Turbón

Feba un mes, se fa u no fa, que llevabe planiando con un companyer de treballo la puyata ta este pico que pa's es dos yera inedito. Entre unas cosas e altras habiemos d'ir rezagando-lo e ahier a la fin quedemos pa puyar-ie. Una serie de circumstancias fayoren que prencipianos a puyar tarde e se nos fayoren las tantas, pero a la fin podié borrar-lo d'es "debes". Con el mal que me feban las garras ahier de tardes dubdo que i torne, a'l menos d'hibierno, per una temporata he he.
Setz buens con la calidat de las fotos, perque cambié grip e tripode per picoleta e grampons, perque l'obchectivo yera la montanya e no pas las fotos :-)

Esta foto me la fayó santialpino, a qui conoixebe per lo suyo blog (he visto mutas vegatas las suyas rutas en wikiloc) e per fin nos conoixiemos en la montanya:

 E aquí tenetz qualques fotos d'el día, tos recuerdo que hetz d'estar conscients de que la fin d'el día yera la montanya e no pas las fotos :-)
Enta'l sur:

 Enta'l norte, a's pietz la Coma de Sant Adrián, per an baixemos:

Enta las Vilas:

 E cara ta'l mío país, con Sierra Ferrera, Penya Montanyesa e Penya Solano:

 

E la boira que i heba per la tierra baixa:

Aquí tos deixo el track, no ye el primer d'el Turbón, pero ye el mío :-D

Zapo (Bufo bufo)

Ahier llevé a un amigo a que conoixés una zona bien bonica e que er, encara que lleva 30 anyos venindo per aquí, encara no conoixeba. Pa una vegata que no piso nieu, que no amenisto molatieras ni raquetas, nos estió plevendo tot el maitín e torné ta casa chupito como una chopa. Ya sabetz mutos de vusaltros la comodidat que significa fer fotos baixo la plevia: se banyan las lents frontals de l'obchectivo, s'empanyan las gafas (es que en llevetz), cal ixecar l'equipo, cal fer fotos con el batiauguas... en resumen: una mierda. Per ixo pocas vegatas he feto fotos a gusto baixo l'augua, quasi m'estimo més de no fer-ne garra, pero ya que ibi'ere... pos aquí las tenetz:

Pero la foto con la que torné més contento fue quan tornanos, ya cerqueta de l'auto, quan nos trobemos a este zapo que salió a pasiar aprofitando la humedat e, sobre tot, la buena temperatura que feba. Yo, que ya ibe farto d'augua e bardo, no tenié garra inconvenient en chitar-me largo en tierra pa poder fer-le bel·la foto:

Primer amaneixer

A la fin salié a fer el priemr amaneixer, pero ta un puesto t'an que no caleba caminar tanto. E ixo que estié a punto de dar-me la vuelta enta casa, perque yera muit nuble. Pero ya que hebe salito pensé que qué menos que puyar dica Pineta, e a veyer cómo evoluvionaba. Quan arribé en l'aparcamiento, prencipié a tener esperanzas, perque la boira s'iba ubrindo per es picos Garién e Felqueral, que yeran es que querebe fotografiar dende el puent d'Esquinarasnos. La cosa prometeba, pero en l'inte de salir el sol, una boira bien negra se clavó en l'este e me deixó con la miel en es labios. Con tot e con ixo, bel·la rayateta de sol s'iba ubrindo paso:

E aquí enta abaixo. No i heba forma de privar que se me cremás el ciel se querebe que se veyés la valle de Pineta :-(

Zaguer amaneixer

Hue querebe despedir estianyo 2013 d'una manera especial, e qué millor forma que veyendo amaneixer sobre Treserols dende una atalaya tant buena como la Punta Estiveta (2282 metros). Ixo sí, m'ha costato una buena puyata de nuet, pero estoi que ha mereixito la pena, perque he presenciato un d'es amaneixer més guapos que he visto sobre Treserols, e ya en llevo uns quantos. Ha durato poco, pero ye estato intenso.
Aquí enta l'este, tanta boira m'ha feto pensar qu eno podrí veyer l'amaneixer que buscabe, pero afortunatament m'ha deixato 5 minutos:

 E aquí las priemras luces sobre Treserols:

A veyer quán me vaga de amanar una panoramica dende Rubinyera dica la Collata Anyisclo.
Que rematetz bien l'anyo e tos deseyo (encara que dubdo de la suya utilidat) un buen 2014. Salut.

Quan no i hai altra cosa

La verdat ye que ye una suerte tener Pineta a'l canto de casa. Muta chent no m'entiende, pero dimpués d'haber -ie treballato 6 anyos, m'estimo més d'ir t'altros puestos, encara que Pineta siempre me fará muto goyo. Peor el cierto ye que me'l deixo siempre pa quan se me tuercen es plans que tenebe u no me vaga d'ir guaire leixos.
Per exemplo hue m'he despierto a las 5:30 (sin rebel ni cosa, soi asinas) e he pensato que yera una hora estupenda pa ir enta Anyisclo, e arribar en el mío cado con las primeras luces, perque tiengo ganas de fer-lo con nieu. Pero m'he mirato per la finestra e yera plevendo a tot plever, e la cota hue la daban alta. Asinas que m'he quedato en casa. Como no m'he puesto tornar a dormir, a las 8 ya yere farto, e aprestato tot, m'he preso un café e soi marchato enta Pineta a veyer qué me trobabe. E esto ye el que m'he trobato. Ye el mismo de quasi siempre, pero a'l menos he salito.
Qué incomodo ye de fer fotos con raquetas, batiaguas e plevendo.

Ordesa

Como el sabado no tenié prou con el sobo e con el frío que pasé en l'Ibón de Pla, el domingo me'n fue ito ta Ordesa. M'ha recibito con -6º e el camín yera una pista de chel, pero dimpués de quantas salitas sin tornar ta casa a gusto con las fotos, hue puedo decir que soi tornato contento.
Pero como esta entrata ye programata, se me ye fendo tarde e maitín he de conducir, puyo las fotos e prou. Salut.

Ibón de Plan. Feliz Saturnalia, solsticio d'hibierno, Navidat... el que queriatz

Pos ixo, que yo soi ateu sin remisión, e se he de celebrar qualquecosa (amés de las vacacions) m'estimo més de remitir-me a's orichens paganos de la crsitiana navidat, pero allá cadaqual con las suyas creyencias. Pero como pareix que estes días cal felicitar-se, pos yo no soi menos :-)
A'l que imos. Que ahier me'n puyé ta la Basa la Mora, u Ibón de Plan, l'ibón que pareix sacato de las Rocosas canadienses. I puyé de maitins, per lo camín (perque ni tiengo 4x4 ni diners pa comprar-ne un), quan pior luz i hai en ixe puesto. Ya sé prou que las millors luces se i troban de tardes, pero tot no se puede en esta vida. Asinas que como la luz yera malisma e las fotos van per lo mismo camín, he prebato de chirar-ne qualcunas d'eras ta blanco e negro, a veyer se sotz tant amables de dar-me la vuestra opinión sobre quál ye millor:

 D'esta zaguera el procesato me'l ha feto un buen amigo:

 E estas altras no he feto soque versión en color. El barranco l'ibón, como pa i foter-se un banyo:

E hue soi marchato ta Ordesa, pero per no saturar, deixo las fotos de hue pa unaltro día. Salut.