Lierga

He vivito un anyo e poco més debaixo d'era. la he visto quasi totz es días dende fa 14 anyos... e nunca no i hebe puyato. Soi charrando de Penya u Punta Lierga, la estribación més occidental d'el macizo de Cotiella, e inedita oa yo dica este Lunes de Pasqua.
Intuyibe que i habría muit buenas vista, pero quan puyé ta la punta yere rodiato per la boira e a una temperatura per debaixo de 0. Me saqué la mochila, me fotié el forro e saliño el sol. Pensé: "A'l menos no me chelaré mientres almuerzo". Conforme almorzabe a'l sol iban salindo las tucas més altas per dencima de la boira: Treserols, Fulsa, Suelza, Lardana, Espadas, Movisón, Cotiella, Penya Montanyesa... Mesmo per un ratet veyé Tella. Quan arribé ta l'auto, ya yera raso de tot, pero ixo m'obliga a tornar-ie (total, i hai una miqueta més de media hora) a disfrutar de la inmensa envista que ha d'ahaber-ie.
Tos deixo bel·la foto, como siempre.
Luna plena dende Santa Isabel e cillos de Lierga:

 S'ubre un claro en las boiras, se i veye Saravillo, La Comuna, Chuistén, Plan, Plandescún...:

 Vista enta la valle Bielsa: Fulsa e Suelza:

 Treserols e abaixo Tella (quasi 2000 metros de desnivel):

 E, tot baixando, una panoramica:

Punchatz sobre las fotos pa poder veyer-las bien.

La Pella Roda

D'hibierno, quan torno ta casa, siempre pienso que he de fer bel·la foto a Fulsa perque pilla unas colors bien mahas de tardes. Ahier no llevabe intención, pero quan tornabe ta casa dimpués de mirar e no trobar narcisos veyé las uellas de Roda e m'acordé d'esta foto d'un amigo (ya sabe er que le'n copiaré malas que tienga oportunidat) e miré de fer bel·la cosa pareixita, pero integrando paisache. No ye que sía la hostia, pero tampoco no me desagrada. Cómo se nota el rango dinamico de la 6D...

Quan el día ye de No, per demés...

Ahier tenebe quasi tot el día pa yo solo. Hebe deixato a's fillos con es suyos tíos e podebe fer el que querés. El plan (a veyer qué día puedo decir yo ixo que deciban en el Equipo A de "m'encanta que es plans salgan bien") yera ir a mirar orquidias de maitins e puyar ta bell puesto de tardes a veyer se pillabe un buen atardeixer.
De maitins estié mirando per quantos puestos, e no'n trobé, d'orquidias, soque dos especies: la Ophrys fusca y la Sphegodes, que ya tenebe fotografiatas d'altros anyos. No i hai traza de trobar la Apifera, con las ganas que le tiengo... Amés feba una miqueta d'aire, e ixo pa fer macro de flora ye d'el pior que te puede pasar. Bien se vale que la 6D se traga ISO 800 e el que le metas, cosa que con la 40D no podebe fer. Aquí tenetz una muestra, como fondo metié el reflector e lleva un flashazo:

De tardes puyé ta un tozal an que querebe ir feba días: Toronzué. M'heban dito que teneba muit buena envista, e la verdat ye que sí, pero no la que esperabe. Pero ixo rai, malas que pasé d'es 2000 metros d'altitud, prencipió a bufar un aire que m'emplastaba (e con la mochila faré, se fa u no fa, uns 90 kg.). Imposible aguantar en la punta, de l'aire e d'el frío que feba (con la calor que heba feto...). Asinas que quatre fotos mal fetas a pulso e cara abaixo a las quatre suelas, a veyer quí yera el guapo que i aguantaba, amés que habría salito volando tripode, camara e tot el coponario. Pincho fotos testimonials: yo i estié e me clavé 900 metros de desnivel per demés.
Enta Treserols, astí querebe pillar las zagueras luces:

 Enta Guara, buena envista tamién:

 E enta l'oeste, se i veye Yesero, Penya uruel, etc.

E ixo, que quan el día diz que no vas a fer cosa, per més que mires de conseguir bel·la cosa, ye per demés.

