E ye que no me vaga

Pos ixo, que no me vaga. Tiengo estas fotos fetas dende el sabado de buen maitín, pero entre unas cosas e altras (sobre tot el treballo) no m'ha vagato de puyar-las. Como totz es anyos per ixas envueltas (sobre el 10 de chunio), puyo a veyer cómo van las flors de lis u azucenas d'es Pirineus.No'n trobé so que dos ubiertas, pero este proximo sabado me fartaré de fer-les fotos perque en ixa zona n'i hai a embute. Pero la mía ideya yera fer qualque foto, mirar cómo iba la flora e fer la zaguera visita a las Cypripedium. E cosa rara, me vagó de fer tot ixo e tornar ta casa antes de las 11 d'el maitín.
E ixo, que aquí tos deixo qualque muestra.
La flor de lis:

 Dos cuquetas que i heba per astí buquindo ya de buen maitín:

 Un detalle d'una Plathantera bifolia con la banyadura:

 Una Dactyloriza, no sé quál:

 Las Cypris, que a estas no yere ito a veyer-las encara:

 E unaltra que me pienso que ye una orquidia, pero no sé quál. Ye muit chiquirrina, pero espero que bell experto nos dé luz:

Au, el sabado espero tornar-ie.

Sin reblar

Marea verde d'Aragón

Cypripedium calceolus 2012 II

Ya prencipian a estar pasatas (no tiengo aquí un emoticono d'ixes pa meter-ne un que plora). Ahier fue a veyer-las con la filla (dende que tiene 6 meses la i he llevata, menos l'anyo pasato) e ya n'i hai que prencipian a estar pochetas. No sé se podré tornar-ie, perque encara en queda bel·la mata pincha. Totz es anyos las visito qualques vegatas, e estianyo tamién, pero les he puesto dedicar menos tiempo. La suya ausencia fa que me centre més en altras especies que son prencipiando a floreixer (ya falta poco pa l'azucena d'es Pirineus, ya he visto flor de nieu e, tamién, altras orquidias que son salindo). Asinas que espero tener un més de chunio entretenito se me vaga d'ir fendo qualque cosa.

Tos deixo con las que, cuento, son las zagueras fotos de la Cypripedium d'estianyo 2012. Salut.

Cypripedium calceolus 2012

Esto maitín no m'he puesto resistir e soi tornato a veyer estas preciosidatz. A veyer se me vaga e esta semana puedo ir a fer-les qualques visitas més.
Pocas parolas cal pa charrar d'eras.

Per fin flors II

Encara que a bell valencià le parexica rar, finals de mayo e primer de chunio ye quan aquí prencipeya a salir la flora de la buena: orquidias, liliáceas, orella d'onso, etc. E ixo que estianyo encara en he visto pocas d'orquidias. Pero n'i hai unas que no fallan, e espero que no el fayan nunca: la Cypripedium calceolus. Ya llevo uns días que voi a mirar-me-las. El miércols i fue e veyé que le faltaba uns días, pero s'han llevato un buen arreón con estas calors e pareix que tienen prisa. Hue no'n he visto soque una medio ubierta, pero m'espera uns días d'ir-ie e disfrutar como un latón en un barducal. Tos amuestro las primers fotos d'estianyo, pero ya digo que i tornaré :-)
Baixando ya enta casa he parato un inte en El Plan, perque en i sale d'altra raza, e astí ibi'yera, una Dactyloriza, pero no sé se ye la majalis u la elata, encara que estoi que ye esta zaguera per es puntetz de las fuellas basals.

 M'espera un mes que malas que tienga un ratet (se el treballo e es fillos me dan el nihil obstat) habré a salir a chugar con el macro.

Per fin flors

Finals de mayo e primers de chunio son meses ideyals pa chugar con el macro, perque ye quan sale la flora que tenemos per aquí, a'l menos la més espectacular.
El chueves, mientres apaseyabe a'l borche, veyé unas Orchis ustulata en un prato (el mismo an que fa dos semanas pillé una zarpateta de muixardinas pa poder fer-me una tortilleta). Torné ta casa a pillar es trastes de fotografiar e marché a fer-les quantas fotos antes que cayés la tronata que nos amenizó la nuet. Ya aprofité pa "afotar" unas campanetas, que ya feba días que hebe visto pero a las que no hebe puesto llevar-me ta casa en forma de bytes. E ye que voi fatal de tiempo. Per exemplo, el sabado pasato (12 de mayo) me'n puyé per fin ta la Penya Montanyesa pero fayé pocas fotos perque la luz yera malisma. E no hebe descargato las fotos dica hue, ueito días dimpués.
E ya ye prou de fer la estrolicadera, tos deixo con las fotos de la ustulata.

Aquí tenetz, per se queretz veyer-lo, el track de la Penya:

Fornos

El domingo m'escapé un ratet a caminar, e como que no tenebe guaire tiempo, decidié d'ir ta Fornos perque ye un ratet d'ir-ie. Ademés, dimpués de tot el que ha plevito estes días ta zaga (mismo hue ha plevito una brinquerrina), contabe que baixaría buen mangazo d'augua. E asinas yera, tanto que no podié cruzar el barrango (me foi mayor, e ya no m'atrivo a fer cosas que fa uns anyos habrí feto he he) pa veyer bien O Chorro Fornos. Mismo veyé que i heba unaltro frato en l'altra man d'el río per an que cayeba augua, cosa que nunca no hebe visto en las mías anteriors visitas a ixe puesto.
E como esta semana no m'ha vagato de fer cosa, dica hue no he puesto descargar las fotos pa veyer-las bien. Asinas que aquí las tenetz. Como captatio benevolentiae, he de decir que i heba muta augua e poca luz, e como soi un zote con el procesato sé que podrí deixar buenas fotos con l'ordenador (chuntando dos fotos, per exemplo), pero las deixo quasi quasi tarqual han salito de la camara.
Las fuents de Fornos:

 Una anvista cheneral d'el caudal d'O Chorro Fornos:

 Bell detalle:

 E aquí se veye una miqueta O Chorro: