Per fin pareix que ye aquí

Con una semana de retraso sobre l'horario previsto pero pareix que per fin arriba l'agüerro. Dimpués de dos días de fiesta soi tornato ta Pineta e se vei més abantato l'agüerro. No se puet decir que sía la hostia, pero ya m'aconorto con el que sía.
En es churros de Lalarri ya i hai faus amarillencos, encara que en queda mutas verdes. El sabado baixé t'A Fraga, entre Rebilla e Escuaín, an que i hai unas gorgas e una gáriz bien pincha pensando-me que i trobarí las colors d'agüerro e no me fayó el morro cloc, yera como aquí, u sía, hauto. Pero per fin hue sí que he puesto fer las tipicas, pero no per ixo menos pinchas, fotos d'esta epoca. Tos ne deixo bel·launa, no n'he feto guaires perque he prencipiato a fer-las una miqueta tarde. A veyer qué tos pareixen. Salut.

¿Trencahuesos, trencauesos u trencagüesos?

La verdat ye que no tiengo mica clar cómo escribir-lo, pero ixo ahora arrai. Hue me'l he pasato como un nin·no afotando ixes animals, que cuasi s'ha convertito en un tótem. S'ha encertato que he puesto acudir ta unbuen puesto pa veyer-los e que un buen amigo m'ha deixato un trabuco en condicions pa no tener que ir-ie con el mío talabarte. Mersi mesache, tamién dende aquí. Yeran més leixos que no pensabe, e i heba "interferencias"entre es animals e el obchetivo, pero con tot e con ixo m'he feto contento de poder-los veyer e afotar, encara que mutas fotos no valen pa cosa. Aquí tenetz bel·launa de las que més goyo m'han feto. Salut.
Estes primers son chóbens, se nota en que son més foscos (e més confiatos, i son entratos es primers a pesar de las chodigatas que les fan cuantos espabilatos d'es que no diré nombres):


N'i heba un que yera pro guito, e que acometeba a totz es de demés:
Estes son adultos, como se vei per la color narancha, son entratos més tarde e la luz ya yera masiato dura:
E aquí un choven e un adulto tricolotiando-se, chugando u que me sé yo qué feban:
En fin, un espectaclo pa's uellos (a'l menos pa's mío), e que con camara en man ye encara millor; cuan no me i cabeban en el encuadre -ixo sí, poquetas veces- pensabe en el privilechio que he tenito. A veyer se nunca puedo repetir-lo. salut.

El tunel

L'altro día me declaroren en fotonatura esta foto como OT (difuera de tematica). Ni el comparto ni el entiendo, pero como me fa goyo e aquí soi quí decide qué e cómo se publica, pos aquí la foto. Tornaré a fer-la cuan l'agüerro sía més abanzato e es faus més amarillencos, pero per ahora habretz a conformar-tos con ésta. Salut.

L'agüerro amuestra la pateta

Se fa de rogar, pero poquet a poquet va arribando el muit chodigo. E més encara hue que ha plevito pro, prencipió ayer di nuet e ha ito plevendo tot el día dica que es barrancos e es ríos han medrato, que buena falta les feba. Con tot e con ixo estianyo l'agüerro viene més tardán, i hai roldes de faus verdes de tot chunto a altros que ya son como heban a estar pa estes días. Bueno, a yo trampis, que el veigo totz es días; pero pa la chent que pensaba aprofitar este Puent d'el Pilar pa fer fotos de l'agüerro (i heba cuantos amigos fotografos que m'heban dito que quereban venirt'aquí) pos va a estar una grand putata. En fin, asinas tendrán desincusa pa tornar-ie una altra vegata. No he puesto fer guaires fotos perque como tos decibe no feba soque plever, pero con tot e con ixo m'he escapato un ratet. Tos ne deixo, como siempre, bel·la muestra.

