Sarra Guara

Totz es días, quan torno de troballar, paso per lo Puerto de Foradada. Fa días que tornando una tarde viyé cómo se meteba el sol, e i heba una luz buenisma dencima de la Sarra Guara, a la que aduyaba unas boira que refleixaban la luz. Como gosa pasar a menuto, ixe día no llevabe la camara. Hue sí que la llevabe, e i soi pasato a ixa hora machica quan s'amaga el sol. Tos deixo un par de muestras. Son fetas con el tele largo, d'astí que no tiengan guaire calidat (con l'angular buen se me quedaba muto leixos), pero me fa muto goyo ixa luz. No ye la que i heba, pero enganyo a'l fotometro de la camara medindo en o puesto més luminoso, asinas s'oscureix tot el de demés (esto tos lo cuento per si nunca tos interesás a bel un). Salut.
Esta ye tirando de tele:

E esta a 70 mm (equivalent a uns 110 mm, pa que veigatz que queda pro leixos):

Dende Cherbe

Esto maitín, quan ibe a troballar, he visto esta anvista dende la recta de Banastón, e m'he esbarrato cara Cherbe pa fer-le una foto. Ixes tozals que se veyen a'l fundo son es de dencima de Sant Mitier, e dezaga ib'ye O Entremont, un puesto majismo. A veyer se tos fa goyo (ye feta con un filtro degradato neutro u qualque cosa pareixita).
Aora tos i foto l'orichinal, d'an que he sacato ixe recorte, e una altra més clareta, pa que me diciatz quál tos fa més goyo.
Orichinal:
Un poquet més clareta:
Au, salut, que no me vaga de fer quasi cosa.

Una gambada per la val de Chistau

Es zaguers días de las mías vacacions, venió un amigo -qui ye un grand fotografo- ta Sant Chuan de Plan, an que i va a menuto. Un día saliemos a fer una corsa per la Val de Chistau con las raquetas, dende Sant Chuan dica La Engrota e baixar per Sant Mamés, asinas fenos unas fotetas e charranos. No ye que el día fues la hostia pa fer fotos, i heba mutas boiras e mala luz, pero a'l menos se'n heba deixato de plever. Como la luz yera tant malisma, he desaturato qualquesfotos pa deixar-las en blanco e negro, asinas les dabe un altro aire, talment més retro.
Ye la primer entrata de l'anyada, pero pa qué tos voi a deseyar feliz anyo nuevo se, per fin, ya han pasato ixes días d'excesos consumistas e de farteras.
Las desaturatas son estas tres:

Cardencha

Baranas


Cabana

Ésta no'n ye, pero como se en fues, perque i heba una boira que deixaba entreveyer es pins d'un prato:

Uembras en la boira

E esta no la desaturo perque me faría goyo que podésetz veyer l'anvista que i heba, enn'o centro de la foto se i vei Plan d'Escún. Ye feta con el material de l'amigo, pero la suya ha quedato millor (se nunca me lei e me da permiso pa meter el enlaz el faré):

Boiras e boira

¿Chinchipera?

En castellano ye mito, aquí en Bielsa n'i hai pero no conoixco el nombre en belsetán, asinas que he recurrito a'l libro de Rafel Vidaller e asinas ye como le dicen per ixe país de la Vall de Benás. Yo conoixebe la voz chinchipera pa referir-se a la familia d'es carboneros (en castellano). Bueno, caldrá aclarir ixe tema...
Las fotos no son fetas en Bielsa, ye feta en un lugar cerqueta de Zaragoza, aón he pasato estes días de Navidat. Las he fetas con l'obchectivo d'un amigo e en el hide d'un altro. Que rematetz e prencipietz bien l'anyo que se'n va e el que viene, a veyer se el 2010 ye l'anyo de l'aplicación de la lei de luengas. Salut.

