Luces de tardes

Ahier de tardes podié fer una escapateta e, como me deixaban un 4x4, decidié d'ir ta la Cruz de Guardia, t'an que feba anyos que no i hebe puyato (en coche, a pata l'anyo pasato). Como i heba habito tronatas e en daban més, i puyé per veyer se tenebe suerte con las luces royas que se meten en Pineta quan truena. Pero no las trobé, perque ya no tornó a tronar e salió el puerto. Asinas que aprofitando que llevabe tele fayé esta foto sobre quantas montanyas de la Valle Bielsa: Cuezo, Comodoto, Punta la Estiveta, Garién, Felqueral, Astazus e el Puerto la Lera:

E dimpués fue a veyer se i heba buen atardeixer sobre Lardana, pero las boiras no me'l querioren ensenyar. Con tot e con ixo, sobre el macizo de Cotiella sí que i habió unas lucetas decents, encara que tampoco no yeran pa tirar codetes:

Que pasetz buenas fiestas de Bielsa.

Glarimas de Sant Lorient

Como totz es anyos, miro de salir a veyer las Glarimas de Sant Lorient u Perseidas. Estianyo decidié que irí a veyer-las ta Vallivió, un puesto més que conoixito pero que tiene posibilidatz. Mientres me mirabe enta el cielpa veyer las estrelas e pensabe (no i hai cosa millor que estar solo, en bell medio d'el mont e en silencio pa ixo), deixé la camara fendo una circumpolar (no pas completa, tenebe suenyo).

 E aquí una de 25 segundos con la Carrera Sant Chaime:

Ahier torné con companyía infantil, pero yera nuble e no se'n veyeba garra.

El Perdido (Treserols)

Per fin, el lunes, dispongo d'un día pa poder ir ta la montanya sin prisa, sin mirar d'estar en casa a la hora de comer.
Como el sabebe dende bell día antes, me meto a pensar t'án puedo pegar, e como feba días que querebe repetir el Perdido, pos t'allá que voi. L'altra vegata hebe puyato per la Collata Anyisclo e la Punta las Solas, esta vegata querebe cambiar una miqueta e decidié (perque ibe yo solo, no trobé acompanyants) de puyar per la Feixa Tormosa, pasando per la Terraza Bellavista (qué nombres les meten, mama mía) e la collata que i hai entre el Soum de Ramond e el Perdido. Ye un camín largo, dur, an que cal trepar en bell tramo, encara queda nieu en la zaguera rampa, no i hai camín a ratos, cal saber orientar-se bien,puyas més de 2400 metros positivos, etc. Bai, que ye muto més fácil de puyar per Góriz, pero manimenos per allá no cuento que tiengas ixa sensación de puyar per puestos salvaches, sin veyer quasi a dengún, con unas envistas enta Pineta impresionants.
Pero bueno, la cima la puerta d'el Corte Inglés, e la baixata per la Escupidera una romería. Per ixo m'estimo més d'ir ta altras montanyas an que no i hai tanta chent, encara que estas emblematicas calga visitar-las de cabo ta quan.
Como ibe a fer montanya, las fotos son de recuerdo, no esperetz veyer calidat, yo no sé se yera la falta d'oxicheno u la cansera, pero no yere pa componer :-)
Las fotos d'el día.
Vista enta Marmorés tot puyando:

 Enta Pineta dende la cima:

 Enta l'Ibón de Marmorés antes de la Escupidera:

Un manguant que yera per astí_

 Enta Lalarri, Robinyera, L'Almunia, La Estiva, etc.:

 El glaciar:

 L'augua baixaba a chorro, se desfá e la chent charrando de la Pantoja u de Paquirri:

 Un ibonet verde antes d'el Balcón, chugando con el reflexo d'el glaciar:

E la vista enta Pineta dende el balcón, sin uembras perque el sol alto:

Dende el Balcón ya baixé a tota vitesa.
E el track:
 

