Pico Moros (Balaitous)

Unaltra nuet en altura. Esta vegata acompanyato de la mía amiga SúperBea, que s'apunta a unbombardeo e con qui tiens risas aseguratas. A bveyer quán en femos unaltra, Bea ;-) Pico Moros u Balaitous, pico a'l que le tenebe mutas ganas dende feba anyos e que, per un au altra cosa, siempre deixabe pa més ta debant. Aquí tenetz la serie, ixe pico tiene unas envistas brutals.

Tardadas

Pos ixo, tardes que no sabes qué fer, e sale a veyer se i hai suerte con las boiras e las luces...

Treserols II

La tarde no fue pa tirar codetes, pero el maitín (que quasi me pierdo perque me fotié media nuet despierto e blinqué d'el saco a las quatre suelas) fue quasi quasi immillorable, no adubibe a fer fotos.

Treserols I

Como ya prencipia a estar costumbre, pa cabo d'agosto u primers de setiembre puyo a fer nuet ta Treserols. Ye una montanya con la que tiengo una relación ambivalent. Per una man, m'encanta puyar-ie per Pineta. Me pareix una puyata dura e salvache. Per altra man, ye plena de chent e per cada vegata que i voi me i trobo més chent dormindo-ie. Esta vegata quasi no i puedo dormir, bien se vale que me mire un cadet en la punta. En fin, que caldrá mirar montanyas con menos nombre pa poder estar tranquilo.
Hue deixo las fotos d'el primer día. Pa unaltra entrata deixo las de l'amaneixer, que me fan més goyo. Encara n'i hai mutas sin editar, cuento que pasarán a esperar bel·la revisión dentro de muto tiempo.
Canyón d'Anyisclo una mica antes de la Punta de ras Solas.

 Anyisclo dende la Punta Treserols:

 Contrastes de luz:

 Un montanyer que i arribó a zaguera hora:

Morrión d'Arrablo u Torre de Góriz recibindo es zaguers rayos de sol:

Perdiguero

Una vegata que ya tenebe tot apanyato e hebe visto que el chenullo me respondeba bienm, deixé de dormir a orillas d'ibons ap prencipiar a fer bivacs en picos. El primer decidié que fues un inedito pa yo: El Perdiguero, a la Vall de Benás. Un día de muto aire e boiras que m'impidioren de veyer l'Aneto e Llardana, pero que me deixoren una tardada brutal. Pasé frío de nuet, pero soportable.

Marmorés

Ya morando puyatas més fuertes dimpués de veyer que el chenullo iba respondendo e que ibe ganando forma dimpués d'ixe mes de parón forzoso. Me'n puyé a dormir ta Marmorés, con muit buen ritmo de puyata (una mica menos de tres horas). Quan i arribé feba aire de puerto y saliba la gabacha que pareixeba una chaminera. Per suerte, quan arribé a orillas de l'ibón se metió una luz d'ocaso preciosa queme fayó correr pa trobar un buen enquadre. Dimpués, como heba dito el pediatra que no ye meteorologo pero quasi siempre las clava, s'aturó l'aire, se despasó e salié d'el saco a fer nocturnas. Tot e que me i hebe puyato es crampons, no tenié ganas de foter-me un banyo chelato e no m'atrivié a cruzar la conchesta de debaixo de Tucarroya.