Galvana

Ixo ye el que tiengo, galvana pa mantener el blog. Dende que "a priori" tiengo més tiempo, no trobo cosa de qué escribir, cuento que tamién ha a veyer que cuasi no salgo a fer fotos perque no me falta fayena pero sí que me falta tiempo. En uns días me'n voi una semaneta de vancanzas, espero recargar pilas - e acotolar las de la camara- e continar con el blog.
Se no trobo motivación u no se m'arriman las musas per cerca caldrá dar per cerrata esta etapa que, se prengo ixa decisión, no habrá durato ni an un triste anyo.
Salut.

Esta nuet en Aragón Televisión: "LA BOLSA DE BIELSA"

Foto quitata d'el Heraldo de Aragón / EFE
Esta nuet, dimpués que se grabó ya fa cuantos meses como ya tos conté, s'estrena el documental de La Bolsa de Bielsa, tota la valle será apegata a's televisors a partir de las 23: 25, sobre tot es que i participemos. Se podetz veyer-lo no tos lo perdiatz perque ye pro bien, a'l menos el pre-estreno que podiemos veyer aquí a Bielsa este verano.

Agüerro en La Enfortunada

Continamos de borrasca (aora pareix que se'n ha deixato dende fa unas horas), e per la montanya ha debito de cayer buen paquete nieu (el túnel ta Francia yera hue cerrato per las litz). Aquí a la Villa ha amaneixito nevando pero sin que arribás a plegar, sí que heba plegato uns 100 m. -u menos- per dencima, e dimpués alternaba l'augua con la nieu. Me'n soi baixato a fer uns recaus ta La Enfortunada e ta L'Aínsa e he aprofitato pa llevar-me la camara fotos, pos hebe visto en la portada d'el Heraldo (edición Uesca) el churro de Las Devotas. Cuan i soi pasato baixaba menos augua que en la foto d'el periodico, pero con tot e con ixo encara yera bien majo pa fer-le bel·la foto.
Una vez feto el recau m'he mirato ent'alto e he visto, en un menuto, un trencahuesos, un cormorán, un milano e una pasa de patos, grullas u que me se yo qué bichos yeran, per el que he pensato en baixar un poquet enta el embalse d'A Espunya, que ye chusto debaixo de La Enfortunada, e encara que per la montanya ya pareix hivierno, es árbols nos indican el contrario, que encara somos en agüerro, per muto que nieve. Ixo sí, ni patos, ni grullas, ni cormorans ni cosa. Maitín que iy'iré con més tiempo a veyer se tiengo suerte.
Churro de Las Devotas




Refleixos en l'augua, mezclallo d'es elementos tipicos de l'agüerro: árbols amarillos, ramas ixutas, e gotas de plevia; no i falta so que bel poquet de boira.
Salut.

Per fin la nieu tant anunciata.

Dende ayer, que tenebe fiesta, estió alternando la nieu con l'augua tot el día a Bielsa. Esto maitín, cuan soi salito a las 6 d'el maitín cara Pineta per zaguer día de la campanaya, plebeba en Bielsa, pero a partir d'Ixabierre nevaba e ya i heba plagato, e dende el esbarre cara Espierba la carretera yera blanca. Hebe a ir esquivando es árbols que s'embanaba per el peso de la nieu, perque como estianyo la nieu ye arribata tant luego encara i hai mutas fuellas en es árbols e ixo, encara que pareixca una fateza, fa que hayan a aguantar muto més peso. A Pineta nevaba a tot meter, dica que se'n ha deixato a ixo de las 11 d'el maitín, pero ya heba meso una capa de nieu d'uns 20 u 25 cm.
Pro que he aprofitato a fer fotos, pero ye un incordio fer-ne nevando, con el batiauguas, el tripode e la nieu cuasi dica la rodeta (a tot esto yo sin molatieras e es balons chupitos); a'l que cal sumar que no tenebe guaire batería. Pero bueno, tos meto bel·la muestra pa que, como yo, tos despidiatz de Pineta per una temporata, perque encara que i vaya puyando, ya no'l faré tant a menuto como dica hue. Voi a fer una preba en meter-las en blanco e negro, ya me diretz qué tos pareix e se ixo ya las meteré en color. Per cierto, en la primera m'ha caito una bolisma de nieu en el polarizador, per ixo i hai un troz borroso

