miércoles, 23 de abril de 2008

Ya arriba la primavera





Pareix que aora sí, e que ye pa quedar-se-ie, encara que bufa un poquet de puerto que fa que no s'esté bien de tot.
Güe, día de Sant Chorche e festivo, no he puesto salir ta'l monte a fer garra foto. Pero ayer, antes de baixar-me-ne ta Zaragoza e puyar di nuet, sí que me fayé una escapata enta Pineta, per viyer se cayeba litz. No tenié suerte con las litz, pero sí con un ziel azul que feba goyo de viyer-lo. Cuento que güe que ha feto buen día se'n será ita muta nieu, pero ayer de maitins encara en quedaba buena cosa.
Sobre tot per alto, que a'l menos n'i hai dos metros (e igual me quedo curto), perque tota l'augua que ha caito aquí estes días (mismo bel ratet nevar) a partir d'es 1.300 yera nieu, que chunto a la que cayó la semana pasata, pos ya podetz contar. Ansinas per ixemplo ye el pantano de Mediano, que ha medrato buena cosa e encara espera es mayencos.
Mientres vas baixando enta la Villa, s'aprezeya més la primavera, es paixaricos encorrendo-se (qué querrán fer es marranos), las flors de las chicoinas en es pratos, es artos e zereseras en flor... menos muixardinas, que encara no'n ha salito garra.
El caso ye que como tos decibe de tardes me'n baixé ta Zaragoza perque hebe a fer cualques recaus e podié disfrutar d'el Somontano tan verde per el trigo e amarillo per las allagas. A una color le trobé falta: a color roya. ¿Ya s'ha pasato el tiempo d'es ababols u encara ye luego?, perque en viyé mui poquetz. Ya nos dirá l'amigo Onset cuánd ye el tiempo d'ixas flors que no abundan guaire per aquí (sí per A Fueba e la Tierra Buixo, que astí tienen almendreras, oliveras, trigo...). Con tot e con ixo, es Pirineus como telón de fondo bien cargatos de nieu, e mismo en i heba en Guara, feban que es güellos se'n isen de cabo ta cuand enta l'anvista.
Ya pa ir rematando este rollo, entrando ta Zaragoza me i trobé la famosa e dica alabez desconoixita pa yo entrascada de la rotonda de la MAZ. Entre que arribabe tarde e la calorota que i feba fayé mui mala folla, e més encara acordando-me que feba poquetas horas yere per Pineta més solo que la una. E pa rematar-la de joder, cuan tornabe enta casa un accident a l'altura de Zuera que obligó a esbarrar el trafico per la carretera viella e me fayó perder més tiempo encara.
En fin, d'ixes días que me fan estresar pero que miro d'olvidar mirando-me estas fotos como las que tos i meto.

4 comentarios:

  1. T'as d'oblidar do stres...,goitan as fotos yo m'oblido de Barcelona y me traslado ta mia tierra,ta mia casa.Grazias por istas imaches

    ResponderEliminar
  2. No i hai de qué, hombre. Per el que veigo gosas ir a sobén t'A Espuña, conque tampoco no se te debe fer guaire dur ixo d'estar a Barcelona. Ademés ya queda poco pa'l verano e pa las vacacions.

    ResponderEliminar
  3. O tiempo d'os ababols ye agora con a primavera. O que pasa -ye o que se diz- que con toz ixos solfatos que esparden no dexan ni un sacre y mata tot. Fas unas fotos que bel día me feré un album con totas as imáchens. Por zierto os güellos d'a tuya filla son impresionans, bien majos. (Cuan charras d'a mala situación de l'aragonés en Bielsa, cómo ye en as aldeas d'a villa?).

    ResponderEliminar
  4. Pos en las aldeas se i charra més, u a'l menos i hai una miqueta més de presencia social, pero no i hai nin·nos (sí que n'i hai bel·laún, pero mui pocos, e n'i hai que charran el belsetán pro castellanizato perque ya no han tenito acceso a'l belsetán pur e han recibito muta influencia d'el castellano en la escuela, la tele, es companyers...), conque mal futur tamién

    ResponderEliminar