Irati

No, que no ye Irati, que ye una chicota broma con es dos fotografos que m'acompanyoren t'astí (aquí e aquí podetz veyer fotos suyas e deleitar-tos la vista). Sé que les fayó muto goyo el puesto e que le sabrán quitar més suco que yo, humilde aficionatet. Son fotos d'el chueves (el viernes tornemos a salir chuntos, pero ixo será pa unaltro día). A l'agüerro ya le queda poquetz días. El sabado que viene, se encara en queda brenca e l'orache me deixa, miraré de salir a despedir-me d'er dica l'anyo que viene. Qué poco dura el buen, pero talment per ixo el aprecie més.

Pineta II. Agüerro-Hibierno

El promeso ye deuda, e aquí van las fotos d'el domingo de tardes. A veyer se puedo fer qualque cosa este puent.
Querebe fer es churros de Lalarri,  pero como ya contabe e m'heban dito dos fotografos (Jep Flaqué e Esteve Garriga) con es que me prenié bell hordio el viernes de tardes, i baixaba demasiata augua. Con tot e con ixo, sabendo el frío que heba feto e que ya heban pasato dos días dende que heba plevito, m'i amané. Per demés, no puyo soque esta pa que tos fayatz una ideya. No ye que no se podés peinar l'augua, ye que se la exposición yera larga, saliba un bloque blanco.

 Como no se podeba fer cosa y no'n saldrí, mientres baixabe me trobé con dos potrecons (Amanita muscaria, per estar més preciso) que fueren es que me dioren la ideya de la mezcla d'agüerro e d'hibierno per la capucheta de nieu que teneban en la punta.

 Sabebe que no podebe cruzar el río perque ha tornato a fer de las suyas e no yere dispuesto a escalzar-me (calient que baixaba l'augua e una temperatura ideyal pa ficar-ie es pietz, como podretz contar), me'n puyé unaltra vegata ta la pista per lo camín viello. Astí m'asomé a veyer el río e no que yera medio chelato...

 E ya, per fin, quan baixabe ta casa ya lusquiando, la luna e la zaguer luz d'el día plena iluminaba Suelza e Fuesa, e no m'aducié d'aturar en la presa pa fer esta foto.

E en puyo tantas perque no sé fer tría, es fotografos buens en trigan una e las altras se las quedan :-)
A yo personalment m'encantan la cinquena e la zaguera, no sé qué en pensaretz vusaltros.

Buixaruelo

Per fin este cabo de semana he puesto dedicar-le bell ratet a l'agüerro. El sabado estié en Buixaruelo, como l'anyo pasato, e encara que estoi que las fotos de l'anyo pasato son millors (sobre tot perque l'orache acompanyó més e no baixaba tanta augua per l'Ara), la visita valió la pena. No ibe solo e no podié fer el chizard tanto como quan voi en mala companyía (u sía, con yo mismo), pero fue un maitín bien majo fendo fotos e estroliquiando.

Ahier fue ta Pineta, e ibi'era l'agüerro con l'hibierno, pero ixo el deixo pa unaltro día.

Pineta

Pareix que la diosa Fortuna ye decidita a quedar-se uns días con nusaltros vestita de royo e amarillo. No sé quánto durará, perque a partir d'el sabado dan un aire de puerto fuerte e chelador que talment no deixe ni una fuella en es árbols.
Esta tarde he visto que yeran las boiras baixas, e como no pleveba, me'n soi puyato un ratet a veyer Pineta vestita de gala. Yera precioso, como soi de pocas parolas, pocas me'n viene ta la capeza pa poder describir-lo: augua, colors e boiras. Un conchunto espectacular. Diz que una imachen més que mil parolas, e las que voi a meter-ne no fan chusticia. Asinas que ya ye prou d'estraliar.

E estas son d'ahier, quan no pleveba, que marché con la filla a plegar castanyas no no m'adubié a llevar-me la camara.

