Per Anyisclo

Puent d'el Pilar, sin marchar ta garra cabo, e mirando de trobar l'agüerro estes días. Ahier fue a veyer se ya yera arribato enta Anyisclo. Como totz es anyos, a las 6 e poco salgo de l'aparcamiento de Sant Úrbez, enchego el frontal e entalto. Encara que fa més d'un mes que no camino en condicions, me trobo bien, encara que la bota dreta me fa una miqueta de rozadura en el calcanyo (a quí se le ocurre estrenar botas con ixa puyata? Pos a yo). Mientres puyo, con la escasa luz d'el frontal, es temors de totz es anyos me vienen ta la capeza: será muit luego? será encara verde? Amés, siento el río gramar abaixo perque el viernes no fayó soque plever, e con muta augua las posibilidatz se reducen, e muto.
Quan arribo ta Selva Plana, mato el frontal, ya se i prencipia a veyer. Per suerte, mientres abanzo enta A Ripareta, veigo es faus que van amarilleando; a'l menos no i soi puyato per demés. En O Puent ya veigo que baixa demasiata augua, qué le imos a fer. En ixe tramo de río, an que l'augua gosa baixar azul turquesa, el río baixa gran e no i foi garra foto que mereixca la pena; amés, s'han caito qualques faus que cruzan el cauce e que el fan una miqueta més fiero (siempre seguntes el mío escaso gusto). Foi qualque foto e endrezo enta el Churro d'alto, tampoco no foi garra foto en ixa gorga tant pincha con bolos debaixo. "Qué foi?"m me digo, "Me'n torno ta casa?". Decido de puyar una miqueta més, pos siempre me quedo en ixe puesto e encara ye luego. Veigo que soi perdendo-me mutos puestos perque siempre miro de no tornar guaire tarde ta casa. bell día podré dedicar-le tot el día e disfrutaré més.
A veyer qué tos pareixen, soi trastiando con una versión nueva de Photoshop e no sé cómo me van quedando, se queretz deixar la vuestra opinión, siempre será bienvenita.

 A partir d'aquí la zona que nunca no hebe visto d'agüerro:

E hue soi ito ta la Francia, pero ixo ye unaltra entrata.

Un trocet d'agüerro

El domingo, con pocas ganas d'andar dimpués d'estar en la feria tot el día anterior, me dio la idea d'ir ta l'altro coté per una foto que m'heban ninviato per whatsapp con un fau con una miqueta de colorito. Asinas que fue ta un puesto a pocos kilometros de la güega que tenebe ya fichato. L'agüerro prencipiaba a asomar la pateta, asinas que la semana que viene caldrá ir-ie bell rato, quan ya sía més abanzato.

 E tornando ya enta casa, paré en la Chapelle des Templaires (qué belsetán més rar charran esta chent), que siempre hebe dito de parar-ie e nunca el hebe feto, encara que el ciel yera malismo:

Siempre gosamos comparar-nos con es altros países europeos per ixo de que son més abanzatos que nusaltros, etc. Tanta mierda como he visto ficando-me per puestos per an que no i hai camins no'n hebe visto nunca tanta per lo nuestro Pirineu, e no me soi referindo a panyuelos de papel de la chent que caga en el mont, soi charrando de botellas de cristal, de plastico, trozos de tela, latas... que trobas per tot arreu, e ixo que ye un Parque Nacional...
Ya pa rematar, tos recuerdo que se punchatz dencima de las fotos se veyen més grans e con fondo negro, una miqueta ganan.

Lalarri, vuelta la burra a las cols

El sabado de maitins, como siempre con no guaire tiempo perque hebe de baixar ta Bielsa a la feria ganadera, me lancé a recorrer una miqueta més d'el río Lalarri, perqu ei hai cados que no se veyen dende es camins, e amés son es que més goyo me fan, perque es podré fotografiar millor u pior, pero no son guaire conoixitos ni vistos. I tornaré con l'agüerro, pero de momento me quito el "mono" e contino conoixendo la camara.

 No podié resistir-me a estes crocus:

El domingo trobé un trocet d'agüerro, pero ixo ye unaltra historia.

Lalarri, unaltra vegata

Contino fendo prebas, e de vez tafaniando a veyer cómo abanza l'agüerro.
Me fa muto goyo esta camara, a veyer se poquet a poquet voi fendo-me-ie.

6D

Prencipio a fer prebas con la nueva camara, la canon 6D que sustituyirá a la vielleta 40D (que mantiengo, perque no la puedo vender perque ya daba problemas e perque el tiengo muto carinyo, ya que con era aprendié lo poco que sé de fer fotos). Pos ixo, que voi poquet a poquet (sobre tot perque no me vaga) fendo-me a era e miro de pillar-le el tino. Encara que es conceptos no cambian, solo faltaría ixo he he, sí que cambian es botons e bell aspecto de configuración, asinas que paciencia. Ixo sí, el rango dinamico e la velocidat ixo d'esta camara son impresionants, ya no ttiengo desincusas pa decir que no he feto una u altra foto per limitacions tecnicas. Aora la responsabilidat será unicament d'el que ye dezaga de la camara: un servidor.
Ahier de tardes marché a fer-le una gollateta a Pineta, pa veyer cómo va abanzando l'agüerro (estoi que estianyo viene antes), e como siempre que no me vaga de fer guaires cosas, acudié enta la Grota a fer las primeras prebas. Aquí tenetz es resultatos, ya sé que son mutos, pero tiengo mutas dubdas.
Aquí debaixo de Bielsa, ya feba días que veyebe esta nuquera amarilla con un rebosadero de una canal, aprofitando que sobreixeba l'augua:

 Aquí ya en La Grota, un puesto fetiche pa yo e que le ha feto muto goyo a tota la chent que i he llevato:

 Tot baixando, a l'altura d'el Plan, el ciel se metió una miqueta de colors, pero tampoco no fue pa tirar codetes. Y aveyetz que per bell árbol i hai colorins:

A veyer se m'instalo el Photoshop 6, perque la mía versión ye viella e no leye es RAWs de la 6D, e ye un conyazo pa poder ubrir-los, cal dar mutas vueltas.

Tot contina

Tot contina. La vida, como es ríos, contina enta debant sin quasi aturar-se . Soi estato uns días desconectato. Hue soi tornato a salir un ratet, ta Pineta, e m'ha acompanyato el mío fillo.
Dimpués de tot, he d'ir prebando, mirando cómo viene l'agüerro e fendo-me a la camara nueva.
La foto que més goyo m'ha feto ye esta, perque como ixe barranco que nunca no s'ixeca, las nuestras vidas tienen continidat en es nuestros descendients:

A mi pai, in memoriam

Fa uns días nos deixó sin esperar-lo. Como no soi creyent, pienso que la chent que se'n va vive en el recuerdo de las personas. Per ixo, e como deciba Jorge Manrique: "partid con buena esperança,
qu'estotra vida tercera / ganaréis". Nunca t'olvidaremos.