Mondoto

Feba días que querebe ir-ie con la camara de fotos a veyer s epillabe un buen atardeixer. Como no me vaga en zagueras de salir ta la montanya, habié d'ir-ie un chueves de tardes, quan tiengo la tarde libre d'obligacions laborals e familiars. Puyar ta Comodoto ye un paseo. Como no recordabe el camín, me die prisa e en una horeta i yera, con lo que me tocó d'esperar un buen rato. La envista ye marabillosa, la pena ye que no tenié luces (no sé, dende las fotos d'este hibierno no'n salgo, no consigo una foto decent...) perque i heba boiras enta l'oeste. A'l menos me fayé una idea e i tornaré l'hibierno que viene, con més nieu,., u antes a veyer se pillo bell atardeixer chulo.
Bel·la foto:

Santa Marina u Nabaín

I hai quantos meses a l'anyo que entro en crisi fotografica.  saber: marzo se fa calor, abril, agosto e setiembre (un quarto de l'anyo, quasi cosa, que no?). E ye perque en marzo e en abril, se fa calor, la nieu ye puerca, e la vida no ha rechitato encara per esta montanya (encara que ye verdat que ya se veye bel·la flor, sobre tot hepaticas). ye quan aprofito pa fer vesitas per la tierra baixa, como l'altro día ta'l Conyo el Mundou este sabado ta'l Pico Nabaín u Santa Marina. Tenebe entendito que yera un mirado excepcional de tot el Pirineu, e ye verdat: dende Penya Uruel e Collarata per l'oeste dica Posets e Espadas per l'Este. Per no charrar de Treserols debant, buena cosa de Vallibió, Sobrarbe, Boltanya, L'Aínsa, Penya Montanyesa, Turbón... Pos ixo, que no desmereix la envista dende la "cumbre", per decir-le de bel·la traza. E pareix un tozal, pero puyando dende Ascaso i hai quasi 900 metros de desnivel positivo per un terreno malismo de garroteras, labaceras, brizonals, buixeras... Cal tener buena orientación se se fa la ruta circular que fayé yo. E tot ixo con un calor de mil demonios e quasi sin augua...
En fin, que en vale la pena de puyar-ie se tiens un día tonto que no sabes qué fer per l'alta montanya.
Tos deixo qualques fotos, no guaires ni talment las millors, perque he mirato de fer una panoramica, l'ordenador quasi se me crema e dimpués m'iba lentismo.
El puent d'el camín que va enta Morillo de Sant Pietro:

Treserols dende la punta:

 Enta Anyisclo:

Sestrals, montanya de Sesa e montanya de Tella (que quantas vegatas he recorrito replegando uellas u puyando ta ixas tucas):

 E ya es dos famosos reloches. El d'Ascaso:

 E el de Santa María d'Ascaso, a'l que no le queda guaire tiempo antes de que s'espalde la casa.

E el domingo es míos fillos se portoren como dos campeons, sobre tot Zilia, que fue caminando dende la presa de Pineta dica Salinas per lo camín d'el Canal (16 km. pa una ninna de 8 anyos). Guillén tiene menos merito, perque fayó 14 km. a las costiellas de su pai...
E ixo ye tot per aora.

Qüestión de suerte

E ixo, ahier mala: ni grullas ni luces. Mediano.

Morcat e Barranco Sieste

El domingo de maitins totz es míos plans se'n fueren a escampar la boira per culpa de la plevia, fina pero contina, que cayeba en Bielsa. Solo de pensar en ir foniando per nieu blanda e farta d'augua feba que se me'n isen las ganas, pero como pa yo salir ta la montanya ye una miqueta terapeutico e perque, dende las 4 que m'hebe despierto dica las 7 que me'n fue, pareixebe un onso zarrato, decidié de hopar enta la tierra baixa a veyer se epr astí no pleveba. E pensé en un puesto t'an que feba mutos anyos que no ibe: O Confesionario (tamién conoixito como O Conyo d'o Mundo modernament). Pero ya aprofité pa visitar o lugar abandonato de Morcat, perque siempre hebe visto la torre de la suya ilesia e un companyer de treballo m'heba recomendato que bi is feba un par de días.
Asinas que astí me planté, en Morcat, con unas buenas envistas enta tot el Pirineu:

 D'aquí baixé enta o Barranco de Sieste pa baixar enta las gorgas d'O Confesionario. El puesto ye muit chulo, pero se bel·laún quiere ir-ie, que sepa que la baixata dende aquí no ye pa chent con vertigo ni pa personas poco fetas a mover-se per las pinganetas; en ixe caso ye millor puyar barranco-barranco. Aquí tenetz qualque foto d'ixe puesto e comprenderetz per qué le dicen como le dicen.

Como ye muit visto, amés de las envistas chenerals, miré de trobar bell detalle, incluyindo-me pa mirar de dimensionar, no pas per guapo (per ixo siempre miro de no salir de caras).
Unas texturas que me fayoren goyo:

 Chugando con la velocidat d'obturación me cuacó l'efecto:

 

Esto de controlar la camara con el móbil te permite no tener que correr 10 segundos (u nian mirar d'arribar-ie). Dimensionando:

 E con luces parasitas d'el sol que ya i entraba:

El que pasa ye que quan consigues fotos que te satisfán, como me pasaba con bel·launa d'Ordesa e de Pineta d'este hibierno, e metes el regle muit alto, las fotos qu efas te pareixen una mierda.