Dende l'atalaya

Ya feba días que no actualizabe el blog, ya perdonaretz. Tamién ye que en estes zaguers días no he feto garra foto que en valga la pena, perque ya soi esperando l'agüerro en plenitut, e ixo que encara le falta cuasi un mes. Como ha feto muto frío (aire de puerto con las primeras nieus per es altos, no guaire, una zinarrata, pero pro como pa que te cheles) tampoco no he puesto caminar guaire.
Esta foto ya debe de tener cerca d'un mes, pero me pareix maja. Salié dende La Estiva cara Feixa Castiecho per Prebón-rodiando Lalarri per alto- e cuan ya yere a punto de prencipiar a baixar me paré a fer-me un fumarret e viyé a este chizard (como podretz apreciar ye un masto, e con buens cuernos) que atalayaba Lalarri dende una pen·na pero no me viyeba a yo. Lastima de no tener un millor obchectivo, ya en voi mirando per internet e le tiengo ganas a un, pero con la economía como va no soi segur de fer ixe gasto. Mientres nos habremos a aconformar con el que tiengo. Salut.

Lirón II

¿Tos acordatz d'ixe lironet que viviba en una caseta de paixariquetz? Pos l'altro día i tornó con parella, ya son fendo-se el niedo pa pasar el hibierno. Cuan salioren de la caixa puyoren ta un árbol, e yo tamién, dezaga, pinchato d'un camal con una man e en l'altra la camara foto... comedias pa poder meter-zos aquí esta foto.

Tuera e bomolón II

Un par de fotos més d'este estilo, que m'ha feto goyo la tecnica. Pa variar una miqueta en meto una de tuera amarilla. Ya se van desfendo las flors e formando un capullet. Esto ya marca agüerro (frío, augua) e setas. E la calefacción de casa que ya prencipeya a meter-se en marcha... la ruina.

¿Ya ye aquí l'agüerro?

Per un regular, en Pineta l'agüerro ye en el suyo esplendor t'allá ta'l Pilar. Debe d'estar la sequera u que me se yó, pero i hai camals que ya amuestran las colors tipicas de l'agüero como es urmos, azirons, bixorteras, avellaneras... u este fau, con un camal ya amarillo entre güembra e sol.
Habremos a asperar més pa tener agüerro agüerro, pero como anticipo no ye mal.

Luna de días

L'altro día baixando de Feixa Tormosa, ya en el río, me trobé con la luna dencima de Treserols.

Tuera e bombolón

La tuera ye la planta més verenosa d'Europa, diz que 1 mg. ye capable de fer crebar a una persona adulta, mismo per contauto cutánio. Aora Pineta en ye plen, sobre tot de l'azul, pero l'amarilla no tardará guaire a salir (u yo no la he sabita viyer, pero n'i hai menos que azul). Con tot e con ixo a's bombolons u abelletas d'éstas pareix que no les afeuta guaire, perque i acuden de contino.
Hue he feto prebas con alta velocidat (1/1600 e 1/2000) e l'he meso una ISO pro alta (1600) per ixo sale rudio, pero pa estar el primer día que m'he mirato de fer este tipo de foto m'he feto contento d'es -dica aora- pobres resultatos. Pa q ue no tardás tanto a puyar-las les he reducito el tamanyo, punchatz-ie dencima pa veyer-las més grands.
Au, e maitín se no plebe ta Tormosa a contar chizartz.

E per fin... l'alica cullebrera

Ayer la cacé per fin (charrando en terminos de fotografía). Posata en la punta d'un pin me vagó de fer-le cualques fotos antes que me guipás e salís volando.
Lastima no tener un obchetivo millor, habré a cabidar pa crompar-me-ne un.

En esta encara no m'heba visto:Chusto antes de meter-se a volar, ya sabetz que se i punchatz se i vei millor, miraz-tos es güellos