte d'Estatos Chunitos. Se trata d'una especie cosirata en la mayor parte d'el suyo habitat.
Caracterisiticas: Se trata d'una planta perenne que alcanza un metro d'altura [no pas aquí, que no arriban ni de conya ta'l plamo] que ninvía ocasionals finos tallos per dencima de la superficie. Floreix de verano, e tiene las flors dispuestas en una espiral. estas flors chiran cara ta'l sol [no sé, pero las que yo veyé yeran totas en una mosquera rodiatas de molsa, asinas que poco pueden chirar enta'l sol, encara que quan les fayé las fotos yera la vispra d'el 18 de chulio]. Igual como altras orquidias, existen en simbiosis con micorrizas, un rizoma cubilla a'l fongo (d'el chenero Rhictozonia, en este caso). Las micorrizas aduyan a la orquidia a absorber e asimilar es nutrients. Esta orquidia ye polinizata per bombolons, el que permite las suya reproducción sexual. Tamién puede reproducir-se vechetativament. Las suyas semillas son probablement las més chicotas de qualsequier planta.
¿Hetz entendito cosa? Yo no pas tot he he. Con tot e con ixo, tos deixo un par de fotetas d'esta chiquirrina orquidia que no hebe visto en las mías guías de flora d'es Pirineus:
Pero no tot son flors en esta vida, perque encara que feba un orache muit malo pa fer macro (muto aire), ancara podiemos fotografiar qualque palometa como esta Zygaena
E una ¿Mellicta deione?
Au, salut

Aguardando l'agüerro

Dende que prencipié con esto de la fotografía, ya fa tres anyadas, septiembre m'ha pareixito un mes mui floixo. Ya yes aguardando l'agüerro con las suyas colors (encara que no dura guaire), i hai mui poqueta flora e, ademés, no tiengo equipo pa adedicar-me a la fauna (tot arribará, espero). Se ademés a ixo le sumamos que las mías circunstancias personals son aora mismo pro embolicatas, pos apenasme vaga de salir ta'l monte, e quan i voi foi poquetas fotos, mismo i ha habito días que no'n he feto garra.
Per ixo, e per no abandonar definitivament el blog, hue m'he obligato a salir ta Pineta e fer bel·la entrata, asinas que aquí van:

No son mica buenas, pero a'l menos no se m'enrobina la camara, ni el dedo indice:-(
La hora no yera la millor pa las fotos de l'augua, cerqueta de la una d'el mediodía, e ademés tenebe que salir a las quatre suelas pa ir a replegar a la filla d'el cole. M'he entretenito quan puyabe a charrar con es míos antigos companyers de troballo e se m'ha feto tarde. Asinas que ya perdonaretz la baixa calidat :-)

Ordesa

No i hai cosa como estar de vacacions. Ademés se te trobas con tiempo libre e sin obligacions pa poder fer el que te pete e poder salir ta la montanya sin prisas ya ye la hostia. Ayer marché enta Ordesa, an que feba anyos que no i ibe. Tot plen de nieu e chel (una lastima que el gore tex de las mías botas hes decidito de pasar a millor vida, baixé como se m'hes banyato con las botas mesas) e de turistas. I heba dominguers e montanyers. Es primers calzaban zapatilletas de deporte, e el camin yera como un pander de chel, no sé cómo farían pa baixar. Es altros iban (inos) bien equipatos: botas, molatieras, raquetas pa se la nieu yera blanda (yo no me las metié, las llevé de cursa).
Bueno, a la fin arribé ta'l churro conoixito popularment como "Cola de caballo". Baixé cansato, tot el hibierno sin mover el cul menos dos vegatas que soi ito con la filla a esquiar e una excursión con raquetas per la val de Chistau a principios d'anyo. Ademés tenendo en cuenta que he tornatoa fumar, pos le metié un buen sobo a'l cuerpo, mereixito se'l teneba.
Entre que el fotografo ye malo e la luz yera una mierda perque i heba gallinazo poqueta cosa podié fer en el tema fotografico (esto se diz captatio benevolentiae); pero tos deixo bel·la foto d'ayer. Salut.
El churro d'O Chordonal (estoi que se diz asinas en aragonés):