¿Nieu? No pas aquí

Como gosa pasar totz es anyos cuan arriba el hivierno, cuan veyes l'orache en la televisión e anuncian el caos per la nieu, aquí no pasa cosa. Hue, en el telediario de Tele 5, han dito que la metat de la provincia de Huesca yera cubierta de nieu, e ye mentira. Anterdayer plebió -yera de nieu sobre es 2.000 m.- e borrasquió una minqueta (bel día caldrá parlar sobre es diferents nombres que reciben per este país las distintas clases de nieu). Mientres que hue ye estato nuble dica la tarde pero no ha caito ni una bolisma. Como ye de dar, bufaba el puerto, e como gosa pasar, cuan bufa el puerto u no nieva u el fa d'una forma ridicula. Se yo tenés un negocio d'hostelería m'acordarí d'es que fan l'orache per espantar a la chent d'ixas trazas.
ya contarán es altros companyers blocaires pirinencos se ha nevato per las suyas tierras.
Ya veremos qué pasa con el frent que anuncian a partir de maitín de tardes, tos ne mantendré informatos.
Salut
Una foto pa ir despedindo l'agüerro, que con estes fríos e aires ya habrán caito caso totas las fuellas. Ye pro tocata -per ir fendo prebas més que altra cosa- e pareix un cuadro (bel·laún me dirá, e con razón, que es experimentos se fan con gaseosa).

¿Se nos ne va l'agüerro?

Ixo pareix se continará fendo el mismo orache que ha feto hue: nieu a 1.800 (de maitins, de tardes estoi que habrá baixato), aire de puerto e frío. Las fuellas ya van cayendo formando l'alfombra ocre que podetz viyer-ie en estas dos fotografías:
Ya me queda poco pa plegar, a cabo de mes, e ye hora d'ir despedindo-me de Pineta que ya me falta poquetz días. D'hivierno i puyo bel·la vez, pero no ye el mismo. Qué pena me fa.
En fin, pa que veigatz la nieu que ha caito (el ciel ye cremato, pero medir luces con este día e con tanta gama de colors, a'l menos a yo, me resulta muit difícil):
E un codirroyo (creigo) que se m'ha meso "a tiro" mientres esperabe a las rebestas:

Anyisclo e Pineta

Ilesia de Vio con Sestrals a'l fundo:
Churros d'el Molín d'Aso:

Puent de San Úrbez, t'abaixo i hai una caita que no la querrí pa's míos huesos:

Churro de Lalarri, en la pista d'el mismo nombre:
Bombolón plen de polen e enganyapastors (o espantaturistas o escusabrendas):

Lugar de Vio:

Ayer de maitins fayé una escapateta enta Anyisclo, ixa grand maravilla natural, no guaire tiempo perque entre que deixabe a la nin·na en·n'a guardería e salibe e no de casa pos se me ficioren las mil. Ixo d'Anyisclo ye pa ir-ie con més tiempo, ya que a las dos enganchabe e no i podié estar guaire. Con tot e con ixo me vagó de fer la "ruta d'el Molín d'Aso" -a las cuatre suelas, ixo sí- e fer bel·la foto. La luz no yera guaire buena perque ya yeran casi las doce d'el maitín, pero qué le imos a fer... Vusaltros chuzgaretz.

De tornata, encara ye la carretera d'el Canyón d'Anyisclo d'unico sentito, m'esbarré enta el lugaret de Vio, hebe pasato cerqueta mutas veces pero no i hebe entrato, e la verdat ye que mui majo. De tardes a troballar, e dimpués d'estar garimboliando me'n puyé per el camín d'es Churros de Lalarri, que aora da més chuego con es faus tant amarillos. Apa, que vaya bien.
Hue blogger ye traveser e no me diexa ordenar las fotos, me cago en la mai que el va parir.
La primer foto (que no me deixa escribir una línia per dencima, ye un d'es churros de Lalarri). No cal que tos recuerde que se punchatz dencima de las fotos se fan més grands e se i veyen millor.
Salut.