Una vuelteta per Anyisclo

Como tiengo mono de fabolars coloritos, m'arrisgué a puyar t'Anyisclo el sabado. L'anyo pasato i fue tal día como hue e me trobé con el fabolar d'A Ripareta en tot el suyo esplendor. Ya contabe con que estianyo veniba més rezagato (e ixo que las condicions d'augua e temperatura son pareixitas a la de l'anyo pasato), pero la cosa yera salir e mirar de trobar a la diosa Fortuna vestita de royo e amarillo. Ixa diosa ha de campar per altros puestos, perque en Anyisclo no ibi'era (ni en Pineta, t'an que puyé el viernes con la familia a veyer cómo iban es faus d'aquí). Pero rai, despierta-te a las 5 d'el maitín, puya con el frontal dica Selva Plana e a veyer se tiens suerte con las primeras luces. Pos no n'i habió, de suerte...
La parte baixa d'Anyisclo yera verde como una ensalada, e en la d'alto se veyeba bell fau abanzato, pero le falta encara prou. A veyer se con este orache prencipeya a cambiar una miqueta la cosa. La pena ye que el fin de semana que viene no podré ir ta'l mont perque he de salir de viache. A veyer se aguanta dica el zaguer cabo de semana d'octubre e el primer de noviembre.
Encara que no trobé el que mirabe, qualque foto i fayé, pero mientres que l'anyo pasato baixé bien contento, estianyo no yere brenca satisfeto.

Per cierto, esta ye la entrata numero 300, quí me'l iba a decir a yo...

Unaltra vegata ta Ordesa

Quasi un mes sin escribir cosa. E no ye que no haya salito ta la montanya (un sabado fue dende Bielsa ta Tella per Portiello e torné ta Bielsa per lo camín d'el canal; e a l'altro me'n fue dende Revilla ta'l Puent d'os Mallos, baixando ta's Vivers d'o Campillón -u Surgencia de Escuaín´- e río-río dica A Fraga, an que sale el camín que torna ta Revilla), pero no consiguié fotos presentables. Es dos zaguers cabo de semana no podié salir per problemas tecnicos en el mío auto.
Pero el sabado me retrobé con la fotografía, fue a fer fotos en exclusiva e se m'acompanyaba l'horario a fer una miqueta de montanya. Asinas, despertando-me a las 5, marché enta Ordesa a veyer cómo iba l'agüerro per ixa latitutz, puyando per lo camín d'es dominguers e tornando per la Faixa Pelai. El camín dica Soaso quasi totz el conoixeretz, perque bien mereix una visita encara que sía plen de dominguers, pero la Faixa de Pelai ye preciosa (no la conoixebe) e tiene unas anvistas excepcionals. Se a yo me fayó muto goyo, la chent que no sía tant feta a veyer estas montanyas han de tener un orgasmo visual. Muit recomendable ixa cursa. Se puede fer en es dos sentitos, pero se no tenetz mal es chenullos yo recomiendo fer-lo en el sentito que siguié yo, perque vas ganando altura china-chana entretenendo-te con es churros que fa l'Arazas e no te clavas es 600 metros de puyatón dende la Pradera dica Calcilarruego, an que prencipia la Faixa. Pero vusaltros mismos.
¿E l'agüerro? Pos ya prencipia a asomar la pateta, sobre tot per la man pacina. M'esperan uns cabos de semana, como totz es anyos, d'ir encorrendo l'agüerro per es fabars que conoixco, e se tienen ríos e barrancos millor :-)
Aquí tos deixo quantas fotos, diez pa estar exactos, a veyer se tos animatz. En uns días fará goyo de veyer es fabolars con las colors de l'agüerro.
O Chordonal. Yeran arribando las primeras luces e precisabe una larga exposición. Amés feba aire e per ixo salen ixes camals movitos.