Churro de L'Estrecho (con lo pincho que ye estre(i)to):
As Gradas de Suaso:
Cola de Caballo:
Ya baixando me metié a chugar con el macro, encara que ibe banayato como una chopa. Aquí uns detalles de la molsa:E aquí una primula (creigo que se diz asinas), que son las primeras floretas, ademés d'el pan de cullebra, que se veyen salir entre la nieu:

Un día per la estepa

Un, que ye feto a la exuberant naturaleza pirenaica, se piensa que per ixas estepas de la valle media de l'Ebro no i debe d'haber guaire vida: espartals, plantas punchutas, tierras de chesos e lagunas salatas, paramos crematos per lo cierzo, per lo frío e per la calor... Manimenos, quan un tiene un guía que conoix como pocos la redolada arredol de Zaragoza (e ademés un gran fotografo) e unaltro acompanyant que te deixa parte d'el suyo equipo fotografico perque a tú no t'arriba con es milimetros ;-), fa goyo de tener amigos como ixes.
El sabado pasato estié en el bel medio d'ixas estepas e pedregals disfrutando como un enano (encara que chelato de frío, sobre tot a primer hora) disfrutando de la vida que rebosa per ixe país (e n'i hai més de la que pareix a simple vista). Tota una revelación de que, encara que sía un comentario pro habitual, la naturaleza arriba ta's rincons més estrimers. Tampoco no ye que fenos guaires fotos, pero aprendié muto, e bel·launa en podiemos fer.
Como siempre tos ne deixo qualque muestra.
Esta ye una alondra de Dupont (Chersofulis duponti), un ave estaparia en periglo d'extinción e que no més vive en las zonas esteparias de la Peninsula Iberica e d'el norte de Marruecos. Corre como un diaple, e quan creyes que la tiens enfocata ya ha desapareixito. Con tot e con ixo, bel·la foto se le podió fer, encara que més leixos d'el que m'habría feto goyo. Manimenos, ixa leixanía sirve pa veyer el suyo habitat.
Dimpués de foter-nos un almuerzo como cal, marchemos a vesitar diferents zonas d'observación d'aves, e a'l canto d'una basa podiemos veyer este chorlitejo (fa un anyo en veyé un chunto a la presa de Pineta, pero no podié afotar-lo con un obchectivo de calidat como el que m'heban deixato):
E ya pa rematar (es primillas no se deixoren afotar) un alicastro, no sé exactament quál ye. No se i vei guaire bien, e ye evident que no ye la millor foto, pero se vei el suyo metodo de caza, sobrevolando es marguinazos e espuenas en busca d'el suyo alimento:
En fin, que las mías baixatas ta Zaragoza tienen aora un alicient, que antes no teneban, e que con ixas amistatz fa goyo d'ir-ie (manimenos, les debo per lo mío país el tordo d'augua, el pintaparetz e mutas altras especies).

Sarra Guara

Totz es días, quan torno de troballar, paso per lo Puerto de Foradada. Fa días que tornando una tarde viyé cómo se meteba el sol, e i heba una luz buenisma dencima de la Sarra Guara, a la que aduyaba unas boira que refleixaban la luz. Como gosa pasar a menuto, ixe día no llevabe la camara. Hue sí que la llevabe, e i soi pasato a ixa hora machica quan s'amaga el sol. Tos deixo un par de muestras. Son fetas con el tele largo, d'astí que no tiengan guaire calidat (con l'angular buen se me quedaba muto leixos), pero me fa muto goyo ixa luz. No ye la que i heba, pero enganyo a'l fotometro de la camara medindo en o puesto més luminoso, asinas s'oscureix tot el de demés (esto tos lo cuento per si nunca tos interesás a bel un). Salut.
Esta ye tirando de tele:

E esta a 70 mm (equivalent a uns 110 mm, pa que veigatz que queda pro leixos):

¿Chinchipera?

En castellano ye mito, aquí en Bielsa n'i hai pero no conoixco el nombre en belsetán, asinas que he recurrito a'l libro de Rafel Vidaller e asinas ye como le dicen per ixe país de la Vall de Benás. Yo conoixebe la voz chinchipera pa referir-se a la familia d'es carboneros (en castellano). Bueno, caldrá aclarir ixe tema...
Las fotos no son fetas en Bielsa, ye feta en un lugar cerqueta de Zaragoza, aón he pasato estes días de Navidat. Las he fetas con l'obchectivo d'un amigo e en el hide d'un altro. Que rematetz e prencipietz bien l'anyo que se'n va e el que viene, a veyer se el 2010 ye l'anyo de l'aplicación de la lei de luengas. Salut.

