5 anyetz de blog

Hue fa 5 anyos que prencipié a fer el fato con esto de blogger. Como mutas de las cosas que foi, el fayé sin plantiar-me-lo guaire per no decir cosa. Yere prencipiando con esto de la fotografía réflex con una Olympus 510 e pensé que yera un buen puesto pa amostrar el que yo pensabe que yeran las mías obras d'arte (aora las veigo e sé reconoixer que son malismas, las d'aora no ye que sían una marabilla, pero sí que son millors e espero continar millorando), pero el ibe barrechando con una miqueta de tot, sobre tot el tema de las luengas. E charrando de luengas, en bel·la ocasión m'han dito que se me cambiás ta'l castellano tendrí més acceptación. No el sé, pero ixo rai.
Amés de las fotos pa mirar de trayer chent que quiera fotografiar las cosas que fotografío yo en este Sobrarbe nuestro, una de las pocas cosas que tenebe clara yera que utilizarí l'aragonés (e la grafía, igual como las fotos, tamién ha amillorato en estes 5 anyos), que estoi que tampoco no ye tant difícil d'entender pa's charradors de qualsequier luenga romanica.
El numeor d'entratas ye ito baixando tarqual, e cuento que arribará bell día, talment no guaire leixano, en que me'n canse e tos canse e plegue. No el sé, ya se verá.
Pero bai, que no foi soque estroliquiar e es pocos que encara m'aguantatz e me visitatz sabetz que no goso escribir guaire.
Asinas que paso a las fotos dimpués de recordar que el blog fa cinco anyos. Este cabo de semana, a pesar d'el frío siberiano que ha feto, he puesto salir ta la montanya. Sobre tot el sabado.
Como tos digo, el sabado miré de fer las primeras luces sobre Treserols (unaltra vegata) pero cambiando el mirador. Asinas que me desperté a las quatre, e a las 5 prencipiabe a caminar dende Espierba. I heba luna plena pero a escape s'amaó dezaga de Treserols e habié de tirar de frontal. Llevabe las raquetas a las costiellas, manimenos no las fayé servir encara que i hai un paquetón de nieu d'el copón. La nieu yera chelata e no m'afunibe brenca. Millor m'habrían venito uns crampons en bel·la costereta antes d'arribar ta la punta Comodoto.
Feba frío pero tampoco no excesivo perque encara ye hibierno, e con buena ropa e es quasi 1000 metros de desnivel mismo sudabe. Quan arribé ta Comodoto yeran las 7:30 e ya faltaba poco pa que l'aurora de rosatos dedos que deciba Homero fes acto de presencia. Me minché l'almuerzo perque tenebe muta fambré, metié el tripode estudiando las fotos que farí, me metié el gore-tex e en ixe inte arribó la ola de frío siberiano, bufando un puerto que fayó volar el tripode de carbono e baixando la temperatura muto,e la sensación termica més (tanto que se me cheló l'augua que llevabe en la mochila). No me'n quedó altra soque brincar d'astí perque yera imposible fer fotos con el tripode levitando e las mías mans a punto de chelar-se per més guants de gore-tex que llevás.
Asinas que cara abaixo cagando-me en Dios per el sobo e el madrugón que m'hebe fotito per demés. Baixando enta el Due (que toponimo més bonico) miré enta zaga e, como i feba menos aire, m'asomé ta un cerro per no baixar-me-ne con la tarcheta vacía e astí fayé qualques fotos, que son estas. Arribé ta Espierba a las 9:30 d'el maitín, e l'auto me marcaba -4'5ºC, uno menos que quan hebe prencipiato a caminar.
Aquí tos deixo bel·la foto d'el sabado.
Enta Treserols:

Rubinyera royo como un carrón:

Enta Comodoto:

E enta el Mallo  Gran:

E hue tenebe curiosidat per saber se es Churros de Lalarri s'habrían chelato con este frío como l'anyo pasato. Asinas que, sin prisa, soi puyato ta Pineta. La verdat ye que encara que ha feto frío, no'n ha feto tanto e i heba una combinación d'augua e chel bien bonica. I hai un paquetón de nieu d'el copón, e he tornato a llevar las raquetas de paseo perque la nieu yera chelata. Soi puyato per lo camín d'es Churros fendo fotos e a escape ta casa. Aquí tenetz una muestra en orden ascendent.