 L'Estrcho dende el río:

La misma dende alto, no apto pa personas con vertigo:

 Chusto antes de las Gradas:

 Las archiconoixitas Gradas:

 E dencima de las Gradas, indo ya enta la "Cola de Caballo"

 Aquí la tenetz:

 Anvistas dende la faixa de Pelai:

Faixa de las Flors

Se el que le metió el nombre de las flors i hes ito a primers de septiembre, el suyo nombre sería Feixa d'es cardos, que suena muto menos lirico, pero yera la flor més abundant en el primer día de septiembre.
Pos ixo, que el sabado, de buen maitín, me'n fue ta Ordesa a fer la Feixa de las Flors (encara que el suyo nombre tradicional seguntes el mapa d'el Parque ye Faixeta de Coma Barrau, pero pocos el conoixen asinas). Feba tiempo que querebe fer-la, perque d'el sector Ordesa no hebe feto soque la tipica cursa per lo fondo de la valle dica la conoixita Coda de Caballo, e siempre con nieu.
 Me desperté a las quatre e media d'el maitín pa poder pillar el primer autobús que sale de Torla a las 6 e las 6:15 prencipiabe a caminar dende casa Oliván. Con la lampa frontal e la luna plena asomando entre es árbols, fue fendo la puyata veyendo el Mallo. Dimpués m'esbarré pa pasar per la Faixeta pa arribar ya ta'l planerón -reino d'el karst- que da acceso a la Faixa de las Flors, d'es Cardos u de Coma Barrau. Quan la veyes dende el principio te dices: "¿pero per esta faixanga se i puede pasar?, ¿m'enfaixonaré?". Se veye muit estreta, pero una vegata que i yes en dentro, no'n ye tanto e no se corre garra risque (ixo sí, un trepuzón enta difuera e te vaga de cagar-te en tot quantas vegatas dica que arribas t'abaixo). Malas que i entré me trobé con un precioso pintaparetz, pero como el maximo de mm. que tiengo ye un 100, se me quedó a tomar per..., pero me deleité un ratet la gollata mirando-me-lo cómo comeba per las crepas de las rocas (prou esbrozolatas, per cierto, que no febe soque mirar-me entalto pa que no me'n cayés garra). Tamién i heba prou flor de nieu ya una miqueta pasata, pero no les fayé garra foto perque ya yeran pasatas e, sobre tot, perque feba un aire furacanato que quasi me tira largo en salir d'un sarrato. N'i heba mutas, pero n'he visto tantas u més en altras zonas d'el Parque, asinas que no será pa tanto he he. Antes d'arribar-ie hebe visto una pila de chizartz, con crapitos de l'anyo, d'el que m'alegré prou.
Adinas que china-chana fue recorrendo la faixa e quan salié veyé una envista de Treserols e la Breca que no coinoixebe, lastima de l'aire e d'el frío que feba (mismo i heba chel en bel·la fontaneta) que no me deixó nian poder plantar el tripode (se quasi me vulca a yo, ya podetz contar ta ón m'habría ninviato la camara e el tripode). E per fin arribé ta las temitas Clavillas de Cotatuera. Qué collons teneba el ferrer de Torla, pa que dimpués charren d'el de Sant Felices. Yo llevabe l'arnés con un par de mosquetons pa asegurar-me en la sirga, e con tot e con ixo ibe espantato (se me quedaba encara garra dubda, ya no'm tiengo: la escalata no ye lo mío), como pa pasar sin asegurar-me, cuento que m'habrí dato la vuelta, perque a yo ixo d'estar sin posar es dos pietz en tierra firme no me va mica.
E ya cara abaixo tranquilament con la satisfacción d'haber puesto pasar-las (cuento que i tornaré, e tamién l'arnés :-D).
Pos ixo, una buena cursa se no tenetz miedo a las caitas verticals.
Luna plena (segunda d'el mes, e la silueta d'el Tozal d'el Mallo):

 Camín de la Faixa:

 Un testimonio d'el Pintapartez:

 Envista enta Buixaruelo:

 Ordesa:

 Enta Treserols:

La Breca:

P.S. Prou que llevabe la camiseta verde d'Educación, pero debaixo d'un polo e d'el forro :-)
E aquí el track: