Cypripedium calceolus 2012

Esto maitín no m'he puesto resistir e soi tornato a veyer estas preciosidatz. A veyer se me vaga e esta semana puedo ir a fer-les qualques visitas més.
Pocas parolas cal pa charrar d'eras.

Per fin flors II

Encara que a bell valencià le parexica rar, finals de mayo e primer de chunio ye quan aquí prencipeya a salir la flora de la buena: orquidias, liliáceas, orella d'onso, etc. E ixo que estianyo encara en he visto pocas d'orquidias. Pero n'i hai unas que no fallan, e espero que no el fayan nunca: la Cypripedium calceolus. Ya llevo uns días que voi a mirar-me-las. El miércols i fue e veyé que le faltaba uns días, pero s'han llevato un buen arreón con estas calors e pareix que tienen prisa. Hue no'n he visto soque una medio ubierta, pero m'espera uns días d'ir-ie e disfrutar como un latón en un barducal. Tos amuestro las primers fotos d'estianyo, pero ya digo que i tornaré :-)
Baixando ya enta casa he parato un inte en El Plan, perque en i sale d'altra raza, e astí ibi'yera, una Dactyloriza, pero no sé se ye la majalis u la elata, encara que estoi que ye esta zaguera per es puntetz de las fuellas basals.

 M'espera un mes que malas que tienga un ratet (se el treballo e es fillos me dan el nihil obstat) habré a salir a chugar con el macro.

Per fin flors

Finals de mayo e primers de chunio son meses ideyals pa chugar con el macro, perque ye quan sale la flora que tenemos per aquí, a'l menos la més espectacular.
El chueves, mientres apaseyabe a'l borche, veyé unas Orchis ustulata en un prato (el mismo an que fa dos semanas pillé una zarpateta de muixardinas pa poder fer-me una tortilleta). Torné ta casa a pillar es trastes de fotografiar e marché a fer-les quantas fotos antes que cayés la tronata que nos amenizó la nuet. Ya aprofité pa "afotar" unas campanetas, que ya feba días que hebe visto pero a las que no hebe puesto llevar-me ta casa en forma de bytes. E ye que voi fatal de tiempo. Per exemplo, el sabado pasato (12 de mayo) me'n puyé per fin ta la Penya Montanyesa pero fayé pocas fotos perque la luz yera malisma. E no hebe descargato las fotos dica hue, ueito días dimpués.
E ya ye prou de fer la estrolicadera, tos deixo con las fotos de la ustulata.

Aquí tenetz, per se queretz veyer-lo, el track de la Penya:

Fornos

El domingo m'escapé un ratet a caminar, e como que no tenebe guaire tiempo, decidié d'ir ta Fornos perque ye un ratet d'ir-ie. Ademés, dimpués de tot el que ha plevito estes días ta zaga (mismo hue ha plevito una brinquerrina), contabe que baixaría buen mangazo d'augua. E asinas yera, tanto que no podié cruzar el barrango (me foi mayor, e ya no m'atrivo a fer cosas que fa uns anyos habrí feto he he) pa veyer bien O Chorro Fornos. Mismo veyé que i heba unaltro frato en l'altra man d'el río per an que cayeba augua, cosa que nunca no hebe visto en las mías anteriors visitas a ixe puesto.
E como esta semana no m'ha vagato de fer cosa, dica hue no he puesto descargar las fotos pa veyer-las bien. Asinas que aquí las tenetz. Como captatio benevolentiae, he de decir que i heba muta augua e poca luz, e como soi un zote con el procesato sé que podrí deixar buenas fotos con l'ordenador (chuntando dos fotos, per exemplo), pero las deixo quasi quasi tarqual han salito de la camara.
Las fuents de Fornos:

 Una anvista cheneral d'el caudal d'O Chorro Fornos:

 Bell detalle:

 E aquí se veye una miqueta O Chorro:

Badaín-Peguera

Esto maitín soi salito un ratet ta'l mont, a cremar toxinas e a ixoriar-me, e me'n soi ito cara Mataire, a veyer se podebe fer qualque foto d'el Cillo Bachaco dende astí. Quan i soi arribato i heba boiras baixas que no me deixaban veyer Bachaco, e quasi cosa, pero a'l menos es dos primers obchectius es he conseguitos :-)
Asinas que me'n soi baixato sin fotos dica que ya cerca de Badaín, m'he entretenito un ratet con el romero, que ye una planta muit común per aquí, pero dimpués de la plevita d'ahier m'ha dato una miqueta de chuego. Tos deixo el track e qualque foto.
Aquí tenetz el track.

E una foto.