 

  

Qué manera d'estraliar, ya ye prou.Salut p'altros 5 anyos como poco.
P.S. Tos deixo el track de la puyata ta Comodot, encara que no tiene posibilidat de perdida.

Buixaruelo d'hibierno

Mama mía, quasi un mes sin fer cosa, Pero ye que entre la nieu, l'aire, bell cabo de semana que he tenito el borche malo e el carnaval (e prou que no voi a salir ta la montanya en carnaval), no he puesto fer cosa dica hue.
Es pocos que encara seguitz este triset blog. sabetz que fa un par d'anyos descubrié Buixaruelo d'agüerro, e que fue un flechazo he he. Pero hue querebe ir a veyer-lo con nieu, asinas que m'he meso el rebel bien luego, he pillato molatieras, raquetas e tot el coponario e i soi ito a repetir la cursa que foi totz es anyos dende que el conoixco. No ye tant bonito como d'agüerro, pero tamién tiene la suya cosa.
Aquí yere fendo una foto a'l churro medio chelato quan he visto que la luz d'el sol prencipiaba a iluminar la punta d'ixe albar, creyando-se un contraste frío-calient intresant:

Dimpués soi ito puyando per lo GR con nieu dica es collons (bien se me'n ha valito de las molatieras e las raquetas), fendo fotos.

No son las millors que he feto en la mía vida, pero como he puesto quitar resultatos "potables" con una sola toma, no me'n queixo. Bell día habré d'aprender a fusionar.

Pos ixo.

Nocturnas hibernals

Feba muto tiempo que no salibe a fer fotografía nocturna. Dende este verano e es resultatos no fueren gran cosa. En realidat, pocas vegatas que he salito a fer fotografías nocturnas m'he quedato contento con las fotos fetas. E ye que fallan tanto la camara como el  fotografo (sobre tot el zaguer). La mía camara fa muto ruido, no tiengo intervalometro e no quiero foter-me guaire tiempo debant de l'ordenador apilando fotos. E amés siempre improviso las mías sesions sobre la marcha, dependendo de las ganas que tienga de salir, cómo sían las carreteras, etc.
Pero caleba aprofitar el plomazo de nieu que nos han deixato estas dos semanas de borrascas e més borrascas. Quasi totz es días ha nevato u ha plevito, altros días solo nevusquiar, dos días ha meso una buena cantidat de nieu. E el viernes, veyendo que i heba luna plena, torné a acordar-me de las fotos nocturnas. La pena ye que quan salié de casa ya prencipiaban a venir las boiras d'unaltro frent que nos deixaría més nieu e augua. Per ixo la luz de la luna plena yera tamizata per las boiras.
El caso ye que astí estié, en la ribera Pineta. un par d'horetas sentindo cantar cómo otulaba el craberet e femndo qualques fotos sin grans pretensions, perque querebe tornar luego ta casa.
La que més goyo m'ha feto ye esta:

Ixo sí, caleba estar bien forrato, perque el termometro de l'auto me marcaba -7'5ºC.
Dica unaltra.

Tornamos con las primeras luces

A yo ye que m'encanta veyer las primeras luces sobre Treserols u qualsequier altra montanya. Ir a veyer-las supone salir de casa de nuet, pasar muto frío e caminar en la escuridat absoluta como el sabado pasato, quan i heba luna nueva.
Esta vegata querebe veyer-las dende la Cruz de Guardia, e calculabe dos horas e media de puyata. Salié dende la puerta casa, pos no caleba pillar l'auto pa ir-ie, e acometié la puyata con el frontal. Se me fayó més largo d'el que yo pensabe, e las pillé dende el cargadué, uns campos que i hai antes d'arribar ta la Cruz de Guardia pero que tienen buena envista enta Treserols. Astí ya yera tot plen de nieu e entre ixo e las prisas no veyé garra primer plan intresant, pero se fayó el que se podió. No duroren guaire e miré de puyar, ya que i yere, pero la nieu per es chenullos e yo sin molatieras m'obligoren a dar media vuelta enta casa. Pa unaltra vegata será.

