Ibón de Plan

L'Ibón de Plan estoi que ye un d'es puestos més fotografiatos de Sobrarbe. El suyo acceso sencillo dende Saravillo fa que i vienga chent a muntons: respetuosa e menos.
Estar tant conoixito, e de tant fácil ir-ie, planteya problemas. La un ye la masificación e el que conlleva (sobre tot, la mierda que i trobas per tot arreu). L'altro ye que se'n veye tantas fotos que pueden arrobar a cansar.
Con tot e con ixo, tener-lo tant cerca de casa ye una tentación constant, e antes que no se plene de chent, miro d'aprofitar-lo.
La semana pasata i fue el miércols de tardes. Ib'yere yo solo, e tot e que no veyé las luces que esperabe e querebe, siempre ye un placer estar con tú mesmo en un puesto machico como ixe.

Fornos

El de mes de mayo ye ideal pa ir a fer una vesiteta a Fornos. Se i hai nieu en las puntas (como ye el caso d'estianyo) e i hai mayenco, tiens l'espectaclo asegurato. Ye una excursión tant sencilla e bonita que en un ratet te i plantas, e en vale la pena.
La lastima ye que, de totas las vegatas que i soi ito, no he puesto cruzar ta l'altra man d'el río a veyer el Chorro (l'augua que sale per un frato en la paret) so que una. Per tanto, siempre me quedo con las ganas de fer-le na foto (e ixo contando con que i hai augua en suspensión que deixaría la lent de l'obchectivo banyata como un chop). Pero bueno, bien vale ir-ie a veyer-lo:

Penya Surta

L'altro día, en Facebook, me recomendaban de puyar ta Penya Surta a veyer una buena envista de Sobrarbe. La verdat ye que, encara que las tucas quedan una miqueta leixos, teneba razón la persona que me fayó ixa recomendación.
Tot e que el ciel no yera el millor (raso de tot, como el uello d'un paixarico) i estié bien a gusto mientres que muta chent veyeba el fútbol (estoi que ixe día chugaba el Madrid la semifinal de la Champions). El que més goyo me fayó de tot fue tornar a pasiar per la Tierra Buixo, u Viello Sobrarbe, que ye espectacular estes meses d'abril e mayo. Tos recomiendo la suya vesita, e més con tota l'augua que ye cayendo.
Bueno, que no escribo més, que tos deixo con las fotos.
Penya Montanyesa e Cotiella:

 Treserols:

 Més Treserols:

 E l'skyline de Sobrarbe :-)

Anyisclo

Encara que siempre me queixo perque remata l'hibierno, ye cierto que la primavera ye una epoca bien bonita. Ye verdat que gosa haber-ie un par de meses (marzo e abril) que se no i hai nieu en la montanya no me fan mica goyo. Pero estianyo he puesto aprofitar-los e soi més contento con es resultatos, a'l menos més que no l'anyo pasato.
Con tot e con ixo, ya ha arribato mayo, es caixicos e fabolars han sacato la fuella nueva, es campos son verdes, las aliagas en flor... ye un placer pa's uellos mirar-se el país. E se amés encara queda nieu a las puntas, como pasa estianyo, encara millor.
Pos ixo, que me'n voi d'el tema. Dimpués d'un cabo de semana veyendo bufar el cierzo en Zaragoza, per fin el lunes, puent de l'1 de mayo, me'n fue ta Anyisclo, en una especie de ritual primaveral perque i voi totz es anyos. E estes son es resultatos.

 E aora a esperar las floretas, a veyer se foi servir el macro que tiengo a'l pobre abandonato de tot.

Ibón de Plan II

Como no quedé mica contento con el resultato de las fotos de l'altro día de l'Ibón, i torné el lunes de tardes, dimpués de troballar, a las zagueras luces que son las millors pa fer fotos aquí. El ciel yera una miqueta hauto perque no i heba ni una boira, pero ye que en tota la semana no ibe a poder puyar-ie, asinas que cal bailar con la musica que i hai.
En la basa que i hai en el Plan de l'Ibón m'entretenié chugando con las formas d'el chel.

 Unas curiosas formas de sedimento:

 El crocodilo de la Basa :-)

 Zagueras luces e refleixo, topicazo:

 E quan me'n ibe, una foto una miqueta diferent d'este entorno:

Per cierto, que replegué dos bolsas de plastico e un par de calcetins. Ixo aora, quan no ye guaire freqüentato, asinas que no quiero pensar qué i habrá de verano. Quanto més fácil ye acceder ta un puesto, més mierda i trobas. Dimpués se queixarán de las restriccions u prohibicions, pero ye que somos una puta plaga e estricallamos tot per an que pasamos.

Ibón de Plan

Dimpués de quantas semanas pensando en ir-ie sin ir-ie, per fin el sabado pasato (no pas el d'este puent, seno l'anterior) i fue, per lo camín d'el Barranco l'Ibón. No se me fayó guaire larga la puyata perque dica que no arribé ta'l plan, quasi no i heba nieu.
L'ibón yera precioso, pero i heba dos puntos en la mía contra. La un que yera tot plen de galochas, ye el malo d'ir ta un puesto tant conoixito (e fotochenico). L'añtrp yera que las luces de maitins no son las millors.
Asinas que me dediqué a la contemplaciñon de la belleza, a almorzar al sol e decidir que miraré de tornar-ie esta semana de tardes, a veyer se pillo un buen día e luces, encara que veigo la cosa complicata.
Tos deixo un par de fotos d'ixe sabado.

Sant Mitier II

Dimpués de que el domingo se me metés a plever quan puyé ta Samitier, el miércosl de tardes decidié aprofitar que se'n deixaba de plever pa tornar-ie.
I fue tot contento, con unas buenas condicions e con una ideya en la capeza. Me meto a fer fotos a pulso e tant bien, pero quan arriba la hora de plantar el tripode...
"Au, va, no me jodas. Pos án ye la zapata d'el tripode?" Que án yera? Pos en casa, en la compacta, que la hebe emplegata pa fer un par de fotos. #Cagüenmiputacabeza... Pos cosa, a fer el que se pueda, pero cosa d'el que tenebe a la capeza (que no sé pa qué la quiero se no ye pa llevar gorro d'hibierno).
Con tot e con ixo, bel·la coseta salió.