Tringonier, bienvenita a l'hibierno 2013-2014

Dimpués d'un agüerro tardán e falto de saturación, e con un cabo de semana entre medio sin poder salir ta'l mont, ahier yera el día pa fer fotos de nieu e chel. La ideya inicial yera ir enta la France, pero aquí ya yera nevando e las cadenas yeran obligatorias ta pasar el frato. Yo llevo ruedas de nieu, pero tampoco no ibe a ficar-me en un chardín de lindas flors per fer un tipo de fotos que podebe fer aquí sin guaire esfuerzo (ixo me pensabe yo). Asinas que deixé l'auto en l'aduana e pillé el camín cara Tringonier. En primeras no i heba guaire nieu, pero dimpués l'espesor fue puyando e puyando e en es ventisquers m'arribaba dica es collons per dencima de la cintura. Amés, yera nieu fina, asinas que se m'hes llevato las raquetas l'unico qu ehabrían feto hes estato estorbo. Bien se vale que yera nieu ixuta, se no  m'habrí banyato como una chopa.
A lo que ibe, que yera tot muit bonito, pero quan arribé ta'l puent d'el barranco d'el Marcatiecho, decidié de dar-me la vuelta, e no arribé nian ta la Plana el Cabo, perque yere remallato e llevabe l'aductor izquierdo decindo-me qu eparás cuenta.
Pos ixo, que cansa muto fer tranya en la nieu. Aquí tenetz quantas fotos.

Fornos, despedida de l'agüerro 2013

Feba días que querebe ir a veyer Fornos d'agüerro. Quasi i fue el domingo pasato, pero a la fin me decanté per Pineta (e bien se me'n valió, perque se no i hes ito no habrí puesto fer la foto de l'Arco Sant Chuan). E hue, per mirar a veyer se encara i heba bel·la miqueta d'agüerro. E la verdat ye que i heba zonas an que yera con tot el suyo esplendor. Per lo camín, que ye pinar, m'iban alegrando la vista es acirons, d'es que n'i hai de quantas razas e colors.

Pero quan ya te vas metendo més enta Fornos, las frondosas van ganando terreno: urmos, abellaneras e, sobre tot, faus teneban encara una color muit buena. No soi guaire contento con las fotos que he feto hue pero tampoco no me va a salir un fotón cada cabo de semana :-)
Antes de cruzar el río soi ito a veyer las Fuents dende l'altra man d'el río. Aquí caldría un mirador, perque la verdat ye que mereix la pena. Una pena que no tiengo tele, perque se i puede fer mutas abstraccions; pero qualque cosa he feto con el 100 macro:

Ya indo enta Fornos, soi baixato a tafaniar per lo río:

Aquí en las Fuents:

E per aquí gosa baixar augua quan en sale per O Chorro Fornos. Hue no'n i heba, pero el fau yera con una color chulisma, e la molsa d'ixas rocas yera d'un verde radioactivo:

E esto ye tot per estianyo, que ye estato un agüerro rarismo per las altas temperaturas e, en cheneral, ha faltato colors. Pero buscando per es míos cados n'he trobato, encara que no yera tant najo como es anyos anteriors. E tamién he puesto conseguir bel·la foto buena.

El puent

Encara que no ye estato un agüerro como es dos zaguers, con unas colors estupendas, augua, boiras, nieu e chel (contina fendo calor) encara s'ha puesto fer qualquecosa. Estes dos zaguers cabos de semana he aprofitato totz es días pa salir, encara que solo fues de maitins, que ye millor que cosa. Amés, m'ha permitito retrobar-me con companyers d'afición e conoixer-ne nuevos. Bell atro no ha puesto venir, e ixo que teneba mutas ganas, unaltro anyo será.
Hue tos deixo con las fotos que he puesto fer esto maitín en el río Lalarri, chugando con l'agua e las colors de l'agüerro.

Aquí un d'es Churros de Lalarri que no se pueden veyer bien se vas per lo camín (se puede veyer un mirador):

Pero la foto d'el día ye esta. Soi puyato buscando ixas luces, pero no esperabe l'arco de Sant Chuan. Soi estato a punto de quedar-me dormindo un ratet més, bien se vale que no el he feto. Como apreciaretz, esta ye millor editata, e ye que quan tiengo bel·la foto buena le'n ninvío a un amigo pa que me la deixe como cal.

Riera de Passavets

Evidentment, ye una broma. Pero hue le decibe a l'amigo que m'ha acompanyato que, se le preguntaban aón heba feto ixas fotos, decís que yeran fetas astí.
No hemos visto a dengún en tot el maitín, una gozada de puesto t'an tornar con més tiempo e un vadeador.

No son unas fotos pa tirar codetes, pero ixe peusto bien mereix una visiteta de cabo ta quan.

Buen cabo de semana

En l'aspecto fotografico ye estato este un buen cabo de semana. Dos días salindo a fer fotos e tornando ta casa con la tarcheta plena de píxels d'agüerro.
Ahier de maitins me'n fue ta Pineta, mirando de trobar nuevos enquadres de l'archiconoixito barranco de Lalarri. Una pena que baixaba muta augua, pero i tornaré. El día salió nuble, pero s'iba despasando enta part de l'este e i habió un ratet (uns 5 minutos, u una miqueta menos) que salió el sol, las boiras fayoren de reflector e se metió una luz roya que feba goyo de veyer-la.
En esta foto se puede veyer ixa luz roya:

 

Aquí el famoso trallo,  dende unaltra perspectiva:

 

La Engrota, preciosa:

E esto maitín soi marchato enta Buixaruelo, e encara que no son las colors tant saturatas como estes dos anyos ta zaga, nunca no defrauda.

El barranco d'Os Gabietos:

Pa que dimpués charren de l'Urederra:

E el puesto que més goyo me fa de Buixaruelo (a falta de conoixer la parte alta):

E en Pineta tamién ye agüerro

Encara no ye a tope, pero en una semana cal veyer el cambio que ha fotito. Aprofitando que hue entrabe tarde a troballar e yera nuble, no m'he puesto resistir e soi puyato a veyer cómo iba l'agüerro per es churros de Lalarri, pero como siempre a las quatre suelas. Una pena.
En fin, aora  a esperar el cabo de semana, que pinta bien perque dan augua tota esta semana.
El d'alto, que tiene tota la chent que ha pasato per ixe puent:

 

 Una miqueta més t'abaixo:

 M'encanta ixe puesto:

 Ya abaixo, enta la valle:

 E una fatera, una extracción de la segunda foto:

Me fan més goyo las de l'altro día d'Anyisclo, pero entre semana el tiengo bien complicato :-(

Que sí, que sí, que ya ye aquí

Per cada anyo viene més tarde (per mutos puestos encara ye asomando la pateta), pero esta semana, veyendo que es fabolars de la Penya Montanyesa ya iban pillando color, pensé en acudir t'Anyisclo, que se fa u no fa ye a la misma altitut, e tenedo en cuenta la inversión termica talment tenés suerte. Asinas que, como siempre, aprofitando que me despierto antes de que metan las carreras, a las 6 d'el maitín ya yere en l'aparcamiento de Sant Úrbez. Quan arribé t'aquí encara no se i veyeba e no sabebe de qué color serían es faus. Mientres s'iba fendo la luz, la mía cara se plenaba d'una sonrisa de fato, perque ya hebe trobato l'agüerro. la pena ye que, como siempre, tenebe prisa per tornar ta casa e no podié cremar las tarchetas como habrí quiesto.
Sé que no deberí meter tantas fotos, pero como ye la primer sesión, no me puedo resistir.