Navatiando per la gáritz d'el Yaga

Una cursa muto maja ye baixar dende Escuaín dica "Os Vivers d'o Campillón", més conoixitos, cómo no, per lo suyo nombre inventato: La surgencia de escuaín. Ye un d'es sistemas d'esplucas integrals més grands d'Europa, e la baixó er primer vegata el club d'espeleolochía de Badalona.
Abe mutos anyos ficié este camín, e no recordabe lo majismo que yera. Ixo sí, cal brincar como es chizartz de pen·na en pen·na brincando gorgas e chugando-te un banyo en ixas badinas con augua de color turquesa que convidan a'l banyo se no fues perque en parte ye parque e no te i puetz banyar e per altra perque encara que no fa frío no yera cuestión de foter-se un banyo en estas alturas de l'anyo.
Total que se va río río dica A Fraga, an que una vegata abe mutos anyos fendo el barrango brinqué es 12 metros que i hai dica la gorga (qué miedo, pero qué sensación), que tamién ye un puesto majismo e torna a puyar cara Escuaín per un puyatón muto costeruto a arreplegar es coches. Per aora me despido per un tiempo d'el mont per es compromisos que tiengo. Le trobaré muta falta pero qué le imos a fer, cal ganar-se la pitanza. Salut.

Os vivers d'o Campillón:

Una de las zonas de la gáritz, m'ha feto goyo ixa ringlera de piedras:
Como ibe dezaga d'el sol (deixando qu em'adelantás pa chugar -fotograficament charrando- con l'agua) es faus se refleixaban en l'augua deixando una color preciosa:
E per fin el churro e gorgas dencima de A Fraga, el brinco de 12 metros (se fa u no fa) ye a la dreta d'el churro d'augua:

Anyisclo II

L'altra vegata que i fue t'Anyisclo yera luego perque l'agüerro encara no i yera arribato e yera tot muto verde, e hue i soi tornato a mirar l'agüerro con dos colegas fotografos, pero talment ya yera una miqueta pasato, con tot e con ixo m'ha feto muto goyo de tornar-ie. Hemos prencipiato a caminar tarde e somos tornatos ta'l coche ya de nuet zarrata, yera escur como una lupatera. Pero bueno, somos puyatos t'A Ripareta que yera el nuestro obchectivo e ya baixando no hemos puesto fer garra foto. A veyer qué tos pareixen las fotos de hue.
Este debe d'estar el fau més fotografiato d'Anyisclo, en meto tres encuadres diferents:
Esta ye una anvista d'el camín, que yera majismo de tot:

Uns potrecons que i heba dencima d'un trallo de fau:Un puent de roca antes d'arribar t'A Ripareta:
Cuantas imáchens de las gorgas e gáritz que fa el río antes d'A Ripareta:



E ixo ye tot, que no ye poco, per hue. Salut.

Més fotos d'agüerro

Como ya he tornato el 100-400 que m'heban amprato e no'n vale la pena que mire de fer paixaricos con el mío 70-300 que ye muto mal, me toca de fer fotos a l'agüerro de Pineta, que esti anyo ye tardán, pero majismo. Es fabolars royos, la nieu e el ciel azul fan una combinación buenisma. La verdat ye que fa una calor que no ye normal, e asinas se'n va de rapida la nieu de l'altro día. Hue soi puyato ta's 1800 u més e de manga curta, encara me tornaré a meter moreno. Per cada día que pasa me queda menos días pa plegar, una pena.
Hue he feto el camín de Montaspro (el nombre el tiene mui bien meso), e tos las meto per orden:

Dende Lalarri, encara no i arriba el sol, pero m'ha feto goyo el refleixo d'el Cilindro en la baseta:

Dende el mismo puesto, pero enta el Perdido, Pico Anyisclo e Punta las Solas:
La Capilla e el Mallo Royo:

Dende la labacera d'el camín de Montaspro enta abaixo:
La selva la Bispeta, un fabolar con unas colors royas majismas:
Una altra de la Bispeta:
Arribando una altra vez ta Lalarri, es Esparrets, Cilindro, un poco del Perdido, es churros de Marmorés...:
E una anvista d'el cul de Pineta, fa una mica d'efecto barrilete el obchetivo, pero tos podetz fer una idea:
Au, ya n'i hai cuantas. Salut.