Baixando m'entretenié un ratet en el barranco Salastro con el chel, pero el puesto daba pocas oportunidatz compositivas perque yera tot chelato e con un eslisón podrí haber rematato en una gorga, asinas que primó la seguridat e pensar en la mía integridat fisica e en la de la camara :-)

 

Las fotos d'el plomazo de nieu d'ahier (e de hue, que contina nevando) las deixo pa unaltro día. Salut.

Barrosa

El 29 d'aviento amaitiné pa ir ta Barrosa a fer las primeras luces. No las tenebe totas con yo, perque i heba luna plena e no sabebe per aón la tendrí. M'acompanyó tot el camín dica que salié ya d'el pinar, alavez s'amagó dezaga de la collata que i hai entre Rubinyera e L'Almunia.
Miré un troz an poder fer bel·la composición aparent, con bolos de granito pa meter de primer plan (aora pareix que se no el metes ya no ye una foto he he) e a esperar a que arribasen las primeras luces sobre ixes dos picos que nombrabe antes. Yera la preciosa hora azul, ixe rato en que el ciel se mete azul perque ni ye de nuet ni prencipeya a fer-se de días. Bonito ye, pero d'hibierno ixa hora, estando-te quieto, te chelas (que vivan mutos anyos las mais d'es que inventoren el gore-tex e la ropa termica), encara que la temperatura no yera guaire baixa, yere a baixo cero. Pos ixo, que astí m'estié como un fato. A l'altro'l día, con l'amigo fotografo con el que puyé ta Benás, conveniemos en que somos frikis, que per mirar las millors luces (que no siempre trobamos) u nos fotemos uns madrugons d'el copón, u se nos fa de nuet en la montanya, u nos chelamos de frío u que me sé yo la de penalidatz que pasamos per una afición. E el pior de tot ye que la mayor parte de las ocasions, las fotos no valen gran cosa u no conseguimos el que tenenos en la capeza.
Pa este caso en concreto, me levanté a las 6 d'el maitín, e encara que la puyata enta Barrosa ye una fatera, el camín yera chelato e i heba trozos an que eslisaba cosa mala, pasé frío, se me rematoren las baterías de la camara (en llevo 6, dos nuevas que no m'hebe acordato de cargar e quatre viellas que no aguantan cosa e que las llevo pa situacions como ixa, perque encara me deixan fer bel·la foto) e las fotos no han tenito garra exito en la web de fotografos de naturaleza per an que me muevo.
Qué le imos a fer; sarna con gusto...

 La preciosa hora azul. No se i siente cosa, només la nieu cruixindo baixo las botas e las mans quan las esfrecas la una con l'altra pa que entren en calor :-)

Prencipian ameter-se las montanyas royas:

Las baterías dicen prou, e enta casa a buena hora:

Benás

El domingo me'n fue ta Benás con un amig que tiene casa en Campo. La verdat ye que siempre que viene ta Campo, el foi venir enta Sobrarbe, e ya caleba que le tornás la visita. Asinas que el sabado de tardes improvisemos una escapateta enta Benás a punto día (como buens frikis que somos he he). E aquí tenetz el resultato de la cursa enta El Forau d'Aiguallut, an que no i yere estato dende feba 20 anyos (e ye que, encara que me pene, me foi mayor, snif). Més que per las fotos (que m'han feto goyo), ye per poder dar una vuelteta, charrar de fotografías, chafardiar e ixas cosas. A veyer quán puyo las d'el sabado, que marché ta Barrosa a pillar las primeras luces. Que teniatz un buen anyo.

Buen 2013

Tiengo bel·las fotos esperando el procesato, pero no me vaga. Asinas que, mientres el foi e no, tos deixo esta foto d'ahier d'el Forau d'Aiguallut (Vall de Benás) pa deseyar-tos a totz es que pasatz per aquí un buen 2013, encara que la cosa no pinte guaire bien :-(

Pos ixo, buen 2013 e salut e treballo que no'n falte.