La fe

En qüestions relichiosas soi ateu, pero per lo que fa a temas fotograficos, quan vas mirando las primeras u las zagueras luces, mutas vegatas se tracta de tener fe. Sales de casa con grans expectativas e tornas sin cosa (como m'ha pasato esto maitín), u sales a veyer qué te trobas, sin guaires esperanzas, e a la fin tiens recompensa.
Se fa u no fa ye el que nos pasé ahier. Llevanos uns días charrando de quedar el sabado de tardes pa ir a fer fotos (no soi yo l'unico barrenato que va per ixas montanyas con camara e tripode a horas intempestivas), mirando previsions e a la fin decidiemos deixar-lo estar perque la previsión yera que plevería tamién tota la tarde e tota la nuet d'el sabado a'l domingo, asinas que las nuestra esperanzas d'un atardeixer buen se desfeban.
Pero a la fin. el sabado a las 5 de la tarde, es telefonos prencipian a sacar fumo de gritatas e whatsapps: qué femos?, miramos de salir?, t'án imos? A la fin i fuemos 3/4 d'es previstos (la un que faltaba heba a venir de leixos) e teniemos una miqueta de suerte. Pero ixo sí, nos costó lo nuestro: boiras que iban e veniban sin deixar-nos veyer cosa, plevia, piedra e, quasi a la fin, bel·la rayateta de sol que iluminó las boiras.
Pos ixo, qüestión de fe, cal ir-ie e, bel·la vegata, la fe fa que no se muevan las montanyas, pero sí las boiras (u talment fues l'aire de puerto).
Asinas nos recibió:

 De cabo quan le daba per mallar de firme:

 Pero a la fin la espera tenió la suya recompensa:

 Las boiras iban e veniban, ofreixendo diferents luces:

E esto meitín soi puyato ta Pineta a veyer se i heba suerte con las priemras luces, pero no pas siempre se'n tiene, de suerte (se no esto sería muit fácil e perdería la emoción).

Una tarde per Chistau

De la forma més fata, quedas con un amigo a dar una vuelta,pillas un camín poco tramenato, arribas en un barranco, paras a fer bel·la foto e ixulufrando, ixulufrando, trobas cascadas preciosas e te fotes tota la tarde en un tramo de 50 metros pasando-te-lo como un chabalín en un chanfurical...
E aquí las fotos. Ya sabetz que se pretatz F11 se veyen més grans e con més resolución

La Mota

Unaltra tarde libre, t'an pego? Pues no guaire leixos, perque prencipairé a caminar a las cinco e pico de la tarde... Au, pues ta la Mota dende Barrosa, curto pero intenso, e amés con buenas vistas.
En ixo se resume esta escapata, no ibe mirando atardeixers (cal baixar con luz perque el terreno no ye el millor) ni cosa, menos fer montanya e meter-me un sobet pa brendar. D'aora dica l'agüerro pocos obchectivos fotograficos tiengo (son més montanyers), salvo mostrar la belelza d'estas montanyas a veyer se bel·laún s'anima a venir.
De tardes amenzaba tronata, pero a la fin cosa. Pico Felqueral e Astazu tapato per la boira:

 Enta Fuesa:

Enta Robinyera e L'Almunia yera tapato. Ixas montanyas claras d'el fundo son las que zarran el circo de Barroude (excursión muit recomendable):

 Enta Cotiella e la Man Pacina, se veye Bielsa astí abaixo:

E aquí el track, pa que no tos caceguetz se nunca iy'itz:

Per Chisagüés

Ahier me desperté tarde p air a fer montanya (las 7 d'el maitín), asinas que decidié de salir a fer fotos per aquí cerqueta. Ya noqueda guaire flora, a'l menos de la que m'interesa a yo, e como feba días que no ibe a veyer las Parnassius apollo, salié cara Chisagüés. En es cados an que per un regular goso trobar-ne no n'i heba garra. Total que camín-camín m'entretenié fendo fotos per las barranqueras, qe baixaban plenas d'augua de tanto como heba plevito es dos días anteriors, que buena falta feba.
Chisagüés de buen maitín, con las boiras:

 Las barranqueras, con ixa color tipica de las rocas de Ruego (< RUBEUM `royo´)

 I hai fotos que antes de fer-las las veyes ya en Blanco e Negro:

 E tot tornando, per fin en trobé una:

 E ya unaltra vegata en Chisagüés, una bonita postal con es tellaus de loseta roya e Fulsa a'l fundo, con las boiras:

 Fulsa:

E ixo ye tot per aora...