La primera ye feta dende el embalse, aprofitando que i daba bel·la rayateta sol (t'alto yera nuble preto como bien he puesto comprebar dimpués):

Este ye feta dende un poquet antes d'el Refugio de la Ronatiza, encara no pleveba pero no tardariba guaire a prencipiar:
Es barrangos de la Man Pacina, ya feba días que no se viyeban tant plens. Es faus d'el primer termino son d'Esquinarasnos, íxes van un poquet més abanzatos:
El churro d'el río Lalarri dende un poquet antes d'el puent que el cruza, aquí s'en heba deixato una miqueta de plever, no tardaría guaire a tornar l'augua.
E ya cuan baixabe, el Cinca, dende el puent de la pista. Ayer cuasi no baixaba augua per es Churros de Marmorés, e hue iban bien medratos.

Anyisclo

Aprofitando que hue tenebe fiesta e, sobre tot, que yeran es buelos en casa pa fer-se cargo de la filla (despertar-la, llevar-la ta'l cole, ir a buscar-la, dar-le a comer...) soi marchato cara Anyisclo, que ya feba días que le tenebe ganas. Encara que me fa una mica de vergonya decir-lo, garra vegata hebe pasato d'el puent de Sangons, e querebe puyar, a'l menos, dica A Ripareta, t'an que i soi arribato.
Encara que es faus no son amarillencos de tot, ya prencipeyan a cambear la color (mismo bel·la un ya ye amarillo amarillo) e ye precioso. Cuento que t'allá ta'l Pilar estará ya en el suyo esplendor, estoi que no podré escapar-me-ie una altra vegata. Pero bueno, rai, el deixaré p'altro anyo. El caso ye que como ayer me tornoren la mía camara -yera en tallers- me'l he pasato como un animal fendo fotos. Tos ne meto cuantas (u mutas) que no fan honor a la belleza d'ixas gáritz d'Anyisclo. Como siempre, pa fer-ne bel·la una pinganetiando per ixes cilletz.
Tamién m'ha venito bien que fues nuble preto, asinas he puesto alargar es tiempos d'exposición (bueno, he tirato con prioridat d'apertura, pero tamién tiene a veyer aón midas la luz pa que te dé un tiempo u altro, ya elsabretz pro) a truca de sacrificar es ciels, pero hue m'estimabe més de fer-les fotos a l'augua e a's faus, que ixes cillos d'Anyisclo siempre i serán.


Esta d'alto ye la costra d'un teixo enorme, n'i hai un par que son es més grands que he visto en la mía vida, e d'éste m'ha feto goyo la textura.
Espero que tos fayan goyo. salut.

Río Lalarri. Esperando l'agüerro.

L'altro día marché a veyer es churros d'el río Lalarri, per mirar se i heba faus ya con la color amarillenca d'agüerro. Esti anyo -bueno, como totz- va per roldes. L'anyo pasato prencipeyó a cambear per la Selva d'el troc d'el pin, e esti anyo prencipia per la parte baixa: el salietar ya ye bien amarillo, e i hai faus a'l canto la carretera que ya son bien avanzatos. Con tot e con ixo, a'l "grueso d'el pelotón" encara le falta, e pareix que arribará ta'l maximo t'allá ta'l Pilar.
Qué ganas que tiengo copón, e ademés maitín me trayen la mía camara d'el "taller", que dica hue he ito tirando de la de mi pai.
Ya perdonaretz que sía estato tantos días sin pinchar cosa.

Més paixariquetz

Este sabado, en un lugar cerqueta de Daroca, tenié la oportunidat d'ir a fer fotos ta un esconderite (u hide, como le dicen es fotografos). Yera la primer vez que el febe e la verdat ye que m'ha feto muto goyo, tanto que pienso explotar las oportunidatz que da ixa tecnica aquí en el lugar, gracias a's consellos d'es dos fotografos a qui acompanyé.
Tos deixo cualques fotos de las que he puesto fer (e n'he feto arrienda), disfruté como un enano. Ixo sí, el equipo amprato per un amigo que me deixó camara e un 100-400 que pa yo el querrí.
Una chincharana (Parus caeruleus):
Una chinchipera (Parus major):

Una mosqueta, no sé de qué clase ye (Phylloscopus spp.):E estes dos no sé cuáls son, el segundo talment sía una codirroya rial, bel experto que nos asesore, per favor (edito, el zaguer ye una aleta (Ficedula hypoleuca), en castellán papamoscas cerrojillo):