Ayer de nuet dende Espierba

Ayer yere troballando a l'ordenador e me dició la muller: "i hai una pila d'estrela·las, se veyen mismo dende la finestra la cocina".
Pro a fes que yo ixo ya el sabebe, pa ixo hebe estato la nuet anterior garimboliando per Sobrarbe fendo fotos. No tenebe previsto salir, pero como me dició ixo m'animó a salir un ratet cara Espierba. No i estié guaire rato perque feba un frío que se chelaban las parolas, no fayé més de 20 fotos e de poca duración. Ixa yera la mía intención, fer fotos con alta sensibilidat e de poco tiempo con el 50 mm 1'8. Ixe 50 mm se convierte en la mía camara en un 80 mm, asinas que poco angular ye (per no decir mica).
Pero ixo rai. Ayer pensabe en lo bien que s'está de nuet, en medio el monte, sentindo cantar es craberetz, sentir cómo se mueven las buixeras perque i pasa animals, escutar cómo cruix la hierba chelata cuan la pisas... Ixo ye muto bien, pero poco rato, perque torné ta l'auto con las mans encheberditas de frío he he
Tos deixo tres fotos d'ayer de nuet. Totz es fins de semana que pueda iré salindo pa prebar con diferents lunas, e qué conyo, perque m'estimo més ixo que estar de bars.
La primera ye mirando enta el sudoeste (el digo perque sé que bel·laún que se mira este blog le da importancia a estas cuestions tecnicas), se i vei -per decir bel·la cosa- el macizo de Treserols, més concretament la Punta las Solas, el pico Anyisclo e el Perdido:
Esta ye endrezata enta el sur, se i vei la carrera Sant Chaime:
E esta ye enta el Mallo Grand, como no i hai guaire angular con el 50 mm, pos no puede salir grand cosa:

Torno a fer fotos

Per fin, dimpués d'un mes y medio con la camara arreplegando polvo, ayer de nuet salié a fer fotos una altra vegata. Como ya somos en luna nueva i heba un ciel que feba goyo de veyer-lo, con la Carrera Sant Chaime preciosa. Encara que i hai poqueta chent per estas montanyas, i hai contaminación luminica, pero mica comparable a la que n'i hai en las ciudatz.
La mía intención yera mirar de fer una foto circumpolar arredol de la estrel·la polar, pero el mío temporizador chinorri no se lleva guaire bien con la mía camara, ademés que no debié de programar-lo bien. Asinas que desisitié e pillé el 50mm f/1'8 per la suya luminosidat, pa sacar buena cosa d'estrelas. Viyendo las fotos a traviés de la pantalleta de la camara pareixeban bien, pero hue en casa no m'han feto guaire goyo, i hai muto ruido e el foco no ye guaire bien. De totas trazas, reducindo-las no se veyen tant mal, per ixo m'animo a puyar-las. A veyer cuán aprendo a fer fotos nocturnas como cal
Bueno, per mirar de conseguir-las que no quede. A'l menos se i vei fauna, perque tornando enta casa viyé un corzo, dos liepres, un teixón e ya a 100 metros de casa un ciervo que cuasi me'l meto en drento el coche.

Esta ye feta dende el mirador enta Anisclo que i hai pasato Buerba, se i vei La Punta las Solas con nieu:
Esta ye feta dende el mismo puesto enta la Penya Montanyesa, se i apreceya pro bien la contaminación luminica de A Espunya e es suyos adosatos:
La Carrera Sant Chaime:
Esta la fayé baixando per lo desfiladero de As Cambras (u Anyisclo baixo), iluminé una miqueta l'árbol con el frontal:
E esta ye feta pensando en una canción de la Ronda de Boltanya que diz, charrando d'es lugars de Sobrarbe, "luciérnaga entre montañas / no te dejes apagar / si los hombres permanecen / los dioses ya volverán":
P. S. Pareix que en poquetz días tendremos, 30 anyadas tarde, una lei de luengas d'Aragón. M'he abstenito d'escribir sobre el tema viyendo la cantidat de rebuznos que se sueltan en foros como el d'el Periodico de Aragón, que ye el que goso leyer per internet. A veyer en qué para tot.

De cul

Voi de cul, no adubo a fer cosa en el blog, e el poco tiempo libre que tiengo el adedico a la familia. Entre el troballo nuevo e que no me vaga de fer fotos no foi res. Cuan le pille la maranya a la nueva fayena (ya le'n voi pillando, pero estes días son de muto quefer) e pueda tornar a fer bel·la foto i tornaré. No tos pensetz que he abandonato el blog (a'l menos per ahora), encara que sía pa decir-tos adiós tos enteraretz.