Puyata frustrata

Cagondiós, no que tot l'hibierno veyendo la Penya Montanyesa sin nieu, e el día que decido de puyar-ie, yera tot "parejo", el día que més n'i heba. Dende aquí no se veye, e yo me pensabe que i habría nieu en la cara norte, pero tamién n'i heba en la sur. Ya el veyé quan paré en A Buerda a prener-me el café (sin ixe café no soi persona), pero como ya el tenebe enn'a capeza (dura como una penna) pensé que no perdebe cosa per fer la prebatina. La ideya inicial yera de puyar dende Oncins t'O Picón d'o Libro, baixar enta A Collada Ceresa e dende astí ta Oncins per O Tozal d'os Pozos. A partir de 1700 m. d'altitut ya pisabe una miqueta de nieu, e a partir d'es 1800 ya n'i heba un buen paquete. Pero como yera luego encara yera dura e no foniabe. Ya no puyé per ixo per A Faixa o Toro, perque hebe leito que con nieu u chel yera fura.
Pa cruzar A Canal Mayor ya habié de perder altura perque no m'atrevié a seguir el camín que llevabe (sin nieu garra problema, pero nieu chelata se se te'n va un piet baixas sin saber cómo t'A Torrolisa), e quan me faltaba 50 metros de desnivel ya veyé que yere metendo-me en una embarcata de las buenas, perque ibe sin piolet ni crampons, només con el tocho d'abellanera (e bien se vale que me'l llevé). Asinas que me die la vuelta, perque me faltaba la zaguera pala que ye prou costeruta.
E baixando hebe de clavar el tocho més de medio metro e calciar pa poder clavar la punta de las botas e ir baixando china-chana.
Total, que habré a tornar-ie unaltra vegata, perque me quedé sin poder veyer las vistas dende la punta, sobre tot enta la cara norte. Pero rai, me veyé bien piyando, e ixo que no caminabe dende l'agüerro, se veye que no he perdito tota la forma, a veyer se la puedo recuperar dentro de poco.
Ya tos contaré quan i torne e pueda fer el que tenebe previsto, con track e tot :-)
Con tot e con ixo, qualque foto fayé, pero no guaires perque yere més per la seguridat...
L'anvista enta Mediano:
E ya quan decidié de baixar sin fer cima. Se i veye A Tuca, e yo salié per dencima d'ixe cillo, e baixé a empalmar con el camín que pasa per debaixo perque el veyé més segur:
Pos ixo, unaltra vegata será.

Yaba

El chueves hebe visto que i habría un ratet de buen orache de maitins, deciban que no plevería dica las dos. Asinas que amaitiné e marché enta el monasterio de Sant Veturián a puyar enta la Penya Montanyesa. En Bielsa pleveba, e prou, pero como i hai vegatas que aquí fa un orache e per abaixo unaltro, decidié prebar suerte. No n'i habió, tamién i pleveba asinas que alborté la puyata e m'adediqué a paixiraquiar per buena parte de Sobrarbe. Dimpués de recorrer Baixo Penyas, enfilé cara t'Anyisclo. Quan pasabe per Fanlo mismo nevusquiaba una minquirrina. Baixé dica Broto, an que fue a veyer el churro d'el Sorrosal, que no nunca no hebe visto de cerca, an que quasi me cayó un penyón dencima (faltó bien poco, e salié d'astí a las quatre suelas). No i fayé garra foto perque pleveba e i heba un polvín d'augua desfeta d'el churro que m'habría salito la foto malament. Ya me'n tornabe enta casa quan m'acordé que feba anyos que querebe visitar el lugar de Yaba, d'el que m'heban dito que yera un lugar bien pincho. E en ye, no podié disfrutar de l'anvista perque pleveba e las boiras yeran baixas, asinas que no se i veyeba guaire. Habré a tornar-ie quan no pleva.
De tornata veyé las feixas replantatas con pins e pensé que talment i hes orquidias. E n'i heba, una especie que no hebe visto nunca en persona. E ye esta.
Total, que maitín miraré de puyar enta la Penya, aprofiando que tiengo fiesta, e se no me fallan las fuerzas (ye la primer cursa que foi en meses), miraré d'alargar-la una miqueta. Ya tos contaré.
Unas anvistas de Yaba:

Una chaminera, n'i hai muit guapas:
E aquí la orquidia, estoi que ye la Ophrys sphegodes, yeran quasi totas prou pochetas per la cantidat d'augua que i heba, e yo clavato en el bardo con es chenullos e es codos, rematé bien farto d'augua:

Hetz a tener en cuenta que no feba soque plever, e fer fotos quan pleve ye una mierda (per exemplo, cal agarra el batiauguas entre el cuello e el huembro e asinas no i hai qui mantienga el libel, se mancha el filtro polarizador, no puetz emplegar filtros ND perque te falta mans, etc.), asinas que no son fotos pa tirar codetes.