Man Pacina de Pineta

Estié treballando quantos anyos de celador en el Parque, en el sector Pineta, he feto muta montanya per la valle Bielsa e i conoixco mutos cados bien bonicos. Pero encara tenebe una qüestión pendient per descubrir e a la que le tenebe mutas ganas: recorrer la Man Pacina de Pineta per alto.
Per fin, a cabo de chuliol e gracias e a la companyía e guía d'un amigo que la conoixeba, podié deixar de tener-la en oendients.
Se veyen unas envistas de Pineta espectaculars, per poco vistas, pero el que més goyo me fayó fue la sensación de pasar per un territorio poco humanizato, pos dende que no se i lleva bestiar, bien poca chent pasa per astí. Asinas ye, sin camins, salvache... Una experiencia pa totz es que nos fa goyo la montanya.
No m'ha vagato de revelar, perque l'ordenador me va fatal, pero cuento que estas  son las millors d'ixe día.

Ibón d'Acherito

Este verano el prencipié fendo una salida d'una nuet difuera d'el mío país, Sobrarbe. Marché enta l'ibón d'Acherito, en la val d'Echo, an que i yere estato feba trenta anyos u més. Tenebe ganas de salir t'altros horizonts e feba días que querebe ir-ie. Asinas que i fue a fer nuet e mirar a veyer se tenebe suerte con las luces. Yo estoi que no'n tenié guaire, pero vusaltros chuzgaretz :-)

Cruz de Guardia

Ya perdonaretz el retraso, pero ye que he tenito problemas tecnicos con l'ordenador (e encara en tiengo) e m'he fotito un mes sin er e sin poder editar fotos e sin poder fer cosa.

Asinas que a veyer se recupero tot el tiempo perdito e voi editando las fotos d'este verano.

Las d ehue son de cabo chuliol, dimpués d'una tarde de tronatas, quan puyé con un amigo ta la Cruz de Guardia a veyer se i heba suerte con las luces e pro que en teniemos. Aquí tos ne deixo una muestra.

Marmorés

Per no aburrir més con la Parnassius apollo (encara me queda fotos), m'actualizo e voi pinchando cosetas més recients, encara que se queden las fotos de Tormosa en l'archivo, como la que fayé fa una semana quan puyié a dormir ta Marmorés e me dediqué a fer fotos nocturnas e no pas a dormir. A l'altro día me'n puyié ta's dos Astazus, pa ir metendo desnivel a las garras e que se vayan templando una miqueta. Encara mantiengo una miqueta la forma: dos horas e media de puyata dica el Volant de Marmorés (Balcón de Pineta) con el mochilón.
Las nocturnas con l'Ibón:

 Las primeras luces:

 E dende la punta de l'Astazu gran:

Parnassius e tardada

I hai días en que te vaga a fer de tot. De maitins marché a fer fotos a la apolo e altros bichos e de tardes me llevé a's fillos a dormir ta la montanya (encara que per qüestions atmosfericas habiemos a baixar ta casa antes d'el previsto) e podié fer fotos con buenas luces en un puesto que pa yo ye especial.

Tardadas

Tiengo localizato un puesto dende an se veye la valle dende l'este enta l'oeste. I soi ito quantas vegatas perque tiengo la foto en la capeza, pero aora cal que se den las condicions ideals pa conseguir ixa foto. Ixas condicions no las he vistas soque dos vegatas en 15 anyos, pero bell día las tornaré a tener.
De momento, me quedo con las prebatinas.

Rubinyera

Clasico pa prencipiar la temporata veraniega de tozals que pasan d'es 3000 metros (sin que ixo signifique que no faya altras montanyas u rutas, que pasar d'es 3000 metros tiene una importancia muit relativa).
Tocaba despertar-se bien luego pa veyer se pillabe buenas luces en es Ibons u Gorgos de Lalarri. Ixo significa fer la primer parte de la puyata de nuet, pero conoixendo el camín no i hai mica problema, e que se quedaba nieu iba a estar més dura que una penna, pero llevando es fierros tampoco no supone garra problema, encara que ye un incordio meter-te-los e sacar-te-los tres vegatas pa cruzar uns pocos metros. Ixo rai, el que importa ye disfrutar d'el que fas, encara que no i haiga luces.
El ciel raso como el uello d'un paixarico e l'ibón sin guaire augua:

 La verticalidat de Pineta: dende es 1300 msnm d'el Churro d'el Cinca dica es 3355 msnm de la Punta Treserols:

 Una envista més ampla dende la punta Rubinyera: