Marmorés

El sabado fayé una d'ixas fateras mías e puyé a fer l'amaneixer ta l'Ibón de Marmorés. Sabebe que encara quedaba pro chel (ye quasi tot chelato encara, l'anyo pasato pa estas alturas ya no'n quedaba mica), e la cosa yera pillar un buen primer plan, a veyer se i heba refleixos.
El primer plan yera sencillet de trobar-lo, es refleixos pior perque i heba chel. E el fondo... el fondo ye espectacular, con Treserols debant, pero el ciel no querió acompanyar e yera raso como el uello d'un paixarico, quedando-se bien hauto. E tampoco no fueren las millors luces de l'amaneixer que yo he visto aquí. En fin, caldrá tornar-ie per millor material, pero ya que i fue...
Antes de que arribás el sol:

 Es primers rayos tocan las puntas:

 Unaltro primer plan:

 E l'unico reflexo que se veyeba:

Ya que ib'yere, dimpués me'n puyé ta's Astazus, pero ixo pa unaltra entrata.

Una nuet per Tella

Picato per las fotos de la Carrera de Sant Chaime que se veyen per internet, vencié la mandria e saliré ta Tella a fer bel·la foto nocturna en la ermita de Sant Chuan y Pablo. No ye la foto que tiengo pensata (las condicions que quiero han de dar-se d'hibierno, e ye difícil), ni muto menos. Pero la proxima luna nueva i tornaré, perque quan i fue la luna ya yera a medias e no se veyeba bien la Carrera de Sant Chaime.
Con tot e con ixo, ya que i fue...

Tardadas per Tella II

Se m'heba olvidato la que més goyo me fa de totas :-)

Es Gorgos de Lalarri

U Ibons de L'Almunia, u es Gorgos d'el Tromacal... Diferents nombres pa uns ibons que se troban a's pietz de Robinyera, an que naix el río Lalarri, e que son d'una belleza exquisita. E més se encara son chelatos como yeran l'altro día. En fin, que talment i torne perque me quedé con ganas de més, antes que se desfaya el chel de tot.
El primer día que es visité de tardes, quan ya i veyé las posibilidatz:

Y l'amaneixer a's pocos días:

 E dimpués de fer l'amaneixer, cara Robinyera, el primer 3000 d'el verano:

Tardadas per Tella

Esta semana pasata, mirando zagueras luces dende las ermitas de Tella.

Lilium

Llevo una miqueta de retraso. Entre que el facebook fa que tienga le blog una miqueta abandonato e que soi estato sin acceso a l'ordenador con el que proceso las fotos, fa que se vayan chuntando las fotos en el disco dur (que, per cierto, precisa una limpieza estival important pa sacar-ne broza).
Pos ixo, uns liliums de diferents días.

Lavasar II

Diz que qui la sigue, la consigue.
Bueno, pos habrá a asperar un anyo, perque estianyo no he conseguito el que querebe. Uns días dimpués, torné enta l'Ibonet de Lavasar, pero ixas boiras prometederas que i heba de mediodías se desfayoren vente menutos antes de las luces buenas. Asinas que tocó de mirar una alternativa a's plans previstos (u, millor dito, sonyatos) e cambiar l'enquadre que llevabe en la capeza.
Baixando enta l'enquadre previsto, mientres veyebe cómo se desfeban ixas boiras:

 Per cada ratet que pasaba s'iba despasando més e més:

Asinas que marché enta l'altra man e chugué con es refleixos de la Penya la Una (u Puntons Royos) en l'ibón con el chel que i  quedaba:

 E el ciel ya raso de tot:

 Encara me vagó, antes de baixar a las quatre suelas per la nieu, de rodiar las Agullas de Lavasar pa veyer cómo se poneba el sol per occident. Sé d'un que ixe mesmo día yera per una tuca en el Pirienu occidental e que tenió més suerte que no yo con las zagueras luces; verdat, Ánchel? ;-)